Kí ta-i Yesu wu Pilati tɛ
(Matiyu 27.2, 11-14; Maraka 15.1-5, Yuhana 18.28-38)
23
1 Kitikwurutɔnŋ kwuru ki bataa i tiri Yesu wu faantiŋ Pilati tɛ. 2 Kí ta-i so niŋ mani nu, kí i ntiŋ fɛkwuru niŋ tɛ tu: «Yibɛ̀ɛ̀ koŋ ka kila-i, ntiŋ i yibɔ̀ɔ̀ konaŋ ki nuye-ri tu kí fa ɲinisa ki wɔri Ɔrɔmu masa ki tɛ ki. Niŋ fa tu afinŋ yɛri ki Kirinŋ Ɲaannakonshimaan ki i, niŋ kɔri ki tu afinŋ masa a.»3 Pilati i Yesu ranɔri: «Miŋ ki yɔ Yawutu kiri wɔ masa ki i wa?»
Yesu tu ntiŋ tɛ: «Abɛ́ɛ́ yɔ nʼbi-a ka a.»
4 Pilati i nʼbi Kirinŋ tɛ sarakawɔrɔtɔnŋ kiri ŋununtiŋ kiri fa konaŋ ki tɛ: «Míŋ bitɔri tenŋ kila koŋ ka ra nwɔ̀ nʼpɔlimaan i ki.»
5 Nka kí i nʼbi furu Pilati tɛ sɛbɛ: «Ka koŋ ka yɔ konaŋ kiri nuye-a, awɔ kalinŋ ki wu Yude mari ki bataa ru, ŋì i shi Galile fɔ ŋì i na so kwumaŋ.»
Kí ta-i Yesu wu kɛnintiŋ Ɛrɔdi tɛ
6 Pilati niŋ nʼnama-i waarinŋ wɔ̀ ru, ntiŋ i nanɔri tan: «Koŋ ka yɔ Galiletɔnŋ i wa?» 7 Pilati nʼtɔ-i waarinŋ wɔ̀ ru tu Yesu po-a Galile mari ki ru, kɛnintiŋ Ɛrɔdia wuru wɔ̀ ŋununnu, ntiŋ tu konaŋ kiri tiri Yesu wu Ɛrɔdi tɛ. Sabu, niŋ shikaŋ, Ɛrɔdi wuru *Yerusalɛmu kili ki ru nʼmaŋ sɛbɛ. 8 Ɛrɔdi Yesu wulu ki rama wuru jibi ra ŋmani na, niŋ fa Yesu ja tɔ wuru ntiŋ nu. Niŋ ki ra, ntiŋ Yesu ja-i waarinŋ wɔ̀ ru, niŋ i di ntiŋ tɛ kusɛbɛ. Sabu ntiŋ wuru nʼtɛ a i Yesu ja awɔ kabakobi ki bɛɛ ma-a. 9 Ntiŋ i nanɔri mwɔɔnna tan Yesu ra, nka Yesu ntiŋ wɔ nanɔri ki tɔri tenŋ nupwulu ki. 10 Kirinŋ tɛ sarakawɔrɔtɔnŋ kiri ŋununtiŋ kiri fa sariya kalimɔɔ wɔ̀ri wuru maŋ, niŋ ni kɔniŋ wuru puru sinaŋ sinaŋ kiri bi-a nwɔma arì i Yesu ŋununnu bi ki furu. 11 Ɛrɔdi fa awɔ surudashi kiri i Yesu rufyɛ, kí i yɛ kulinŋ tan bo ntiŋ sun, kí i masabi jɛrɛbi sinaŋ tɔtiŋ shɔɔrinŋ bɛɛ bo ntiŋ yɛɛra. Niŋ kɔɔtɛ, Ɛrɔdi i kí pwulu ta Yesu wu Pilati tɛ sɛbɛ. 12 Ɲabi wuru Ɛrɔdi fa Pilati faninmwuŋ fɔlɔ, nka, niŋ shikaŋ, kí i ji wɔshurutiŋ ni.
Kí kiti ki kwuru-i Yesu sun tu ntiŋ a kilɛn
(Matiyu 27:15-26; Maraka 15:6-15; Yuhana 18:39-19:16)
13 Pilati i Kirinŋ tɛ sarakawɔrɔtɔnŋ kiri fa Yawutu kiri ŋununtiŋ kiri fa konaŋ ki dɔri bo arìmaŋ sun, 14 ntiŋ i na nʼbi kí tɛ: «Abɛ́ɛ́ na-i koŋ ka wu míŋ tɛ tu ntiŋ awɔ́ konaŋ ki ŋuniŋ li-a. Míŋ ntiŋ nanɔri-i abɛ́ɛ́ bataa ɲaanna ka a, abɛ́ɛ́ wulu finŋ woo finŋ bi-i ntiŋ sun, míŋ kɔniŋ ntiŋ pɔlimaŋ ja niŋ tɔri tenŋ na ki. 15 Kɛnintiŋ Ɛrɔdi yɛrima ki, pɔlimaŋ ja ntiŋ na ki, sabu niŋ ntiŋ pwulu na-i yibɛ̀ɛ̀ tɛ. Niŋ na, koŋ ka bijɛ tɔri tenŋ ma nwɔ̀ a so ji-i ntiŋ kilɛn ŋuŋ i ki. 16 Niŋ ki ciiru, míŋ a kí bo, kí i ntiŋ bwɔ shɛnŋ na. Niŋ kɔɔtɛ, ŋí i ntiŋ pani, ntiŋ i tiri.»
18 Kí bataa i arì wulu fɛshi tu: «Á weŋ ka kilɛn, á i Barabasi pani yi tɛ.» 19 Barabasi bo wuru nkasu ki ru, nʼsababu ki i ji tu wú konaŋ ni nuye Yerusalɛmu kili ki ru, niŋ fa wú i ji koŋ kilɛn-ni. 20 Yesu bo tɔ wuru Pilati ru, niŋ ki ra, ntiŋ i wulubi konaŋ ki tɛ sɛbɛ. 21 Nka kí i fali kí i nʼbi: «Á wú kpinkpi suu sun! A wú kpinkpi suu sun!» 22 Pilati wulubi kaan byantɔnŋ ki tu kí tɛ: «Wú nfɛnŋ bijɛ ma? Wú bi wɔ̀ ma-i, niŋ i ji-a wú kilɛn ŋuŋ po, míŋ niŋ ja ki. Niŋ ki ra, míŋ a nʼbi tu, kí wú bwɔ shɛnŋ na, ŋí i wú pani.» 23 Nka konaŋ kiri tu-i fali-la, kí i arì pwulu-li nʼsun, kí i nʼbi furu tu Pilati Yesu kpinkpi suu sun. Kí falika jɛ ki fɔ kí i ba kí i kɛmi de Pilati ru. 24 Niŋ na, niŋ tu kíbɛ́ɛ́ dintɛ bi ki i nwɔ̀, a ra niŋ ma kí tɛ. 25 Barabasi wɔ̀ bo wuru nkasu ki ru kpeeri ŋuniŋ lirama fa koŋ kilɛn bira, ntiŋ i niŋ pani, ntiŋ i Yesu wɔri kí tɛ, nwɔma kí i arì dintɛbi ki ma ntiŋ wu.
Kí Yesu kpinkpi-i suu sun
(Matiyu 27:32; Maraka 15:21)
26 Kí tirira ki Yesu wu kpinkpimaŋ ki ru, kí i shuru bɛɛ ja. Niŋ shuru ki tɔ wuru tu Simɔŋ. Sirɛnitɔnŋ wuru i, nwɔ̀ wuru po-a awɔ ji ru. Kí i niŋ karaba tu niŋ Yesu kpinkpisuu ki shi ntiŋ cɛfan.
27 Konaŋ mwɔɔnna nʼpa wuru Yesu cɛfan. Niŋ konaŋ ki ru, mari mwɔɔnna wuru nʼmaŋ nwɔ̀ri wuru arì *kuŋ nu bwɔ-a, kí i arì makwulu yaalinpo-ri Yesu bira. 28 Yesu i a ɲaannupwulu, ntiŋ nʼbi kí tɛ: «Yerusalɛmu mari ri, á fa ŋuntan míŋ bira ki, nka á ŋuntan a fa a daŋ kiri bira, 29 sabu jibi bɛɛ ri yiri-ra yɔ maŋ, kí a na nʼbi tu: ‹Mari danjibali kiri fa mari wɔ̀ri daŋ kila-i sun ki, niŋ fa nwɔ̀ri ɲɛŋ wɔri daŋ tɛ ki, niŋ ni yɔ koŋ fɛrɛmaan ni.› 30 Niŋ waaci ki ru, konaŋ kiri ra na nʼbi-ri tɔnŋ kiri tɛ: ‹A fɛɛn yi sun!› Kí i nʼbi-ri tintiŋ kiri tɛ tu: ‹A yi radu!› 31 Míŋ yɔ niŋ bi-a abɛ́ɛ́ tɛ, sabu a kí jirinŋ ŋuniŋ ki ma ka ɲaan ka tɛ, jirinŋ furu ki wɔ ki a na ji dɔɔkunŋ?»
32 Kí wuru ta-a bikulinŋ matɔnŋ fuuli wu kpinkpimaŋ ki ru sɛbɛ. Kí wuru ta-a niŋ ni fa Yesu kilɛn arìmaŋ fan.
Yesu kpinkpimaan ki suu ki sun
(Matiyu 27:33-44; Maraka 15:22-32)
33 Kí i ta so Yesu wu mani nu nwɔ̀ tɔ yɔ tu Gologota.b Kí i Yesu kpinkpi suu sun niŋ mani nu. Kí i bikulinŋ matɔnŋ fuuli kari kpinkpi suu tɔri ri sun ntiŋ kɛlinna sɛbɛ: tenŋ wuru ntiŋ pantɛ, tenŋ i ji ntiŋ nɔrinŋ tɛ. 34 Yesu wuru nʼbi-a tu: «Míŋ Tiŋ, á yafa kí tɛ, sabu kí yɔ nwɔ̀ ma-a, kí niŋ tɔ-a ki.»
Ntiŋ wɔ juulinŋ kiri lurama ki, kí i nʼbaalinŋ bili arìmaŋ tɛ. 35 Konaŋ kiri ta wuru tu kí i maannashɛɛli-li. Yawutu kiri ŋununtiŋ kiri kɔniŋ wuru yɛ ki tan bo-a Yesu sun, kí i nʼbi-ri tu: «Wú nʼbɛɛ ri mwu-i, wú a yɛri ki mwu kɛ! A wúfinŋ ji Mwutɔnŋ ki i, Kirinŋ Ɲaannakonshimaan ki i, wú a yɛri mwu ni!» 36 Surudashi kiri yɛri ki wuru yɛ kulinŋ tan bo-a ntiŋ sun. Kí i arì kpari ntiŋ tɛ, kí i mwunufinŋ lɔmaan ji-ri ntiŋ wu. 37 Kí i nʼbi-ri tu: «A miŋ ji Yawutu kiri wɔ masa ki i, miŋ nʼyɛri mwu sunu!»
38 Sɛbɛ tanmaan kpinkpi wuru Yesu kpinkpisuu ki ŋuniŋ na, nwɔ̀ wuru nʼbi-a tu: «Ka yɔ Yawutu kiri wɔ masa ki i.»
39 Bikulinŋ matɔnŋ fuuli wɔ̀ri kpinkpi wuru Yesu fan, niŋ ni nu tenŋ wuru ntiŋ ki-a tu: «Miŋ Mwutɔnŋ ki i kili ki wa? Nʼyɛri mwu, ŋi i yibɛ̀ɛ̀ mwu sɛbɛ kɛ!» 40 Nka bikulinŋ matɔnŋ ki tenŋ ki i tu maŋ: «Miŋ ji kɛni-na Kirinŋ jɛŋ wa? Nʼshɛɛli, miŋ mìŋ cɔɔri tenŋ ki ru ki wa? 41 Nwɔ̀ yɔ yibɛ̀ɛ̀, ka cɔɔri ka kɛɲɛ-i yibɛ̀ɛ̀ sun, sabu yibɛ̀ɛ̀ bijɛ ma -i. Nka katiŋ kɔniŋ bikulinŋ tɔri tenŋ ma ki.» 42 Niŋ kɔɔtɛ, ntiŋ i nʼbi: «Yesu, a abɛ́ɛ́ na sɔɔ awɔ́ masabi ki sun waarinŋ wɔ̀ ru, á i a ɲakili tu míŋ na.» 43 Yesu tu ntiŋ tɛ: «Sɛli ki ra, míŋ yɔ nʼbi-a miŋ tɛ, nʼtu miŋ a de míŋ fan alijinac ki ru mìŋ jiŋ.»
Yesu beŋ ki
(Matiyu 27:45-56; Maraka 15:33-41, Yuhana 19:28-30)
44-45 Sunŋ ki wuru juu ta-a ŋununnu kɔ, niŋ waaci ki ru, sunŋ sarinŋ ja kili ki, mani i cin kɛniŋ ki bataa ru, fɔ ŋì i lɛɛri byaŋ ma. Kirinfusinaŋ ki faninmwuŋ juulinŋ ki i gbɛri san amaŋ na nʼfaninmwuŋ fuuli i.d 46 Yesu i fali faan na, ntiŋ i nʼbi: «Míŋ Tiŋ, míŋ a ɲini ki pwulu abɛ́ɛ́ sun.»e Ntiŋ niŋ bi-i, ntiŋ i ɲinisan.
47 Surudashi jalitiŋ ki niŋ bi kiri bataa ja-i waarinŋ wɔ̀ ru, niŋ i baraka wɔri Kirinŋ tɛ niŋ i nʼbi tu: «Sɔsɔɔlinŋ nʼnu ki, koŋ ka wuru koŋ telimaan a.»
48 Maannashɛɛlitɔnŋ wɔ̀ri rakɔli wuru maŋ, niŋ ni i bi kiri maka ɲaan ki ja, kí i pwulula ki arɔ̀ɔ̀ mani ni nu, kí i ta arì kuŋ nu bwɔ fan tɔnɲaa ki ra. 49 Yesu bidi wuru nwɔ̀ri tɛ, niŋ fa mari wɔ̀ri po wuru ntiŋ fan Galile mari ki ru, niŋ ni tu wuru mani narimwuŋ kí i maannashɛɛli-li.
Yesu kwuu ye bi ki
(Matiyu 27:57-61; Maraka 15:42-47; Yuhana 19:38-42)
50-51 Koŋ bɛɛ wuru nʼmaŋ nwɔ̀ tɔ wuru tu Yusufu. Ntiŋ wuru po-a Yawutu kiri wɔ kili bɛɛ ra nwɔ̀ tɔ yɔ tu Arimate. Yawutu kiri wɔ kitikwurutoŋ ki ru koŋ sɔbɛ ki bɛɛ wuru i. Ntiŋ wuru koŋ shɔɔrinŋ i, nwɔ̀ wuru a tu-a daalinŋ na ki. Ntiŋ wuru Kirinŋ wɔ masabi ki na ki saarashɛɛli-la. Ntiŋ kaashi kitikwurutɔnŋ kiri wuru wulu wɔ̀ri bi-a niŋ fa kí mabi kiri fu-ri ntiŋ sun ki.
52 Niŋ koŋ ki i ta Yesu kwuu ki rafɛ Pilati gbɛ, nwɔma a i ta nʼye. 53 Pilati i a tu. Yusufu i ta Yesu kwuu ki jɛri san kpinkpisuu ki sun, ntiŋ i nʼsunye, ntiŋ ta nʼye saali lu, nwɔ̀ wuru faayɛli. Koŋ ye-ri niŋ saali ki ru sun ki. 54 Niŋ sisarifuluntɔnŋ ki wuru ra ji Nufaan Jibi ki i. Nʼɲaannafaan bi kiri tɔnpa wuru kɔ.
55 Mari wɔ̀ri po wuru Yesu fan fɔ Galile mari ki ru, niŋ ni i nʼpa Yusufu cɛfan fɔ saali ki tɔnŋ na. Kí i ta Yesu kwuu ki yeka ɲaan ki shɛɛli. 56 Niŋ kɔɔtɛ, kí i arì pwulu ta kulu, kí i ta ŋuŋ ni fa kinidifinŋ ni namɔni konkwuu ki tɛ.
Kí i Nufaan Jibi ki rasɔɔ miŋ tu nʼbi-i ɲaan wɔ̀ tɛ Kirinŋ wɔ sariya sɛbɛ ki ru.