Kanimari bɛɛ wɔ Kirinŋ kafinŋ ki
(Maraka 12:41-44)
21
1 Ŋì i kí tu Kirinfusinaŋ ki ra, Yesu i a ŋuniŋ fɛshi, ntiŋ i nafulutiŋ kiri shɛɛli arì gbɛfɛfinŋ kiri bɛɛ ri bo-a Kirinŋ kafinŋ bofinŋ ki ru. 2 Ntiŋ i kanimari gbɛwɔ bɛɛ ja tama fuuli bo-a kafinŋ bofinŋ ki ru sɛbɛ. 3 Niŋ na, Yesu i nʼbi: «Sɛli ki ra, míŋ yɔ nʼbi-a abɛ́ɛ́ tɛ nʼtu, kanimari gbɛwɔ ka jalinŋ wɔ̀ wɔri-i, nʼtu nʼmwɔ koŋ pyɛ kiri bataa wɔ wu. 4 Sabu koŋ pyɛ kiri jalinŋ bo-i, kɔ́ɔ́ nu a so nwɔ̀ sun ki; nka mìŋ mari wuru ra finŋ wɔ̀ sɔɔ nmari i a yɛri tɔnnafɛ, nmari niŋ ki bataa wɔri-i.»Yesu wulu bi-i Kirinfusinaŋ ki gwubi ki sun sɛbɛ
(Matiyu 24:1-2; Maraka 13:1-2)
5 Koŋ bɛɛ ri wuru Kirinfusinaŋ ki ɲɛnika ɲaan ki rakali-la. Konaŋ kiri faa shɔɔrinŋ wɔ̀ri fa finŋ shɔɔrinŋ wɔ̀ri wɔri wuru Kirinŋ tɛ, niŋ ni bataa wuru konaŋ ɲaninpontɛfinŋ ni. Yesu i nʼbi kí tɛ: 6 «Abɛ́ɛ́ ɲaniŋ yɔ finŋ wɔ̀ri ra, jibi ri yɔ yiri-ra maŋ, hali kwɔ kiri tɔri tenŋ na na tu arìmaŋ sun ki, kí a na yìrì bataa warinka.»
Juniɲa nakɔɔra ki taanmashɛ kiri
(Matiyu 24:3-14; Maraka 13:3-13)
7 Kí i Yesu ranɔri: «Kalimɔɔ, bi kari ra na ma waarinŋ danwɔ ru? Taanmashɛ danwɔ ri nʼji-a tu niŋ bi kiri ra na ma?» 8 Yesu tu kí tɛ: «Á a yɛri paka shɔ, nwɔma koŋ fa so á fɔni-i ki. Sabu, koŋ mwɔɔnna a na, kí i míŋ tɔ ye arì ra, tu arìbɛ̀ɛ̀ míŋ yɛri ki i, tu juniɲa kɔ waaci ki so. A fa bili niŋ ni na ki, á i pa kí cɛfan ki. 9 Abɛ́ɛ́ na kari kiri fa koŋ kaanmaan kiri wulu ki rama waarinŋ wɔ̀ ru, á fa kɛni ki. Sabu, niŋ ni kakan-i niŋ ni i ma sun, nka, niŋ a na ji juniɲa ki kɔ ki i shuu ki.»
10 Ntiŋ tu kí tɛ, niŋ na: «Shiya ki bɛɛ ra na jɔrɔkɔ nʼtɔri cɛfan, kí i arìmaŋ kari-ri, kɛniŋ fa kɛniŋ i bo arìmaŋ na. 11 Fwuniŋ sɛrɛsɛri ki i mwɔ pwɔkulinŋ ki sun, niŋ fa bɛɛ fa kira jɛ ri i de mani mwɔɔnna nu. Kɛmi finŋ ni fa taanmashɛ sun bi sinaŋ ni i ji kirinpɔli ki ra.
12 Nka niŋ jɛŋ, kí a na abɛ́ɛ́ pa, kí i á makwulujuu kusɛbɛ. Kí i á de kitikwurutɔnŋ kiri gbɛfɛ Yawutu kiri wɔ kalinfu ki ru, kí i á bo nkasu ru, kí i kila, kí i ta á wu masa kiri fa kɛnintiŋ kiri ɲaanfɛ, míŋ tɔ ki bira. 13 Niŋ bataa ra na ji sababu, abɛ́ɛ́ so mɔ́ɔ́n wulu ki bi-i kí tɛ. 14 Á a ɲakili tu nʼna, tu abɛ́ɛ́ kakan á i a ciirufɔni awɔ́ wulubi wɔ̀ kiri bira kí ɲaanfɛ ki. 15 Sabu míŋ yɛri ki a na ɲakilitinbi wulu de abɛ́ɛ́ daru, nwɔ̀ a ji sababu koŋ a so abɔ́ɔ́ wulu ki rupwulu-i walima ntiŋ i nʼsɔsɔ ki. 16 Hali abɛ́ɛ́ jifinŋ kiri fa abɛ́ɛ́ ɲɛnsi kiri, ŋì i ta bo a tindaŋ kiri sun, niŋ fa awɔ́ wɔshuru kiri fɔn a na abɛ́ɛ́ de a ɲa kiri gbɛfɛ, kí i á kilɛn. 17 Konaŋ kiri ra na abɛ́ɛ́ bikwɔ arì sun míŋ tɔ ki bira. 18 Nka niŋ fa a fɔn na, abɛ́ɛ́ ŋununshinŋ tenŋ na cɛn fɔni ki. 19 Á a banba, á i ɲaanfɛkwulu ki pa á ra, nwɔma á i tu bilinabi ki sun. Niŋ ɲaan ki tɛ, abɛ́ɛ́ ɲini kiri ra arì mwu.»
Yesu Yerusalɛmu kili ki gwu wulu bi-i
(Matiyu 24:15-21; Maraka 13:14-19)
20 Yesu tu: «Abɛ́ɛ́ na nʼja tu ɲa kiri Yerusalɛmu nakwunu waarinŋ wɔ̀ ru, á nʼtɔ tu nʼgwu waari ki so. 21 Niŋ waari ru, koŋ wɔ̀ri a na ji Yude mari ki ru, tu niŋ ni bili ta tɔnŋ maŋ kiri ru. A nʼna nwɔ̀tiŋ ni kila Yerusalɛmu kili ki ru, tu niŋ ni bili po. A nwɔ̀ri na ji jaŋ fan, tu niŋ ni fa nʼbi tu arìbɛ̀ɛ̀ ra arì pwulu na kili ki ru ki. 22 Sabu niŋ jibi kiri ra na ji shɛsan jibi, nwɔma kirinŋ wɔ wulu Sɛbɛ ki ciiru wulu kiri i rafaa. 23 Niŋ jibi kiri ra na ji ɲaniŋ sinaŋ mari ciitiŋ kiri fa danɲintiŋ kiri gbɛ, sabu cɔɔri sinaŋ na ji Isirayɛli kɛniŋ ki ru, niŋ fa Kirinŋ na na awɔ tɔnkwulu ki ji nʼnu konaŋ ki wu. 24 Kí a na nʼbɛɛ ri kilɛn baamwuru ra, kí i nʼtɔri ri pa, kí i niŋ ni jeɲe ji joŋ ni kɛniŋ tɔri ri ru. Shiya tɔri ri a na Yerusalɛmu ciriki arì kanfɛ faratata, fɔ niŋ shiya kiri wɔ waaci ki i ta nafaa.»
Koŋ Danshuru ki na bi ki
(Matiyu 24:29-31; Maraka 13:24-27)
25 «Taanmashɛ ri a na ja sunŋ ki, ɲɛ ki niŋ fa sɔriniŋ kiri ra kirinpɔli ki ra. Pwɔkulinŋ ki sun, jukwululuŋ ni a na jɔrɔkɔ wɛɛlufinju ki sun yìrì i sɔnkɔ-ri, fɔ ŋì i shiya kiri ciiru fɔni, ŋì i daŋ kɔ kí sun. 26 Bi wɔ̀ri a na ma pwɔkulinŋ ki sun, niŋ ciirufɔni ki a na koŋ mwɔɔnna kilɛn, sabu kirinpɔlila finŋ kiri ra na yuuyuu ɲaanmi arìmaŋ wu. 27 A niŋ ma, kí a na Koŋ Danshuru ki yirira ki ja loŋ kiri faninmwuŋ sotinbi niŋ fa awɔ nɔɔri sinaŋ ki wu.
28 A niŋ bi kiri na tɔnpa waarinŋ wɔ̀ ru, á a ŋuniŋ kiri fɛshi, á i kirinna shɛɛli, sabu abɛ́ɛ́ mwu jibi ki myɛ-ɛ.»
Yesu tu afɔɔn wulu ki a kɔ fɛsɛfɛsɛ ki
(Matiyu 24:32-35; Maraka 13:28-31)
29 Yesu wulusuntalinŋ bɛɛ bi-i kí tɛ, ntiŋ tu: «Abɛ́ɛ́ fili jirinŋ ki fa jirinŋ pyɛ kiri shɛɛli. 30 Abɛ́ɛ́ nʼja ŋì i da ki cɔ-ri waarinŋ wɔ̀ ru, abɛ́ɛ́ yɔ nʼtɔ-a tu yili ki myɛ. 31 Mìŋ ɲaan ki tɛ, abɛ́ɛ́ na nʼja tu niŋ bi kiri juu ma-a waarinŋ wɔ̀ ru, á nʼtɔ tu Kirinŋ wɔ masabi ki myɛ. 32 Sɛli ki ra, míŋ yɔ nʼbi-a abɛ́ɛ́ tɛ, nʼtu jiintɔnŋ ki bataa ra beeni kɔ niŋ bi kiri bataa nafaabali ki. 33 Kirinpɔli ki fa pwɔkulinŋ ki a kɔ, nka mɔ́ɔ́n wulu ki a kɔ ki.»
A tu a ɲaanna waarinŋ bataa ru
34 Yesu tu: «Á a yɛri kɔrɔshi, á fa ncusun fyikatinbi, lɔmwunubi niŋ fa juniɲa ciiru koŋ ciirufɔnɔbi kiri i a ɲakili li ki, míŋ na jibi ki i na bali á ra ki. 35 Sabu miŋ tu jɔ yɔ bali-la yɛrinŋ na ɲaan wɔ̀ tɛ, niŋ jibi ki a na bali pwɔkulinŋ sun konaŋ ki bataa ra niŋ ɲaan ki tɛ. 36 Niŋ ki ra, á tu a ɲaanna, á i Kirinŋ nafɛ-ri waarinŋ bataa ru, nwɔma á i cunadibi kila. A niŋ ma, bi wɔ̀ri yiri-ra yɔ maŋ, abɛ́ɛ́ ra a mwu niŋ ni wu, niŋ fa abɛ́ɛ́ ra na so tu-i Koŋ Danshuru ki ɲaanfɛ.»