7
Nowee nɛ ɛ-hɔʋ taa ñɩma pasʋʋ mɛlɛ taa yɔ
1 Pʋwayɩ lɛ, KƖPAƔLƲ heyi Nowee se, ɛ nɛ ɛ-hɔʋ taa ñɩma pásʋʋ mɛlɛ taa, mbʋ pʋyɔɔ yɔ, e-ɖekeɣ ɛnʋ naɣ se ɛkɛ ɛyʋ kʋtʋʋzʋ siŋŋ ɛyaa tɩŋa taa. 2 Ɛsʋʋ lɛ, ɛ́kpɛndɩnɩ wazaɣ kpɩna, d halʋ nɛ abalʋ, halʋ nɛ abalʋ, tɔm lʋbɛ. Pɩkazɩ wena alɛ tɛkɛ wazaɣ ñɩna yɔ, halʋ nɛ abalʋ, halʋ nɛ abalʋ. 3 Ɖɔɖɔ lɛ, ɛ́kpaɣ sumasɩ, paa ŋga, halʋ nɛ abalʋ, halʋ nɛ abalʋ, tɔm lʋbɛ nɛ pataamʋʋ tɛtʋ yɔɔ. Lɩm kɔŋ pɩsɔɔ lɛ, palʋlɩ nɛ pihuúu. 4 Mbʋ pʋyɔɔ yɔ, kɩyakɩŋ lʋbɛ (7) taa, ɛnʋ yeki nɛ kigiluu tɛʋ nɩɩ tɛtʋ yɔɔ kɩyakɩŋ nɩɩnaza (40) wɩsɩ nɛ ɖoó, nɛ ɛɖɩzɩ mbʋ ɛnʋ laba yɔ pɩ-tɩnɛ payɩ: ɛyaa nɛ kpɩna.
5 Nowee ña KƖPAƔLƲ nɛ ɛla mbʋ pɩtɩŋa payɩ eheyi-i yɔ ɖeyiɖeyi.
Kigiluu tɛʋ tɔm
6 Alɩwaatʋ ndʋ kigiluu tɛʋ nɩwa nɛ lɩm pazɩ walʋʋ tɛtʋ yɔɔ yɔ, Nowee kɛwɛnɩ pɩnzɩ taŋga nɛ mɩnʋʋ (600). 7 Peeye Nowee nɛ ɛ-halʋ nɛ e-piya nɛ e-wolaa pasʋ mɛlɛ taa se, patʋlɩ kigiluu tɛʋ nɛ lɩm. 8 Wazaɣ kpɩna nɛ wena afɛyɩ wazaɣ yɔ nɛ sumasɩ nɛ mbʋ payɩ pɩwɛ wezuu tɛtʋ yɔɔ yɔ, 9 pa-tɩŋa payɩ naalɛ naalɛ, halʋ nɛ abalʋ halʋ nɛ abalʋ, patalɩ Nowee cɔlɔ, mɛlɛ taa ɛzɩ Ɛsɔ keheyuu-i yɔ. 10 Pɩkɔma pɩla kpɩtaʋ lɛ, kigiluu tɛʋ lɩm suwa nɛ pɩwalɩ tɛtʋ tɩŋa yɔɔ.
11 Pɩnaɣ ŋga Nowee wɛnɩ pɩnzɩ taŋga nɛ mɩnʋʋ (600) yɔ, ka-taa, fenaɣ naalɛ ñɩŋga taa, kɩyakʋ hiu nɛ lʋbɛ (17) ñɩŋgʋ wiye, tɛtɛɛ liŋgamɩŋ hila sɔsɔna nɛ ɛsɔtɔnʋʋ patʋlaa hooo, 12 nɛ kigiluu tɛʋ pazɩ nɩʋ tɛtʋ yɔɔ, kɩyakɩŋ nɩɩnaza (40), wɩsɩ nɛ ɖoó. 13 Kɩyakʋ ŋgʋ ki-wiye, Nowee nɛ ɛ-halʋ nɛ ɛ-pɩyalaa, Sɛm nɛ Kam nɛ Yaafɛɛtɩ nɛ e-wolaa, pasʋ mɛlɛ taa. 14 Kpɩna ndɩ ndɩ sʋwa ɖɔɖɔ: tɛyɛ kpɩna ndɩ ndɩ nɛ ɖɩɣa ñɩna ndɩ ndɩ nɛ tɛtɛ ñɩtʋ ndɩ ndɩ nɛ sumasɩ ndɩ ndɩ nɛ furufuruwaa. 15 Mbʋ pɩtɩɩwɛ wezuu yɔ, pɩtɩŋa payɩ pɩsʋ Nowee cɔlɔ, halʋ nɛ abalʋ halʋ nɛ abalʋ. 16 Paa kpɩnɛ nɖɩ, ɖɩsʋ halʋ nɛ abalʋ ɛzɩ Ɛsɔ keheyuu Nowee yɔ. Peeye KƖPAƔLƲ ɖɩɣ pɔ-yɔɔ pɔɔyʋʋ.
17 Kigiluu tɛʋ nɩɩ kɩyakɩŋ nɩɩnaza (40) tɛtʋ yɔɔ. Kɩnɩɣaɣ ḿbʋ lɛ, lɩm wɛɛ pɩkpaɣ nɛ pɩkʋsʋʋ mɛlɛ. 18 Pɩwɛɛ pɩkpaɣ nɛ pihuuzi tɛtʋ yɔɔ, nɛ pɩcɔzʋʋ mɛlɛ. 19 Halɩ pɩkɔɔ pisu tɛtʋ yɔɔ nɛ pɩwalɩ pʋŋ sɔsɔŋ tɩŋa yɔɔ. 20 Pɩkɔma pɩtɛmna se, lɩm kpawa, nɛ pɩɖɛɛ pʋŋ yɔɔ ɛzɩ mɛtanaa lʋbɛ (7) ḿbʋ yɔ. 21 Mbʋ pɩ-tɩŋa payɩ pɩɩwɛ wezuu tɛtʋ yɔɔ yɔ, pɩsɩba: sumasɩ nɛ ɖɩɣa kpɩna nɛ tɛyɛ ñɩna nɛ tɛtɛ ñɩtʋ nɛ ɛyaa pa-tɩŋa payɩ. 22 Tɛtʋ yɔɔ kpɩna wena awɛ wezuu nɛ afeziɣ yɔ, asɩba. 23 Mbʋʋ KƖPAƔLƲ ɖɩzɩ mbʋ pʋwɛnɩ wezuu tɛtʋ yɔɔ yɔ, pɩtɩŋa payɩ: ɛyaa nɛ kpɩna sɔsɔna nɛ cikpena halɩ pɩkpɛndɩnɩ sumasɩ ɛsɔdaa. Ɛɖɩzɩ pa-tɩŋa payɩ nɛ pɩkazɩ Nowee nɛ mba ɛ nɛ wɛ pɛwɛ mɛlɛ taa yɔ.
Nowee lɩʋ mɛlɛ taa yɔ
24 Lɩm walɩ tɛtʋ yɔɔ mbʋʋ kɩyakɩŋ mɩnʋʋ nɛ nɩɩnʋwa (150).