Ɲaanjiwulu wɔ̀ bi-i nafulu ŋununnu sɔɔtɔnŋ kɛrɛbimaan bi ki sun
16
1 Yesu tu awɔ kalindaŋ kiri tɛ: «Nafulutiŋ sinaŋ bɛɛ wuru maŋ. Niŋ koŋ bɛɛ shi sɔɔ wuru awɔ nafulu ki ŋununnu. Konaŋ kiri i ta wú tɔ bi-ri nafulutiŋ ki tɛ, tu wú ntiŋ wɔ nafulu ki nuli-a. 2 Wú ŋununtiŋ ki i wú dɔri, ntiŋ i na nʼbi wú tɛ: ‹Míŋ yɔ nwɔ̀ rama-a miŋ bi ki ru, niŋ di míŋ tɛ ki. Miŋ n’wɔ baara ki ma-i ɲaan wɔ̀ tɛ, niŋ ɲaan bi míŋ tɛ, sabu miŋ a so tu-i mɔ́ɔ́n nafulu ki ŋununnu kili ki.› 3 Niŋ na, wú i nʼbi a ciiru: ‹Míŋ ŋununtiŋ ki tu a ra míŋ kwɔ san awɔ jalinŋ ki sun. Míŋ a nʼji dɔɔkunŋ dɔɔ? Baraka míŋ nu ŋí i ji kaan ki, a nʼbi tu míŋ nafɛ tan de-ri, niŋ ɲaankwunŋ i míŋ tɛ. 4 Míŋ a nwɔ̀ ma dɔɔ, míŋ niŋ tɔ-i. Míŋ a niŋ ma nwɔma a kí na míŋ kwɔ san jalinŋ ki sun waarinŋ wɔ̀ ru, kpeeri i kila nwɔ̀ri a míŋ ŋununafuka shɔ arɔ̀ɔ̀ mani ni nu.›5 Niŋ ɲaan ki tɛ, koŋ wɔ̀ri kɔni kiri shi wuru wú ŋununtiŋ ki gbɛ, wú i kí dɔri tenŋ tenŋ i. N’wɔ́ jɔnɔ na-i, wú i niŋ nanɔri: ‹Míŋ ŋununtiŋ ki wɔ jinŋ miŋ na?› 6 Niŋ tu wú tɛ: ‹Ŋuŋ duŋ yaataanŋ.› Wú tu niŋ tɛ: ‹Sɔɔ, mɔɔn kɔni ki sɛbɛ ki i ka a. Nʼsɛbɛ jona, ŋuŋ duŋ yaafuuli fa byinŋ i.› 7 Wú tu nʼtɔri tɛ: ‹Miŋ ji, mɔɔn ki jinŋ i?› Niŋ tu wú tɛ: ‹Bilaŋ tɔtɔɔlinŋ yaataanŋ.› Wú tu niŋ tɛ: ‹Mɔɔn kɔni ki sɛbɛ ki i ka a. Nʼsɛbɛ tɔtɔɔlinŋ yaapyiiraŋ i.›»
8 Yesu tu nafulutiŋ ki niŋ nama-i waarinŋ wɔ̀ ru, ntiŋ i ka koŋ daalintiŋ ka tɔjii bi awɔ kɛrɛbi bi mamaan ki bira. Yesu tu sɛbɛ: «Sɛli ki ra, nwɔ̀ri ɲaniŋ yɔ po-a ka juniɲa ka tɛ, niŋ ni yɔ arìmaŋ faninmwuŋ bi kiri ma-a kɛrɛbi wu, ŋì i fwuu manisarinŋ nu tɔnŋ kiri sun.»
9 Yesu tu sɛbɛ: «Míŋ yɔ nʼbi-a abɛ́ɛ́ tɛ, nʼtu á wɔshuru ri ceeli a yɛri ra ka juniɲa ka ru nafulu ki wu, nwɔma a nʼna kɔ waarinŋ wɔ̀ ru, niŋ wɔshuru kiri i so abɛ́ɛ́ ŋununafuka shɔ-i Kirinŋ wɔ ki ru. 10 Konwɔ́tiŋ yɔ koŋ sɔbɛ finŋ pyaanŋ bi ru, nintiŋ a ji koŋ sɔbɛ bi sinaŋ bi ki ru sɛbɛ. Nka konwɔ́tiŋ yɔ daalintiŋ bi pyaanŋ ki ru, nintiŋ fani na ji daalintiŋ bi sinaŋ bi ki ru sɛbɛ. 11 Ka juniɲa ka ru nafulu wɔ̀ yɔ koŋ fɔni-na, a koŋ bili abɛ́ɛ́ ra niŋ bi ru ki, nkɛnŋ a jɛɛn ntiŋ i bili abɛ́ɛ́ ra, ntiŋ i nafulu sɔbɛ bi ye abɛ́ɛ́ gbɛsun? 12 A abɛ́ɛ́ sii kontɔrifinŋ ki sun, á i niŋ marika shɔ ki, nkɛnŋ a jɛɛn ntiŋ i abɛ́ɛ́ yɛrima ki wɔ ki wɔri a tɛ?
13 Baaradaŋ so-a cinŋ ma-i ŋununtiŋ fuuli tɛ ki, sabu ŋì a tenŋ ki bikwɔ a sun, ŋì i tenŋ bidi a tɛ, walima, ŋì a a kɔli tenŋ na, ŋì i a ranari tenŋ na. Mìŋ ɲaan tenŋ ki tɛ, abɛ́ɛ́ a so baara ma-i Kirinŋ tɛ, á i nʼma jalinŋ ki tɛ mìŋ waaci tenŋ ki ru ki.»
Yesu wɔ wulusuntalinŋ tɔri kiri
(Matiyu 11:12-13; 5: 31-32; Maraka 10:11-12)
14 Jalinŋ ki bidi wɔ̀ tan-i Farinsiyɛnŋ kiri tɛ, niŋ ni Yesu wɔ wulu kari rama-i waarinŋ wɔ̀ ru, kí i yɛtan bo-ri ntiŋ sun. 15 Ntiŋ tu kí tɛ: «Abɛ́ɛ́ yɔ a yɛri ji-a koŋ fɔɔmaan ni konaŋ kiri ɲaanna, nka Kirinŋ ɲaniŋ yɔ abɛ́ɛ́ ciiru kiri ra, sabu bi wɔ̀ri yɔ bi sinaŋ ni konaŋ kiri ɲaanna, niŋ ni yɔ ɲii nʼnu finŋ ni Kirinŋ ɲaanna.
16 Fɔlɔfɔlɔ, Kirinŋ wɔ sariya ki fa Kirinŋ wɔ cintɔnŋ kiri wɔ wulu kiri wuru sɔɔ-ra konaŋ kiri i kali-li, fɔ ŋì i na so Wutɔnŋ Yuhana wɔ waaci ki sun. Ŋì i shi niŋ sun sa, Kirinŋ wɔ Masabi ki ru wulujii ki i sunjo-a konaŋ kiri tɛ. Koŋ bataa i a sunfuru-ra kí i demaŋ ceeli-li niŋ Masabi ki ru. 17 Kirinpɔli ki fa pwɔkulinŋ kiri ra so kɔ-i, nka Kirinŋ wɔ sariya ki wuludaŋ tenŋ a so po san-i nʼmaŋ ki.
18 A koŋ woo koŋ awɔ mari fwuru ba, ntiŋ i nʼtɔri cɛn, nintiŋ yɔ nankulunbi ma-a. A koŋ woo koŋ mari fwuru bamaan cɛn, nintiŋ yɔ nankulunbi ma-a sɛbɛ.»
Ɲaanjiwulu wɔ̀ bi-i nafulutiŋ sinaŋ ki fa Lansaari bi ki sun
19 Yesu i ka wulusuntalinŋ ka bi awɔ kalindaŋ kiri tɛ sɛbɛ: «Ka wuru nafulutiŋ sinaŋ bɛɛ. Wú wuru juulinŋ tɔtiŋ kpaafuru ri bo-a a sun, wú i nufinŋ jii nu-ni jibi woo jibi, niŋ fa wú i a ɲaannabyɛ-ri. 20 Gbɛwɔ bɛɛ wuru maŋ, nwɔ̀ tɔ wuru tu Lansaari. Niŋ sun ki bataa wuru ta ri, wú bili wuru nafulutiŋ ka wɔ mani ki tɔnŋ na. 21 Nufinŋ bwulubwulu wɔ̀ri wuru fɛɛn-na nafulutiŋ ki wɔ nuŋ numaŋ ki ru, Lansaari wuru nʼtɛ a i niŋ ni kila nu. Nka wú bilimaan ki tu-ri niŋ mani nu, kwuu kiri wuru na-a wú ra ta kiri sunfyɛn-ni.
22 Ka gbɛwɔ ka na-i beeni, Kirinŋ wɔ mɛlɛkɛn kiri i wú shi, yìrì i ta wú sɔɔ Aburahamu tɔntɛ Alijina ki ru. Nafulutiŋ ki fani i na beeni, kí i ntiŋ kwuu ki ye. 23 Ŋì i nafulutiŋ ka ɲaanfɛkwulumaan ki tu Jaanama ki ru, ntiŋ i a ŋuniŋ fɛshi, ntiŋ i Aburahamu ja mani narimwuŋ, Lansaari i ji ntiŋ tɔntɛ. 24 Niŋ na nafulutiŋ ki i dɔri tan, ntiŋ i nʼbi: ‹Míŋ tiŋ Aburahamu, á míŋ sunmakwulupa! A Lansaari bo ta a gbɛnaŋ ki ŋuniŋ ki de ju ru, wú i na míŋ nɛninɛŋ ki fili niŋ wu, sabu míŋ cɔɔrika jitan-i ka tuu ka ru.› 25 Aburahamu tu nafulutiŋ ki tɛ: ‹Nʼdaŋ, nʼɲakili bo nʼtɛ tu waarinŋ wɔ̀ ru miŋ wuru juniɲa ciiru, tu miŋ n’wɔ ɲaanfɛfili ki kila niŋ waari ru ŋi i Lansaari tu awɔ ɲaanfɛkwulu ki ru. Dɔnsaŋ, Lansaari yɔ awɔ ɲaanfɛfili ki ru, miŋ i ji n’wɔ ɲaanfɛkwulu ki ru. 26 Niŋ bantenŋ i ki, bili nʼna tu kukuta sinaŋ yɔ yibɛ̀ɛ̀ fa abɛ́ɛ́ faninmwuŋ. Niŋ ɲaan ki tɛ, a konwɔ́tiŋ ji nʼtɛ a i po kwumaŋ a i ta abɛ́ɛ́ tɛ, nintiŋ fa so fwuu-u ki, a nwɔ̀tiŋ ji nʼtɛ a i po abɛ́ɛ́ tɛ, a i na yibɛ̀ɛ̀ tɛ, niŋ fani fa so fwuu-u ki.› 27 Nafulutiŋ ki tu: ‹Míŋ tiŋ, míŋ yɔ abɛ́ɛ́ rafɛ-a, á Lansaari bo ta míŋ tiŋ ki wɔ kaniŋ ki sun, 28 sabu míŋ tindaŋ koŋ taanŋ yɔ maŋ, wú i ta kí racin, nwɔma kí fa na ka ɲaniŋ ka ru sɛbɛ ki.› 29 Aburahamu tu nafulutiŋ ki tɛ: ‹Kirinŋ wɔ Sariya ki fa Kirinŋ wɔ cintɔnŋ kiri wɔ wulu kiri yɔ kí fan maŋ, kí arì tɔɔnye niŋ ni tɛ, kí i yìrì pa.› 30 Nafulutiŋ ki tu: ‹Aayi, míŋ tiŋ Aburahamu, niŋ a nʼpo ki, nka koŋ beenimaan ki bɛɛ ja ji bo ta wulubi kí tɛ, kí a bili niŋ na, kí i ntɔribi arɔ̀ɔ̀ bijɛ kiri ra, kí i na Kirinŋ tɛ.› 31 Aburahamu tu niŋ na: ‹A kí so bili-i Kirinŋ wɔ sariya ki fa Kirinŋ wɔ cintɔnŋ kiri wɔ wulu kiri ra ki, hali koŋ ŋmɛni po san konkwuu kiri ru, ntiŋ i ta wulubi kí tɛ, kí a bili nʼna fyewu ki.›»