Ɲaanjiwulu wɔ̀ bi-i saanaŋ fɔnimaan jamaan ki bi ki
(Matiyu 18:12-14)
15
1 *Ɲinisarakɔlɔtɔnŋ kiri fa bijɛmatɔnŋ mwɔɔnna tɔri ri wuru na-a arì tɔɔnye-ri Yesu tɛ. 2 Farinsiyɛnŋ kiri fa sariya kalimɔɔ kiri niŋ ja-i waarinŋ wɔ̀ ru, kí i tɔnkunfɛ wulu bi-ri tɛ: «Á nʼshɛɛli, ka shuru ka yɔ a tu-a bijɛmatɔnŋ kiri i na-ni sɔɔ-ri a fan, fɔ kí i nuŋ nu-ni arìmaŋ fan.» 3 Niŋ ki ra Yesu i wulusuntalinŋ ka bi kí tɛ tu:
4 «A saa yaataanŋ ji abɛ́ɛ́ bɛɛ gbɛ, a tenŋ fɔni san yìrì ra, ntiŋ yaapyiiraŋ fa bwununtenpɔni ki kee tu-a maŋ, ntiŋ i ta tenŋ fɔnimaan ki ceeli ja ki wa? 5 A ntiŋ nʼja waarinŋ wɔ̀ ru, ntiŋ ciirudimaan ki yɔ nʼshi bili-la a yɛ sun, ntiŋ i na nʼwu a kaashi kiri maŋ ki ru. 6 A ntiŋ na so kulu ki ru, ntiŋ yɔ nʼbi-a awɔ wɔshuru kiri fa a sɔɔshi kiri tɛ: ‹Á a yoori míŋ fan, sabu mɔ́ɔ́n saa tenŋ wɔ̀ fɔni wuru i, míŋ nʼja-i.›»
7 Yesu tu: «Mìŋ ɲaan tenŋ ki tɛ, míŋ yɔ nʼbi-a abɛ́ɛ́ tɛ, nʼtu bijɛmatɔnŋ tenŋ nʼja ji ntɔribi awɔ bijɛ kiri ra, ntiŋ i a pwulu Kirinŋ tɛ, ciirudibi wɔ̀ yɔ ji-a Kirinŋ wɔ ki ru niŋ bira, hali niŋ bishi ma-a koŋ telimaan yaapyiiraŋ fa bwununtenpɔni bira ki, niŋ ni wɔ̀ maku kí i ntɔribi bi tɔri ra kili ki.»
Ɲaanjiwulu wɔ̀ bi-i warifɔ peeraŋ tenŋ fɔnimaan jamaan ki bi ki sun
8 Yesu tu sɛbɛ: «Mari danwɔ nʼmaŋ sɛbɛ, warifɔ daŋ byinŋ yɔ nwɔ̀ gbɛ, a tenŋ fɔni, tu nmari ra tuu cu, nmari i mani ki bataa su, nmari i wuluwulaaŋ tɛ kiri bataa shɛɛli cunadibi wu fɔ nmari i nʼja ki? 9 A nmari nʼja waarinŋ wɔ̀ ru, nmari ra a fulumaa kiri fa a sɔɔshi mari kiri dɔri, nmari nʼbi kí tɛ: ‹Á a yoori míŋ fan, sabu mɔ́ɔ́n warifɔ daŋ tenŋ wɔ̀ fɔni wuru i, míŋ nʼja-i.›» 10 Yesu tu: «Mìŋ ɲaan ki tɛ, míŋ yɔ nʼbi-a abɛ́ɛ́ tɛ nʼtu bijɛmatɔnŋ tenŋ ntɔribi awɔ bijɛ kiri ra, ntiŋ i a pwulu Kirinŋ tɛ, nʼtu niŋ ji-a ciirudibi Kirinŋ wɔ mɛlɛkɛn kiri gbɛ.»
Ɲaanjiwulu wɔ̀ bi-i daŋ fɔnimaan jamaan ki bi sun
11 Yesu tu sɛbɛ: «Danshuru fuuli wuru cɛɛnni bɛɛ gbɛ. 12 Jibi bɛɛ, pwaŋ ki i na nʼbi arì tiŋ ki tɛ: ‹Baba, mɔ́ɔ́n lu wɔ̀ ji-a kila abɔ́ɔ́ nafulu ki ru, á n’wɔ́ ki wɔri nʼtɛ.› Cɛɛnni ki i awɔ nafulu ki kila a daŋ fuuli ki faninmwuŋ. Pwaŋ ki wɔ ki i wɔri wú tɛ.
13 Nʼcin ki, pwaŋ ki i awɔ finŋ kiri bataa ju, wú i yìrì jalinŋ ki bo a gbɛ, wú i tiri a rumaanni kɛniŋ narimaan bɛɛ ru. Wú ta-i so niŋ kɛniŋ ki ru, wú i ta tu bikulinŋ ma ki ra, wú i a gbɛfɛ jalinŋ ki bataa nuli kɔ.
14 Wú na-i awɔ jalinŋ ki fa a gbɛfɛfinŋ kiri bataa nuli kɔ waarinŋ wɔ̀ ru, bɛɛ sinaŋ i de niŋ kɛniŋ ki ru, fɔ wú i waa-ri a yɛri ki wɔ nufinŋ ki kila-i. 15 Nʼna shɔ ki, wú i ta a yɛri wɔri niŋ kɛniŋ ki ru koŋ bɛɛ tɛ, wú i ji niŋ wɔ baaradaŋ i. Niŋ i wú bo ta awɔ ji ru, wú i ta niŋ wɔ cɛ ri ɲaannasuu-ri. 16 Bɛɛ ki kwulukajɛ ki wú ra, wú wuru ra a tu, wú i niŋ cɛ kiri wɔ nufinŋ ki bɛɛ nu, wú i a pyii, nka koŋ wuru jɛɛn-na ntiŋ i niŋ tɔri wɔri wú tɛ ki.
17 Ŋì wú tu niŋ na, jibi bɛɛ, wú i na sɔɔ, wú i a miiri, wú i ɲakili kila. Wú tu: ‹Míŋ tiŋ ki wɔ baaradaŋ kiri bataa yɔ nufinŋ nu-a arì pyiika, fɔ kí i nʼpyɛ tu-ri, míŋ i ji kwumaŋ, bɛɛ i nfaanna míŋ kilɛn!› 18 Wú tu: ‹Míŋ a tiri nʼtiŋ ki tɛ, ŋí i ta nʼbi kí tɛ: ‘Baba, míŋ bijɛ ma -i Kirinŋ ɲaanfɛ, ŋí i nʼma abɛ́ɛ́ wu sɛbɛ. 19 Míŋ kakan ŋí i dɔri tu abɛ́ɛ́ daŋ kili ki. A míŋ shi ji awɔ baaradaŋ ki bɛɛ.’› 20 Wú i jɔrɔkɔ niŋ ɲaan ki tɛ, wú i a pwulu-li a tiŋ kaniŋ ki ru.
Wú ta-i myɛ kaniŋ ki tɛ waarinŋ wɔ̀ ru, wú tiŋ ki i tu niŋ i wú yiri-ra ja mani narimwuŋ. Wú makwulu i ntiŋ pa. Ntiŋ i bili po, ntiŋ i ta wú ŋununafu ciirudibi wu, ntiŋ i a kɔlɔkɔli wú wu. 21 Wú tu a tiŋ ki tɛ: ‹Baba, míŋ bijɛ ma -i Kirinŋ ɲaanfɛ, ŋí i nʼma abɛ́ɛ́ wu sɛbɛ. Míŋ kakan ŋí i dɔri tu abɛ́ɛ́ daŋ kili ki.› 22 Nka wú tiŋ ki tu awɔ baaradaŋ kiri tɛ, tu kí na jɛrɛbi kiri bataa ru shɔɔrinŋ ki wu jona, tu kí i na niŋ bo wú sun, tu kí i pyɛɛranŋ ye wú gbɛnaŋ ki ra, niŋ fa tu kí i kari ye wú kanŋ na. 23 Ntiŋ tu kí tɛ: ‹Á ta naan tuula bulinŋ faamaan tenŋ pa, á i na nʼkilɛn, yi a yi radi jiŋ, 24 sabu míŋ daŋ wɔ̀ yɔ ka a, wú fɔni wuru i, jiŋ wú ja-i. Wú ji-i miŋ tu wú beeni, wú i ŋmɛni.› Kí i ɲaannabyɛ ki tɔnpa.
25 Niŋ waari ru, danshuru cɛɛnni ki wuru juunŋ. Niŋ pwulula ki na-i myɛ kulu ki tɛ waarinŋ wɔ̀ ru, niŋ i wɔshɛ wulu ki fa shupɔri wulu kiri rama. 26 Niŋ i baaradaŋ ki bɛɛ tenŋ dɔri, niŋ i niŋ nanɔri nʼɲaan sun. 27 Baaradaŋ ki tu danshuru cɛɛnni ki tɛ: ‹Miŋ pwaŋ ki namaan yɛ. Miŋ tiŋ ki naan tuula bulinŋ faamaan tenŋ kilɛn-i, tu sabu wú kenemaan na.› 28 Danshuru cɛɛnni ki niŋ nama-i waarinŋ wɔ̀ ru, niŋ tɔnŋ i kwulu, fɔ wú tu a ra de kulu ki.
Wú tiŋ ki i po, niŋ i na wulubi wú tɛ, ntiŋ i wú rafɛ. 29 Wú tu a tiŋ ki tɛ: ‹Míŋ ka jiri mwɔɔnna kari ma-i abɛ́ɛ́ fan kwumaŋ, ŋí i baara ki ma-ni, míŋ abɛ́ɛ́ wulu sɔsɔ sunŋ tenŋ sun ki. Nka sunŋ tenŋ abɛ́ɛ́ so hali saanaŋ wɔri-i míŋ tɛ, nʼfa n’wɔ́ wɔshuru kiri i yi ɲaannabyɛ ki. 30 Dɔɔ, abɛ́ɛ́ daŋ wɔ̀ ta-i awɔ jalinŋ ki bataa ruli nankulunmaari ru, niŋ na-i, abɛ́ɛ́ jɛɛn a i naan tuula faamaan kilɛn niŋ tɛ kɛ!› 31 Wú tiŋ ki tu wú tɛ: ‹Nʼdanshuru, miŋ yɔ míŋ fan kwumaŋ waaci bataa ru. Míŋ gbɛfɛfinŋ ki bataa yɔ mɔɔn. 32 Nka yi kakan-i yi i yi radi jiŋ, sabu miŋ pwaŋ wɔ̀ yɔ ka a, wú yɔ miŋ tu konwɔ́tiŋ beeni, ntiŋ i ŋmɛni. Wú fɔni wuru i, nka dɔɔ, wú ja-i.›»