Ɖɩpazɩyɛ Tɔm Takayaɣ 20

Abɩraham nɛ Abimelɛɛkɩ pɔ-tɔm

¹ Pʋwayɩ lɛ, Abɩraham kʋyɩ nɛ ewolo Neegɛɛvɩ egeetiye taa, nɛ ɛcaɣ Kadɛɛsɩ tɛtʋ nɛ Suuri ñɩndʋ pɛ-hɛkʋ taa. Pʋbʋ wayɩ lɛ, ewolo ɛcaɣ Geraarɩ tɛtʋ taa. ² Abɩraham keheyi tɛtʋ ndʋ tɩ-taa ñɩma se, ɛ-halʋ Saaraa kɛ e-neu, nɛ peeye wiyaʋ Abimelɛɛkɩ tiyi se, pakpaɣ ɛ́lɛ nɛ powoni-i. ³ Ɖoó yuwa lɛ, Abimelɛɛkɩ ɖozi se, Ɛsɔ wobi ɛ-cɔlɔ nɛ eheyi-i se, halʋ weyi etiyaa se pakpaɣ nɛ powoni-i yɔ, ɛ-yɔɔ lɛ, ɛsɩkɩ, mbʋ pʋyɔɔ yɔ, ɛwɛnɩ walʋ. ⁴ Ŋgʋ, Abimelɛɛkɩ totukunidi-i. Pʋ-yɔɔ ɛmabɩ kubuka nɛ eheyi KƖPAƔLƲ se, ɛnʋ nɛ ɛ-samaɣ pɛtɛwɛɛkɩ pʋyʋ! Nɛ ɛpɔzɩ ɛ́lɛ se, paa mbʋʋ yɔ, ɛkʋʋ-wɛ yaa we? ⁵ Se, pɩtɛkɛ Abɩraham maɣmaɣ heyini ɛnʋ se, e-neu lɛ halʋ ɛnʋ yaa we? Ɛ́lɛ ñɔtɔyɔɔdɩ ɛ-maɣmaɣ se, ɛ-ɖalʋ lɛ yaa we? Se, ɛnʋ kɛwɛnɩ lɩmaɣza kɩbana, nɛ ɛtala ɛzaɣtʋ natʋyʋ. ⁶ Ɛyɔɔdɩ ḿbʋ lɛ, Ɛsɔ heyi-i se, ɛnʋ nawa se ɛwɛnɩ lɩmaɣza kɩbana. Ɛnʋ kpanɩ-ɩ se ɛtaayʋsɩnɩ ɛ-maɣmaɣ. Pʋ-yɔɔ eteyebi-i se etukuni-i. ⁷ Se, lɛɛlɛɛyɔ, ɛ́cɛlɩ halʋ ɛnʋʋ ɛ-walʋ, mbʋ pʋyɔɔ yɔ, ɛ́lɛ kɛ Ɛsɔ lɔɔyaɣ tʋ, ɛ́lɛ sɛɣ Ɛsɔ ɛ-yɔɔ nɛ piyele ɛwɛɛ wezuu. Ɛlɛ, ye ɛtɛcɛlɩ halʋ ɛnʋʋ yɔ, ɛtɩlɩ se paa pɩɩla ɛsɩna, ɛ nɛ ɛ-ñɩma tɩŋa pasɩkɩ.

⁸ Pɩlabɩ ḿbʋ lɛ, Abimelɛɛkɩ kʋyɩ tanaŋ cu, ɛyaa ɛ-tʋmlaɖaa tɩŋa nɛ ɛkɛdɩ-wɛ tɔm ndʋ tɩtɩŋa, nɛ sɔɔndʋ kpa-wɛ siŋŋ. ⁹ Pʋwayɩ lɛ, Abimelɛɛkɩ yaa Abɩraham nɛ ɛpɔzɩ-ɩ se, ɛbɛ ɛlabɩ-wɛ ḿbʋ? Ɛbɛ ɛnʋ yʋsɩnɩ-ɩ nɛ eyele se ɛ nɛ e-kewiyaɣ taa ñɩma pala kɩwɛɛkɩm sɔsɔm mbʋ? Ɛpɔzɩ-ɩ ḿbʋ lɛ, eheyi ɛ́lɛ se, ɛlaba ɛnʋʋ mbʋ pɩtamʋnɩ se ɛyʋ ɛla lɛlʋ kpem yɔ. ¹⁰ Ɛtasɩ-ɩ pɔzʋʋ se, ɛzɩ ɛbɛ tiiyeba nɛ ɛla ḿbʋ? ¹¹ Abɩraham cosi se, ɛnʋ maɣzaa se, peeye ñɩma ɛɛñaŋ Ɛsɔ paa ñɩɩ, papɩsɩɣ pakʋ-ɩ ɛ-halʋ yɔɔ. ¹² Paa mbʋʋ yɔ, toovenim taa lɛ, ɛkɛ ɛnʋ neu, ɛkɛ ɛ-caa pɛlɛ. Ɛlɛ, ɛ nɛ ɩ patakaa ɖoo. Pʋ-yɔɔ ɛpɩsaa ɛkpaɣ-ɩ nɛ ɛkɛ ɛ-halʋ.^a ¹³ Ḿbʋ yebina nɛ alɩwaatʋ ńdʋ Ɛsɔ heyi ɛnʋ se ɛ́kʋyɩ ɛ-caa ɖɩɣa taa lɛ, éheyi ɛ-halʋ se, pówobi paa le lɛ, ɛ́lɛ ɛyɔɔdɩ se, ɛnʋ kɛ ɛ-ɖalʋ nɛ pɩkɛdɩnɩ ɛnʋ. ¹⁴ Peeye Abimelɛɛkɩ kpaɣ heŋ nɛ pʋŋ nɛ naŋ nɛ tʋmlaɖaa halaa ñɩma nɛ abalaa ñɩma, nɛ ɛha Abɩraham, nɛ ɛcɛlɩ-ɩ ɛ-halʋ Saaraa, ¹⁵ nɛ Abimelɛɛkɩ heyi Abɩraham se, ɛ́na! Ɛnʋ mʋʋ-ɩ ɛ-ɛjaɖɛ taa peeye nesi naalɛ, se, ɛ́cɔna nɛ ɛ́na, ɖenɖe ɛwɛ-ɩ ɖeu lɛ, ɛcaɣ peeye. ¹⁶ Piyele eheyi Saaraa se, ɛ́na! Ɛnʋ haɣ ɛ-ɖalʋ liidiye ñɩɣtʋ kutoku: mbʋʋ lɛ yʋsaɣ ŋga kawɩlɩɣ ɛ́lɛ cɔlɔ ñɩma se, ɛ́lɛ tɛwɛɛkɩ pʋyʋ tɔm ndʋ tɩ-taa yɔ.

^17-18 Ŋgʋ, Abɩraham halʋ Saaraa yɔɔ lɛ, KƖPAƔLƲ pɩsɩ Abimelɛɛkɩ ɖɩɣa taa halaa tɩŋa payɩ kaalʋlasɩ. Peeye Abɩraham sɛ Ɛsɔ nɛ ɛ́lɛ yele nɛ Abimelɛɛkɩ nɛ ɛ-halʋ nɛ ɛ-tʋmlaɖaa halaa ñɩma pɔ-yɔɔ cɛ, nɛ papɩzɩɣ se patasɩ piya lʋlʋʋ.