Wutɔnŋ Yuhana wɔ waajulu ki
(Matiyu 3.1-12; Maraka 1.1-8; Yuhana 1.19-28)
3
1 Masasinaŋ Tibɛri wɔ faan ki jiri bwununtaantɔnŋ ki, Pɔnsi Pilati wuru Yude kɛniŋ ki ŋununtiŋ ki i. Ɛrɔdi i ji Galile kɛniŋ ki ŋununtiŋ ki i, wú tindaŋ Filipu i ji Iture niŋ fa Tarakoniti mari kiri ŋununtiŋ ki i. Lisaniyasi wuru Abilɛni mari ki ŋununnu. 2 Anasi fa Kayifu wuru niŋ waarinŋ ki ru Kirinŋ tɛ sarakawɔrɔtɔnŋ kiri ŋununtiŋ kiri i. Niŋ waaci ki ru, Kirinŋ Jakaliya danshuru Yuhana cin-i awɔ wulu ki wu. Yuhana wuru Yude, jaŋ fan. 3 Niŋ ki ra, Yuhana i tiri Yurudɛn baa tɔnŋ fan mani kiri bataa ra. Ntiŋ wuru konaŋ kiri racin-a tu kí ntɔribi arɔ̀ɔ̀ bijɛmamaan kiri ra, kí i na Kirinŋ tɛ, kí i arì wu, nwɔma Kirinŋ i kɔ́ɔ́ bijɛ kiri tu kí tɛ. 4 Niŋ ma-i, miŋ tu nʼsɛbɛ-i Kirinŋ wɔ cintɔnŋ Esayi wɔ sɛbɛ ki ru ɲaan wɔ̀ tɛ tu:«Koŋ bɛɛ yɔ fali-la jaŋ ki faninmwuŋ tu:
‹Á Ŋuntiŋ ki wɔ saa ki ramɔni,
á i nwɔ̀ saa pyaanŋ kiri teli.
5 Kukuta kiri bataa ra na naye,
tɔnŋ kiri fa tintiŋ kiri bataa ra na gwu kɛɲɛ.
Saa kɛrɛmaan kiri bataa ra na teli,
demaŋ jɛ kiri fɔn i ramɔni.
6 A niŋ ma, koŋ bataa ra na Kirinŋ wɔ koŋ mwuka ɲaan ki ja.›»
7 Jama wɔ̀ri wuru ta-a Yuhana tɛ, tu arì wu, ntiŋ wuru nʼbi-a niŋ ni tɛ: «Abɛ́ɛ́ fɔnfɔniŋ daŋ kari, abɛ́ɛ́ yɔ nʼbi-a tu abɛ́ɛ́ kɛrɛbi, á i na-ni a wu-ri, nwɔma Kirinŋ wɔ kiti ki i mini a ŋuniŋ na. Nkɛnŋ abɛ́ɛ́ racin kɔɔn sa! 8 A bishɔɔrinŋ ni ma, nwɔ̀ri ra nʼji tu abɛ́ɛ́ ntɔribi awɔ́ bijɛ kiri ra. A fa nʼsunu tu abɛ́ɛ́ Aburahamu nupo ria, tu niŋ a abɛ́ɛ́ mwu ki dɛ! Míŋ a nʼbi abɛ́ɛ́ tɛ, tu nupobi ki ji i, Kirinŋ na so kwɔ kari ji-i Aburahamu daŋ ni. 9 Jirinŋ kwuru pulu ki i juu gbɛɛra kɔ, jirinŋ kiri fa arì kanaŋ kiri kwuru fɛɛnnama ki tɛ. Jirinŋ finŋ woo finŋ daŋ shɔɔrinŋ pa-a ki, niŋ ni bataa ra kwuru bo tuu ru.»
10 Jama ki wuru Yuhana nanɔri-ra: «Niŋ na, yibɛ̀ɛ̀ kakan yi i nfɛnŋ ma?» 11 Ntiŋ wuru kí rupwulu-la tu: «Jɛrɛbi fuuli i nwɔ̀ gbɛ, niŋ tenŋ wɔri nʼbali tɛ. Nufinŋ i nwɔ̀tiŋ gbɛ, niŋ niŋ nukila a fa nufinŋ bali ki bɛɛ tɛ.» 12 Ɲinisarakɔlɔtɔnŋ kari fɔn wuru na-a Yuhana tɛ, tu arì wu. Niŋ ni i ntiŋ ranɔri tu: «Kalimɔɔ, yibɛ̀ɛ̀ kakan yi i nfɛnŋ ma?» 13 Ntiŋ i kí rupwulu tu: «A jalinŋ tɔnŋ wɔ̀ bi abɛ́ɛ́ tɛ, á fa nʼtɔri mwu bo niŋ sun ki.» 14 Surudashi bɛɛ ri i Yuhana nanɔri: «Yibɛ̀ɛ̀ ji? Yibɛ̀ɛ̀ kakan yi i nʼdanwɔ ma?» Ntiŋ tu kí tɛ: «Á fa koŋ wɔ jalinŋ mwusan ntiŋ wu faan sun walima puru sun ki, á tu awɔ́ sali ki sun.»
15 Konaŋ kiri wuru Kirinŋ Ɲaannakonshimaan ki na ki saarashɛɛli ki wɔ̀ tan-a, niŋ na, kí wuru arì ciiru kwuru-ra Yuhana sun, tu mìntiŋ ki a ji niŋ i. 16 Niŋ ki ra, Yuhana i nʼbi kí bataa tɛ: «Míŋ yɔ abɛ́ɛ́ wu-a ju ra, nka koŋ bɛɛ yiri-ra yɔ n’maŋ, nwɔ̀ wɔ so ki gbɛ-i mɔ́ɔ́n ki wu, míŋ ŋuniŋ kuru-i niŋ wɔ kari yaa pilitɔnŋ i. Niŋ a na abɛ́ɛ́ wu Ɲiniwɔlinŋ ki fa tuu ra. 17 Ntiŋ wɔ bilaŋ numyɛɛn kɛrinŋb ki yɔ ntiŋ gbɛɛra, ntiŋ a na bilandaŋ ki fa nʼkɛnŋ ki po san arìmaŋ nu. Ntiŋ a na bilandaŋ ki bo awɔ cinŋ ki ru, ntiŋ i nʼkɛnŋ ki bo tuu ru, tuu wɔ̀ byi-a ki.» 18 Yuhana konaŋ ki racin-i niŋ wulu ki bishi mwɔɔnna wu. Niŋ ɲaan ki tɛ, ntiŋ i Kirinŋ wɔ Wulujii ki bi kí tɛ.
19 Nka jibi bɛɛ, Yuhana i na jɛbi Ɛrɔdi gbɛ, niŋ i kila, ntiŋ a tindaŋ *Filipu wɔ mari Ɛrɔdiyadi mwusan wuru niŋ wu. Ntiŋ i níŋ ji awɔ mari, niŋ fa, ŋì i bo ntiŋ wɔ bikulinŋ mamaan mwɔɔnna tɔri ri sun. 20 Ntiŋ i nʼtɔri bo awɔ bikulinŋ mamaan ki sun sɛbɛ, ntiŋ i Yuhana pa bo nkasu ru.
Yesu wubi ki Wutɔnŋ Yuhana gbɛ
(Matiyu 3.13-17; Maraka 1.9-11)
21 Waarinŋ wɔ̀ ru, Yuhana bo-ri nkasu ki ru sun ki, konaŋ ki bataa wuru a wu-a ntiŋ gbɛ. Yesu yɛrima ki i na a wu. Yesu wumaan ki kɔɔtɛ, ntiŋ i a bo Kirinŋ nafɛ sun. Ntiŋ tu-i niŋ na, kirinpɔli ki i rawwulu. 22 Ɲiniwɔlinŋ ki i ji miŋ tu konfɔaŋ kilaaŋ fɔ, ŋì i jɛri ntiŋ sun. Wulu bɛɛ i po kirinpɔli ki ra, ŋì i nʼbi: «Miŋ yɔ míŋ dintɛ Danshuru ki i. Miŋ nʼbi ki gbɛ-i míŋ gbɛ haali.»
Yesu cunsaa ki
(Matiyu 1.1-17)
23 Yesu jiri kɔniŋ fa byinŋ bishi kila-i waarinŋ wɔ̀ ru, ntiŋ i awɔ baara ki tɔnpa. Ŋì i kɛɲɛ konaŋ kiri wɔ ɲakilila ki wu, Yesu i Yusufu daŋ i. Yusufu i ji Eli daŋ i.
24 Eli wuru Matati daŋ i, Matati i ji Lewi daŋ i.
Lewi wuru Mɛlɛki daŋ i, Mɛlɛki i ji Yanayi daŋ i.
Matatiya wuru Amɔsi daŋ i, Amɔsi i ji Nawumu daŋ i.
Nawumu wuru Esili daŋ i, Esili i ji Nagayi daŋ i.
26 Nagayi wuru Maati daŋ i, Maati i ji Matatiya daŋ i.
Matatiya wuru Semeŋ daŋ i, Semeŋ i ji Yosɛki daŋ i.
Yowanaŋ wuru Eresa daŋ i, Eresa i ji Nsorobabɛli daŋ i.
Nsorobabɛli wuru Salatiyɛli daŋ i, Salatiyɛli i ji Nɛri daŋ i.
28 Nɛri wuru Mɛlɛki daŋ i, Mɛlɛki i ji Adi daŋ i.
Adi wuru Kosamu daŋ i, Kosamu i ji Elimadamu daŋ i.
Niŋ Yesu tɔ ki wuru Eliyɛnsɛri daŋ i, Eliyɛnsɛri i ji Yoromu daŋ i.
Yoromu wuru Matati daŋ i, Matati i ji Lewi daŋ i.
30 Lewi wuru Simeyɔnŋ daŋ i, Simeyɔnŋ i ji Yuda daŋ i.
Yuda wuru Yusufu daŋ i, Yusufu i ji Yonamu daŋ i.
Mɛlɛya wuru Mɛna daŋ i, Mɛna i ji Matata daŋ i.
Matata wuru Natamu daŋ i, Natamu i ji Dawuda daŋ i.
32 Dawuda wuru Yesayi daŋ i, Yesayi i ji Yobɛdi daŋ i.
Yobɛdi wuru Boonsi daŋ i, Boonsi i ji Sala daŋ i.
Aminadabu wuru Adimini daŋ i, Adimini i ji Arini daŋ i.
Arini wuru Ɛsirɔmu daŋ i, Ɛsirɔmu i ji Farɛsi daŋ i.
Yakuba wuru Ishaka daŋ i, Ishaka i ji Aburahamu daŋ i.
Aburahamu wuru Tera daŋ i, Tera i ji Nahɔri daŋ i.
Aragawu wuru Falɛki daŋ i, Falɛki i ji Ebɛri daŋ i.
Kayinamu wuru Arifasadi daŋ i. Arifasadi i ji Sɛmu daŋ i.
Sɛmu wuru Nawu daŋ i, Nawu i ji Lemɛki daŋ i.
37 Lemɛki wuru Matusala daŋ i, Matusala i ji Enɔki daŋ i.
Enɔki wuru Yarɛti daŋ i, Yarɛti i ji Malɛlɛyɛli daŋ i.
Enɔsi wuru Sɛti daŋ i, Sɛti i ji Adama daŋ i.
Adama i ji Kirinŋ daŋ i.