Ɖɩpazɩyɛ Tɔm Takayaɣ 15

Ɛsɔ haʋ Abɩram nɔɔ yɔ

¹ Pʋ-wayɩ lɛ, KƖPAƔLƲ yɔɔdɩnɩ Abɩram nɛ ɖoziye taa. Eheyi-i se, sɔɔndʋ ɛtaakpa-ɩ se, ɛnʋ maɣmaɣ lɛ kpayʋʋ ŋgʋ kuhuuzuu ɛ-yɔɔ yɔ, se, ɛnʋ lakɩ-ɩ kʋjɔʋ siŋŋ. ^2-3 Abɩram yáa ɛ-KƖPAƔLƲ Ɛsɔ nɛ ɛpɔzɩ-ɩ se, ɛlakɩ-ɩ kʋjɔʋ se, pɩwazɩ-ɩ we? Se, ɛnʋ fɛyɩ pɩɣa, ɛtaha-ɩ liɖe taa tʋ nɔɔyʋ. Se, ɛnʋ tʋmlaɖʋ Daamaasɩ tʋ Eliyeezɛɛrɩ, kaɣnɩ kpaɣʋ ɛnʋ ñɩm ɛ-sɩm wayɩ. ⁴ Ɛlɛ, KƖPAƔLƲ heyi-i se, pɩtɛkɛ Eliyeezɛɛrɩ kaɣnɩ kpaɣʋ ɛ-ñɩm ɛ-sɩm wayɩ, ɛlɛ, pɩɣa ŋga ɛlʋlʋʋnɩ ɛ-maɣmaɣ ɛ-tɔbʋʋ yɔ, ŋ́ga kaɣnɩ-pʋ kpaɣʋ. ⁵ Ɛyɔɔdɩ ḿbʋ lɛ, ɛlɩzɩ Abɩram ɛ-kɩɖanɖʋʋ tɛɛ, nɛ eheyi-i se, ɛ́kpasɩ ɛ-ɛza ɛsɔdaa nɛ ɛna se, ɛpɩzɩɣ ɛkalɩ ɛsɔtɩɩnzɩ na? Mbʋʋ e-liɖe taa ñɩma kaɣ wɛʋ, paawɛɣ kalʋʋ. ⁶ Abɩram wɛnɩ lidaʋ KƖPAƔLƲ yɔɔ, pʋ-yɔɔ ɛ́lɛ kpaɣ-ɩ se ɛkɛ kʋtʋʋzʋ.

⁷ Ɛlɛ, KƖPAƔLƲ tɔ se, ɛnʋʋ lɛ weyi ɛlɩsɩ-ɩ Uuri ɛjaɖɛ taa, Kalɩdee ñɩma hɔɔlʋʋ taa, nɛ ɛha-ɩ ɛjaɖɛ ńɖɩ ɖɩ-taa ɛwɛɛ yɔ se, ɖɩ́kɛ ɛ-ñɩnɖɛ yɔ. ⁸ Abɩram yaa-ɩ se, KƖPAƔLƲ Ɛsɔ, nɛ ɛpɔzɩ-ɩ se, ɛbɛ ɛnʋ naɣna se, ɛjaɖɛ ńɖɩ ɖɩkaɣ kɛʋ ɛnʋ ñɩnɖɛ? ⁹ Peeye KƖPAƔLƲ heyi-i se, éwolo nɛ ɛñɩnɩ nɔ halɩñɩnʋ weyi ɛtalʋlɩda yɔ, nɛ pʋnʋ nɛ ɛyaʋ ḿba pɛwɛnɩ pɩnzɩ naadozo (3) naadozo yɔ, nɛ ehooye nɛ halikuku kɩfalʋ nɛ éwona. ¹⁰ Abɩram woni wondu ńdʋ lɛ, ɛfaɣ kpɩna hɛkɩŋ taa nɛ ɛsɩɩ paa hɔɔlʋʋ ŋgʋ nɛ kɩcɔŋɩnɩ lɛɛkʋ. Ɛlɛ, ɛtafaɣ sumasi taa. ¹¹ Ɛlabɩ ḿbʋ lɛ, abɛntɛnaa nabɛyɛ tii se pɔtɔkɩ, ɛlɛ, ɛɖɔɔnɩ-wɛ.

¹² Wɩsɩ kɔma sikpe lɛ, Abɩram ɖoo nɛ elimisi. Pɩkɛdaa lɛ, pɩkpɛyɩ ɛ-yɔɔ yem, nɛ sɔɔndʋ natʋyʋ kpa-ɩ. ¹³ Peeye KƖPAƔLƲ heyi-i se, ɛ́tɩlɩ se, ɛ-sayɩnaa kɔŋ caɣʋ ɛjaɖɛ ńɖɩ ɖɩtɛkɛ pa-ñɩnɖɛ yɔ ɖɩ-taa. Pakaɣ kɛʋ yomaa ɖɩ-taa nɛ panasɩ-wɛ pɩnzɩ nasɩnaza (400). ¹⁴ Ɛlɛ, ɛnʋ kɔŋ hɔm ɛjaɖɛ ńɖɩ ɖɩ-taa pɛkɛ yomaa ḿbʋ yɔ, ɖɩ-taa ñɩma nɩŋgbaŋ. Ɛtɛŋ pa-nɩŋgbaŋ hɔm lɛ, ḿba kpɛndɩnɩ ñɩm sakɩyɛ nɛ pekpe pɛ-tɛ. ¹⁵ Piyele ɛnʋʋ Abɩram lɛ, laŋhɛzɩyɛ taa ɛkaɣ wonaʋ sɔsaa mʋlʋm. Ɛkpadɩyɩɣ pɛɛyɛɛ taa nɛ pɩcɔ ɛsɩ. ¹⁶ Ɛ-sayɩnaa sayɩnaa kɔŋnɩ pɩsʋʋ ɖenɖe ɛwɛ ḿbʋ yɔ. Se, ɛnʋʋ KƖPAƔLƲ ɛɛmʋʋ ɛjaɖɛ nɖɩɩ Amoorii ñɩma nesi taa nɛ pɛtɛɖɛlɩsɩdɩ niye pa-kɩtɛkɛdɩm taa.

¹⁷ Wɩsɩ kpema ḿbʋ, nɛ piyu kpemm lɛ, momoliku nakʋyʋ, nɛ ki-miŋ nɛ kʋ-ñɔsɩ, powolo patɩŋ kpɩna wena patayɩ ḿbʋ yɔ, a-hɔɔlɩŋ hɛkʋ taa. ¹⁸ Kɩyakʋ ŋgʋʋ KƖPAƔLƲ ɖʋ Nɔɔ Haʋ ɛ nɛ Abɩram pɛ-hɛkʋ taa. Ɛtɔm se, ɛ́haɣ ɛjaɖɛ nɖɩɩ e-liɖe taa ñɩma. Ɛjaɖɛ ńɖɩ, ɖɩkpaɣnɩ Ejipiti pɔɔ nɛ piwolo pɩsɩnɩ pɔɔ sɔsɔɔ ŋga payaɣ se, Efiraatɩ yɔ. ¹⁹ Ɖɩkɛ Kenii ñɩma nɛ Keniizii ñɩma nɛ Kadimoonii ñɩma ²⁰ nɛ Hɛɛtɩ liɖe taa ñɩma nɛ Periizii ñɩma nɛ Reefaa ñɩma ²¹ nɛ Amoorii ñɩma nɛ Kanaanɩ ñɩma nɛ Girigaasi haɖaa taa ñɩma nɛ Yeebuusii ñɩma pɛ-ɛjaɖɛ.