Yesu kiratɔnŋ bɛɛ kene-i Nufaan Jibi ki sun sɛbɛ
14
1 Yawutu kiri wɔ Nufaan Jibi tɔri sun sɛbɛ, Yesu ta-i nuŋ nu Farinsiyɛnŋ ŋununtiŋ bɛɛ wɔ mani nu. Koŋ wɔ̀ri wuru niŋ mani nu, niŋ ni wuru Yesu pɛrɛkɛ-a. 2 Niŋ waaci ki ru, koŋ bɛɛ wuru niŋ mani nu, firi fyɛ kira wuru niŋ nu. 3 Yesu i wulu ki shi, ntiŋ i sariya kalimɔɔ kiri fa Farinsiyɛnŋ kiri ranɔri: «Ŋì i kɛɲɛ sariya ki wu, nʼfu-i koŋ kiratɔnŋ kene Nufaan Jibi ki sun daa walima nʼfu ki?.»4 Kí i arì gbansan, koŋ ntiŋ nupwulu ki. Niŋ na, Yesu i a gbɛ ki bili kiratɔnŋ ki sun, ntiŋ i ntiŋ kene, ntiŋ i ntiŋ bosaara. 5 Niŋ kɔɔtɛ, ntiŋ i nʼbi kí tɛ: «Nkɛnŋ abɛ́ɛ́ ru kwumaŋ, a ntiŋ daŋ walima ntiŋ wɔ naan fɛɛn kɔninta ru Nufaan Jibi ki sun, tu ntiŋ bili-la ntiŋ i nʼpo jona ki?» 6 Kí so niŋ nanɔri ki rupwulu-i ki.
Tɔtiŋ sɔɔmaŋ ɲaanna shirama ki
7 Ŋì i Yesu tu niŋ nufinŋ numaŋ ki ru, ntiŋ i nʼja tu koŋ wɔ̀ri dɔri wuru sɛbɛ, niŋ ni bɛɛ ri wuru koŋ tɔtiŋ sɔɔmaŋ ni ceeli de-a arì yɛri tɛ. Niŋ na, ntiŋ i wulusuntalinŋ bɛɛ bi kí tɛ. Ntiŋ tu: 8 «A koŋ miŋ dɔri cɛn ku nunama wu, fa ta sɔɔ tɔtiŋ sɔɔmaŋ nu ki. Sabu ŋì a so kila-i, tu ntiŋ koŋ tɔri dɔri nwɔ̀ tɔ gbɛ-i mɔɔn ki wu. 9 A nintiŋ na, koŋ wɔ̀ abɛ́ɛ́ bataa dɔri-i, a niŋ ja na miŋ tɛ, niŋ i na nʼbi tu miŋ sɔɔmaŋ ki wɔri koŋ tɔtiŋ tɔri ki tɛ, miŋ ɲaankwunkɔni ki a na jɔrɔkɔ, ŋi i ta sɔɔ kɔɔtɛ. 10 Nka a koŋ miŋ dɔri ninkunŋ, ta sɔɔ kɔɔtɛ sɔɔmaŋ ki bɛɛ ru. A miŋ ta sɔɔ niŋ mani nu, miŋ dɔritɔnŋ ki na nʼja tu miŋ sɔɔmaŋ ki shɔ niŋ mani nu ki, ntiŋ yɛri ki a na nʼbi miŋ tɛ: ‹Nʼwɔshuru, na sɔɔ sɔɔmaŋ tɔtiŋ ka ru kwumaŋ.› A niŋ ma waarinŋ wɔ̀ ru, niŋ yɔ baraka de-a miŋ nu koŋ pyɛ kiri ɲaanna. 11 Sabu koŋ woo koŋ yɔ a yɛri gbɛ-a, Kirinŋ na nintiŋ sunjɛri. Nka koŋ woo koŋ yɔ a yɛri sunjɛri-ra, Kirinŋ na nintiŋ gbɛ.»
Koŋ dɔrika ɲaan ki nufinŋ tɛ
12 Yesu i nʼbi a dɔritɔnŋ ki tɛ: «A miŋ suunna walima ciiku si nʼtu ŋi i nʼwɔri-ra kpeeri tɛ, fa n’wɔ wɔshuru ri walima nʼɲɛnsi walima nʼtindaŋ walima nʼkankanfan nafulutiŋ kiri bantenŋ dɔri nʼwu ki. Sabu niŋ ni yɛri kiri ra so miŋ dɔri-i nʼbɛɛ wu sɛbɛ, niŋ a ji miŋ tu kí mɔɔn ki tɔ ki san. 13 Nka a miŋ ja nufinŋ namɔni, gbɛwɔ kiri fa bɔlɔma kiri fa mwurunku kiri niŋ fa ɲaanfwuu kiri dɔri nʼwu. 14 A niŋ ma, miŋ a ji koŋ fɛrɛmaan, sabu niŋ ni a so mɔɔn ki tɔ ki kila wɔri-i nʼtɛ ki. Miŋ yɔ ta-a niŋ kila koŋ telimaan kiri ŋmɛni shikaŋ ki ru.»
Ɲaanjiwulu wɔ̀ bi-i koŋ dɔrimaan kiri bi ki sun nufinŋ sinaŋ ki tɛ
(Matiyu 22:1-10)
15 Koŋ wɔ̀ri fa Yesu sɔɔ wuru nufinŋ numaŋ ki ru, niŋ bɛɛ tenŋ niŋ wulu kiri rama-i, niŋ i nʼbi Yesu tɛ: «Koŋ wɔ̀ri a nufinŋ sinaŋ ki nu Kirinŋ wɔ Masabi ki ru, niŋ ni a ji koŋ fɛrɛmaan ni dɛ!» 16 Yesu i niŋ koŋ ki wɔ wulu ki rupwulu wulusuntalinŋ ka wu. Ntiŋ tu: «Jibi bɛɛ, koŋ bɛɛ wuru nʼtɛ a i nufinŋ sinaŋ namɔni, ntiŋ i nʼbi koŋ mwɔɔnna tɛ. 17 Nufinŋ nu waari ki so-i, ntiŋ i awɔ baaradaŋ ki bo, tu niŋ i ta nʼbi konaŋ ki tɛ: ‹A na dɔɔ, nufinŋ kiri bataa maan-a.›
18 Nka kí bataa i arì dariwulu bi ɲaan tenŋ tɛ, kí i arì kaan ta nufinŋ numaŋ ki ru. Koŋ jɔnɔ ki tu: ‹Míŋ ji ŋunaŋ sa-i, míŋ yɔ nʼtɛ ŋí i ta niŋ shɛɛli, míŋ i miŋ nafɛ-a, míŋ a nʼmaŋ kila ki.› 19 Nʼtɔri tu: ‹Míŋ naan tuula byinŋ sa-i dɔɔ, míŋ yɔ ta-a niŋ ni kini shɛɛli, míŋ i miŋ nafɛ-a, míŋ a nʼmaŋ kila ki.› 20 Koŋ tɔri tu sɛbɛ: ‹Míŋ yɔ faa-a mari cɛn kɔ-a ka a, niŋ na, míŋ a so ta-i ki.› 21 Baaradaŋ ki i a pwulu, ntiŋ ta niŋ bataa ɲaanbi a ŋununtiŋ ki tɛ. Ŋununtiŋ ki tɔnŋ i kwulu, ntiŋ i nʼbi awɔ baaradaŋ ki tɛ: ‹Bili ta kiliwulinŋ ki fan niŋ fa furubamaŋ kiri ru, ŋi i ta gbɛwɔ kiri fa mwurunku kiri fa ɲaanfwuu kiri fa bɔlɔma kiri dɔri na kwumaŋ.› 22 Baaradaŋ ki po-i, niŋ i ta niŋ konaŋ ki bataa dɔri na waarinŋ wɔ̀ ru, ntiŋ tu a ŋununtiŋ ki tɛ: ‹Ŋuntiŋ, abɛ́ɛ́ wɔ̀ bi-i míŋ niŋ ma-i, niŋ fa a fɔn na fu ki faa-a sun ki dɛ!› 23 Baaradaŋ ki ŋununtiŋ ki tu niŋ tɛ niŋ na: ‹Po, ŋi i ta juunŋ saa kiri fa sibi kiri ru, ŋi i ta konaŋ kiri nafɛ ɲaan ki fɔn tɛ, tu kí na, nwɔma mɔ́ɔ́n kaniŋ ki i faa. 24 Sabu míŋ yɔ nʼbi-a abɛ́ɛ́ tɛ nʼtu míŋ koŋ jɔnɔ wɔ̀ri dɔri-i, kí i arì kaan na, nʼtu mɔ́ɔ́n nufinŋ ki bo-a niŋ tɔri tenŋ nɛninɛŋ sun ki.›»
Koŋ nʼpa-a Yesu cɛfan dɔɔkunŋ?
(Matiyu 10:37-38)
25 Jibi bɛɛ, Yesu fa koŋ mwɔɔnna wuru tiri-ra saa ki fan, ntiŋ i tu, ntiŋ nʼbi kí tɛ: 26 «Konwɔ́tiŋ yɔ nʼtɛ a i na míŋ tɛ, nka ntiŋ dumiŋ nʼtɛ a i míŋ pari a tiŋ fa a ɲiŋ ki wu ki, a fa míŋ pari awɔ mari fa a daŋ wu ki, a dumiŋ fa míŋ pari a ɲɛnsimari fa nʼshuru wu ki, a dumiŋ fa míŋ pari a yɛri ki ɲinita ki wu ki, nintiŋ a so ji-i mɔ́ɔ́n kalindaŋ i ki. 27 Koŋ finŋ woo finŋ a tu ntiŋ i a yɛri ki kpinkpisuu ki shi ki, nintiŋ a so ji-i mɔ́ɔ́n kalindaŋ i ki.
28 Nkɛnŋ abɛ́ɛ́ ru, a ntiŋ ji nʼtɛ a i sankasoŋ tan tu ntiŋ sɔɔ-ra sun ki, ntiŋ i a miiri nʼkpaa ki sun, nwɔma ntiŋ i nʼtɔ afinŋ ji-a so walima a ji-a so ki? 29 A ntiŋ niŋ ma sun ki, a ntiŋ fu ki cɛ bo, a ntiŋ so nʼnakɔ-i ki, koŋ bataa ra na niŋ ja, kí i yɛtan-ni ntiŋ sun, 30 kí i nʼbi-ri: ‹Weŋ ka futannama tɔnpa-i, wú i na waa nʼgbɛ, wú i nʼnakɔbali ki tu maŋ.›»
31 Yesu tu kí tɛ sɛbɛ: «Masa danwɔ nʼmaŋ sɛbɛ, a ntiŋ ji-a ta a bishi masa karimwuŋ, tu ntiŋ a sɔɔ ki, ntiŋ i a miiri tu afinŋ ji-a so jɔrɔkɔ-i awɔ karitantɔnŋ koŋ waa byinŋ ki wu, a i masa ka ki fa awɔ karitantɔnŋ waa kɔniŋ ki ŋununafu ki? 32 Niŋ ɲaan ki tɛ, a ntiŋ i nʼtɔ tu afinŋ fa awɔ karitantɔnŋ kiri ra so a bishi masa ki fa awɔ karidaŋ kiri gbɛ ki, ntiŋ yɔ niŋ tu-a mani narimwuŋ, ntiŋ i kpeeri bo ta niŋ nafɛ, nwɔma arì i kari ki kɔ.
33 Mìŋ ɲaan tenŋ ki tɛ, abɛ́ɛ́ ru, koŋ woo koŋ so-a a tɛɛpo san-i a gbɛfɛfinŋ kiri ru ki, ntiŋ a so ji-i mɔ́ɔ́n kalindaŋ i ki.»
Nɛŋ wɛɛlufinŋ wɔ̀ ru ki
(Matiyu 5:13; Maraka 9:50)