Pilati sɔnni Yesu fagako man
19
1 Ayiwa,
Pilati ko ko àyi ye Yesu minan ka a gbisi ni gbɛnɲɛn ye.
2 Sorasiy naan ngbɛnun dannan ka o kɛ yomi masafugula,
ka o biri Yesu kun nan,
ka derekeba wulenman dɔ do a kan nan.
3 Àyi naan i mandugura a kɔrɔ ka a fɔ a man ko:
«Yaudiyay ya mansacɛ,
an ye i fora!»
Àyi naan a kɛra tɛgɛ ci ye a toro kɔrɔ.
4 Pilati bɔni kɛnɛn man tuguni ka a fɔ Yaudiyay man ko:
«Ni bɛnan a to ayi ye bɔ ni a ye kɛnɛn man ya,
beisa ayi ye a lɔn ko ni man foyi sɔrɔ a ya ko rɔ min bɛ se ka kɛ a fagakun ye.»
5 Àyi bɔni ni Yesu ye kɛnɛn man;
ngbɛnun fugula ye a kun nan,
mansadereke wulenman ye a kan nan.
Pilati ko jaman man ko:
«Ayiwa,
cɛ ye nin.»
6 Sarakalasebaga kuntigiy ani Alabatosoba kɔrɔsibagay ɲan lani Yesu ka minŋɛ,
àyi naan i pɛrɛnnan ko:
«A gbengben yiri ra!
A gbengben yiri ra!»
Pilati ko:
«Ayi yɛrɛ ye a minan ka wa a gbengben yiri ra,
sabu ni man foyi ye min cɛ ra min bɛ a fagakun bɔ.»
7 Yaudiya kuntigiy naan Pilati jabira ko:
«Seereya dɔ ye annugu boro;
ka kaɲan ni o seereya ye a ka kan ka faga le,
sabu a ko ko ale le Ala Denɲɛ ye.»
8 Pilati naan o kuman miɛnnan minŋɛ,
dɔ faranni a ya siranɲan ka bele.
9 A segikɔni ka do bonba kɔnɔn tuguni,
ka Yesu ɲininŋa,
ko:
«Ile bɔni mini le?»
Yesu man a jabi.
10 Pilati ko a man ko:
«I jeni ni ra le wa?
I man a lɔn ko se ye ni ye ka i labla,
ko se ni ye ka i gbengben yiri ra fanan wa?»
11 Yesu naan Pilati jabira ko:
«Se foyi si tun tɛnan kɛ ile boro ni ka ni a tun man di i man ka bɔ sanŋolo rɔ;
o le kɔsɔn min naan ni minanra ka nan ni di ile man,
o tigi le baa jurumun ba kɛ ka timi ile ka.»
12 Kabini Yesu naan o fɔra,
Pilati naan cogoya ɲininan ka Yesu labla.
Ŋa Yaudiyay naan a kɛra pɛrɛn ye ko:
«Ni i ka min cɛ labla,
i tɛ mansacɛba Sezari teri ye.
Ni mɔgɔ o mɔgɔ ko ko ale ye mansacɛ le ye,
o tigi ye mansacɛba Sezari jugu le ye.»
13 Pilati naan o kuman miɛnnan minŋɛ,
a naan Yesu labɔra kɛnɛn man tuguni.
Bonba yɔrɔ min rɔbɛnni tɛɛ ni kabakuruy ye,
min ye welera heburukan nɔn ko «Gabata»,
Pilati nanni i sigira a ya kititɛgɛsigilan ka o yɔrɔ le rɔ.
14 O lon dugusɛgbɛ le tɛɛ Jɔnɲanban ɲɛnɛngbɛ ye;
tere tɛɛ a kunɲɛ man.
Pilati ko Yaudiyay man ko:
«Ayi ya mansacɛ ye nin!»
15 Àyi naan i pɛrɛnnan ko:
«A faga!
A faga!
A gbengben yiri ra!»
Pilati ko àyi man ko:
«Ka ayi yɛrɛ ya mansacɛ gbengben yiri ra wa?»
Sarakalasebaga kuntigiy naan a jabira ko:
«Mansacɛ gbɛrɛ tɛ an boro ni mansacɛba Sezari tɛ.»
16 A laban nan Pilati naan Yesu dora àyi boro,
ko àyi ye wa a gbengben yiri ra.
Àyi naan a minanra ka wa ni a ye.
Yesu gbengbenni yiri ra
17 Yesu naan a ya gbengbenyiri tara;
àyi bɔni dugu kɔnɔn ka wa yɔrɔ dɔ rɔ min ye welera ko Kunkolo yɔrɔ;
heburukan nɔn a ye welera ko Gɔligota.
18 Àyi naan a gbengbennan yiri ra o yɔrɔ le rɔ.
Àyi naan mɔgɔ fla gbɛrɛ gbengbennan ni a ye yiri gbɛrɛy ka,
kelenŋ ye a fan kelenŋ nɔn,
kelenŋ ye a fan dɔ rɔ,
Yesu ye àyi cɛ man.
19 Pilati naan kuman dɔ sɛbɛra ka o dɛn gbengbenyiri san fɛ.
A naan a sɛbɛra ko:
«Yesu Nazarɛtikacɛ,
Yaudiyay ya mansacɛ.»
20 Yaudiyay shiaman naan o sɛbɛli karannan,
sabu àyi nɔn tɛɛ Yesu gbengbennan yɔrɔ min nɔn,
o yɔrɔ ni dugu cɛ tun man jan,
ani fanan o sɛbɛli kɛni tɛɛ heburukan le rɔ,
ani latɛnkan,
ani gɛrɛkikan.
21 Sarakalasebaga kuntigiy wani a fɔra Pilati ɲɛnnɛn ko:
«I tun man kan ka a sɛbɛ ko ‹Yaudiyay ya mansacɛ.›
I ka kan tɛɛ ka a sɛbɛ le ko:
‹Cɛ min ko ko ale ye Yaudiyay ya mansacɛ le ye.› »
22 Pilati naan àyi jabira ko:
«Ni baa min sɛbɛ ka ban,
o sɛbɛni le.»
23 Ayiwa sorasiy naan Yesu gbengbennan yiri ra ka ban tuman min nan,
àyi naan a ya faniy tarannan ka o kɛ sigiyɔrɔman naani ye,
àyi bɛɛ kelenŋ kelenŋ ni àyi ta.
Àyi naan a ya derekeba fanan tara;
o derekeba tɛɛ fani kuturu kelenŋ le ye,
karansira si tun tɛ a ra,
ka a ta a sanfɛyɔrɔ man fo ka wa a bla a dugumanyɔrɔ man.
24 Sorasiy naan a fɔra ɲɔnŋɔn ɲɛnnɛn ko:
«An kanan a ya derekeba faran;
an ye kara la,
beisa min bɛnan a sɔrɔ,
an ye o tigi lɔn.»
O kɛni minŋɛ,
min sɛbɛni Ala ya Kitabu kɔnɔn,
o kɛni ciɛn ye ko:
«Àyi naan ni ya faniy tarannan àyi ni ɲɔnŋɔn cɛ,
Ka kara la ni ya derekeba kɔsɔna.»
Sorasiy naan o koy le kɛra.
25 Ayiwa,
Yesu bamuso ani a bamuso badenmuso,
ani Kilopasi muso Mariyamu,
ani Mariyamu Magidalakamuso,
olugu lɔni tɛɛ Yesu ya gbengbenyiri kɛrɛ fɛ.
26 Yesu naan a bamuso yera minŋɛ,
a ya karanmɔgɔden min ya ko tɛɛ a di a ye,
ka o fanan lɔni ye a bamuso kɔrɔ,
a ko a bamuso man ko:
«Ni bamuso,
i denɲɛ le nin.»
27 O kɔ a ko o karanmɔgɔden man ko:
«I bamuso le nin.»
Ka a ta o lon man,
o karanmɔgɔden wani ni Yesu bamuso ye a ya so kɔnɔn.
Yesu sa cogo
28 O kɔ,
Yesu naan a lɔnnan ko koy bɛɛ baa dafa tuman min nan,
a ko:
«Minlɔgɔ ye ni ra.»
A naan o fɔra beisa min sɛbɛni Ala ya Kitabu Kɔnɔn,
o ye kɛ ciɛn ye.
29 O y'a sɔrɔ daga dɔ tɛɛ o yɔrɔ rɔ,
o fani tɛɛ minlifen kumuni dɔ ra.
Àyi naan fu dɔ sura o minlifen nɔn,
ka a dɛn izope yiri dɔ ra,
ka o la Yesu da ra.
30 Yesu naan o minlifen kumuni minnan tuman min nan,
a ko:
«Sisani a bɛɛ baa dafa.»
O kɔ,
a naan a kun birinan ka sa.
Yesu sɔgɔni tanba ra
31 Ayiwa o lon le tɛɛ Yaudiyay ya Nunnɔnkirilon ɲɛnsigi ye.
Yaudiya kuntigiy tun tɛ a fɛ suy ye to gbengbenyiri ra ka Nunnɔnkirilon se;
sabu o Nunɔkirilon le tɛɛ a bo ka timi a tɔy bɛɛ ka.
O le kɔsɔn àyi wani Pilati daarira ko a ye a to àyi ye wa mɔgɔ gbengbenniy seny kerikeri,
ka àyi suy lajigi ka bɔ yiri ra.
32 Cɛ fla miny gbengbenni tɛɛ ni Yesu ye,
sorasiy wani olugu rɔ fɔlɔ gbɛnɛny kerikerira ka a yɛlɛman ka tɔ kelenŋ fanan gbɛnɛny kerikeri.
33 Àyi seni Yesu man minŋɛ,
àyi naan yera ko ale baa sa ka ban.
O le kɔsɔn àyi man ale gbɛnɛny kerikeri.
34 Ŋa o bɛɛ ni a ta,
sorasi kelenŋ naan Yesu sɔgɔra a kɛrɛ ra ni tanba ye.
O yɔrɔni bɛɛ rɔ jeri ni ji bɔni o sɔgɔda rɔ.
35 Mɔgɔ min naan min koy lakeninan,
ale yɛrɛ ɲan le naan a yera;
a ya seereya fanan ye ciɛn le ye.
Ale yɛrɛ lani a ra ko a ye ka ciɛn le fɔ;
a naan min koy lakeninan,
beisa alugu fanan ye la a ra.
36 Ayiwa,
min koy kɛni minŋɛ,
sɛbɛlikumany kɛni ciɛn ye ko:
«A kolo dɔ man kan ka kerib»
37 Sɛbɛli dɔ gbɛrɛ ko tuguni ko:
«Àyi naan min sɔgɔra,
àyi bɛnan àyi ɲan lɔ ale le rɔc.»
Yesu ya sutarali
38 O kɔ,
Yusufu Arimatekacɛ wani Pilati daarira ko a ye a to àyi ye Yesu su lajigi ka bɔ yiri ra;
Pilati sɔnni.
A wani Yesu su lajigira.
Yusufu tɛɛ Yesu ya karanmɔgɔden dɔ le ye,
ŋa a tɛɛ a dogora Yaudiyay kuntigiy ɲɛnsiranɲan le kɔsɔn.
39 Ayiwa,
Nikodɛmu min wani tɛɛ Yesu nɔn fɛ lon dɔ su fɛ,
ale fanan nanni ni sumanjiyalan suguya fla ɲanŋanmuni ye ɲɔnŋɔn nɔn,
miiri ani alowɛsi.
A bɛɛ lajɛnni tɛɛ kile bisaba bɔra.
40 Àyi naan Yesu su tara,
ka fani gbɛ dɔy kɛ ka a mini,
ka kasajiyalany kɛ a ka ka kaɲan ni Yaudiyay ya sudocogo ye.
41 Àyi nɔn tɛɛ Yesu gbengbennan yiri ra yɔrɔ min nɔn,
yiritu dɔ tɛɛ o yɔrɔ rɔ;
kaburu kura dɔ tɛɛ o yiritu kɔnɔn.
Su si tun man do o yɔrɔ rɔ fɔnɔn.
42 Yomi o lon le tɛɛ Yaudiyay ya Nunnɔnkirilon ɲɛnsigi ye,
àyi naan Yesu su dora o kaburu kɔnɔn,
sabu o yɔrɔ le tɛɛ a surun.