28
1 Reebeeka yɔɔdɩ ḿbʋ lɛ, Izaakɩ yaa Yaakɔɔbʋ nɛ ɛlabɩ-ɩ welewele nɛ ɛka ɛ-ñʋʋ taa se, ɛ́taakpaɣ halʋ Kanaanɩ ɛjaɖɛ taa peeye. 2 Eheyi-i se, ɛ́kʋyɩ nɛ ewolo Mezoopotamii egeetiye taa, e-ɖoo caa Betuwɛɛlɩ ɖɩɣa taa, nɛ ɛkpaɣ halʋ e-ɖoo ɖalʋ Labaanɩ pɛlaa taa nɔɔyʋ. 3 Se, Ɛsɔ Ɖoŋ Tɩŋa Tʋ ɛ́wazɩ ɛ-yɔɔ nɛ ɛha-ɩ pɩya sakɩyɛ, nɛ ɛ́kɛ ɛyaa samaɣ cɔzɔ. 4 Se, ɛ́lɛ ɛ́wazɩ ɛ nɛ e-liɖe taa ñɩma pɔ-yɔɔ ɛzɩ ɛ́lɛ kaawazʋʋ Abɩraham yɔɔ yɔ. Se, ɛ́tɩɣyɩ ɛjaɖɛ nɖɩ Ɛsɔ kaɖʋwa se ɛhaɣ Abɩraham, nɛ ɛnʋʋ Yaakɔɔbʋ ɛkɛ caɣyʋ ɖɩ-taa yɔ. a 5 Mbʋʋ Izaakɩ yeba nɛ Yaakɔɔbʋ kʋyɩ nɛ ewolo Mezoopotamii egeetiye taa, Aram tʋ Betuwɛɛlɩ pɩyalʋ Labaanɩ cɔlɔ. Ɛ́lɛ kɛ Yaakɔɔbʋ nɛ Ezaawʋ po-ɖoo Reebeeka ɖalʋ.
6 Lɛɛlɛɛyɔ, Ezaawʋ nawa se, Izaakɩ wazɩ Yaakɔɔbʋ yɔɔ nɛ eheyi-i se, ewolo Mezoopotamii egeetiye taa nɛ ɛkpaɣ halʋ peeye. Ɛnawa ɖɔɖɔ se, Izaakɩ lakaɣ Yaakɔɔbʋ welewele lɛ, ɛka ɛ́lɛ ñʋʋ taa se, ɛtaakpaɣ Kanaanɩ ɛjaɖɛ taa peeye halʋ nɔɔyʋ. 7 Ɛnawa ɖɔɖɔ se, Yaakɔɔbʋ nɩ ɛ-caa nɛ e-ɖoo pɔ-nɔɔ taa tɔm nɛ ɛkʋyɩ ewolo Mezoopotamii egeetiye taa. 8 Peeye, Ezaawʋ na kaɣlaa se, Kanaanɩ ɛjaɖɛ taa pɛlaa tɔm taakɛdɩnɩ ɛ-caa Izaakɩ. 9 Ɖɩnɛɛ, Ezaawʋ ɖʋwa se, ɛtasɩɣ halʋ kpaɣʋ. Pʋ-yɔɔ ɛkʋyaa ewolo ɛ-ñɩnʋ Abɩraham pɩyalʋ Isimayɛɛlɩ cɔlɔ nɛ ɛkpaɣ ɛ́lɛ pɛlɛ Mahalaatɩ. Ɛ́lɛ ñɛkɛ Nebayɔɔtɩ neu.
Yaakɔɔbʋ ɖozuu tɔm
10 Yaakɔɔbʋ kʋyɩ ɛ-ñɩma cɔlɔ Bɛɛrɩseva lɛ, ɛkpaɣ nʋmɔʋ se, ewoki Haraanɩ hɔɔlʋʋ taa. 11 Ɛkɔma ɛtalɩ ɖoli nɔɔyʋ lɛ, wɩsɩ kpema, nɛ ɛsʋʋ peeye. Ɛhɩnaɣ lɛ, ɛkpaɣ pɩyɛ naɖɩyɛ peeye nɛ ɛɖʋ ɛ-ñʋʋ. 12 Ɛhɩnaa lɛ, eɖozi se, ɛna taya naayɛ, petesi-yɛ tataa nɛ akpa ayozini ɛsɔtɔnʋʋ, nɛ Ɛsɔ tiyiyaa tɩŋɩɣnɩ a-yɔɔ, pakpaɣ nɛ petiki. 13 KƖPAƔLƲ kasɩŋ ɛ-ɛsɩndaa nɛ eheyiɣ ɛnʋ se, ɛlɛɛ lɛ KƖPAƔLƲ, ɛnʋ cɔzɔ Abɩraham Ɛsɔ nɛ Izaakɩ Ɛsɔ. Se, tɛtʋ ndʋ tʋ-yɔɔ ɛnʋ hɩnaa yɔ, ɛ́lɛ haɣ-tʋ ɛnʋ nɛ e-liɖe taa ñɩma. 14 Se, ɛnʋ liɖe taa ñɩma kaɣ ɖɔʋ ɛzɩ tataa kañɩŋga yɔ. Se, pakaɣ pɛ-tɛtʋ walɩsʋʋ wɩsɩɖɩlɩyɛ nɛ sɩ-ɖɩɖʋyɛ pɔ-hɔɔlɩŋ taa, nɛ hadɛ kiŋ nɛ hayo kiŋ. Se, pɩkaɣ tɩŋɩnaʋ ɛnʋ nɛ e-liɖe taa ñɩma pɔ-yɔɔ, nɛ pawazɩ ajɛɛ kpeekpe taa ñɩma yɔɔ. 15 Se, paa leɣ ɛnʋ woki yɔ, ɛ́lɛ wɛɣ ɛnʋ cɔlɔ. Ɛ́lɛ kaɣ ɛnʋ yɔɔ huuzuu nɛ ɛpɩsɩnɩ ɛnʋʋ ɛjaɖɛ nɖɩ ɖɩ-taa ɛnʋ wɛ ḿbʋ yɔ. Se, ɛ́lɛ ɛɛlɔʋ ɛnʋ, nɛ pɩkɔɔ pɩsɩnɩ alɩwaatʋ ndʋ ɛ́lɛ labɩ mbʋ ɛ́lɛ ɖʋwa se ɛlakɩ ɛnʋ yɔ.
16 Yaakɔɔbʋ femni ɖom yɔ lɛ, ɛtɔ se, toovenim, KƖPAƔLƲ wɛ lone nɖɩ ɖɩ-taa ɛnʋ wɛ ḿbʋ yɔ, ɛlɛ, ɛnʋ taatɩlɩ. 17 Peeye sɔɔndʋ kpa-ɩ nɛ ɛtɔ se, lone ńɖɩ ɖɩ-taa wɛ sɔɔndʋ! Paa pɩɩla ɛzɩma, pɩkɛ Ɛsɔ ɖɩɣa, pɩkɛ ɛsɔdaa nɔnɔɔ kpem! 18 Kifema lɛ, ɛkʋyɩ tanaŋ tɛɛ lɔŋ cu nɛ ɛkpaɣ pɩyɛ nɖɩ ɛɛɖʋ ɛ-ñʋʋ yɔ, nɛ esiɣ-ɖɩ nɛ ɛpɩyɩ ɖɩ-ñʋʋ taa num nɛ ɖɩpɩsɩ kɔdaɣ taa pɩyɛ. 19 Ɛlɛ, ɛ́yaa lone ńɖɩ se, Beetɛɛlɩ, pʋ-tɔbʋʋ se, Ɛsɔ Ɖɩɣa. Ŋgʋ, payaɣaɣ lone ńɖɩ se Luuzi. 20 Peeye, Yaakɔɔbʋ ɖuwaa se, ye KƖPAƔLƲ ɛwɛ ɛnʋ cɔlɔ nɛ ehuuzi ɛ-yɔɔ ɛnʋ nʋmɔʋ taa, nɛ ɛha ɛnʋʋ mbʋ ɛɛtɔɔ nɛ esuu yɔ yɔ, 21 se, ye ɛnʋ ɛpɩsɩ ɛ-caa ɖɩɣa taa nɛ alaafɩya yɔ, pʋbʋ KƖPAƔLƲ kɛɣ ɛ-Ɛsɔ. 22 Ɖɔɖɔ lɛ, lone nɖɩ ɖɩ-taa ɛnʋ siɣ pɩyɛ nɛ ɖɩkɛ kɔdaɣ taa ñɩnɖɛ yɔ, ɖɩkɛɣ Ɛsɔ ɖɩɣa, nɛ mbʋ pɩ-tɩŋa payɩ ɛ́lɛ haɣ-ɩ yɔ, ɛnʋ táyɩ-pʋ tɔm hiu (10) nɛ ɛkpaɣ hɔɔlʋʋ kʋɖʋmʋʋ nɛ ɛha ɛ́lɛ.