Ɖɩpazɩyɛ Tɔm Takayaɣ 16

Palʋlʋʋ Isimaayɛɛlɩ yɔ

¹ Abɩram halʋ Saarayɩ taalʋlɩ-ɩ pɩɣa. Ɛlɛ, ɛɛwɛnɩ tʋmlaɖʋ halɩñɩnʋ nɔɔyʋ, ɛ́lɛ kɛ Ejipiti tʋ. Payaɣ-ɩ se, Hagaarɩ. ² Nakʋyʋ wiye lɛ, Saarayɩ heyi Abɩram se, ɛ́cɔna nɛ ɛ́na, KƖPAƔLƲ taha ɛnʋʋ piya. Pʋ-yɔɔ lɛ, éwolo nɛ ɛ nɛ ɛ-tʋmlaɖʋ ɛnʋ pacaɣ nɛ pɩtɔmaɣ yɔ, pɩ́ɩtɩŋnɩ ɛ-yɔɔ nɛ ɛnʋ hiɣ piya. Eheyi Abɩram ḿbʋ lɛ, ɛ́lɛ ñetisi ɛ-tɔm. ³ Peeye Saarayɩ kpaɣ ɛ-tʋmlaɖʋ halɩñɩnʋ Hagaarɩ ɛnʋ nɛ ɛcɛlɩ ɛ-walʋ Abɩram nɛ ɛ́lɛ kɛ ɛ-halʋ. Abɩram caɣ Kanaanɩ nɛ pɩla pɩnzɩ hiu (10) lɛ, pɩlakaɣ ḿbʋ. ⁴ Ɛ nɛ Hagaarɩ pacaɣaɣ lɛ, ɛ́lɛ ñahaɣ hoa. Ɛna ɛ-tɩ ḿbʋ lɛ, e-ɖoo tatasɩ kɛʋ pʋyʋ ɛ-ɛsɩndaa. ⁵ Ɖɩnɛɛ Saarayɩ heyi Abɩram se, patʋ ɛnʋʋ kʋtʋʋ ŋgʋ yɔ, ɛ-cɔlɔ lɛ! Se, ɛnʋ maɣmaɣ kpaɣnɩ ɛ-tʋmlaɖʋ halɩñɩnʋ nɛ ɛɖʋsɩ e-nesi taa. Ɛlɛ, ɖooo ɛzɩ ɛnaʋ ɛ-tɩ se, ɛ nɛ hoa yɔ, ɛnʋ tatasɩ kɛʋ pʋyʋ ɛ-ɛsɩndaa. Pʋ-yɔɔ lɛ, KƖPAƔLƲ ɛ́hʋʋ ɛnʋʋ Saarayɩ nɛ Abɩram pɔ-tɔm! ⁶ Abɩram heyi Saarayɩ se, ɛ-tʋmlaɖʋ lɛ Hagaarɩ, e-nesi taa ɛwɛɛ, ɛpɩzɩɣ ɛlabɩ-ɩ mbʋ e-liu wɛɛ yɔ.

Peeye Saarayɩ nazɩ Hagaarɩ siŋŋ nɛ ɛ́lɛ se nɛ ɛsʋʋ lakʋ. ⁷ Pɩkɛdaa lɛ, KƖPAƔLƲ tiyiyu nɔɔyʋ na-ɩ hiɖe ńɖɩ ɖɩwɛ Suuri habɩyɛ yɔɔ yɔ, ɖɩ-cɔlɔ. ⁸ Ɛna-ɩ lɛ, ɛyaa-ɩ se, Saarayɩ tʋmlaɖʋ Hagaarɩ, nɛ ɛpɔzɩ-ɩ se, le ɛlɩnaa? Le ewoki? Ɛ́lɛ cosi se, e-ɖoo Saarayɩ eseɣ. ⁹ Ecosi ḿbʋ lɛ, ɛ́lɛ heyi-i se, ɛ́pɩsɩ e-ɖoo cɔlɔ nɛ éluzi ɛ-tɩ ɛ́lɛ tɛɛ. ¹⁰ Se, ɛnʋ haɣ-ɩ sayɩnaa sakɩyɛ sakɩyɛ, paawɛɣ kalʋʋ. ¹¹ Se, ɛlʋlʋʋ abalɩbɩɣa nɛ ɛyaa-kɛ se, Isimaayɛɛlɩ. Mbʋ pʋyɔɔ yɔ, KƖPAƔLƲ nɩ ɛ-kʋñɔwiye. ¹² Ɛ-pɩyalʋ ɛnʋ, ɛkaɣ wɛʋ ñʋʋ taa ɖoŋ ɛzɩ kpaŋaɣ yɔ. Ɛkaɣ kʋyʋʋ ɛyaa tɩŋa yɔɔ, nɛ ɛyaa tɩŋa ñakʋyɩ ɛ-yɔɔ. Pɩkaɣ-ɩ wɛʋ kaɖɛ se, ɛñɔtɩnɩ lalaa.

¹³ Peeye Hagaarɩ pɔzɩ ɛ-tɩ se, Ɛsɔ weyi ɛnaɣ ɛnʋ yɔ, ɛzɩ ɛnʋʋ ɛnʋ na camɩyɛ naa we? Pʋ-yɔɔ ɛya KƖPAƔLƲ weyi ɛyɔɔdɩnɩ-ɩ yɔ se, ɛlɛɛ lɛ, Ɛɛlɩ Rooyi. Pʋ-tɔbʋʋ se, Ɛsɔ weyi ɛnaɣ ɛnʋ yɔ. ¹⁴ Pʋ-yɔɔ paya lɔkɔ ŋ́gʋ se, Lahayɩ Rooyi lɔkɔ. Pʋ-tɔbʋʋ se, Weyi ɛwɛ wezuu nɛ ɛnaɣ ɛnʋ yɔ, ɛ-lɔkɔ. Kɩwɛ Kadɛɛsɩ nɛ Beerɛɛdɩ pɛ-tɛtʋ hɛkʋ taa. ¹⁵ Pɩkɔma lɛ, Hagaarɩ lʋlɩ Abɩram abalɩbɩɣa, nɛ ɛ́lɛ yaa-kɛ se, Isimaayɛɛlɩ. ¹⁶ Hagaarɩ lʋlɩ Abɩram Isimaayɛɛlɩ lɛ, ɛ́lɛ kɛwɛnɩ pɩnzɩ nɩɩnʋwa nɛ niidozo nɛ loɖo (86).