Kaburu lɔkoron
20
1 Ayiwa,
lɔgɔkun tere fɔlɔ sɔgɔmanda jonan fɛ,
ka a sɔrɔ kɛnɛn tun man ci fɔnɔn,
Mariyamu Magidalakamuso wani kaburu rɔ.
A wani a sɔrɔra ko kabakuruba tun baa bɔ kaburu da ra.
2 A borini ka wa Simɔn Piyɛri fɛ,
ani karanmɔgɔden min ya ko tɛɛ a di Yesu ye,
ka wa a fɔ àyi ɲɛnnɛn ko:
«Àyi baa Mantigi su ta ka bɔ kaburu kɔnɔn;
annugu fanan man a blayɔrɔ lɔn.»
3 Piyɛri ni o karanmɔgɔden bɔni ka wa kaburu rɔ.
4 Àyi fla bɛɛ tɛɛ borira ɲɔnŋɔn boro,
ŋa o karanmɔgɔden borini ka Piyɛri dan ka kɔnŋɔn a ɲɛn kaburu rɔ.
5 A seni ye minŋɛ a naan i birinan ka kaburu kɔnɔn yɔrɔ flɛ,
ka fani gbɛy blani ye,
ŋa a man do.
6 Simɔn Piyɛri tɛɛ a kɔ;
ale seni minŋɛ,
a doni kaburu kɔnɔn ka fani gbɛy blani ye.
7 Fani min kɛni tɛɛ ka Yesu kun datugun,
a naan o blani yera,
ŋa a ni kasanŋe tun tɛ yɔrɔ kelenŋ nɔn;
a lɔkuruni tɛɛ ka bla a dannan.
8 Ayiwa karanmɔgɔden min kɔnŋɔni tɛɛ ka se kaburu rɔ,
ale doni kaburu kɔnɔn.
A naan a yera te minŋɛ a lani a ra.
9 Sabu kuman min sɛbɛni tɛɛ Kitabu kɔnɔn,
ko Yesu ka kan ka kunu ka bɔ saya rɔ,
àyi tun man o famu fɔnɔn.
10 O kɔ,
o karanmɔgɔden fla bɔni ka wa àyi ya lu kɔnɔn.
Yesu ya yɛrɛ yira fɔlɔ
11 Ayiwa Mariyamu lɔni tɛɛ kɛnɛn man kaburu kɛrɛ fɛ ka kɛ kisi ye.
A kisitɔ a naan a kun labirinan ka kaburu kɔnɔn flɛ.
12 A naan mɛlɛkɛ fla yera;
derekegbɛ ye àyi kan nan.
Yesu su lani tɛɛ yɔrɔ min nɔn,
àyi sigini tɛɛ o yɔrɔ le rɔ.
Kelenŋ ye a kunɲanfan fɛ,
tɔ kelenŋ ye a senŋanfan fɛ.
13 Mɛlɛkɛy naan Mariyamu ɲininŋara ko:
«Muso,
mɛnɛn kɔsɔn i ye kisira?»
A ko:
«Àyi baa ni Mantigi su le ta;
ni man a lɔn àyi baa a bla yɔrɔ min nɔn.»
14 Ka a to o kuman ra,
a naan a ɲan murura ka Yesu lɔni ye;
ŋa a man a lɔn ko Yesu le.
15 Yesu naan a ɲininŋara ko:
«Muso,
mɛnɛn kɔsɔn i ye kisira?
I ye jeni le yɔrɔɲininan?»
Ayiwa,
a kɛni Mariyamu ɲan kɔrɔ ko yiriforotigi le.
Mariyamu ko:
«N'ye Yesu le yɔrɔɲininan;
ni ile nanni ka kɛ a tara,
a yɔrɔ yira ni ra,
ni bɛnan wa a ta ka wa ni a ye.»
16 Yesu ko a man ko:
«Mariyamu!»
Mariyamu naan a ɲan murura ka a fɔ heburukan nɔn ko:
«Rabuni!»
O kɔrɔ le ko «An Karanmɔgɔ.»
17 Yesu ko a man ko:
«I kanan tugu ni ra,
sabu ni man yɛlɛn fɔnɔn ka wa n'Fa fɛ.
Wa a fɔ n'badenmany ɲɛnnɛn ko n'ye ka yɛlɛn ka wa n'Fa ani ayi fanan Fa fɛ,
n'ya Ala ani alugu fanan ya Ala.»
18 Mariyamu Magidalakamuso wani a fɔra karanmɔgɔdeny ɲɛnnɛn ko:
«Ni baa Mantigi ye»;
Yesu naan min fɔra a ɲɛnnɛn,
a naan o fɔra karanmɔgɔdeny ɲɛnnɛn.
Yesu ya yɛrɛ yira flanan
19 O lon yɛrɛ wulada fɛ,
min tɛɛ lɔgɔkun tere fɔlɔ ye,
karanmɔgɔdeny lajɛnni tɛɛ bon dɔ kɔnɔn,
ka da sɔgɔ àyi yɛrɛ man Yaudiyay ɲɛnsiranɲan kɔsɔn.
Yesu nanni ka nan i lɔ àyi cɛ man,
ka a fɔ àyi man ko:
«Ala ye hɛrɛ kɛ ayi ye.»
20 A naan o fɔra minŋɛ,
a naan a boroy ni a kɛrɛy yirara àyi ra.
Karanmɔgɔdeny naan Mantigi yera minŋɛ,
àyi jusu jiyani kosɔbɛ.
21 Yesu ko àyi man tuguni ko:
«Ala ye hɛrɛ kɛ ayi ye.
Fa Ala naan ni cera ɲan min man,
ni fanan bɛnan alugu ce o ɲan man.»
22 A naan o fɔra minŋɛ,
a naan àyi fiyɛra ni a dafɔɲɔn ye ka a fɔ àyi man ko:
«Ni bɛnan Nin Seninman di ayi man.
23 Ni ayi ka mɔgɔ o mɔgɔ ya jurumun yafa,
o tigi ya jurumun bɛnan yafa;
ŋa ni ayi fanan man mɔgɔ o mɔgɔ ya jurumun yafa,
o tigi ya jurumun tɛnan yafa.»
Yesu ya yɛrɛ yira sabanan
24 Yesu nanni a ya karanmɔgɔdeny fɛ lon min nan,
karanmɔgɔden tan ni fla rɔ min tɔgɔ ko Toma,
ni a ye a welera fanan ko Flani,
ale tun tɛ ni tɔy ye o lon nan.
25 Karanmɔgɔden tɔy naan a fɔra a ɲɛnnɛn ko:
«An naan Mantigi yera.»
Toma ko àyi man ko:
«Ni ni kɔni man nɛgɛy nɔn ye a boro ra,
ka n'borokunanden la o nɛgɛy nɔn rɔ,
ka n'boro la fanan tanba nɔn rɔ a kɛrɛ ra,
ni tɛ la a ra fiyewu.»
26 Ayiwa lɔgɔkun kelenŋ timini kɔ,
karanmɔgɔdeny lajɛnni tɛɛ bon kɔnɔn tuguni.
O lon nan Toma tɛɛ ni àyi ye.
Àyi nɔn tɛɛ day sɔgɔra,
ŋa àyi nanni barala ka Yesu lɔni ye àyi cɛ man.
A naan àyi fora ko:
«Ala ye hɛrɛ kɛ ayi ye.»
27 O kɔ,
a ko Toma man ko:
«Toma,
i mandugu ya;
i boro la ni boro ka ka a flɛ;
o kɔ i ye i borokunanden la ni kɛrɛ ra.
I kanan sigiya,
ŋa i ye limɛnɛnɲan.»
28 Toma ko a man ko:
«E,
ni Mantigi,
ani ni ya Ala!»
29 Yesu ko a man ko:
«I baa ni ye minŋɛ,
o le kɔsɔn i baa la ni ra kɛ!
Miny lani ni ra k'a sɔrɔ àyi man ni ye,
olugu ta ɲanni.»
Yuana ya Kitabu sɛbɛkun