Yesu so kila-i Shitaanni wɔ kɔrɔbɔ ki sun
(Matiyu 4:1-11; Maraka 1:12-13)
4
1 Yesu faa wuru Ɲiniwɔlinŋ na, ntiŋ i a pwulu yiri Yurudɛn baa ki tɔnŋ na. Ntiŋ i tiri jaŋ fan, Ɲiniwɔlinŋ ki i ntiŋ jɛnpa-ri awɔ bi kiri bataa ra. 2 Niŋ mani nu, Shitaanni i ntiŋ kɔrɔbɔ, fɔ ŋì i ta so sunŋ yaafuuli sun. Ntiŋ nufinŋ bo a daru ka sunŋ yaafuuli ka ru ki. Sunŋ yaafuuli ki fwuudemaan ki kɔɔtɛ, bɛɛ ki i ntiŋ pa. 3 Shitaanni i nʼbi ntiŋ tɛ: «A miŋ ji Kirinŋ Danshuru ki i, nʼbi ka kwɔ ka tɛ, tu ŋì a rapwulu ji bwuru.» 4 Yesu i nʼnupwulu: «Kirinŋ wɔ wulu sɛbɛ ki yɔ nwɔ̀ bi-a, niŋ yɔ ka a: Konaŋ nakili-la nufinŋ bantenŋ na ki.»a 5 Niŋ kɔɔtɛ, Shitaanni i tiri ntiŋ wu fɔ cuunŋ, ŋì i ta juniɲa ciiru kɛniŋ kiri bataa ji ntiŋ wu manaanŋ tenŋ nu, 6 ŋì i nʼbi ntiŋ tɛ: «Miŋ ɲaniŋ yɔ kɛniŋ wɔ̀ri fa arì ciiru nafulu wɔ̀ri ra, míŋ a yìrì wɔri miŋ tɛ. Sabu niŋ ni bataa wɔri-i míŋ tɛ. Míŋ i so-a yìrì wɔri-i koŋ tɛ, nwɔ̀tiŋ bi di-i míŋ tɛ. 7 Niŋ na, a miŋ nʼkwushiri, ŋi i míŋ gbɛ, niŋ bataa ra ji mɔɔn ni.» 8 Yesu i nʼnupwulu: «Kirinŋ wɔ wulu sɛbɛ ki yɔ nwɔ̀ bi-a, niŋ yɔ ka a: ‹*NʼŊuntiŋ Kirinŋ gbɛ, ŋi i baara ma nʼtenŋ pe tɛ.›» 9 Shitaanni i Yesu jɛnpa ta sɛbɛ Yerusalɛmu, ŋì i ta ntiŋ wu Kirinfusinaŋ ki ŋuniŋ faninmwuŋ, ŋì i nʼbi ntiŋ tɛ: «A miŋ ji Kirinŋ Danshuru ki i, tu ka fu ka ŋuniŋ faninmwuŋ, ŋi i see fɛɛn fwuniŋ sun. 10 Sabu nʼsɛbɛ-i Kirinŋ wɔ wulu sɛbɛ ki ru, tu Kirinŋ na na nʼbi awɔ mɛlɛkɛn kiri tɛ tu yìrì miŋ ɲaannasuu. 11 Niŋ fa tu yìrì ra na arì gbɛ cu miŋ fɛ, nwɔma miŋ kanŋ ki fa nakwuru kwɔ ra ki.» 12 Yesu i nʼnupwulu: «Nʼbi-i Kirinŋ wɔ wulu sɛbɛ ki ru sɛbɛ: Fa nʼŊuntiŋ Kirinŋ kɔrɔbɔ ki.» 13 Shitaanni i Yesu kɔrɔbɔ ɲaan ki fɔn tɛ, ŋì i waa ntiŋ na, ŋì i a san ntiŋ tɔntɛ sun.Yesu wɔ baara ki tɔnpa ki Galile
(Matiyu 4.12-17; Maraka 1.14-15)
14 Yesu a pwulu ta-i Galile, Ɲiniwɔlinŋ ki wɔ so ki wu. Ntiŋ tɔ ki i niŋ mari ki bataa rapo. 15 Ntiŋ wuru konaŋ kiri kali-la Yawutu kiri wɔ kalinfu kiri ru. Koŋ bataa wuru ntiŋ gbɛ-a.
Nansarɛtitɔnŋ kiri arì kaan-a Yesu tɛ
(Matiyu 13.53-58; Maraka 6.1-6)
16 Yesu ta-i Nansarɛti sɛbɛ, a rakili kili ki ra. Nufaan Jibi ki so-i, ntiŋ i ta de Yawutu kiri wɔ kalinfu ki ru, miŋ tu ntiŋ dali wuru ntiŋ i nʼma-ni ɲaan wɔ̀ tɛ. Ntiŋ jɔrɔkɔ tu-i, tu a ra Kirinŋ wɔ wulu ki sɛbɛ ki kali, 17 Kirinŋ wɔ cintɔnŋ Esayi sɛbɛ wɔ̀ tan wuru i, kí i niŋ wɔri ntiŋ tɛ. Ntiŋ i nʼnupili, ntiŋ wuru nʼtɛ, a i mani wɔ̀ kali, ntiŋ i niŋ kila. Nʼsɛbɛ wuru niŋ mani nu tu:
18 «Ŋuntiŋ Kirinŋ Ɲini ki i míŋ sun,
ŋì míŋ ɲaannashi-i, tu míŋ awɔ Wulujii ki bi gbɛwɔ kiri tɛ,
ŋì míŋ cin-i tu:
ŋí i nʼsunjo, tu joŋ kiri wɔ jonbi ki a kɔ,
ɲaanfwuu kiri i maannaja,
ŋí i koŋ makwulujuumaan kiri mwusan arì yɛlitɔnŋ kiri wu, ŋí i kí bo arì yɛri tɛ,
19 ŋí i Ŋuntiŋ Kirinŋ wɔ shɔɔrinŋ ma jiri ki sunjo konaŋ ki tɛ.»
20 Niŋ kɔɔtɛ, Yesu i sɛbɛ ki kwunu, ntiŋ i nwɔ̀ri kalinfu ki ru baaramatɔnŋ ki tɛ, ntiŋ i ta sɔɔ. Koŋ finŋ woo finŋ wuru kalinfu ki ru, niŋ bataa i arì ɲaniŋ da tu ntiŋ na. 21 Niŋ na, ntiŋ i nʼbi kí tɛ: «Abɛ́ɛ́ Kirinŋ wɔ wulu wɔ̀ rama-i ka a dɔnsaŋ, niŋ cintɔnbi wulu ki rafaa-a jiŋ.» 22 Koŋ bataa wuru ntiŋ tɔ shɔɔrinŋ bi-a, niŋ fa konanbi wulu wɔ̀ wuru po-a ntiŋ tɔnŋ na, niŋ i bo-ri kí tɔnŋ sun, fɔ kí i nʼbi-ri: «Taa Yusufu danshuru ki i ji i kili wa?» 23 Ntiŋ i nʼbi kí tɛ: «Míŋ nʼtɔ-i abɛ́ɛ́ ra wulusuntalinŋ wɔ̀ bi míŋ tɛ, niŋ yɔ ka a: ‹Janmatɔnŋ, nʼyɛrɛma ki kene.› Abɛ́ɛ́ ra na nʼbi míŋ tɛ sɛbɛ: ‹Yibɛ̀ɛ̀ nʼnama-i tu miŋ botɔnsunbi ri ma Kafarinawumu kili ki ru, niŋ ni bishi ma nʼyɛrɛma ki wɔ kili ki ra ni!›» 24 Ntiŋ i nʼbi kí tɛ sɛbɛ: «Sɛli ki ra, Kirinŋ wɔ cintɔnŋ teennaanŋ paka shɔ-a awɔ kili la ki. 25 Míŋ a nʼbi abɛ́ɛ́ tɛ, nʼtu sɛli ki ra, Kirinŋ wɔ cintɔnŋ Eli wɔ sunŋ ki ra, furu ki tu-i, ŋì i jiri byaŋ fa ɲɛ taanmani ma Isirayɛli kɛniŋ ki ru, bɛɛ ki i de kɛniŋ ki bataa ru. Kanimari mwɔɔnna wuru Isirayɛli kɛniŋ ki ru. 26 Niŋ fa a fɔn na, Eli cin niŋ ni tɔri tenŋ tɛ ki, nka ntiŋ cin ta-i kɛniŋ tɔri ru mari bɛɛ tɛ, nwɔ̀ wɔ shuru beeni wuru i. Niŋ mari ki wuru po-a Sarɛpita kili ki ru, *Sidɔnŋ mari ki rub. 27 Tuutiŋ mwɔɔnna fani i ji wuru Isirayɛli kɛniŋ ki ru Kirinŋ wɔ cintɔnŋ Elinse wɔ sunŋ ki ra, nka ntiŋ nʼtɔri teennaanŋ kene ki, fɔ Naamac wɔ̀ po-i Siri kɛniŋ ki ru.»
28 Kalinfu ki ru konaŋ finŋ woo finŋ niŋ wulu kiri rama-i, niŋ ni bataa tɔnŋ i kwulu ntiŋ cɛfan. 29 Kí i jɔrɔkɔ, kí i ntiŋ pa, kí i ntiŋ cɛɛn po kili ki kɔɔtɛ. Kili ki sɔɔ wuru tɔnŋ bɛɛ sun, kí i ta ntiŋ wu fɔ niŋ tɔnŋ ki ŋuniŋ faninmwuŋ, tu arì ra ntiŋ curu fɛɛn niŋ kukuta ki rud. 30 Nka Yesu i po kí gbɛkulu la, ntiŋ i tiri.
Yesu shuru ɲinijɛtiŋ bɛɛ kene-i
(Maraka 1.21-28)
31 Yesu i ta Galile mari ki ru kili tɔri ra, nwɔ̀ tɔ ki yɔ tu Kafarinawumu. Ntiŋ i konaŋ kiri kali-li Nufaan Jibi kiri sun niŋ mani nu. 32 Ntiŋ wɔ koŋ kalika ɲaan ki wuru bo-a konaŋ kiri tɔnŋ sun, sabu baraka wuru ntiŋ wɔ kalinŋ tan wulu ki ru. 33 Jibi bɛɛ, shuru ɲinijɛtiŋe bɛɛ wuru kalinfu ki ru, niŋ i yaalinpo tu: 34 «Heyi! Nansarɛtitɔnŋ kiri wɔ Yesu, nfɛnŋ yibɛ̀ɛ̀ fa miŋ faninmwuŋ? Miŋ na-i yibɛ̀ɛ̀ tu kɔ wa? Miŋ yɔ nwɔ̀, míŋ niŋ tɔ-i, miŋ yɔ Kirinŋ wɔ Cintɔnŋ Wɔlinŋ ki i.» 35 Yesu i fali ɲinijɛ ki sun: «Nʼtɔnŋ ki rala, ŋi i po san weŋ ki ru.» Ɲinijɛ ki i weŋ ki fɛɛn kí kanfɛ, ŋì i po san wú ru, ŋì bi tɔri ma wú wu kili ki.
36 Niŋ i bo konaŋ ki bataa tɔnŋ sun, fɔ kí i arìmaŋ nanɔri-ri: «Han! Ka a wulu kwuru danwɔ? Ntiŋ i wulubi-a ɲinijɛ kiri tɛ sotinbi wu, tu yìrì po san koŋ nu, yìrì fani i po-ri ncinŋ i.» 37 Niŋ i nʼbɛɛ bo Yesu tɔ ki sun niŋ mari ki mani ki bataa ru.
Yesu kiratɔnŋ mwɔɔnna tɔri ri kene-i
(Matiyu 8.14-17; Maraka 1.29-34)
38 Yesu i po Yawutu kiri wɔ kalinfu ki ru, ntiŋ i ta Simɔŋ wɔ mani nu. Ntiŋ i ta fa Simɔŋ famari ki bili wu firikwulu la, nwɔ̀ juu wuru kusɛbɛ. Kí i Yesu rafɛ tu ntiŋ nmari kene. 39 Yesu i a kpari, ntiŋ i a sunsan nmari ŋununnu, ntiŋ i fali, ntiŋ i a kwɔɔn firikwulu ki sun, tu ŋì po san mari ki ru. Mìŋ manaanŋ tenŋ ki ru, firikwulu ki i kɔ, mari ki i jɔrɔkɔ, nmari i ku si kí tɛ.
40 Sunfyiri ki sun, kiratɔnŋ wuru koŋ finŋ woo finŋ gbɛ, niŋ ni wuru na-a niŋ ni wu ntiŋ tɛ. Kiratɔnŋ kwuru ki fɔn wuru kí ru. Ntiŋ i á gbɛ bili niŋ kiratɔnŋ kiri fɔn tenŋ tenŋ sun, ntiŋ i kí kene. 41 Ɲinijɛ ri wuru po-a kiratɔnŋ mwɔɔnna nu, yìrì i yaalinpo-ri tu: «Miŋ yɔ Kirinŋ Danshuru ki i.» Sabu, ɲinijɛ kiri wuru nʼtɔ-a tu Yesu Kirinŋ Ɲaannakonshimaan ki i, nka ntiŋ i fali, ntiŋ i a kwɔɔn yìrì sun, tu yìrì fa wulubi ki.
Yesu a cin ŋuŋ ki bi-i konaŋ ki tɛ
(Maraka 1.35-39)
42 Si ki sari-i, Yesu i po tiri jaŋ fan, koŋ wuru mani wɔ̀ ru ki. Konaŋ kwuru kiri i jɔrɔkɔ, kí i ta ntiŋ ceeli. Kí ta-i ntiŋ ja waarinŋ wɔ̀ ru, kí wuru nʼtɛ, ntiŋ i a san arì tɔntɛ kili ki. 43 Nka Yesu tu kí tɛ: «Míŋ kakan-i, ŋí i ta Kirinŋ wɔ Masabi ki Wulujii ki sunjo kili tɔri ri ra sɛbɛ, sabu míŋ cin ŋuŋ ki yɔ niŋ i.»
44 Niŋ ɲaan ki tɛ, ntiŋ wuru Kirinŋ wɔ Masabi ki sunjo de-a Yawutu kiri wɔ kalinfu kiri ru Yude mari ki ru.