8
1 Ɛsɔ taasɔɔ Nowee nɛ tɛyɛ kpɩna tɩŋa nɛ ɖɩɣa ñɩna tɩŋa mba pa nɛ ɩ paawɛ mɛlɛ taa yɔ pɔ-yɔɔ. Pɩkɛdaa lɛ, eyele nɛ heelim nabʋyʋ ma tɛtʋ yɔɔ nɛ lɩm pazɩ tibu. 2 Ɖɔɖɔ lɛ, eyeba nɛ tɛtɛɛ liŋgamɩŋ hila nɛ ɛsɔtɔnʋʋ paɖɩɣ nɛ tɛʋ yele nɩʋ. 3 Lɩm pazɩ tibu tataa pazɩ pazɩ. Kpaɣnɩ kigiluu tɛʋ pazʋʋ nɩʋ yɔ, pɩkɔma pɩla kɩyakɩŋ mɩnʋʋ nɛ nɩɩnʋwa lɛ, lɩm tiba. 4 Fenaɣ lʋbɛ (7) ñɩŋga taa, kɩyakʋ hiu nɛ lʋbɛ (17) ñɩŋgʋ wiye, mɛlɛ tibi kɩcaɣ pʋʋ ŋgʋ payaɣ se Araraatɩ pʋʋ yɔ, kʋ-yɔɔ. 5 Lɩm wɛɛ pitiki ḿbʋ, nɛ pɩkɔɔ pɩtalɩ fenaɣ hiu (10) ñɩŋga taa. Fenaɣ ŋ́ga ka-kajalaɣ kɩyakʋ ñɩŋgʋ wiye lɛ, pɩpazɩ losuu pʋŋ ñʋŋ taa.
6 Pɩlabɩ kɩyakɩŋ nɩɩnaza (40) lɛ, Nowee tʋlɩ mondoɖe nɖɩ ɛɛtʋlɩ mɛlɛ yɔɔ yɔ, 7 nɛ ɛlɩzɩ sumaɣ ŋga payaɣ se, kaŋgaɖɩyɛ yɔ. Ɖɩɖɩ ñalɩwa lɛ, ɖiwoki nɛ ɖɩpɩsɩɣ pɩkɔɔ pɩsɩnɩ alɩwaatʋ ndʋ lɩm sɔ tɛtʋ yɔɔ yɔ. 8 Peeye ɛlɩzɩ halikuku se, ɛna se lɩm tasɩ tibu tɛtʋ yɔɔ. 9 Ɛ́lɛ lɩwa lɛ, ɛɛnaɣ ɖenɖe ɛcaɣ yɔ, mbʋ pʋyɔɔ yɔ, lɩm kpɛndɩ pɩwɛ tɛtʋ yɔɔ ḿbʋ. Ɖɩnɛɛ, ɛpɩsaa se ɛsʋʋ mɛlɛ taa Nowee cɔlɔ, ɛ́lɛ posi e-nesi nɛ ɛkpa-ɩ nɛ ɛsʋnɩ pɩ-taa. 10 Nowee tasɩ ɖaŋʋʋ kɩyakɩŋ lʋbɛ (7) nɛ ɛtasɩ lɩzʋʋ halikuku mɛlɛ taa. 11 Pɩkɔma ɛzɩ ɖanaɣ yɔɔ lɛ, halikuku pɩsɩ ɛ-cɔlɔ. Ɛtʋnɩ ɛ-nɔɔ tɩʋ ŋgʋ payaɣ se oliiviyee yɔ, kɩ-hayʋʋ lɛŋ ñɩŋgʋ. Peeye Nowee nawa se, lɩm tasɩ tibu tɛtʋ yɔɔ. 12 Pʋwayɩ lɛ, ɛtasɩ yebu nɛ kɩyakɩŋ lʋbɛ (7) ɖɛɛ, nɛ ɛtasɩ ɖɔɖɔ lɩzʋʋ halikuku. Ɛ́lɛ lɩwa lɛ, ɛtatasɩ pɩsʋʋ nɛ ɛ-yɔɔ.
13 Pɩnaɣ ŋga Nowee kɔma ɛwɛnɩ pɩnzɩ taŋga nɛ mɩnʋʋ nɛ kʋɖʋm (601) yɔ, ka-kajalaɣ fenaɣ, kɩyakʋ kajalaɣ ñɩŋgʋ wiye, lɩm ñɔ tɛtʋ yɔɔ. Peeye Nowee kuli lɔbɩtʋ mɛlɛ yɔɔ, nɛ ɛna se tataa pazɩ wɩlʋʋ.
14 Pɩkɔma ɛzɩ fenaɣ naalɛ ñɩŋga taa kɩyakʋ nɩɩlɛ nɛ lʋbɛ (27) ñɩŋgʋ wiye lɛ, tataa tɛzɩ wɩlʋʋ.
15 Ɖɩnɛɛ Ɛsɔ heyi Nowee se, 16 ɛ nɛ ɛ-halʋ nɛ ɛ-pɩyalaa nɛ e-wolaa palɩɩ mɛlɛ taa. 17 Eheyi-i ɖɔɖɔ se, ɛ́lɩzɩ kpɩna ndɩ ndɩ wena ɛ nɛ yɛ paawɛ mɛlɛ taa yɔ nɛ alʋlɩ nɛ pihuúu nɛ pisu tɛtʋ yɔɔ. Anaɣ yɔ: sumasɩ nɛ ɖɩɣa kpɩna nɛ mbʋ pɩtɩnɛ pɩwɛ wezuu mɛlɛ taa yɔ. 18 Ɛsɔ heyi Nowee ḿbʋ lɛ, ɛ nɛ ɛ-halʋ nɛ ɛ-pɩyalaa nɛ e-wolaa palɩɩ. 19 Kpɩna ndɩ ndɩ lɩɩ ɖɔɖɔ, halʋ nɛ abalʋ, halʋ nɛ abalʋ. Anaɣ yɔ: tɛyɛ kpɩna nɛ tɛtɛ ñɩtʋ nɛ sumasɩ nɛ mbʋ pɩtɩnɛ pɩwɛ wezuu mɛlɛ taa yɔ.
20 Palɩ ḿbʋ lɛ, Nowee ma KƖPAƔLƲ kɩlaŋ ɖɩlayɛ, nɛ ɛkpa kpɩna, wazaɣ kpɩna tɩŋa taa nɛ sumasɩ, wazaɣ sumasi tɩŋa taa nɛ ɛlaa-wɛ, nɛ ɛhɔbɩ-wɛ kɩlaŋ ɖɩlayɛ ńɖɩ ɖɩ-yɔɔ nɛ pañaɣ. 21 Ɛhɔbɩ-wɛ ḿbʋ lɛ, KƖPAƔLƲ nɩɩ sɔzɩŋ nɛ ɛɖʋ ɛ-maɣmaɣ ɛ-taa se ɛɛtasɩɣ wɩlʋʋ tɛtʋʋ kpalʋʋ ɛyʋ yɔɔ kaʋ. Ɛɖʋ ɛ-taa ɖɔɖɔ se ɛyʋ taa fɛyɩ ɖeu ɖooo ɛ-pɩcatʋ. Paa mbʋʋ yɔ, ɛɛtasɩɣ kʋʋ mbʋ pɩwɛ wezuu yɔ ɛzɩ ɛlabʋ yɔ kaʋ. 22 Ɛnawa se,
Alɩwaatʋ ndʋ tɛtʋ kpɛndɩ tɩwɛɛ yɔ,
Poɖuu nɛ pakʋ,
Ninkaɣ wɛɛ nɛ soŋaɣ wɛɛ,
Yolim yoli nɛ lʋŋɩyɛ lʋŋ,
Ɖoó yu nɛ tɛʋ fe,
Mbʋʋ pɩwɛɣ tam.