9
Mbʋ Ɛsɔ ɖʋwa se ɛlakɩ Nowee yɔ
1 Pʋ-wayɩ lɛ, Ɛsɔ wazɩ Nowee nɛ ɛ-pɩyalaa pɔ-yɔɔ. Eheyi-wɛ se, pálʋlɩ píhuúu nɛ pisu tɛtʋ yɔɔ. 2 Pɩkpaɣʋnɩ lɛɛlɛɛyɔ yɔ, ye tɛtʋ yɔɔ kpɩna tɩŋa nɛ sumasɩ tɩŋa ɛsɔdaa nɛ mbʋ pɩtɩŋa payɩ pʋɖɔŋ tɛtʋ yɔɔ yɔ, nɛ kpakpasɩ tɩŋa teŋgu taa pana-wɛ yɔ, sɔɔndʋ kpaɣ-wɛ. Ɛɖʋsɩ-wɛ pe-nesi taa. 3 Mbʋ pɩtɩŋa payɩ pɩwɛ wezuu nɛ pɩɖɔŋ tɛtʋ yɔɔ yɔ, mbʋ kɛɣnɩ pɔ-tɔɔnaɣ. Lɛɛlɛɛyɔ, ɛhaɣ-wɛ pɩ-tɩŋa ɛzɩ ɛɛhaʋ-wɛ tɩŋ hatʋ nɛ ñɩtʋ yɔ. 4 Paa mbʋʋ yɔ, pataatɔɔ nandʋ ndʋ tɩ-taa wɛ wezuu yɔ, pʋ-tɔbʋʋ se: ndʋ tɩ-taa nɛ calɩm yɔ. 5 Pa-calɩm ɖɔɖɔ lɛ, pɩkɛ pe-wezuu, ɛpɔzʋʋ kʋ-yɔɔ. Pʋ-yɔɔ lɛ, ye kpɩnɛ naɖɩyɛ yaa ɛyʋ nɔɔyʋ ɛkʋ ɛyʋ yɔ, ɛpɔzʋʋ e-wezuu yɔɔ. Tovenim, ɛpɔzʋʋ kʋ-yɔɔ.
6 Weyi ɛkpɛdɩɣ ɛyʋ calɩm yɔ,
ɛyʋ kpɛdɩɣnɩ ɛ-calɩm ɖɔɖɔ.
Mbʋ pʋyɔɔ yɔ, Ɛsɔ labɩ ɛyʋ ɛzɩ ɛ-maɣmaɣ yɔ.
7 Ɛsɔ tasɩ-wɛ heyuu se, mbaa lɛ, pálʋlɩ píhuúu nɛ pisu tɛtʋ yɔɔ nɛ pɔtɔyɩ tɩ-yɔɔ.
8 Pʋ-wayɩ lɛ, Ɛsɔ tasɩ Nowee nɛ ɛ-pɩyalaa heyuu se, 9 ɛɖʋʋ Nɔɔ Haʋ ɛ nɛ wɛ pɛ-hɛkʋ taa. Pa-wayɩ lɛ, kɛwɛɣ ɖɔɖɔ ɛ nɛ pa-sayɩnaa pɛ-hɛkʋ taa. 10 Nɔɔ haʋ ḿbʋ, pɩwɛɣ ɖɔɖɔ ɛ nɛ mbʋ pɩ-tɩŋa payɩ pɩwɛ wezuu pɔ-cɔlɔ yɔ, pɛ-hɛkʋ taa. Mbʋʋ yɔ: sumasɩ nɛ ɖɩɣa kpɩna nɛ tɛyɛ ñɩna, pʋ-tɔbʋʋ se, kpɩna wena alɩnɩ mɛlɛ taa yɔ, a-tɩŋa nɛ wena akaɣ wɛʋ tɛtʋ yɔɔ yɔ. 11 Ɩɩnaɣ mbʋ manɖʋwa se malakɩ yɔ, mbʋʋ lɛ se: lɩm nabʋyʋ ɛɛtasɩɣ walʋʋ tɛtʋ yɔɔ nɛ pɩkʋ mbʋ pɩwɛ wezuu tɩ-yɔɔ yɔ, pɩ-tɩŋa, kigiluu tɛʋ nakʋyʋ ɛɛtasɩɣ nɩʋ nɛ kʋkʋ mbʋ pʋwɛ tɛtʋ yɔɔ yɔ, pɩ-tɩŋa. 12 Ɛyɔɔdɩ ḿbʋ lɛ, ɛtasɩ-wɛ heyuu se, alɩwaatʋ ndʋ tɩ-tɩŋa payɩ ɛyaa wɛɣ kedeŋa yɔɔ yɔ, yʋsaɣ ŋga kawɩlɩɣ se Nɔɔ Haʋ wɛ ɛ nɛ wɛ nɛ mbʋ pɩ-tɩŋa pɩwɛ wezuu yɔ pɛ-hɛkʋ taa yɔ, ŋgaa lɛ se, 13 ɛɖʋʋ ɛ-tɩŋkaɣyʋʋ ɛsɔmɩndʋ yɔɔ, ŋgʋ kɛɣnɩ Nɔɔ Haʋ mbʋ pɩwɛ ɛ nɛ mbʋ pɩwɛ tɛtʋ yɔɔ yɔ, pɛ-hɛkʋ taa yɔ, pɩ-yʋsaɣ. 14 Ɛtɔm se, alɩwaatʋ ndʋ eyeki nɛ tɛʋ piyi ɛsɔdaa yɔ, ye tɩŋgaɣyʋʋ ɛlɩ ɛsɔmɩndʋ yɔɔ yɔ, 15 pʋbʋ, ɛtɔsʋʋ Nɔɔ Haʋ mbʋ pɩwɛ ɛ nɛ wɛ nɛ mbʋ pɩ-tɩŋa payɩ pɩwɛ wezuu tɛtʋ yɔɔ yɔ, pɛ-hɛkʋ taa yɔ, pʋ-yɔɔ. Lɩm nabʋyʋ ɛɛtasɩɣ walʋʋ tɛtʋ yɔɔ nɛ pɩkʋ mbʋ pɩwɛ wezuu yɔ pɩ-tɩŋa kaʋ. 16 Tɩŋgaɣyʋʋ ŋ́gʋ, kɩkakɩ nɛ ɛnʋʋ Ɛsɔ ɛ́na-kʋ mɩndʋ yɔɔ lɛ, ɛ́tɔsɩ Nɔɔ Haʋ mbʋ pɩwɛ ɛ nɛ mbʋ pɩ-tɩŋa payɩ pɩwɛ wezuu tɛtʋ yɔɔ yɔ, pɛ-hɛkʋ taa tam yɔ, pʋ-yɔɔ. 17 Ɛsɔ tɛm yɔɔdʋʋ ḿbʋ lɛ, ɛtasɩ Nowee heyuu se, tɩŋgaɣyʋʋ lɛ Nɔɔ Haʋ mbʋ ɛnʋʋ Ɛsɔ ɛɖʋ ɛ nɛ mbʋ pɩ-tɩŋa payɩ pɩwɛ wezuu tɛtʋ yɔɔ yɔ, pɛ-hɛkʋ taa yɔ, pʋ-yʋsaɣ.
Nowee pɩyalaa naadozo tɔm
18 Nowee pɩyalaa yɩla yɔ: Sɛm, Kam nɛ Yaafɛɛtɩ. Ḿba lɩnɩnɩ mɛlɛ taa. Kam lɛ weyi payaɣ se Kanaanɩ yɔ, ɛ-caa. 19 Nowee pɩyalaa ḿba, pa-naadozo pa-sayɩnaa ɖeke wɛnɩ tɛtʋ tɩŋa yɔɔ.
20 Nowee lɛ haɖʋ weyi ɛcalɩ sɔʋ tɩŋ weyi popuu e-pe sʋlʋm yɔ. e 21 Nakʋyʋ wiye ɛñɔ tɩŋ ɛnʋ e-pe sʋlʋm nɛ pɩkʋʋ-ɩ nɛ ɛhɔsɩ e-wondu nɛ ɛhɛnɩ ŋtaakpeɖe ɛ-kɩɖanɖʋʋ tɛɛ. 22 Pɩkɛdaa lɛ, Kanaanɩ caa Kam sʋʋ nɛ ɛna ɛ-caa ŋtaakpeɖe mbʋ. Ɛna-ɩ lɛ, ɛlɩɩ nɛ eheyi ɛ-ɖalʋ nɛ e-neu, paba ñaawɛ tɩŋtɛɛ. 23 Peeye Sɛm nɛ Yaafɛɛtɩ pakpaɣ pa-caa Nowee toko sɔsɔʋ nɛ palaɣyɩ-kʋ pa-hazasɩ yɔɔ nɛ piyele pasʋʋ kɩɖanɖʋʋ tɛɛ ŋgiligiɖiye nɛ pohuuzi ɛ-yɔɔ. Pɔɖɔŋaɣ ŋgiligiɖiye se, pataana pa-caa ŋtaakpeɖe yeɣyeɣ. 24 Pɩkɔma pɩcɛ Nowee yɔɔ nɛ ɛkʋyɩ lɛ, ɛnɩɩ mbʋ ɛ-pɩyalʋ cikpelu laba yɔ.
25 Peeye Nowee wɩlɩ Kanaanɩ kpalʋʋ
nɛ eheyi-i se,
ɛkɛɣ ɛ-ɖalʋ nɛ e-neu,
yomaa taa yom.
26 Pʋ-wayɩ lɛ, ɛtɔ se,
Pása KƖPAƔLƲ, Sɛm Ɛsɔ!
Kanaanɩ ɛ́kɛ Sɛm yom!
27 Ɛsɔ ɛ́walɩsɩ Yaafɛɛtɩ tɛtʋ!
Ɛlɛ, ɛ́wɛɛ Sɛm kɩɖanɖɩŋ tɛɛ,
nɛ Kanaanɩ ñɛkɛ Yaafɛɛtɩ yom!