27
Izaakɩ wazʋʋ Yaakɔɔbʋ yɔɔ yɔ
1 Izaakɩ kɔma ɛkpadayɩ lɛ, ɛ-ɛza mʋlʋm sɩ nɛ ɛtatasɩɣ naʋ. Nakʋyʋ wiye ɛ́yaa ɛ-pɩyalʋ sɔsɔ Ezaawʋ nɛ ɛ́lɛ ñocosi se, caa. 2 Ɛ́lɛ woba lɛ, Izaakɩ heyi-i se, lɛɛlɛɛyɔ ɛnʋ kpadayaa, ɛnʋ ɛɛsɩŋ ɛ-sɩm kɩyakʋ. 3 Pʋ-yɔɔ lɛ, ɛnʋ tendiɣ-i se, ɛkpaɣ ɛ-lakʋ wondu, ɛ-tɔʋ nɛ kɩ-ñɩmɛ, nɛ ewolo lakʋ nɛ ɛkʋ ɛnʋʋ nandʋ. 4 Se, ɛkɔmnɩ lakʋ lɛ, ɛtɩzɩ ɛnʋʋ tɔɔnaɣ kɩpaŋga nakɛyɛ ɛzɩ ɛnʋ liu wɛʋ yɔ, nɛ ewoni ɛnʋʋ kɛ nɛ ɛnʋ tɔɔ. Ɛnʋ tɛŋ tɔɔʋ lɛ, ɛnʋ wazɩ ɛ-yɔɔ nɛ pɩcɔ ɛnʋ sɩ.
5 Izaakɩ yɔɔdaɣnɩ ɛ-pɩyalʋ Ezaawʋ ḿbʋ lɛ, Reebeeka ñaawɛɛ nɛ ewelesiɣ. Ezaawʋ ɖɛ lakʋ taa se, ɛkʋʋ nandʋ nɛ ewona lɛ, 6 Reebeeka heyi ɛ-pɩyalʋ Yaakɔɔbʋ se, ɛnʋ nɩ ɛ-caa heyaɣ ɛ-ɖalʋ Ezaawʋ se, 7 ɛ́lɛ ewolo nɛ ɛkʋ-ɩ nandʋ nɛ ɛtɩzɩ-ɩ tɔɔnaɣ kɩpaŋga nakɛyɛ ɛzɩ e-liu wɛʋ yɔ, nɛ ewoni-i nɛ ɛtɔɔ. Ɛtɛŋ tɔɔʋ lɛ, ɛwazɩ ɛ́lɛ yɔɔ KƖPAƔLƲ ɛsɩndaa nɛ pɩcɔ ɛsɩ. 8 Pʋ-yɔɔ Reebeeka heyi ɛ-pɩyalʋ ɛnʋ se, ɛ́lɛ ewelesi nɛ ɛnɩɩ ndʋ ɛnʋ heyiɣ-i yɔ, nɛ ɛla tʋ-yɔɔ. 9 Ɛtasɩ-ɩ heyuu se, ɛnʋ tendi-i se, ewolo wondu kalakʋ taa nɛ ɛkpa pimbisi kɩbanzɩ naalɛ nɛ ewoni ɛnʋ nɛ ɛnʋ labɩnɩ ɛ-caa tɔɔnaɣ kɩpaŋga ɛzɩ ɛ́lɛ liu wɛʋ yɔ. 10 Ɛnʋ tɛŋ tɔɔnaɣ ŋ́ga ka-labʋ lɛ, ɛkpaɣ-kɛ nɛ ewoni ɛ-caa, nɛ ɛ́lɛ tɔɔ nɛ ɛwazɩ ɛ-yɔɔ, nɛ pɩcɔ nɛ ɛ́lɛ sɩ.
11 Peeye, Yaakɔɔbʋ cosi e-ɖoo Reebeeka se, ɛnawa se ɛnʋ ɖalʋ Ezaawʋ ñɔ hʋndʋ ɛ-tɩŋa yem kpimm, ŋgʋ, nabʋyʋ fɛyɩ ɛnʋ yɔɔ. 12 Pʋtɔma, ɛnʋ caa kaɣ ɛnʋ yɔɔ saɣyʋʋ nɛ ɛ́lɛ kaɣ naʋ se, ɛnʋ cɛtɩɣ-ɩ. Pʋbʋ, ɛnʋ caa ɛɛwazɩɣ ɛnʋ yɔɔ kɩwazʋ, ɛlɛ, kpalʋʋ ɛwɩlɩɣ ɛnʋ. 13 Peeye e-ɖoo ya-ɩ se, ɛ-pɩyalʋ nɛ eheyi-i se, kpalʋʋ ŋ́gʋ kɩpɩsɩ ɛnʋ yɔɔ. Se, sɔɔndʋ ɛtaakpa-ɩ, éwolo nɛ ɛ́kpa pimbisi ńzɩ nɛ ewoni ɛnʋ.
14 Peeye, Yaakɔɔbʋ woba nɛ ɛkpa pimbisi nɛ ewoni-sɩ e-ɖoo, nɛ ɛ́lɛ ñala tɔɔnaɣ ɛzɩ Izaakɩ liu wɛʋ yɔ. 15 Pʋwayɩ lɛ, Reebeeka kpaɣ ɛ-pɩyalʋ sɔsɔ Ezaawʋ tokonaa mba pakɩlɩ ɖeu nɛ paawɛ ɛ-cɔlɔ ɖɩɣa yɔ, nɛ esuu-wɛ ɛ-pɩyalʋ cikpelu Yaakɔɔbʋ. 16 Ɛkpaɣ ɖɔɖɔ pimbisi tɔna nɛ ehuuzi ɛ́lɛ nesi nɛ e-pondone pɔ-yɔɔ. E-pondone nɖɩ, ɖɩwɛ loso loso. 17 Pʋwayɩ lɛ, ɛkpaɣ tɔɔnaɣ ŋga ɛtɩzaa yɔ nɛ kpɔnɔ, nɛ ɛɖʋzɩ ɛ-pɩyalʋ Yaakɔɔbʋ nesi taa se ɛ́lɛ ewoni ɛ-caa. 18 Ewoba lɛ, ɛtɔ se, caa wɛ leɣ? Izaakɩ cosi se, ɛnʋʋ yɔ! Nɛ ɛpɔzɩ se, ɛnʋʋ ɛ-pɩyalʋ weyi? 19 Yaakɔɔbʋ cosi ɛ-caa se, ɛnʋʋ ɛ-pɩyalʋ sɔsɔ Ezaawʋ. Se, ɛnʋ labɩ mbʋ ɛ-pɔzɩ ɛnʋ yɔ. Ɛnʋ tendi-i se, ɛkʋyɩ ɛcaɣ nɛ ɛtɔɔ nandʋ ndʋ ɛnʋ kʋwa yɔ, nɛ ɛwazɩ ɛnʋ yɔɔ. 20 Ɖɩnɛɛ Izaakɩ pɔzɩ ɛ-pɩyalʋ se, ɛzɩma ɛlaba nɛ ɛtɛ kʋʋ nandʋ yem kɛlɛʋ ḿbʋ? Ɛ́lɛ ñocosi-i se, KƖPAƔLƲ Ɛsɔ weyi eluŋuu ɛ́lɛ tɛɛ yɔ, ɛ́lɛ yebina nɛ ɛnʋ hiɣ ñʋʋ leleŋ. 21 Peeye, Izaakɩ heyi Yaakɔɔbʋ se, ɛñɔtɩnɩ ɛnʋ nɛ ɛnʋ tukuni-i nɛ ɛna se, toovenim lɛ, ɛnʋʋ lɛ ɛ-pɩyalʋ Ezaawʋ yaa we? 22 Ɖɩnɛɛ, Yaakɔɔbʋ ñɔtɩnɩ ɛ-caa Izaakɩ, nɛ ɛ́lɛ tukuni-i nɛ ɛyɔɔdɩ se, nɔɔ ŋga ɛnʋ nɩɣ yɔ, kɛkɛ Yaakɔɔbʋ ñɩŋga, pɩkazɩ nɛ nesi ñɛkɛ Ezaawʋ ñɩnzɩ. 23 Ɛtapɩzɩ nɛ eɖiɣzina se Yaakɔɔbʋ, mbʋ pʋyɔɔ yɔ, e-nesi yɔɔ nɛ hʋndʋ kpimm ɛzɩ ɛ-ɖalʋ Ezaawʋ ñɩnzɩ yɔ. Ɛlɛ, pɩcɔ nɛ ɛwazɩ ɛ-yɔɔ lɛ, 24 ɛtasɩ-ɩ pɔzʋʋ se, toovenim lɛ, ɛnʋʋ lɛ ɛnʋ pɩyalʋ Ezaawʋ yaa we? Etisi se, ɛɛɛ.
25 Peeye Izaakɩ heyi ɛ-pɩyalʋ se, ɛ́ɖʋ ɛnʋ mbʋ ɛkʋwa yɔ pʋ-tɔɔnaɣ nɛ ɛnʋ tɔɔ, nɛ pɩkazɩ ɛnʋ wazɩ ɛ-yɔɔ. Ɖɩnɛɛ, Yaakɔɔbʋ ɖʋ ɛ-caa tɔɔnaɣ nɛ ɛ́lɛ tɔɔ, nɛ ɛpɩyɩ-ɩ sʋlʋm nɛ ɛ́lɛ ñɔɔ. 26 Pʋwayɩ lɛ, Izaakɩ heyi ɛ-pɩyalʋ se, ɛ́lɛ ɛñɔtɩnɩ-ɩ nɛ ekpiikini ɛnʋ. 27 Peeye, Yaakɔɔbʋ ñɔtɩnɩ-ɩ nɛ ekpiikini-i. Izaakɩ nɩɩ ɛ́lɛ tokonaa sɔŋ nɛ ɛwazɩ ɛ́lɛ yɔɔ. Ɛtɔm se, toovenim lɛ, ɛnʋ pɩyalʋ tʋmʋʋ sɔŋ wɛ ɛzɩ hayɩm mbʋ KƖPAƔLƲ wazɩ pʋ-yɔɔ yɔ, pɩ-mʋzʋŋ.
28 Ɛsɔ eyele nɛ hulumiye lɩnɩ ɛsɔdaa nɛ ɖitii!
Ɛ́ha-ɩ mʋzʋŋ tɛtʋ!
Ɛ́ha-ɩ tɔɔnaɣ nɛ sʋlʋm sakɩyɛ!
29 Ajɛɛ taa ñɩma ɛ́kɛ ɛ-tʋmlaɖaa!
Samaɣ éluŋ ɛ-tɛɛ!
Ɛ́kɛ ɛ-ñɩma ñʋʋdʋ!
Póluŋ ɛ-tɛɛ!
páwɩlɩ kpalʋʋ weyi ɛwɩlɩɣ-ɩ kpalʋʋ yɔ!
Páwazɩ weyi ɛwazɩɣ ɛ-yɔɔ yɔ, ɛ́lɛ yɔɔ!
30 Izaakɩ tɛm Yaakɔɔbʋ yɔɔ wazʋʋ lɛ, ɛ́lɛ ɖɛɛ nɛ ɛlɩɩ. Ɛtɩlɩwa ɛɖɛɛ lɛ, Ezaawʋ ñalɩnɩ ɛkpandʋ ɖeɖe nɛ ɛtalɩ. 31 Ɛ́lɛ ɖɔɖɔ ñatɩzɩ tɔɔnaɣ kɩpaŋga, nɛ ɛkpaɣ-kɛ ewoni ɛ-caa. Ewonaa lɛ, eheyi ɛ-caa se, ɛkʋyɩ nɛ ɛtɔɔ mbʋ ɛnʋ kʋwa yɔ pʋ-tɔɔnaɣ, nɛ ɛwazɩ ɛnʋ yɔɔ. 32 Ɛyɔɔdɩ ḿbʋ lɛ, ɛ-caa Izaakɩ pɔzɩ-ɩ se, ɛnʋ lɛ anɩ? Ɛ́lɛ cosi-i se, ɛnʋʋ lɛ ɛ-pɩyalʋ sɔsɔ Ezaawʋ. 33 Peeye, Izaakɩ pazɩ seluu kpakpakpa, nɛ ɛpɔzʋʋ se, anɩ lɛ weyi ɛ́lɛ wobi lakʋ nɛ ewoni ɛnʋʋ mbʋ ɛkʋwa yɔ? Se, ɛnʋ tɔɔ pɩ-tɩŋa nɛ ɛwazɩ ɛ́lɛ yɔɔ, nɛ pɩcɔ ɛnʋʋ Ezaawʋ ɛtalɩɣ. Toovenim lɛ, ɛnʋ wazɩ ɛ́lɛ yɔɔ, ɛnʋ ɛɛpɩzɩɣ nɛ ɛmʋ wazɩtʋ ńdʋ kaʋ. 34 Ezaawʋ nɩ tɔm ndʋ ɛ-caa yɔɔdaa yɔ lɛ, pɩcɛyɩ-ɩ nɛ ɛkpɛzɩ kubuka leɣleɣ se, ɛwazɩ ɛnʋ, ɛwazɩ ɖɔɖɔ ɛnʋ yɔɔ. 35 Ɛlɛ, Izaakɩ cosi-i se, e-neu woba nɛ epeɣzi ɛnʋ nɛ ɛmʋ ɛ́lɛ wazɩtʋ. 36 Ezaawʋ yɔɔdɩ se, ɛzɩ paya-ɩ se Yaakɔɔbʋ a yɔɔ emuli ɛnʋʋ tɔm naalɛ ḿbʋ? Kacalaɣ lɛ, emuli ɛnʋ nɛ ɛmʋ ɛnʋ sɔsɔtʋ nɛ lɛɛlɛɛyɔ, ɛlɛɣ ɖɔɖɔ ɛnʋ wazɩtʋ. Ezaawʋ pɔzɩ ɛ-caa se, ɛtakazɩ ɛnʋʋ wazɩtʋ natʋyʋ yaa we? 37 Peeye, Izaakɩ cosi Ezaawʋ se, ɛnʋ pɩsɩ Yaakɔɔbʋ, ɛ-ñʋʋdʋ. Se, ɛnʋ cɛlɩ-ɩ ɛ́lɛ ñɩma tɩŋa payɩ se pɛkɛ ɛ-tʋmlaɖaa. Se, ɛnʋ ha ɛlɛɛ tɔɔnaɣ nɛ sʋlʋm. Se, ɛnʋ ɛɛpɩzɩɣ ɛlabɩ-ɩ pʋyʋ. 38 Peeye, Ezaawʋ tasɩ ɛ-caa pɔzʋʋ se, ɛzɩ wazɩtʋ kʋɖʋmtʋ ńdʋ ti-ɖeke koŋ ɛ́lɛ wɛna? Eheyi ɛ́lɛ se, ɛ́wazɩ ɖɔɖɔ ɛnʋ yɔɔ. Kpaagbaa ḿbʋ lɛ, ɛpazɩ wiluu wooo. 39 Ɖɩnɛɛ ɛ-caa Izaakɩ heyi-i se,
ɛ-ɖɩcaɣyɛ kaɣ posinaʋ mʋzʋŋ tɛtʋ,
ɖɩkaɣ posinaʋ hulumiye nɖɩ ɖɩlɩnɩ ɛsɔdaa yɔ.
40 Ɛ-sɩɣa yɔɔ ɛwɛɣ wezuu,
ɛkaɣ kɛʋ e-neu tʋmlaɖʋ.
Ɛlɛ, ɛkaɣ yotuu nɛ ɛkpaɣ nɛ etiki,
éholi ɛ-tɩ,
ɛkaɣ e-neu yɔɔ kʋyʋʋ nɛ ɛlɩɩ ɛ́lɛ nesi taa.
Yaakɔɔbʋ ɖɛɣʋ e-ɖoo ɖalʋ Labaanɩ tɛ yɔ
41 Pɩlabɩ ḿbʋ lɛ, Ezaawʋ taa wɛɛ pɩwɩɣnɩ Yaakɔɔbʋ wazɩtʋ ndʋ pa-caa wazɩ ɛ́lɛ yɔɔ yɔ, tʋ-yɔɔ. Ɛɖʋ ɛ-taa se, pɩkazɩ pazɩ nɛ pa-caa sɩ. pu-wiyeɣ, ɛnʋ kʋʋ Yaakɔɔbʋ. 42 Pɔkɔma peheyi Reebeeka ɛ-pɩyalʋ sɔsɔ Ezaawʋ lɩmaɣza lɛ, etiyi nɛ payaa ɛ-pɩyalʋ cikpelu Yaakɔɔbʋ. Ɛ́lɛ woba lɛ, ɛpaɣ-ɩ se, ɛ́kpa ɛ-tɩ nɛ ɛ-ɖalʋ Ezaawʋ se, ɛ́lɛ ñɩnɩɣ se ɛkʋ-ɩ nɛ ɛkpa kɩmɩyɛ. 43 Se, lɛɛlɛɛyɔ, ɛnʋʋ ɛ-pɩyalʋ ewelesini-i camɩyɛ, se, ɛ́kʋyɩ peeye nɛ ése ewolo Haraanɩ tɛtʋ taa, ɛnʋ ɖalʋ Labaanɩ cɔlɔ. 44 Se, ɛ́caɣ ɛ́lɛ cɔlɔ nɛ pɩkɔɔ pɩsɩnɩ alɩwaatʋ ndʋ ɛ-ɖalʋ pana hɛwa yɔ. 45 Se, alɩwaatʋ ndʋ ɛ-ɖalʋ pana hɛɣ nɛ ɛ́lɛ sɔɔ mbʋ ɛlabɩ ɛ́lɛ yɔ pɩ-tɩŋa payɩ lɛ, ɛnʋ tiyi ɛ-wayɩ peeye. Ɛnʋ ɛɛcaɣ se, ɛnʋ elesi pa-naalɛ kɩyakʋ kʋɖʋmʋʋ.
46 Peeye, Reebeeka wobi ɛ-walʋ Izaakɩ cɔlɔ nɛ epeyindiɣ se, ɛnʋ wolaa, Hɛɛtɩ liɖe taa ñɩma yɔɔ lɛ, wezuu caɣʋ lɩ ɛnʋʋ sɔŋ. Se, ye Yaakɔɔbʋ ɖɔɖɔ ñakpakɩɣ Ezaawʋ halaa ɛjaɖɛ taa halʋ yɔ, ɛnʋ tɛzɩɣ sɩbʋ nɛ ɛhɛzɩ.