Ɖɩpazɩyɛ Tɔm Takayaɣ 17

Abɩram pɩsʋʋ Abɩraham yɔ

¹ Abɩram kɔma ɛwɛnɩ pɩnzɩ nɩɩnʋwa nɛ nɩɩnaza nɛ nakʋ (149) lɛ, KƖPAƔLƲ lɩɩ ɛ-yɔɔ nakʋyʋ wiye nɛ ɛkaɖɩ-ɩ se, ɛnʋʋ lɛ Ɛsɔ Ɖoŋ Tɩŋa Tʋ. Se, ɛ́caɣ wezuu ɛ-ɛsɩndaa tam, pátaana kawanaɣ nakɛyɛ ɛ-yɔɔ. ² Se, ɛ́ɖʋʋ ɛ-Nɔɔ Haʋ ɛ nɛ ɛnʋʋ Abɩram pɛ-hɛkʋ taa. Ɛ́haɣ-ɩ sayɩnaa sakɩyɛ. ³ Peeye Abɩram luŋaa nɛ ɛpa ɛ-ɛza nɛ tɛtʋ nɛ Ɛsɔ tasɩ-ɩ yɔɔdɩnaʋ. ⁴ Eheyi-i se, éwelisi nɛ ɛnɩɩ Nɔɔ Haʋ mbʋ pɩwɛ ɛ nɛ ɩ pɛ-hɛkʋ taa yɔ. Mbʋʋ lɛ se, ɛ́lɛ kaɣ kɛʋ ajɛɛ sakɩyɛ taa ñɩma cɔzɔ. ⁵ Se, pátaatasɩ-ɩ yaʋ se, Abɩram. Ɛlɛ, páyaa-ɩ se Abɩraham. ^l Mbʋ pʋyɔɔ yɔ, ɛnʋ yeki nɛ ɛ́kɛ ajɛɛ sakɩyɛ taa ñɩma cɔzɔ. ⁶ Se, ɛnʋ yeki nɛ e-liɖe taa ñɩma huúu siŋŋ, nɛ pósu ajɛɛ sakɩyɛ. Halɩ awiya wɛɣ pa-taa. ⁷ Se, éyeki nɛ ɛ-Nɔɔ Haʋ wɛɛ ɛ nɛ ɩ pɛ-hɛkʋ taa, nɛ ɛ́lɛ wayɩ lɛ, kɛwɛɛ ɛ nɛ ɛ́lɛ sayɩnaa pɛ-hɛkʋ taa, kpaɖɩŋ tɩŋa taa, pɩ́kpaɣnɩ ɛnʋʋ Abɩraham nɛ pɩɖɛɛ. Nɔɔ haʋ ḿbʋ, pɩwɛɣ tam yɔɔ: mbʋʋ ɛ́kɛɣ ɛnʋʋ Abɩram ɛ-Ɛsɔ nɛ ɛ-wayɩ lɛ, ɛ́kɛ ɛ-sayɩnaa tɩŋa Ɛsɔ. ⁸ Se, ɛ nɛ ɛ-sayɩnaa lɛ, ɛ́haɣ-wɛ ɛjaɖɛ ɛgɔm nɖɩ ɖɩ-taa ɛwɛɛ yɔ, Kanaanɩ ɛjaɖɛ tɩŋa nɛ ɖɩkɛ pa-ñɩnɖɛ tam yɔɔ, nɛ ɛnʋ ñɛkɛ pɛ-Ɛsɔ.

⁹ Ɛsɔ tɛm yɔɔdʋʋ ḿbʋ lɛ, eheyi Abɩraham se, pɩwɛɛ se, ɛ nɛ ɛ-sayɩnaa, kpaɖɩŋ tɩŋa taa, pɩ́kpaɣnɩ ɛnʋʋ Abɩraham nɛ pɩ́ɖɛɣ lɛ, pɔ́ɖɔkɩ ɛ-Nɔɔ Haʋ mbʋʋ nesi naalɛ. ¹⁰ Nɔɔ haʋ mbʋ pɩwɛ ɛ nɛ ɩ nɛ ɛ-sayɩnaa pɛ-hɛkʋ taa nɛ pɩwɛɛ se, pɔɖɔkɩ-pʋ nesi naalɛ yɔ lɛ se: pɩwɛɛ se, pɛ́pɛlɩ abalaa ḿba pɛwɛ pa-taa yɔ, patɩŋa payɩ. ¹¹ Pɛ-pɛlʋʋ ḿbʋ, pɩkɛɣnɩ Nɔɔ Haʋ mbʋ pɩwɛ ɛ nɛ wɛ pɛ-hɛkʋ taa yɔ, pɩ-yʋsaɣ. ¹² pɩ́wɛɛ se, pɛ́pɛlɩ abalɩbiya mbʋ pɛwɛ paa kpaɖʋʋ ŋgʋ kɩ-taa yɔ, sɩ-tɩŋa, kɩyakʋ lutozo (8) ñɩŋgʋ wiye. Pɩkpɛndɩnɩ yomaa mba palʋlɩ-wɛ ɛ-ɖɩɣa taa yɔ, yaa yomaa agɔma mba ɛyabɩ-wɛ nɛ liidiye yɔ. ¹³ Mbʋʋ pɩwɛɛ se, pɛpɛlɩ yom weyi palʋlɩ ɛ-ɖɩɣa taa yɔ, nɛ weyi ɛyabɩ-ɩ kɩyabʋ yɔ, nɛ ɛnʋ Nɔɔ Haʋ wɛɛ pa-taa tam. ¹⁴ Ye pɩkazɩ nɔɔyʋ nɛ pɛtɛbɛlɩ-ɩ yɔ, pɛkɛzɩɣ ɛ́lɛ nɛ hɔɔlʋʋ, ɛɛñɔtʋʋnɩ samaɣ. Mbʋ pʋyɔɔ yɔ, ɛtɔɖɔ Nɔɔ Haʋ paɣtʋ yɔɔ.

¹⁵ Pʋwayɩ lɛ, Ɛsɔ tasɩ heyuu Abɩraham se, ɛtaatasɩ ɛ-halʋ yaʋ se, Saarayɩ. Se, kpaɣnɩ alɩwaatʋ ńdʋ lɛ, payaa-ɩ se, Saaraa. ¹⁶ Se, ɛnʋ wazɩɣ ɛ́lɛ yɔɔ nɛ halɩ ɛtɩŋɩnɩ ɛ́lɛ yɔɔ nɛ ɛha Abɩraham abalɩbɩɣa. Se, ɛwazɩɣ ɛ́lɛ yɔɔ, ɛkɛɣ ajɛɛ ndɩ ndɩ taa ñɩma neze, nɛ ɛ́lʋlɩ ajɛɛ ñʋŋdɩnaa. ¹⁷ Peeye Abɩraham luŋaa nɛ ɛpa ɛ-ɛza nɛ tɛtʋ, nɛ ɛpazɩ woŋuu nɛ ɛpɔzʋʋ ɛ-tɩ se, ɛyʋ weyi ɛwɛnɩ pɩnzɩ mɩnʋʋ (100) yɔ, ɛpɩzɩɣ ɛwɛnɩ pɩɣa naa we? Yaa Saaraa nɛ ɛ́lɛ pɩnzɩ nɩɩnʋwa nɛ nɩɩnaza (90) yɔ, ɛ́lɛ ñapɩzɩɣ ɛlʋlɩ pɩɣa naa we? ¹⁸ Ɛlɛ, eheyi Ɛsɔ se, Isimaayɛɛlɩ ɛñɩtaa ɛwɛɛ wezuu nɛ ɛ́lɛ tɔm kɛdɩnɩ ɛnʋʋ Ɛsɔ yɔ, pɩɖɔ ɛnʋ! ¹⁹ Peeye Ɛsɔ heyi-i se, pɩtɛkɛ mbʋ! Ɛlɛ, ɛ-halʋ Saaraa lʋlʋʋ-ɩ abalɩbɩɣa nɛ ɛyaa-kɛ se, Izaakɩ. ^m Se, ɛnʋ yeki nɛ ɛ-Nɔɔ Haʋ wɛɛ ɛ nɛ kɛ pɛ-hɛkʋ taa, nɛ ɛ́lɛ wayɩ lɛ, Nɔɔ Haʋ ḿbʋ, pɩwɛɛ ɛ nɛ ɛ́lɛ sayɩnaa pɛ-hɛkʋ taa tam. ²⁰ Piyele Isimaayɛɛlɩ tɔm taa lɛ, se, ɛnʋ nɩ ndʋ Abɩraham yɔɔdaa yɔ. Ɛwazɩɣ ɛ́lɛ yɔɔ, eyeki nɛ ɛlʋlɩ nɛ píhuúu pɩfɛyɩ yɔɔdʋʋ. Ɛkaɣ lʋlʋʋ awiya hiu nɛ naalɛ (12), nɛ ɛnʋ yele nɛ ɛ-sayɩnaa su ɛjaɖɛ. ²¹ Ɛlɛ, ɛnʋ ɖʋʋ ɛ-Nɔɔ Haʋ ɛ nɛ Izaakɩ weyi Saaraa lʋlʋʋ-ɩ yɔ, pɛ-hɛkʋ taa. Se, Ɛlʋlʋʋ-ɩ ceewayɩ alɩwaatʋ ńdʋ tɩ-taa paawɛɛ yɔ, tɩ-taa ɖeyiɖeyi. ²² Ɛsɔ kɔma ɛtɛ Abɩraham yɔɔdɩnaʋ lɛ, eyebi-i nɛ ɛɖɛɛ.

²³ Peeye Abɩraham ya ɛ-pɩyalʋ Isimaayɛɛlɩ nɛ yomaa ḿba palʋlɩ-wɛ ɛ-ɖɩɣa taa yɔ, nɛ ḿba ɛyabɩ-wɛ kɩyabʋ yɔ, tobi taa se, abalaa ḿba pɛwɛ ɛ-ɖɩɣa taa yɔ, patɩŋa payɩ nɛ ɛpɛlɩ-wɛ kɩyakʋ ŋ́gʋ Ɛsɔ yɔɔdɩnɩ-ɩ yɔ, kɩ-maɣmaɣ ki-wiye. ²⁴ Pɛpɛlaɣaɣ Abɩraham lɛ, ɛɛwɛnɩ pɩnzɩ nɩɩnʋwa nɛ nɩɩnaza nɛ nakʋ (149). ²⁵ Pɛpɛlaɣaɣ ɛ-pɩyalʋ Isimaayɛɛlɩ lɛ, ɛ́lɛ ñaawɛnɩ pɩnzɩ hiu nɛ naadozo (13). ²⁶ Pɛpɛlɩ Abɩraham nɛ ɛ-pɩyalʋ Isimaayɛɛlɩ kɩyakʋ kʋɖʋmʋʋ, ²⁷ pa nɛ ɛ-ɖɩɣa taa yomaa tɩŋa, mba palʋlɩ-wɛ ɛ-ɖɩɣa taa yɔ, nɛ mba ɛyabɩ-wɛ kɩyabʋ yɔ.