Mɔgɔy wani Yesu minanyɔrɔ rɔ
18
1 Ayiwa Yesu naan o kuman fɔra ka ban tuman min nan,
a bɔni ni a ya karanmɔgɔdeny ye ka wa Sedɔrɔn kɔ ɲan dɔ ka.
Yiritu dɔ tɛɛ o yɔrɔ rɔ,
àyi doni o yiritu rɔ.
2 Zudasi min tɛɛ naan Yesu janva,
ale fanan tɛɛ o yiritu yɔrɔ lɔn,
sabu Yesu tɛɛ tora ka wa ni a ya karanmɔgɔdeny ye o yɔrɔ rɔ.
3 O rɔ,
Zudasi blani sorasikuru dɔ ɲɛn,
ani Alabatosoba kɔrɔsibaga dɔy;
sarakalasebaga kuntigiy ani Fariziy le nɔn tɛɛ àyi cera.
Àyi wani sera o yiritu rɔ ni tasumanmɛnɛny ani lamany ani kɛrɛkɛminany ye àyi boro.
4 Ko o ko tɛɛ naan Yesu sɔrɔ,
a yɛrɛ nɔn tɛɛ o bɛɛ lɔnnan ka ban;
a naan i mandugura o mɔgɔy ra ka àyi ɲininŋa ko:
«Ayi ye jenitigi le yɔrɔɲininan?»
5 Àyi naan a jabira ko:
«Yesu Nazarɛtikacɛ.»
Yesu ko àyi man ko:
«Ni le!»
Zudasi min tɛɛ naan Yesu janva,
ale tɛɛ àyi cɛ man.
6 Kabini Yesu ko «Ni le,»
àyi segikɔni ka bien dugu man.
7 Yesu naan àyi ɲininŋara tuguni ko:
«Ayi ye jenitigi le ɲininan?»
Àyi ko:
«Yesu Nazarɛtikacɛ.»
8 Yesu ko àyi man ko:
«Ni baa a fɔ ayi ɲɛnnɛn ka ban ko ni le.
Ni ayi ye ni le yɔrɔɲininan,
ayi ye minlugu to ye àyi ye wa.»
9 O kɛni minŋɛ,
Yesu nɔn tɛɛ kuman min fɔra,
o kɛni ciɛn ye,
ko:
«Ni Fa,
i naan min o min dira ni man,
o si man tunu ni boro.»
10 O ye a sɔrɔ kɛrɛkɛmuru dɔ tɛɛ Simɔn Piyɛri boro.
Ale naan o samannan ka a bɔ,
ka sarakalasebaga kuntigiba ya jɔnɲɛ kininboroyafan toro caro ka a bɔ ye.
O jɔnɲɛ tɔgɔ le tɛɛ ko Malikusi.
11 Yesu ko Piyɛri man ko:
«I ya kɛrɛkɛmuru do a yaa rɔ!
O tuman,
ni Fa Ala naan tɔɔrɔya min latɛgɛra ni man,
ile tɛ a fɛ o ye se ni man wa?»
12 Ayiwa,
sorasiy ani àyi ya kuntigi ani Yaudiyay ya Alabatosoba kɔrɔsibagay naan Yesu minanra ka a siri.
13 Àyi wani ni a ye Ani le fɛ fɔnɔn.
Ani le tɛɛ Kayife blanɲɛ ye;
Kayife le tɛɛ sarakalasebagay kuntigiba ye o san nan.
14 Kayife le nɔn tɛɛ Yaudiya kuntigiy lalira ka a fɔ àyi ɲɛnnɛn ko:
«Mɔgɔ kelenŋ ye sa jamanan mɔgɔy bɛɛ nɔn rɔ,
o le y'a fisa ayi man.»
Piyɛri naan i sɔsɔra Yesu ya karanmɔgɔdenɲan man
15 Àyi watɔ ni Yesu ye,
Simɔn Piyɛri ni karanmɔgɔden dɔ tuguni àyi kɔ.
Lɔnbagaya tɛɛ o karanmɔgɔden ni sarakalasebaga kuntigiba cɛ;
o le kɔsɔn a doni ni àyi ye sarakalasebaga kuntigiba ya lu kɔnɔn.
16 Piyɛri toni kɛnɛn man da ra.
O karanmɔgɔden min tɛɛ sarakalasebaga kuntigiba lɔnbaga dɔ ye,
ale bɔni kɛnɛn man;
muso min tɛɛ da kɔrɔsira,
a nanni kumannan o fɛ ka Piyɛri lado lu kɔnɔn.
17 Bagaradenmuso min tɛɛ da kɔrɔsira,
ale ko Piyɛri man ko:
«Yala ile fanan tun tɛ min cɛ ya karanmɔgɔden dɔ le ye wa?»
Piyɛri ko:
«Ɔn-ɔn,
ni tɛ àyi dɔ ye dɛ!»
18 Yomi nɛnnɛn le tɛɛ ye,
bagaradeny ni sorasiy naan ta kundora ka i lɔ a kɔrɔ ka i ja Piyɛri fanan lɔni tɛɛ àyi kɔrɔ ka kɛ ta ja ye.
Yesu ya ɲininŋali Sarakalasebaga kuntigiba boro
19 Ayiwa sarakalasebaga kuntigiba naan Yesu ɲininŋara a ya karanmɔgɔdeny ani a ya karan ta ko rɔ.
20 Yesu naan a jabira ko:
«Ni kɔni kumanni mɔgɔy bɛɛ ɲan kɔrɔ kɛnɛn ka;
ni tɛɛ mɔgɔy karannan karanso kɔnɔn ani Alabatosoba lu kɔnɔn wagati bɛɛ,
Yaudiyay ye ɲɔnŋɔn lajɛnnan o yɔrɔ miny rɔ;
ni man n'ya kuman si fɔ dogo rɔ.
21 Mɛnɛn kɔsɔn i ye ni ɲininŋara bele?
Mɔgɔ miny sɔnni ka ɲan kuman lamiɛn,
olugu ɲininŋa;
ni kumanni àyi fɛ ɲan min man,
olugu ye o lɔn fo ka ɲan.»
22 Yesu naan o kuman fɔra minŋɛ,
Alabatosoba kɔrɔsibagay rɔ min lɔni tɛɛ a kɔrɔ,
o naan tɛgɛ cira a ɲan ka,
do a fɔ a man ko:
«I ye sarakalasebaga kuntigiba le jabira ta wa?»
23 Yesu ko o cɛ man ko:
«Ni ni naan kumanjugu le fɔra,
fen min naan a kɛra kumanjugu ye,
o fɔ ni ɲɛnnɛn.
Ŋa ni naan min fɔra ni o tɛ kumanjugu ye,
mɛnɛn kɔsɔn ile baa ni gbisi?»
24 Ka Yesu boro fla sirini to,
Ani naan a lawara sarakalasebaga kuntigiba Kayife fɛ.
Piyɛri naan a fɔra tuguni ko ale tɛ Yesu ya karanmɔgɔden dɔ ye
25 O y'a sɔrɔ Simɔn Piyɛri lɔni tɛɛ tasuman jara bele.
Mɔgɔ dɔ ko a man ko:
«Ile fanan tɛ min cɛ ya karanmɔgɔden dɔ le ye wa?»
Piyɛri man sɔn ka i lɔ a ra;
a ko:
«Ɔn-ɔn,
ni tɛ àyi dɔ ye dɛ!»
26 Piyɛri nɔn tɛɛ cɛ min toro kelenŋ carora,
ale badenɲɛ le tɛɛ sarakalasebaga kuntigiba ya bagaraden dɔ ye.
Ale ko Piyɛri man ko:
«O tuman ni yɛrɛ ɲan man ile ni a ye ɲɔnŋɔn boro yiritu rɔ wa?»
27 Piyɛri man sɔn ka i lɔ a ra.
O yɔrɔni bɛɛ rɔ dunun kisini.
Àyi wani ni Yesu ye Pilati fɛ
28 O kɔ,
àyi bɔni ni Yesu ye Kayife fɛ ye ka wa ni a ye jamanantigi ya bonba kɔnɔn.
O kɛni tɛɛ sɔgɔmanda joonan le ra.
Yaudiyay man sɔn ka do bonba kɔnɔn,
beisa àyi kanan lanɔgɔ,
àyi seninɲanni ye to,
ka Jɔnɲanban ɲɛnɛngbɛ dogoni kɛ.
29 O le kɔsɔn Pilati bɔni ka wa àyi nɔn fɛ kɛnɛn man,
ka àyi ɲininŋa ko:
«Min cɛ jarakikun le ye jeni ye ayi boro?»
30 Àyi naan Pilati jabira ko:
«Ni min cɛ tun man kɛ kojugukɛbaga ye,
an tun tɛnan nan ni a ye i fɛ.»
31 Pilati ko àyi man ko:
«Àyi yɛrɛ ye wa ni a ye ka wa a ya kiti tɛgɛ ka kaɲan ni ayi ya seereya ye.»
Àyi ko Pilati man ko:
«A man daga ko annugu ye mɔgɔ si faga.»
32 O kɛni,
beisa Yesu nɔn tɛɛ kuman min fɔra ka a ya saya cogoya yira,
o kuman ye kɛ ciɛn ye.
33 Pilati segikɔni ka do bonba kɔnɔn,
ka Yesu wele ka a ɲininŋa ko:
«Ile le ye Yaudiyay ya mansacɛ ye wa?»
34 Yesu naan a jabira ko:
«Ile yɛrɛ le baa o kuman miiri ka a fɔ wa,
walaman mɔgɔ gbɛrɛ le naan o fɔra i ɲɛnnɛn?»
35 Pilati ko:
«O tuman n'ye Yaudiya dɔ le ye wa?
I yɛrɛ ya siyamɔgɔy ani sarakalasebaga kuntigiy le nanni ni i ye ni fɛ,
ko n'ye kiti tɛgɛ i ka;
i naan jeni le kɛra?»
36 Yesu naan a jabira ko:
«N'ya mansaya tɛ dunuɲan min Kɔnɔn ya;
ni n'ya mansaya tun ka kɛ min dunuɲan Kɔnɔn ya,
ni nɔnfɛmɔgɔy tun bɛnan kɛrɛ kɛ,
beisa Yaudiya kuntigiy kanan se ka ni minan.
Ŋa n'ya mansaya tɛ min dunuɲan kɔnɔn ya sisani.»
37 Pilati ko Yesu man ko:
«O tuman ile ye mansacɛ le ye wa?»
Yesu naan a jabira ko:
«I baa a fɔ ɲan min man,
n'ye mansacɛ le ye.
Ni nanni worora dunuɲan Kɔnɔn min kɔsɔn,
o le ye ka ciɛn yira mɔgɔy ra.
Mɔgɔ o mɔgɔ ye a fɛ ka tagaman ciɛn ka,
o tigi le n'ya kuman lamiɛnnan.»
38 Pilati ko:
«Mɛnɛn yɛrɛ le ciɛn ye?»
Yesu ya saya latɛgɛni Yaudiya boro
A naan o fɔra minŋɛ,
a bɔni ka wa Yaudiyay nɔn fɛ kɛnɛn man tuguni,
ka wa a fɔ àyi man ko:
«Ni kɔni man foyi si sɔrɔ min cɛ ra min ye se ka kɛ a fagakun ye.
39 Ayiwa,
yomi lada dɔ ye ayi boro ko san o san,
Jɔnɲanban ɲɛnɛngbɛ rɔ,
n'ye kasoden kelenŋ lablara,
ayiwa ayi ye a fɛ n'ye Yaudiyay ya mansacɛ labla wa?»
40 Jaman naan i pɛrɛnnan tuguni ko:
«Ɔn-ɔn,
ale tɛ!
Barabasi labla!»
Ka a sɔrɔ o Barabasi tɔgɔ tɛɛ bienŋalikɛla le ye.