Yesu yeni karanmɔgɔden woronvla boro tuguni
21
1 Ayiwa o koy kɔ fɛ Yesu naan a yɛrɛ yirara a ya karanmɔgɔdeny ra tuguni Tibɛriyadi bada ra.
A naan a yɛrɛ yira àyi ra ɲan min man,
o flɛ nin:
2 O ye a sɔrɔ Simɔn Piyɛri,
ani Toma min ye welera fanan ko Flani,
ani Natanayɛli min ye bɔra Kanan,
Galile mara rɔ,
ani Zebede denɲɛ fla,
ani karanmɔgɔden fla gbɛrɛ,
olugu tɛɛ ɲɔnŋɔn boro.
3 Simɔn Piyɛri ko àyi man ko:
«Ni ye ka wa jɛgɛminanyɔrɔ rɔ.»
Karanmɔgɔden tɔy ko:
«Annugu fanan bɛnan wa ni i ye.»
Àyi bɔni ka wa do kurun kɔnɔn ka kɛ jɔ firi ye.
Ŋa o lon su fɛ,
àyi man jɛgɛ foyi sɔrɔ.
4 Dugu nanni gbɛra minŋɛ,
àyi naan Yesu lɔni yera bada ra;
ŋa karanmɔgɔdeny man a lɔn ko Yesu le.
5 Yesu ko àyi man ko:
«Ni teriy,
ayi baa jɛgɛ dɔ sɔrɔ wa?»
Àyi naan Yesu jabira ko:
«An man foyi sɔrɔ.»
6 Yesu ko àyi man ko:
«Ayi ye jɔ firi kurun kininboroyafan fɛ,
ayi bɛnan dɔ sɔrɔ.»
Àyi naan jɔ firira minŋɛ,
jɛgɛ shiayakojugu fɛ,
àyi man se ka a saman ka bɔ ji rɔ.
7 Karanmɔgɔden min ya ko tɛɛ a di Yesu ye,
ale ko Piyɛri man ko:
«Mantigi le!»
Kabini Simɔn Piyɛri naan a miɛnnan ko Mantigi le minŋɛ,
a naan a ya dereke tara ka a do,
sabu a feri lanŋolon le tɛɛ;
a bienni ji rɔ ka kɛ wa ye Yesu nɔn fɛ.
8 Karanmɔgɔden tɔy nanni kurun kɔnɔn,
àyi ye jɔ samannan,
a fani jɛgɛ ra,
sabu àyi ni gbeere tun tɛ timi nɔnŋɔna ɲan kɛmɛn fla ɲɔnŋɔn ka.
9 Àyi seni kɛnɛn man tuman min,
àyi naan takemi mɛnɛnni yera,
jɛgɛ ye a ka;
àyi naan buru fanan blani yera.
10 Yesu ko àyi man ko:
«Ayi naan jɛgɛ miny minanra,
ayi ye nan ni o dɔy ye ya.»
11 Simɔn Piyɛri doni kurun kɔnɔn ka jɔ saman ka bɔ ni a ye kɛnɛn man,
a fani jɛgɛden baba gbaŋazan nan,
jɛgɛden kɛmɛn ni bilooru ni jɛgɛden saba.
Ŋa jɛgɛ ni a ya shiaya bɛɛ,
jɔ man faran.
12 Yesu ko àyi man ko:
«Ayi ye nan dogoni kɛ.»
Karanmɔgɔden si man sɔn ka a ɲininŋa ko:
«Ile ye jenitigi le ye?»
Sabu àyi bɛɛ nɔn tɛɛ a lɔnnan ko Mantigi le.
13 Yesu naan i mandugura ka buru ta ka a di àyi man,
ani jɛgɛ fanan.
14 Kabini Yesu kununi ka bɔ saya rɔ,
min le tɛɛ a shiɛn sabanan ye a ye a yɛrɛ yirara karanmɔgɔdeny ra.
Yesu ni Piyɛri
15 Àyi naan dogoni kɛra ka ban tuman min nan,
Yesu ko Simɔn Piyɛri man ko:
«Yuana denɲɛ Simɔn,
i ye ni kanunnan ka timi minlugu ka wa?»
Piyɛri ko:
«Ɔnhɔn,
Mantigi,
ile yɛrɛ ye a lɔn ko n'ye i kanunnan.»
Yesu ko a man ko:
«I jando ni ya sagadeny rɔ.»
16 Yesu ko a man tuguni a shiɛn flanan nɔn ko:
«Yuana denɲɛ Simɔn,
i ye ni kanunnan wa?»
Piyɛri ko:
«Ɔnhɔn,
Mantigi;
ile yɛrɛ ye a lɔn ko ni ye ile kanunnan.»
Yesu ko a man ko:
«Ni ya sagay kɔrɔsi.»
17 Yesu ko Piyɛri man shiɛn sabanan nɔn ko:
«Yuana denɲɛ Simɔn,
i ye ni kanunnan wa?»
Piyɛri naan a ɲan sisira,
sabu Yesu naan a ɲininŋara fɔ shiɛn saba ko:
«I ye ni kanunnan wa?»
A ko Yesu man o le rɔ ko:
«Mantigi,
ile ye fen bɛɛ lɔn;
ile yɛrɛ ye a lɔn ko ni ile kanunnan.»
Yesu ko a man ko:
«I jando ni ya sagadeny rɔ.»
18 Yesu ko Simɔn man tuguni ko:
«Ni bɛ a fɔ i ɲɛnnɛn ciɛn rɔ,
ko i kanbelentɔ,
i tɛɛ i ya dereke dora,
ka i yɛrɛ cɛsiri;
ni yɔrɔ min ka i jiya i bɛ wa ye.
Ŋa ni i ka nan kɔrɔ,
i bɛnan i boro kɔrɔta,
mɔgɔ gbɛrɛ bɛ i ya dereke do i ka nan ka i cɛsiri.
I t'a fɛ ka wa yɔrɔ min nɔn,
a bɛ wa ni i ye o yɔrɔ le rɔ.»
19 Piyɛri tun bɛnan sa ɲan min man ka boɲan la Ala tɔgɔ ka,
Yesu naan min kuman fɔra ka o le yira.
O kɔ,
a ko Piyɛri man ko:
«Tugu ni kɔ!»
Yesu ni Karanmɔgɔden min ya ko tɛɛ a di ye
20 Karanmɔgɔden min ya ko tɛɛ a di Yesu ye,
Piyɛri naan a ɲan murura ka o nantɔ ye àyi kɔ fɛ.
Ka àyi to dogonira lon dɔ su fɛ,
o karanmɔgɔden le sigini toni Yesu kɛrɛ fɛ ka a ɲininŋa ko:
«Mantigi,
jenitigi le bɛnan i janva?»
21 Ayiwa,
Piyɛri naan o karanmɔgɔden yera minŋɛ,
a ko Yesu man ko:
«Mantigi,
min do,
mɛnɛn le bɛnan ale sɔrɔ?»
22 Yesu ko a man ko:
«Ni ni y'a fɛ ko ale ye to si ra fɔ ka wa se ni nanlon man,
ile ta mɛnɛn le o rɔ?
Ile kɔni ye tugu ni kɔ drɔn!»
23 Badenman limɛniɲanniy naan o kuman le tara ka o fɔ yɔrɔ bɛɛ ko o karanmɔgɔden tɔgɔ tɛnan sa,
ka a sɔrɔ Yesu man a fɔ Piyɛri ɲɛnnɛn ko a tɛnan sa.
Yesu ko le ko:
«Ni ni y'a fɛ a ye to si ra fɔ ka wa se ni nanlon man,
ile ta mɛnɛn le o rɔ?»
24 Ayiwa,
o karanmɔgɔden le naan min koy seereya ladira,
ale le naan min koy sɛbɛra fanan.
An fanan ye a lɔn ko a ya kuman ye ciɛn le ye.
Kuman laban
25 Ayiwa Yesu naan ko shiaman gbɛrɛ kɛra.
Ni o bɛɛ tun ka sɛbɛ kelenŋ kelenŋ,
ni bɛ a miiri ko o kitabu miny tun bɛnan sɛbɛ olugu tun tɛnan kun dunuɲan bɛɛ lajɛnni kɔnɔn!