Yesu naan Ala daarira a yɛrɛ ya ko rɔ
17
1 Yesu naan o kuman fɔra minŋɛ,
a naan a ɲan kɔrɔtara san fɛ ka a fɔ ko:
«Fa Ala,
sisani wagati baa se,
boɲan la i denɲɛ ka mɔgɔy ɲan kɔrɔ,
beisa ale fanan ye i boɲan.
2 Sabu i naan sebagaya dira a man ka a la sigi dunuɲan mɔgɔy bɛɛ kunnan,
beisa i naan miny bɛɛ lananra a fɛ,
a ye ɲɛnnɛnmanya banberi di olugu man.
3 Ɲɛnnɛnmanya banberi kɔrɔ le ko àyi ye ile lɔn,
ile min kelenpe ye Ala ɲɛnnɛnman ye,
ani i naan min cera,
Yesu Kirisita,
ka o fanan lɔn.
4 Ni baa i tɔgɔ boɲan dugukolo ka;
i nɔn tɛɛ bagara min dira ni man ko ni ye a kɛ,
ni baa o kɛ ka a dafa.
5 Sisani Fa Ala,
ni boɲan,
ka a to ni ye kɛ ni i ye;
boɲan min tɛɛ ni boro kakɔrɔ,
ka a sɔrɔ dunuɲan tun man dan fɔnɔn,
o boɲan di ni man.»
Yesu ya Aladaari karanmɔgɔdeny ye
6 «I naan mɔgɔ miny labɔra dunuɲan mɔgɔy rɔ ka olugu di ni man,
ni baa i tɔgɔ yira olugu ra,
beisa àyi ye i lɔn.
Àyi tɛɛ ile tay le ye,
ŋa i naan àyi dira ni man;
àyi fanan naan i ya kuman lamarala.
7 Sisani kɔni àyi ye a lɔn ko i naan fen o fen dira ni man ko o bɔni ile yɛrɛ le rɔ.
8 Sabu i naan kuman miny fɔra ni ɲɛnnɛn,
ni baa o le fɔ àyi ɲɛnnɛn fanan;
àyi sɔnni o man.
Àyi baa a lɔn ciɛn rɔ,
ko ni bɔni ile le rɔ;
àyi lani a ra ko ile le naan ni cera.
9 Ni ye i daarira olugu le ye.
Ni tɛ i daarira dunuɲan mɔgɔ tɔy ye;
i naan miny dira ni man,
ni ye i daarira olugu le ye,
bawu àyi ye ile ta le ye.
10 Fen o fen ye ni boro,
o ye ile ta le ye;
fen o fen ye ile boro fanan,
o ye ni ta le ye.
Ni ta boɲan ye lɔnnan olugu le fɛ.
11 Ni tɛ dunuɲan Kɔnɔn bele,
ŋa olugu bɛnan to dunuɲan rɔ ya;
ni bɛnan wa i fɛ.
Fa Ala Seninman,
àyi mara ni i tɔgɔ ye,
i naan tɔgɔ min dira ni man,
beisa àyi ye kɛ kelenŋ ye yomi ile ni ni ye kelenŋ ye ɲan min man.
12 Ni tɛɛ ni àyi ye wagati min nan,
ni naan àyi marala ni i tɔgɔ ya sebagaya ye,
i naan sebagaya min dira ni man.
Ni naan àyi bɛɛ marala,
àyi si man halaki,
fɔ min tun ka kan ka halaki,
beisa kuman min sɛbɛni,
o ye kɛ ciɛn ye.
13 Ŋa sisani ni bɛnan wa i fɛ,
ni bɛnan min koy bɛɛ fɔ sisani ka n'to dunuɲan kɔnɔn ya;
beisa ni ya sawa ye kɛ àyi fɛ,
sawa dafani.
14 Ni naan àyi karannan i ya kuman ra;
dunuɲan mɔgɔy ye àyi kɔninɲannan,
sabu àyi ni dunuɲan mɔgɔy tɛ kelenŋ ye yomi ni ni dunuɲan mɔgɔy tɛ kelenŋ ye ɲan min man.
15 Ni tɛ i daarira ko i ye àyi ta ka bɔ dunuɲan rɔ,
ŋa ko i ye àyi latanŋan Sitanan man;
16 sabu àyi ni dunuɲan mɔgɔy tɛ kelenŋ ye,
yomi ni ni dunuɲan mɔgɔy tɛ kelenŋ ye ɲan min man.
17 Àyi bla i dannan ka àyi laseninɲan ni i ya ciɛn ye,
sabu i ya kuman le ye ciɛn ye.
18 I naan ni cera dunuɲan Kɔnɔn ɲan min man,
ni fanan baa àyi ce dunuɲan Kɔnɔn o ɲan kelenŋ le man.
19 Ni naan n'yɛrɛ blara n'dannan ka kɛ ile kelenŋ ta ye olugu le kɔsɔn,
beisa olugu fanan ye bla àyi dannan i ye ciɛn rɔ.»
Yesu ya Aladaari lananbaga tɔy bɛɛ ye
20 «Ni tɛ i daarira minlugu drɔn kɔsɔn;
miny bɛnan la ni ra olugu ya wajibili sababu ra,
ni bɛnan i daari olugu fanan ye,
21 beisa àyi bɛɛ ye bɛn ka kɛ kelenŋ ye,
yomi ile Fa Ala,
ile ye ni rɔ ɲan min man,
ani ni fanan ye ile rɔ ɲan min man.
Olugu fanan ye kɛ annugu rɔ,
beisa dunuɲan mɔgɔy ye la a ra ko ile le naan ni cera.»
22 Ni kɔni,
i naan boɲan min dira ni man,
ni naan o ɲɔnŋɔn le dira àyi man,
beisa àyi ye jɛn ka àyi kan kɛ kelenŋ ye,
yomi ile ni ni ye kelenŋ ye ɲan min man.
23 N'ye olugu rɔ ɲan min man,
ani ile ye ni rɔ ɲan min man,
olugu fanan ye kɛ kelenŋ ye te ka ɲan,
beisa dunuɲan mɔgɔy ye a lɔn ko ile le naan ni cera,
ko ile naan olugu fanan kanunnan yomi i naan ni kanunnan ɲan min man.
24 «Fa Ala,
n'ye a fɛ ko n'bɛnan kɛ yɔrɔ min nɔn,
i naan mɔgɔ miny dira ni man,
olugu fanan ye kɛ o yɔrɔ rɔ,
beisa i naan nɔɔrɔya min dira ni man,
àyi ye o nɔɔrɔya ye;
sabu i naan ni kanunnan kabini dunuɲan tun man dan fɔnɔn.
25 Fa Ala terenni,
dunuɲan mɔgɔy man i lɔn,
ŋa ni kɔni,
ni naan i lɔnnan;
minlugu fanan baa a lɔn ko ile le naan ni cera.
26 Ni baa i tɔgɔ yirara àyi ra,
ni bɛnan a yira àyi ra tuguni,
beisa i naan ni kanunnan ni kanunɲan min ye,
o kanunɲan ɲɔnŋɔn ye kɛ olugu fanan kɔnɔn,
ni fanan ye kɛ àyi kɔnɔn.»