Yesu ŋmɛni-i
(Matiyu 28:1-10; Maraka 16:1.8; Yuhana 20:1-10)
24
1 Nufaan Jibi ki sisarifuluntɔnŋ ki siira ki ru, mari kiri kinidifinŋ wɔ̀ri ramɔni wuru i, kí i yìrì shi, kí i ta yìrì wu saali ki ra. 2 Faa sinaŋ wɔ̀ la wuru saali ki tɔnŋ na, mari kiri i ta fa niŋ kulunkulu sanmaan wu maŋ. 3 Kí i de saali ki ru, nka kí Ŋuntiŋ ki kwuu ki ja nʼmaŋ ki. 4 Kí ciirufɔnimaan ki tu-i niŋ na, kí i kwulu, kí i shuru fuuli tu ja arì ɲaanfɛ. Niŋ ni wɔ juulinŋ kiri wuru cucu-a. 5 Mari kiri i kɛni, kí i arì ŋuniŋ shuuli fwuniŋ sun. Shuru fuuli kari tu kí tɛ: «Konwɔ́tiŋ ɲaninkulutɔnŋ yɛ, nfɛnŋ na abɛ́ɛ́ i niŋ ceeli-li koŋ kwuu ri kanfɛ?» 6 Ntiŋ kwumaŋ ki, ntiŋ ŋmɛni-i. Ŋì i abɛ́ɛ́ tu Galile, ntiŋ wulu wɔ̀ bi wuru abɛ́ɛ́ tɛ, á a ɲakili bo niŋ tɛ. 7 Ntiŋ nʼbi wuru tu: «Koŋ Danshuru ki kakan-i ŋì i de bijɛmatɔnŋ kiri gbɛfɛ, kí i nʼkpinkpi suu sun, niŋ fa tu nʼbeŋ ki sunŋ byantɔnŋ ki, tu ŋì a ŋmɛni po san kwuu kiri kanfɛ.»8 Niŋ na, mari kiri ɲakili i bo Yesu wɔ wulu kiri tɛ. 9-10 Makidala Mariyamu, Yahanɛ, niŋ fa Yakuba ɲiŋ Mariyamu, ŋì i bo mari tɔri ri sun, niŋ kiri ta wuru saali ki ra. Kí pwulu pomaan ki saali ki ra, kí i ta niŋ bi kiri bataa rakali Yesu wɔ cindaŋ bwununtenŋ ki fa kalindaŋ pyɛ kiri tɛ. 11 Yesu wɔ cindaŋ kiri i mari kiri wɔ wulu ki ji myɛɛnbi wulu, kí bili nʼna ki. 12 Niŋ fa a fɔn na, Pyɛɛri i jɔrɔkɔ, ntiŋ i bili ta saali ki ra. Ntiŋ ta-i so, ntiŋ i saali ki ciiru ki rufɔɔ, ntiŋ i juulinŋ fɔ ki bantenŋ ja maŋ. Daŋ i kɔ ntiŋ sun, ntiŋ ɲakili ɲaanmimaan ki i a pwulu kulu.
Yesu a yɛri ji-i kalindaŋ fuuli wu Emayusi saa ra
(Maraka 16:2-13)
13 Mìŋ shikaŋ tenŋ ki ru, Yesu wɔ kalindaŋ fuuli wuru ta-a kili bɛɛ ra nwɔ̀ tɔ wuru tu Emayusi. Niŋ kili ki fa Yerusalɛmu faninmwuŋ ki wuru kilo bwununtenŋ bishi i. 14 Kí tirira ki wuru bi mamaan kiri bari po ta-a arìmaŋ tɛ. 15 Ŋì i kí tu bari ki fa sɔsɔɔlinŋ ki ra, Yesu yɛri ki i na a bo kí fan. Ntiŋ fa kí i saa ki tiri-ri tenŋ i, 16 ŋì i ji miŋ tu finŋ bɛɛ kí ɲaninaŋ kiri rala, kí so Yesu tɔ-i ki. 17 Ntiŋ i kí ranɔri: «Abɛ́ɛ́ nfɛnŋ barima-a ámaŋ tɛ?»
Yesu niŋ nanɔri ki tan-i, kí i tu. Kí bataa firi kilɛnmaan wuru i. 18 Kí ru koŋ tenŋ tɔ wuru tu Kilewopasi, niŋ i nanɔri ki rupwulu: «Miŋ a ji jɛ kwumaŋ dɛ! A miŋ tenŋ ji i ki, bi wɔ̀ri ma-i Yerusalɛmu sunŋ fuuli ka ra, niŋ ni nadu koŋ tɔri tenŋ sun ki.»
19 Yesu i kí ranɔri sɛbɛ: «Niŋ nfɛnŋ finŋ i?.»
Kí tu ntiŋ tɛ: «Nansarɛtitɔnŋ kiri wɔ Yesu ki bi ki kɛ! Kirinŋ wɔ cintɔnŋ wuru i, ntiŋ i kabakobi mwɔɔnna ma, niŋ fa ntiŋ i sotinbi wulu li bi Kirinŋ fa konaŋ kiri bataa ɲaanfɛ. 20 Nka yibɔ̀ɔ̀ Kirinŋ tɛ sarakawɔrɔtɔnŋ kiri ŋununtiŋ kiri fa yi jɛntɔnŋ kiri saa wɔri-i tu ntiŋ kilɛn. Kí i ntiŋ kpinkpi suu sun ncinŋ i. 21 Yibɛ̀ɛ̀ kɔniŋ wuru nʼpwulu-la tu koŋ wɔ̀ a na Isirayɛlidaŋ kiri ŋunsan, tu niŋ koŋ ki wuru i. Nka ka bi kari ma-i, nʼsunŋ byantɔnŋ i jiŋ. 22 Mari bɛɛ ri yɔ yibɛ̀ɛ̀ fan, niŋ ni sɔli ta-i saali ki ra jiŋ siira, kí na-i wulu wɔ̀ bi, niŋ botɔnsun yibɛ̀ɛ̀ pa-i. 23 Kí tu arìbɛ̀ɛ̀ ta Yesu kwuu ki ja saali ki ru nʼmaŋ ki, niŋ fa tu mɛlɛkɛn bɛɛ ri i arì yɛri ji arìbɛ̀ɛ̀ wu, tu niŋ ni i nʼbi tu ntiŋ ŋmɛni. 24 Yibɛ̀ɛ̀ kaashi tɔri ri i ta saali ki ra, kí i ta nʼja, miŋ tu mari kiri nʼbi-i ɲaan wɔ̀ tɛ, nka kíbɛ́ɛ́ ɲaniŋ tu Yesu yɛri ki ra ki.»
25 Niŋ ki ra, Yesu i nʼbi kalindaŋ fuuli ki tɛ: «Ɲakili abɛ́ɛ́ rapo ki dɛ! Kirinŋ wɔ cintɔnŋ kiri wulu wɔri bi-i, nfɛnŋ na abɛ́ɛ́ bili-la niŋ ni na jona ki? 26 Nʼbi-ri tu Mwutɔnŋ ki a na cɔɔri ka ɲaan ka tɛ ŋì i kila ŋì i de awɔ nɔɔri ki ru ki wa?» 27 Niŋ kɔɔtɛ, *Sɛbɛ ki wulu finŋ woo finŋ bi-i ntiŋ bi ki sun, ntiŋ i niŋ bataa ɲaan bi fɔɔ kí tɛ. Ntiŋ i nʼtɔnpa wulu wɔri bi-i Kirinŋ wɔ cintɔnŋ Musa wɔ sariya sɛbɛ kiri ru, ŋì i ta so Kirinŋ wɔ cintɔnŋ kiri wɔ wulu kiri sun.
28 Kí myɛ arì ta kili ki tɛ waarinŋ wɔ̀ ru, Yesu nʼji-i miŋ tu ntiŋ a fwuude ntiŋ i tiri jɛŋ. 29 Nka kí i ntiŋ nafɛ: «Tu yi fan, sabu sunŋ ki kɔ-i kɔ, niŋ fa cii ra so miŋ sun.» Ntiŋ i de kí fan kili ki ru, ntiŋ i ta jɛri kí fan. 30 Ciiku ki na-i maan, kí fa Yesu i sɔɔ nufinŋ ki tɛ arìmaŋ fan. Ntiŋ i bwuru ki shi, ntiŋ i baraka wɔri Kirinŋ tɛ, ntiŋ i nʼnucɛn, ntiŋ i nwɔ̀ri kí tɛ.a 31 Mìŋ manaanŋ tenŋ ki ru, kí ɲaninaŋ kiri i rawwulu, kí i nʼtɔ tu Yesu i. Nka ntiŋ i juu san kí kanfɛ. 32 Koŋ fuuli ki i tu nʼbi-a arìmaŋ tɛ: «Ntiŋ wuru wulu ki bi-a yibɛ̀ɛ̀ tɛ saa ki fan, ntiŋ i Kirinŋ wɔ wulu ki kɔri ki bika shɔ-ri yibɛ̀ɛ̀ tɛ, yibɛ̀ɛ̀ ciiru di-ri ki wa?»
33 Mìŋ manaanŋ tenŋ ki ru, kí i jɔrɔkɔ, kí i arì pwulu tiri Yerusalɛmu. Kí i ta cindaŋ koŋ bwununtenŋ ki fa kalindaŋ pyɛ kiri rakɔlimaan kila arìmaŋ sun. 34 Niŋ ni tu kí tɛ: «Sɔbɛ ra, Ŋuntiŋ ki ɲaninkulutɔnŋ yɛ! Ntiŋ a yɛri ji-i Simɔŋ wu.»
35 Niŋ na, bi wɔ̀ ma-i kíbɛ́ɛ́ koŋ fuuli ki wu saa ki fan, niŋ fa kí Yesu tɔ-i bwuru ki ruyali yalimaŋ ki ru ɲaan wɔ̀ tɛ, kíbɛ́ɛ́ i niŋ nakali kalindaŋ pyɛ kiri tɛ sɛbɛ.
Yesu a yɛri ji-i awɔ kalindaŋ kiri wu
(Matiyu 28:16-20; Maraka 16:14-18; Yuhana 20:19-23; Mabi kiri 1:6-8)
36 Ŋì i kí tu niŋ wulu ki ra, Yesu i a yɛri ji kí wu, kí i ntiŋ ja arì faninmwuŋ, ntiŋ i kí co: «Kirinŋ wɔ ɲaanfɛfili ki ji á fan!» 37 Kí miniŋ i cɛn, kɛmi i de kí ru, sabu nʼwuru kí ɲaanna tu arìbɛ̀ɛ̀ konminiŋ ja-a. 38 Nka Yesu tu kí tɛ: «Abɛ́ɛ́ kɛni-na, á i sii sii-ri nfɛnŋ na kɔɔn? 39 A míŋ gbɛ kiri fa nʼkanŋ kiri shɛɛli, míŋ ki yɛ terere. A na myɛ shɛɛli míŋ na. Miŋ tu abɛ́ɛ́ ɲaniŋ yɔ nʼna ɲaan wɔ̀ tɛ, shɛn yɔ míŋ nu, wɔ i ji nʼnu, shɛn fa wɔ dumiŋ ɲini nu ki.» 40 Niŋ wulu ki sun, ntiŋ i a gbɛ kiri fa a kanŋ kiri ji kí wu. 41 Niŋ fa a fɔn na, ŋì i bo kí tɔnŋ sun, fɔ kí ciirudika jɛ ki i waa-ri bili-i nʼna sɛbɛ. Niŋ na, ntiŋ i kí ranɔri: «Nufinŋ yɔ abɛ́ɛ́ gbɛ kaŋ wa?» 42 Kí i yɛrinŋ biliturumaan wɔri ntiŋ tɛ. 43 Ntiŋ i nʼmwu, ntiŋ i nʼnu kí ɲaanna.
44 Niŋ kɔɔtɛ, ntiŋ tu kí tɛ: «Míŋ wuru faa-a abɛ́ɛ́ fan waarinŋ wɔ̀ ru, míŋ wuru mìŋ ka bi-a abɛ́ɛ́ tɛ, nʼtu bi wɔ̀ri sɛbɛ míŋ bi ki sun, Kirinŋ wɔ cintɔnŋ Musa wɔ sariya sɛbɛ ki ru, niŋ fa nwɔ̀ri sɛbɛ-i Kirinŋ wɔ cintɔnŋ kiri wɔ wulu ki fa Kirinŋ tɛ shu kiri sɛbɛ kiri ru, nʼtu niŋ ni bataa kakan yìrì i ma miŋ tu yìrì bi-i ɲaan wɔ̀ tɛ.»
45 Niŋ ɲaan ki tɛ, ntiŋ i kalindaŋ kiri ɲakili kiri rawwulu, nwɔma kí i Kirinŋ wɔ wulu kiri kɔri kiri tɔ. 46 Niŋ fa ntiŋ tu kí tɛ tu nʼsɛbɛ Kirinŋ wɔ wulu ki ru tu kí a na Kirinŋ Ɲaannakonshimaan ki makwulujuu, kí i nʼkilɛn, nka tu ŋì a na ŋmɛni a beŋ ki sunŋ byantɔnŋ ki i. 47 Tu ŋì i tɔnpa Yerusalɛmu, ŋì a na sunjo ntiŋ tɔra juniɲa bataa ru, tu konaŋ kiri ntɔribi arɔ̀ɔ̀ bijɛ kiri ra, kí i ji Kirinŋ tɛ, nwɔma ŋì i kɔ́ɔ́ bijɛ kiri tu kí tɛ.
48 Niŋ kɔɔtɛ, Yesu tu kí tɛ: «Abɛ́ɛ́ kiri yɔ mɔ́ɔ́n bi kiri bataa shɛɛri kiri i. 49 Míŋ Tiŋ ki arì tɔnŋ wɔri-i abɛ́ɛ́ tɛ wɔ̀b bira, Míŋ a niŋ bo na abɛ́ɛ́ sun. Nka nwɔ̀ yɔ abɛ́ɛ́, á tu kili ka ra sun, nwɔ̀ yɔ Yerusalɛmu, fɔ á i faa sotinbi ki ra, ŋì i po Kirinŋ gbɛ cuunŋ.»
Yesu tunpa-i kirinpɔli ki ru
(Matiyu 6.19-20; Mabi kiri 1.9-11)
50 Niŋ kɔɔtɛ, Yesu i po san kalindaŋ kiri wu kili ki ru, ntiŋ i ta kí wu fɔ Bɛtani kɛlinŋ tɛ. Niŋ mani nu, ntiŋ i a gbɛ kiri fɛshi cuunŋ, ntiŋ jubasan kí tɛ. 51 Ntiŋ tu-i juba ki san-a kí tɛ, ntiŋ i fɛshi san kí ra, ntiŋ i ta kirinpɔli ki ru. 52 Kalindaŋ kiri i ntiŋ gbɛ. Kí kɔ-i niŋ na waarinŋ wɔ̀ ru, kí ciirudimaan i arì pwulu tiri Yerusalɛmu. 53 Niŋ waaci ki ru, kí wuru Kirinfusinaŋ ki ra waarinŋ bataa ru, kí i baraka wɔri-ri Kirinŋ tɛ, niŋ fa kí i nʼgbɛ-ri.