Yesu Ɔrɔmu masa ki wɔ surudashi jalitiŋ sinaŋ bɛɛ wɔ joŋ kene-i
(Matiyu 8:5-13)
7
1 Yesu ka wulu kari bataa bi kɔ-i konaŋ kiri tɛ waarinŋ wɔ̀ ru, ntiŋ i tiri Kafarinawumu sɛbɛ. 2 Ɔrɔmu masa ki wɔ surudashi jalitiŋ sinaŋ bɛɛ wuru maŋ, joŋ bɛɛ wuru niŋ gbɛ. Niŋ joŋ ki bidi wuru ntiŋ tɛ kusɛbɛ. Joŋ ki i na kira, kira ki i juu, fɔ ŋì i myɛ beŋ tɛ. 3 Niŋ surudashi jalitiŋ ki Yesu wulu ki rama-i waarinŋ wɔ̀ ru, ntiŋ i Yawutu cɛɛnni kiri bɛɛ ri cin ta Yesu rafɛ, tu ntiŋ i na awɔ joŋ ki kene. 4 Niŋ ni ta-i so Yesu tɛ waarinŋ wɔ̀ ru, kí i ntiŋ nafɛ kusɛbɛ. Kí tu ntiŋ tɛ: «Ka koŋ ka fa ye nʼtɛ kakan-i, 5 sabu yibɔ̀ɔ̀ konanbi ki bidi-i ntiŋ tɛ haali, mìntiŋ ki yibɔ̀ɔ̀ kalinfu ki tan-i.» 6 Yesu i a tu, ntiŋ i tiri kí fan. Kí ta-i myɛ surudashi ki wɔ mani ki tɛ, surudashi ki i awɔ wɔshuru ri po tu niŋ ni ta ka bi ntiŋ tɛ: «Ŋuntiŋ, fa ka yɛlinŋ ka fɔn bo nʼtɛ ki, sabu míŋ ŋuniŋ kuru-i, miŋ i de mɔ́ɔ́n mani nu. 7 Niŋ ki fani ncin-i, míŋ nʼyɛri kɔli ta-a miŋ tɛ ki. Nka hali miŋ wuludaŋ tenŋ bi, mɔ́ɔ́n joŋ ki a kene. 8 Mìŋ ɲaan tenŋ ki tɛ, ŋununtiŋ ni yɔ míŋ na, míŋ yɛri ki i ji surudashi kiri bɛɛ ri ŋununtiŋ i. A míŋ nʼbi nwɔ̀ tɛ: ‹ta keŋ›, niŋ i tiri-ra niŋ mani nu; a ŋí nʼbi nʼtɔri tɛ, ‹na›, niŋ i na-a, a míŋ nʼbi n’wɔ́ joŋ ki tɛ: ‹ka ma›, niŋ i niŋ ma-a.» 9 Yesu niŋ wulu ki rama-i waarinŋ wɔ̀ ru, ntiŋ ɲaniŋ i po surudashi ki tɛ. Niŋ na, ntiŋ i a ɲaannupwulu a cɛfantɔnŋ kiri tɛ, ntiŋ i nʼbi: «Míŋ i nʼbi-a abɛ́ɛ́ tɛ, hali Isirayɛlidaŋ kiri nu, míŋ ka koŋ ka wɔ bilinabi ki bishi ja-i sun ki.» 10 Niŋ bimaan ki sun, surudashi ki wɔ cintɔnŋ kiri i arì pwulu tiri kulu, kí i ta fa joŋ ki kenemaan wu.Yesu kanimari bɛɛ danshuru tenŋ beenimaan ŋmɛni-i.
11 Niŋ kɔɔtɛ, Yesu fa awɔ kalindaŋ kiri, ŋì i bo koŋ mwɔɔnna tɔri ri sun, kí i ta kili bɛɛ ra nwɔ̀ tɔ wuru tu Nayini. 12 Kí so-i niŋ kili ki tɔnna waarinŋ wɔ̀ ru, kí wuru ta-a konkwuu bɛɛ wu saali kiri ru. Kanimari bɛɛ danshuru tenŋ pe kwuu wuru i. Nmari fa kili ki ru tɔnŋ mwɔɔnna wuru arìmaŋ fan. 13 Ŋuntiŋ ki nmari ja-i waarinŋ wɔ̀ ru, nmari makwulu i ntiŋ pa, ntiŋ i nʼbi nmari tɛ: «Fa ŋuntan ki.» 14 Ntiŋ i a kpaan konkwuu shitɔnŋ kiri tɛ, ntiŋ i ta a gbɛ myɛ konkwuu shifinŋ ki ra, konkwuu shitɔnŋ kiri i tu. Ntiŋ tu: «Ɲɔrɔkɔ, míŋ tu, jɔrɔkɔ!» 15 Konkwuu ki i ŋmɛni, ŋì i jɔrɔkɔ sɔɔ, ŋì i wulu bi-ri. Yesu i nwɔ̀ri a ɲiŋ ki tɛ. 16 Kɛmi sinaŋ i de konaŋ ki bataa ru, kí i baraka wɔri-ri Kirinŋ tɛ, kí i nʼbi-ri: «Kirinŋ wɔ cintɔnŋ sinaŋ po-i yibɛ̀ɛ̀ kanfɛ, Kirinŋ na-i ye awɔ konanbi ki tɛ.» 17 Niŋ wulu wɔ̀ri bi-i Yesu sun, niŋ ni i so mani ki bataa ru, Yude kɛniŋ ki fa a kankanfan ki ru.
Wutɔnŋ Yuhana kpeeri cin-i Yesu tɛ
(Matiyu 11.2-19)
18 Yuhana wɔ kalindaŋ kiri i ta Yesu wɔ bi mamaan kiri bataa rakali ntiŋ tɛ. Ntiŋ i koŋ fuuli dɔri kí ru. 19 Ntiŋ i kí cin Ŋuntiŋ ki tɛ, tu kí ta ntiŋ ranɔri: «Kirinŋ Ɲaannakonshimaan wɔ̀ wulu bi-i, tu ŋì a na, abɛ́ɛ́ i daa walima yi kakan yi koŋ tɔri suu?» 20 Niŋ koŋ kiri so-i Yesu tɛ waarinŋ wɔ̀ ru, kí tu ntiŋ tɛ: «Wutɔnŋ Yuhana yibɛ̀ɛ̀ cin na-i, tu yibɛ̀ɛ̀ na abɛ́ɛ́ nanɔri: Nʼbi-i tu Kirinŋ Ɲaannakonshimaan wɔ̀ a na, abɛ́ɛ́ i daa walima yi kakan yi i nʼtɔri suu?» 21 Niŋ waaci ki yɛri ki ru, Yesu i koŋ mwɔɔnna wɔ kira ri fa kí yɛlibi ri kɔ, ntiŋ i kí ru ɲinijɛ kiri kalikali po san kí ru, niŋ fa, ntiŋ i ɲaanfwuu mwɔɔnna ɲaannawwulu. 22 Niŋ kɔɔtɛ, ntiŋ tu Yuhana wɔ cintɔnŋ kiri tɛ: «Abɛ́ɛ́ nwɔ̀ ja-i, a i nwɔ̀ rama, á ta niŋ bi Yuhana tɛ: ɲaanfwuu kiri yɔ maannaja-a, mwurunku kiri i tiri-ri, tuutiŋ kiri i kene-ni, niŋ fa tɔɔnkpilinŋ kiri wulu lama-ni, konkwuu kiri i ŋmɛni-ni, Kirinŋ wɔ Wulujii ki i sunjo-ri gbɛwɔ kiri tɛ. 23 Nwɔ̀tiŋ sii-ra míŋ na ki, nintiŋ yɔ koŋ fɛrɛmaan i.»
24 Yuhana wɔ cintɔnŋ kiri pwulu tirimaan ki kɔɔtɛ, Yesu i Yuhana ɲaan bi-ri konaŋ ki tɛ. Ntiŋ i kí ranɔri: «Abɛ́ɛ́ ta-ri nfɛnŋ shɛɛli jaŋ ki faninmwuŋ? Abɛ́ɛ́ ta wuru ɲiŋ gbansanŋ nutimaanna shɛɛli faa gbɛ wa? 25 A niŋ ji-i ki, abɛ́ɛ́ ta-ri nfɛnŋ shɛɛli? Koŋ juulinŋ tɔtiŋ botɔnŋ i wa? Nka nwɔ̀ri yɔ juulinŋ tɔtiŋ kiri bo-a, niŋ ni yɔ masafu ri ru. 26 Niŋ na, abɛ́ɛ́ ta-ri nfɛnŋ shɛɛli gbɛ? Kirinŋ wɔ cintɔnŋ i wa? Aawe, sɛli yɛ, niŋ fa míŋ yɔ nʼbi-a abɛ́ɛ́ tɛ, nʼtu ntiŋ gbɛ Kirinŋ wɔ cintɔnŋ wu. 27 Sabu, Yuhana yɔ koŋ i, nʼsɛbɛ-i nwɔ̀ bi sun Kirinŋ wɔ wulu Sɛbɛ ki ru tu Kirinŋ tu:
‹Nʼshɛɛli, míŋ i n’wɔ́ cintɔnŋ ki cin ta-a miŋ jɛŋ,
ŋì i ta n’wɔ saa ki ramɔni nʼjɛŋ.›»
28 Yesu tu sɛbɛ: «Míŋ yɔ nʼbi-a abɛ́ɛ́ tɛ, nʼtu mari daŋ ji nwɔ̀ gbɛ Yuhana wu ki. Nka Kirinŋ wɔ Masabi ki ru konaŋ ki bataa ru pyaanŋ ki gbɛ-i ntiŋ wu.
29 Koŋ finŋ woo finŋ Yuhana wɔ wulu kiri rama wuru i, ŋì i ta bo ɲinisarakɔlɔtɔnŋ kiri fɔn sun, kí i arì tu, kí i arì wu ntiŋ gbɛ, niŋ wuru nʼji-a, tu kí arì tu nʼna tu Kirinŋ telimaan i. 30 Nka Farinsiyɛnŋ kiri fa sariya kalimɔɔ kiri i arì kaan wuru arì wu Yuhana gbɛ, niŋ i nʼji tu kí arì kaan Kirinŋ wɔ bi gbɛbilimaan kiri tɛ arì tɛ.»
31 Yesu i nʼbi kí tɛ sɛbɛ: «Míŋ a jiintɔnŋ kiri fa nkɛnŋ ni pyi sa? Kí fa nkɛnŋ ni po? 32 Kí fa tiraŋ ni po-i, nwɔ̀ri sɔɔ kili ki ru furuba sɔɔmaŋ nu, kí i arì wulu saan wɔri-ri arìmaŋ tɛ tu:
‹Yibɛ̀ɛ̀ wɔ bwɔ-i abɛ́ɛ́ sun, abɛ́ɛ́ nʼshɛ ki.
Yi i beŋ shupɔri a tɛ, a ŋuntan ki.›
33 Mìŋ ɲaan ki tɛ, Wutɔnŋ Yuhana na-i, ntiŋ wuru bilaŋ nu-a ki, ntiŋ dumiŋ wuru dunfɛnŋ mwunu-na ki, abɛ́ɛ́ i nʼbi tu ɲinijɛ niŋ nu. 34 Koŋ Danshuru ki na-i, niŋ i bilaŋ nu-ni, ŋì i mwunufinŋ mwunu-ni, abɛ́ɛ́ tu: ‹A nʼshɛɛli, ka yɔ lɔmwunutɔnŋ wulatiŋ i, niŋ fa tu ntiŋ i ji ɲinisarakɔlɔtiiri fa bijɛmatiiri wɔ wɔshuru.› 35 Kirinŋ wɔ saa tiritɔnŋ ki bataa yɔ sɛli wɔri-ra Kirinŋ wɔ ɲakilitinbi ki tɛ.»
Yesu mari bijɛmatɔnŋ bɛɛ wɔ bijɛ kiri tu-i nmari tɛ
36 Farinsiyɛnŋ ki bɛɛ Yesu dɔri-i nuŋ wu awɔ mani nu. Yesu ta-i so, ntiŋ i sɔɔ nufinŋ ki tɛ, kí i nʼnu-ni. 37 Niŋ waaci ki ru, mari bijɛmatɔnŋ bɛɛ wuru niŋ kili ki ru. Niŋ nʼnama-i waarinŋ wɔ̀ ru, tu Yesu nufinŋ nu-a Farinsiyɛnŋ ka wɔ mani nu, nmari i ta duŋ pyaanŋ kpaafuru bɛɛ wu. Niŋ duŋ ki faa wuru ŋuŋ kpaafuru kini jii bɛɛ ra sɛbɛ. 38 Nmari de-i, nmari i ta a kwushiri ntiŋ kɔɔtɛ. Nmari i ŋuntan kusɛbɛ, fɔ nmari ɲaannaju ki i ntiŋ kanda kiri fili. Niŋ kɔɔtɛ, nmari i a ŋununshinŋ ki sɔɔ, nmari i a ɲaannaju ki kini san ntiŋ kanda kiri sun. Nmari i ntiŋ kanda kiri sunmyɛɛnni, nmari i kila nmari i ŋuŋ kini jii ki kɔri ntiŋ kanŋ kiri sun.
39 Farinsiyɛnŋ wɔ̀ Yesu dɔri na wuru awɔ mani ki ru, niŋ niŋ ja-i waarinŋ wɔ̀ ru, niŋ i nʼbi a ciiru: «A ka koŋ ka ji wuru Kirinŋ wɔ cintɔnŋ i ncinŋ, ntiŋ wuru ra nʼtɔ, tu mari ka wɔ̀ myɛ-na afinŋ na, tu bijɛmatɔnŋ i.»
40 Niŋ ki ra, Yesu i nʼbi Farinsiyɛnŋ ki tɛ: «Simɔŋ, wulu yɔ míŋ gbɛ, ŋí i nʼbi miŋ tɛ.» Simɔŋ tu: «Kalimɔɔ, á nʼbi.» 41 Niŋ na, Yesu i nʼbi kí tɛ tu: «Koŋ bɛɛ wɔ kɔni wuru koŋ fuuli la. Koŋ tenŋ wɔ ki wuru dinaari daŋ jankɔli fa yaataanŋ a, koŋ tenŋ ki wɔ ki i ji dinaari daŋ yaafuuli fa byinŋ i. 42 Kí koŋ fuuli ki fɔn na ji so-a arì ra kɔni ki sali-i ki, jalintiŋ ki i kí koŋ fuuli ki dɔri, ntiŋ i kɔ́ɔ́ kɔni kiri tu kí tɛ. Simɔŋ, miŋ cirasun, niŋ mamaan ki ra, ka koŋ fuuli ka ru, jalintiŋ ki bi a di nʼdanwɔ tɛ, ŋì i fwuu nʼdanwɔ sun?» 43 Simɔŋ i ntiŋ nupwulu: «Míŋ cirasun, jalinŋ tɔnŋ mwɔɔnna ki tu-i nwɔ̀ tɛ.» Yesu tu: «Miŋ sɛli bi-i.»
44 Niŋ kɔɔtɛ, Yesu i a ɲaannupwulu, ntiŋ i mari ki shɛɛli, ntiŋ i nʼbi Simɔŋ tɛ: «Miŋ mari ka ja-a ki wa? Míŋ de-i mɔɔn mani ki ru, miŋ ju wɔri míŋ tɛ ŋí i nʼkanŋ kiri rawu ki, nka nmari míŋ kanŋ kiri sunwu-i a ɲaannaju wu, nmari i yìrì sunciriki a ŋununshinŋ na. 45 Kabi míŋ de sun, miŋ míŋ ŋununafu, ŋi i nʼkɔlɔkɔli míŋ wua ki, nka nmari míŋ kanŋ sunmyɛɛnni ki tɔnbo ki. 46 Miŋ ŋuŋ kɔri míŋ ŋununnu ki, nka nmari ŋuŋ kini jii kɔri-i míŋ kanŋ kiri sunb. 47 Niŋ ki ra, míŋ i nʼbi-a miŋ tɛ tu bidintɛbi sinaŋ wɔ̀ yɔ nmari ru, niŋ yɔ nʼji-a tu nmari wɔ bijɛ kiri mwɔ woo mwɔ, tu yìrì bataa tu nmari tɛ. Nka pyaanŋ tu-i nwɔ̀tiŋ tɛ, nintiŋ wɔ bidintɛbi ki rakuru-i.» 48 Niŋ kɔɔtɛ, Yesu i nʼbi mari ki tɛ: «Mɔɔn bijɛ kiri bataa tu-i nʼtɛ.»