Ŋununlibi ki, niŋ fa bijɛ tu nʼtɛmaanna ki
(Matiyu 18:6-7, 21-22; Maraka 9:42)
17
1 Yesu tu awɔ kalindaŋ kiri tɛ: «Sɛli yɛ, bi ri yɔ maŋ, nwɔ̀ri yɔ konaŋ curu bo-a bijɛ ma ki sun, nka koŋ wɔ̀ yɔ niŋ bi kiri sababu ki i, bɔni ki yɔ nintiŋ wɔ. 2 Koŋ woo koŋ yɔ ji-a sababu ntiŋ i ka daŋ ka bɛɛ tenŋ ŋununli, ntiŋ i nʼfɔni, sana ntiŋ i niŋ ma, a kí kwɔtuntuŋ sinaŋ kɔli-li ntiŋ yɛɛra, kí i ta ntiŋ kee bo wɛɛlufinju ki ru, niŋ wuru ra pari ntiŋ sun. 3 Á a ɲakili tu a yɛri ra, á i a yɛri paka shɔ.A miŋ tindaŋ ki pɔli miŋ gbɛ, jɛbi nʼgbɛ. A ntiŋ ja awɔ pɔli ki tɔ, ntiŋ i a pwulu, ntiŋ wɔ pɔli ki tu ntiŋ tɛ. 4 A ntiŋ pɔli miŋ gbɛ hali kaan jɔnpɔni sunŋ ki ru, a ntiŋ na miŋ tɛ nʼfɔn tenŋ tenŋ ki ra, ntiŋ i na nʼbi: ‹Míŋ ntɔri nʼbi-i n’wɔ́ bi mamaan ki ra, nʼtu nʼtɛ›, nʼtu ntiŋ tɛ.»
Bilinabi pyaanŋ yɔ bi sinaŋ ma-a
(Matiyu 17:20)
5 Cindaŋ kiri tu Ŋuntiŋ ki tɛ: «Nʼbɛɛ bo yɔ̀ɔ̀ bilinabi ki sun.» 6 Ŋuntiŋ ki tu kí tɛ: «Hali abɔ́ɔ́ bilinabi ki gbɛka ki ji wuru fiŋa daŋ po-ri, abɛ́ɛ́ wuru ra so nʼbi-i jirinŋ ka tɛ tu: ‹nʼfa a kanŋ ki cɛn po, ŋì i ta a yɛri ye wɛɛlufinju ki ru›, nʼwuru a tu abɔ́ɔ́ wulu ki ra ncinŋ i.»
Joŋ wɔ̀ a tukulu ki faa-a
7 Yesu tu: «A joŋ ji abɛ́ɛ́ bɛɛ gbɛ, a niŋ joŋ ki ji ntiŋ wɔ ji ki ɲaannasuu-ra walima ntiŋ wɔ nafulufinŋ kiri nakpari-ra. A niŋ joŋ ki na, ŋì i po jaŋ ki fan waarinŋ wɔ̀ ru, ntiŋ yɔ awɔ joŋ ki dɔri-ra tu ŋì na sɔɔ, ŋì i nufinŋ ki nu wa? 8 Aayi dɛ! Míŋ yɔ nʼbi-a nʼtu ntiŋ nʼbi-a joŋ ki tɛ: ‹Nʼnukɔli, ŋi i nufinŋ si wɔri nʼtɛ, ŋí i nʼnu, ŋí i nʼmwunu. A míŋ pyii waarinŋ wɔ̀ ru, miŋ a kila ŋi i nʼbɛɛ nu, ŋi i nʼmwunu. Ŋì ma-a ninkunŋ ki wa?› 9 Ntiŋ a niŋ joŋ ki co tu niŋ awɔ cinŋ ma wɔ̀ ki bataa ma a ɲaan tɛ wa? 10 Mìŋ ɲaan tenŋ ki tɛ, cinŋ wɔ̀ bi ye-i abɛ́ɛ́ gbɛ sun, abɛ́ɛ́ ja niŋ bataa ma miŋ tu nʼbi-i ɲaan wɔ̀ tɛ, á nʼbi a yɛri tɛ: ‹Yibɛ̀ɛ̀ yɔ baaramatɔnŋ gbansanŋ ni. Yibɛ̀ɛ̀ bo-i nwɔ̀ ra, yibɛ̀ɛ̀ niŋ bantenŋ ma-i. Yibɛ̀ɛ̀ gbɛ bi tɔri ceeli-la kili ki.›»
Yesu tuutiŋ koŋ byinŋ kene-i
11 Yesu tirira ki Yerusalɛmu, ntiŋ i de Galile fa Samari mari kiri faninmwuŋ. 12 Ntiŋ deera kili bɛɛ ra, tuutiŋ koŋ byinŋ i ta ntiŋ ŋununafu. Kí i tu mani narimwuŋ, 13 kí i arì wulu so ntiŋ sun: «Kalimɔɔ Yesu, á yibɛ̀ɛ̀ sunmakwulupa.»
14 Yesu kí ja-i, ntiŋ tu kí tɛ tu, kí ta arì yɛri ji Kirinŋ tɛ sarakawɔrɔtɔnŋ kiri wub. Ŋì i tuutiŋ kiri tu saa ki fan, kí bataa i kene. 15 Kí ru koŋ tenŋ nʼja-i tu afinŋ kene waarinŋ wɔ̀ ru, niŋ pwulula ki i na Yesu tɛ. Niŋ i tu baraka wɔri-ra Kirinŋ tɛ a sɔbɛ ra. 16 Nʼso-i Yesu tɛ waarinŋ wɔ̀ ru, ŋi i ta nʼkwushiri ntiŋ fɛ, ŋi i nʼɲaanfɛ ki da fwuniŋ sun, ŋi i baraka wɔri ntiŋ tɛ. Niŋ koŋ ki wuru Samaritɔnŋ i. 17 Niŋ ki ra, Yesu tu: «Míŋ tu koŋ byinŋ ki bataa kene ki wa? Koŋ teenpɔni pyɛ ki ji? 18 Koŋ kila kíbɛ́ɛ́ ru nwɔ̀tiŋ a pwulu, ntiŋ i na baraka wɔri Kirinŋ tɛ, ka jɛ ka ciniŋ ki wa?» 19 Niŋ kɔɔtɛ Yesu i nʼbi shuru ka tɛ: «Jɔrɔkɔ, ŋi i tiri, mɔɔn bilinabi ki nʼmwu-i.»
Kirinŋ wɔ Masabi ki nanama taanmashɛ kiri
(Matiyu 24:23-28, 37-41)
20 Farinsiyɛnŋ kiri i Yesu ranɔri tu: «Kirinŋ wɔ Masabi ki ra na waarinŋ danwɔ ru?» Ntiŋ tu kí tɛ: «Kirinŋ wɔ Masabi ki a na miŋ tu konaŋ sunufinŋ i ki. 21 Koŋ a na nʼbi sɛbɛ ki tu: ‹Á nʼshɛɛli, nʼyɔ kwumaŋ› walima ‹nʼyɔ keŋ ka›, sabu Kirinŋ wɔ Masabi ki i juu abɛ́ɛ́ faninmwuŋ kɔ.»
22 Niŋ kɔɔtɛ, Yesu i nʼbi awɔ kalindaŋ kiri tɛ: «Waaci a na so, abɛ́ɛ́ a na nʼceeli, a i Koŋ Danshuru ki wɔ sunŋ tenŋ ja, nka abɛ́ɛ́ a na nʼja ki.
23 Konaŋ kiri ra na nʼbi abɛ́ɛ́ tɛ: ‹Á nʼshɛɛli, nʼyɔ kwumaŋ› walima ‹á nʼshɛɛli, nʼyɔ keŋ ka.› Á fa nʼpa kí cɛfan ki dɛ! 24 Kirinŋ ki yɔ ŋani-na kirinpɔli ki kɛlinŋ tenŋ tɛ, nʼsarinŋ ki i ja kɛlinŋ tɔri ki tɛ ɲaan wɔ̀ tɛ, Koŋ Danshuru ki a na ji mìŋ ɲaan tenŋ ki tɛ a na shikaŋ ki ru. 25 Nka sana niŋ i ma, waajibi yɛ, ntiŋ kakan-i ntiŋ i cɔɔri kusɛbɛ, niŋ fa jiintɔnŋ ki i a kaan ntiŋ tɛ.
26 Bi wɔ̀ri ma-i Nawu wɔ sunŋ ki rac, niŋ ni bishi ri a na ma Koŋ Danshuru ki na waari ki ru sɛbɛ. 27 Konaŋ kiri tu wuru nufinŋ nu ki ra, niŋ fa mwunufinŋ mwunu ki fa cɛn tan kiri ra, fɔ ŋì i ta so Nawu de jibi ki sun kwurinŋ sinaŋ ki ru; judali sinaŋ ki i kila, ŋì i na, ŋì i kí bataa kilɛn. 28 Walima, ŋì a na ji miŋ tu nʼma-i Lɔti wɔ sunŋ ki ra ɲaan wɔ̀ tɛ: Konaŋ kiri tu wuru nufinŋ nu ki ra, niŋ fa mwunufinŋ mwunu ki ra, kí i arɔ̀ɔ̀ ku ri ju-ri, kí i arɔ̀ɔ̀ ji ri kaan-ni, niŋ fa kí arɔ̀ɔ̀ fu ri tan-ni. 29 Nka jibi wɔ Lɔti po san-i Sodɔmud kili ki ru, tuu fa kiribi i po kirinpɔli ki ra miŋ tu kirinŋ judaŋ, ŋì i na konaŋ ki bataa kilɛn. 30 Koŋ Danshuru ki a na a yɛri ji jibi wɔ̀, niŋ shikaŋ, ŋì a na ji ninkunŋ.
31 Niŋ shikaŋ, a niŋ na ma, ŋì i hali nwɔ̀tiŋ tu tanka sun, a ntiŋ wɔ finŋ kiri ji ntiŋ gbɛfɛ ki, ntiŋ fa a yɛri kɔli jɛri de-a fu ki ru a i yìrì shi-a kili ki. Mìŋ ɲaan ki tɛ, a nʼna fa nwɔ̀tiŋ wu juunŋ, ntiŋ fa a ciniŋ pwulu kulu ki. 32 Nwɔ̀ ma-i Lɔti wɔ mari ki wu, á a ɲakili bo niŋ tɛe. 33 Niŋ shikaŋ, nwɔ̀tiŋ a na ji nʼtɛ a i a ɲinita ki mwu, nintiŋ a bɔni nʼnu. Nka nwɔ̀tiŋ a na bɔni a ɲinita ki ru, nintiŋ a nʼmwu. 34 Míŋ yɔ nʼbi-a abɛ́ɛ́ tɛ, nʼtu niŋ shikaŋ cii ki ru, a nʼta fa koŋ fuuli wu bilifinŋ tenŋ nu, koŋ tenŋ ki a na shi san koŋ tenŋ ki na. 35 Mari fuuli a na tu finŋ ɲɛ-a arìmaŋ fan mani tenŋ nu, tenŋ ki a na shi san tenŋ ki ra. [ 36 Shuru fuuli a na ji arìmaŋ fan ji tenŋ nu, tenŋ ki a na shi san tenŋ ki ra.»]
37 Kalindaŋ kiri i Yesu ranɔri: «Yibɛ̀ɛ̀ Ŋuntiŋ, niŋ a na ma mani danwɔ ru?.» Ntiŋ tu kí tɛ: «Finŋ kwuu ki ji mani wɔ̀ ru, juba kiri yɔ arìmaŋ nakɔli-la niŋ mani nu.»