ಮಾರ್ಕನು
ಗ್ರಂಥಕರ್ತೃತ್ವ
ಈ ಪುಸ್ತಕವು ಮಾರ್ಕನೆನಿಸಿಕೊಳ್ಳುವ ಯೋಹಾನನಿಂದ ಬರೆಯಲ್ಪಟ್ಟಿದೆ ಎಂದು ಆದಿ ಸಭೆಯ ಪಾದ್ರಿಗಳು ಒಮ್ಮತದಿಂದ ಒಪ್ಪಿಕೊಂಡಿದ್ದಾರೆ. ಮಾರ್ಕನೆನಿಸಿಕೊಳ್ಳುವ ಯೋಹಾನನ ಬಗ್ಗೆ ಹೊಸ ಒಡಂಬಡಿಕೆಯಲ್ಲಿ ಹತ್ತು ಬಾರಿ ಉಲ್ಲೇಖಿಸಲಾಗಿದೆ (ಅ.ಕೃ. 12:12,25; 13:5,13; 15:37,39; ಕೊಲೊ 4:10; 2 ತಿಮೊ. 4:11; ಫಿಲೆ. 24; 1 ಪೇತ್ರ. 5:13.) ಈ ಉಲ್ಲೇಖವು (ಕೊಲೊ 4:10) ಮಾರ್ಕನು ಬಾರ್ನಬನ ಸೋದರಸಂಬಂಧಿ ಎಂದು ಸೂಚಿಸುತ್ತದೆ. ಮಾರ್ಕನ ತಾಯಿಯ ಹೆಸರು ಮರಿಯಳು, ಆಕೆಯು ಯೆರೂಸಲೇಮಿನಲ್ಲಿ ಸಂಪತ್ತು ಮತ್ತು ಸ್ಥಾನಮಾನವು ಇದ್ದಂಥ ಸ್ತ್ರೀಯಾಗಿದ್ದಳು ಮತ್ತು ಅವರ ಮನೆಯು ಆದಿ ಕ್ರೈಸ್ತರು ಕೂಡಿಬರುತ್ತಿದ್ದಂಥ ಸ್ಥಳವಾಗಿತ್ತು (ಅ.ಕೃ. 12:12). ಪೌಲನ ಮೊದಲ ಮಿಷನರಿ ಪ್ರಯಾಣದಲ್ಲಿ ಮಾರ್ಕನೆನಿಸಿಕೊಳ್ಳುವ ಯೋಹಾನನು ಪೌಲನ ಮತ್ತು ಬಾರ್ನಬನ ಜೊತೆಯಲ್ಲಿ ಹೋಗಿದ್ದನು (ಅ.ಕೃ. 12:25; 13:5). ಸತ್ಯವೇದ ಆಧರಿತವಾದ ಪುರಾವೆಗಳು ಮತ್ತು ಆದಿ ಸಭೆಯ ಪಾದ್ರಿಗಳು ಪೇತ್ರನ ಮತ್ತು ಮಾರ್ಕನ (1 ಪೇತ್ರ 5:13) ನಡುವೆ ನಿಕಟವಾದ ಸಂಬಂಧವಿತ್ತು ಎಂದು ಪ್ರತಿಪಾದಿಸುತ್ತಾರೆ. ಮಾರ್ಕನು ಪೇತ್ರನ ಭಾಷ್ಯಾಕಾರನಾಗಿದ್ದನು ಮತ್ತು ಪೇತ್ರನ ಬೋಧನೆಯು ಮತ್ತು ಪ್ರತ್ಯಕ್ಷದರ್ಶಿಯಾದ ಅವನ ಸಾಕ್ಷಿಯು ಮಾರ್ಕನ ಸುವಾರ್ತೆಯ ಪ್ರಾಥಮಿಕ ಮೂಲವಾಗಿರುವ ಎಲ್ಲಾ ಸಾಧ್ಯತೆಗಳಿವೆ.
ಬರೆದ ದಿನಾಂಕ ಮತ್ತು ಸ್ಥಳ
ಸರಿಸುಮಾರು ಕ್ರಿ.ಶ. 50-60 ರ ನಡುವೆ ಬರೆಯಲ್ಪಟ್ಟಿದೆ.
ಸಭಾ ಪಾದ್ರಿಗಳ (ಐರೆನೇಯಸ್, ಅಲೆಕ್ಸಾಂಡ್ರಿಯಾದ ಕ್ಲೆಮೆಂಟ್ ಮತ್ತು ಇತರರು) ಹಲವಾರು ಬರಹಗಳು ಮಾರ್ಕನ ಸುವಾರ್ತೆಯು ರೋಮ್ನಲ್ಲಿ ಬರೆಯಲ್ಪಟ್ಟಿದೆ ಎಂದು ದೃಢಪಡಿಸುತ್ತವೆ. ಈ ಸುವಾರ್ತೆಯು ಪೇತ್ರನ ಸಾವಿನ ನಂತರ (ಕ್ರಿ.ಶ. 67-68) ಬರೆಯಲ್ಪಟ್ಟಿದೆ ಎಂದು ಆದಿ ಸಭೆಯ ಮೂಲಗಳು ತಿಳಿಸುತ್ತವೆ.
ಸ್ವೀಕೃತದಾರರು
ಈ ಕಥನವನ್ನು ರೂಪಿಸುವಂಥ ಪುರಾವೆಯು, ಮಾರ್ಕನು ಈ ಸುವಾರ್ತೆಯನ್ನು ಸಾಮಾನ್ಯವಾಗಿ ಅನ್ಯಜನರ ಓದುಗರಿಗೆ ಮತ್ತು ನಿರ್ದಿಷ್ಟವಾಗಿ ರೋಮನ್ ವಾಚಕರಿಗೆ ಬರೆದಿದ್ದಾನೆಂದು ಸೂಚಿಸುತ್ತದೆ. ಇದೇ ಕಾರಣಕ್ಕಾಗಿ ಯೇಸುವಿನ ವಂಶಾವಳಿಯನ್ನು ಇದರಲ್ಲಿ ಸೇರಿಸಲಾಗಿಲ್ಲ, ಏಕೆಂದರೆ ಇದು ಅನ್ಯಜನರ ಜಗತ್ತಿಗೆ ಅಷ್ಟೊಂದು ಮುಖ್ಯವೇನು ಅಲ್ಲ.
ಉದ್ದೇಶ
ಕ್ರಿ.ಶ. 67-68 ರಲ್ಲಿ ನೀರೋ ಚಕ್ರವರ್ತಿಯ ಆಳ್ವಿಕೆಯಲ್ಲಿ ಕ್ರೈಸ್ತರನ್ನು ಕಠೋರವಾಗಿ ಹಿಂಸಿಸಿಲಾಯಿತು ಮತ್ತು ಕೊಂದುಹಾಕಲಾಯಿತು, ಆ ಕಠೋರವಾದ ಹಿಂಸೆಯ ನಡುವೆ ಜೀವಿಸುತ್ತಿದ್ದ ರೋಮನ್ ಕ್ರೈಸ್ತರು ಮಾರ್ಕನ ಸುವಾರ್ತೆಯ ಓದುಗರು ಆಗಿದ್ದರು. ಅಂತಹ ಸನ್ನಿವೇಶದಲ್ಲಿ ಮಾರ್ಕನು ಈ ಸುವಾರ್ತೆಯನ್ನು ಬರೆದನು. ಅಂತಹ ಕಷ್ಟದಲ್ಲಿ ಹಾದುಹೋಗುತ್ತಿದ್ದ ಕ್ರೈಸ್ತರನ್ನು ಪ್ರೋತ್ಸಾಹಿಸಲು ಇದನ್ನು ಬರೆದನು. ಇದರಲ್ಲಿ ಯೇಸುವನ್ನು ಸಂಕಟವನ್ನು ಅನುಭವಿಸುತ್ತಿರುವ ಸೇವಕನನ್ನಾಗಿ ವರ್ಣಿಸಿದ್ದಾನೆ (ಯೆಶಾ 53).
ಮುಖ್ಯಾಂಶ
ಯೇಸು - ಸಂಕಟವನ್ನು ಅನುಭವಿಸುತ್ತಿರುವ ಸೇವಕ
ಪರಿವಿಡಿ
1. ಸೇವೆಗಾಗಿ ಅಡವಿಯಲ್ಲಿ ಯೇಸುವಿನ ಸಿದ್ಧತೆ — 1:1-13
2. ಗಲಿಲಾಯದಲ್ಲಿನ ಮತ್ತು ಅದರ ಸುತ್ತಮುತ್ತಲಿನ ಯೇಸುವಿನ ಸೇವೆ — 1:14-8:30
3. ಯೇಸುವಿನ ನಿಯೋಗ: ಶ್ರಮೆ ಮತ್ತು ಮರಣ — 8:31-10:52
4. ಯೆರೂಸಲೇಮಿನಲ್ಲಿನ ಯೇಸುವಿನ ಸೇವೆ — 11:1-13:37
5. ಶಿಲುಬೆಗೇರಿಸುವಿಕೆಯ ವಿವರಣೆ — 14:1-15:47
6. ಯೇಸುವಿನ ಪುನರುತ್ಥಾನ ಮತ್ತು ಪ್ರತ್ಯಕ್ಷತೆ — 16:1-20