16
1 «Ni baa min koy bɛɛ fɔ ayi ɲɛnnɛn,
beisa ni a ka nan se,
foyi kanan ayi kunnɔnciɛn ka i bɔ lananya rɔ.
2 Àyi bɛnan ayi gbɛn ka bɔ karansoy kɔnɔn;
wagati dɔ yɛrɛ bɛnan se,
ni mɔgɔ min ka ayi dɔ faga,
o tigi bɛnan a miiri ko a baa koɲunman le kɛ Ala ye te.
3 Àyi bɛnan o koy bɛɛ kɛ ayi ra,
sabu àyi man ni Fa Ala lɔn,
àyi man ni fanan lɔn.
4 Ŋa ni baa min koy fɔ ayi ɲɛnnɛn sisani beisa ni a kɛwagati ka nan se ayi hakiri ye jigi a ra ko ni nɔn tɛɛ a fɔra ayi ɲɛnnɛn ka ban.
Ni man kɔnŋɔn ka o koy fɔ ayi ɲɛnnɛn,
sabu ni yɛrɛ tɛɛ ni ayi ye.»
Nin Seninman ya bagara
5 «Ayiwa,
sisani ni bɛnan wa n'cebaga fɛ,
ŋa ayi si man ni ɲininŋa ko:
‹I watɔ mini?›
6 Ni baa min kumany fɔ ayi ɲɛnnɛn minŋɛ,
o le baa ayi jusu kisi kosɔbɛ.»
7 O bɛɛ ni a ta ni ye ciɛn le fɔra ayi ɲɛnnɛn:
Ni ye wa,
o le a fisa ayi man,
sabu ni ni man wa,
Jɛmɛnbaga tɛnan nan ayi fɛ;
ŋa ni ni ka wa,
ni bɛnan a ce ka nan ayi fɛ.
8 Ni o Jɛmɛnbaga ka nan,
a bɛnan a yira dunuɲan mɔgɔy ra ko àyi firini jurumun ta ko rɔ,
ko àyi firini terenniya ta ko rɔ,
ani ko àyi firini Ala ya kiti ta ko rɔ fanan.
9 Àyi firini jurumun ta ko rɔ,
sabu àyi man la ni ra.
10 Àyi firini terenniya ta ko rɔ,
sabu ni bɛnan wa Fa Ala fɛ,
o le kɔsɔn àyi tɛnan ni ye bele.
11 Àyi firini Ala ya kiti ta ko rɔ,
sabu kiti baa tɛgɛ dunuɲan kuntigi ka ka ban.
12 «Fen shiaman ye ni fɛ ka a fɔ ayi ɲɛnnɛn hali bi,
ŋa o y'a bo ayi baraka man sisani.
13 O le kɔsɔn Nin Seninman min bɛnan ciɛn yira,
ni o ka nan,
a bɛnan ayi ɲan minan ka ciɛn bɛɛ yira ayi ra;
sabu a ya kumany tɛnan bɔ a yɛrɛ ra,
ŋa a bɛnan fen o fen miɛn a bɛnan o bɛɛ le fɔ ayi ɲɛnnɛn,
ka ko nantay fanan fɔ ayi ɲɛnnɛn.
14 A bɛnan ni tɔgɔ boɲan,
sabu kuman min ye ni fɛ,
a bɛnan o le ta ka o fɔ ayi ɲɛnnɛn.
15 Fen o fen ye Fa Ala boro o bɛɛ ye ni ta le ye.
O le kɔsɔn ni ko,
ko Nin Seninman le bɛnan ni ya kumany ta ka o fɔ ayi ɲɛnnɛn.»
Karanmɔgɔdeny ya ɲanrɔsisi ni ayi ya sawa
16 O kɔ,
Yesu ko:
«Ni dɔɔni ka kɛ,
ayi tɛnan ni ye;
ŋa ni dɔɔni ka kɛ o kɔ fɛ tuguni,
ayi bɛnan ni ye.»
17 Karanmɔgɔden dɔy naan a kɛra ɲɔnŋɔn ɲininŋa ye ko:
«A baa min fɔ nin,
o kɔrɔ ye di le?
A ko:
‹Ni dɔɔni ka kɛ,
ayi tɛnan ni ye,›
ko ‹ŋa ni dɔɔni ka kɛ o kɔ fɛ tuguni,
ayi bɛnan ni ye,
sabu ni ye ka wa Fa Ala fɛ.›
18 O ‹dɔɔni› kɔrɔ ye jeni ye?
An kɔni man o famu!»
19 Yesu naan a lɔnnan ko karanmɔgɔdeny ye a fɛ ka ale ɲininŋa;
a ko àyi man ko:
«Ni ko minŋɛ ko ‹Ni dɔɔni ka kɛ,
ayi tɛnan ni ye bele,
ko ŋa ni dɔɔni ka kɛ o kɔ fɛ tuguni,
ayi bɛnan ni ye,›
ayi ye ɲɔnŋɔn ɲininŋara o le ra wa?»
20 Ciɛn rɔ ni bɛ a fɔ ayi ɲɛnnɛn ko ayi kɔni,
ayi bɛnan kisi,
ka manɲumankokan bɛɛ fɔ,
k'a sɔrɔ dunuɲan mɔgɔy ye sawara.
Ayi jusu bɛnan kisi,
ŋa Ayi ya jusukisi bɛnan yɛlɛman ka kɛ sawa ye.
21 Ni muso ka kɛ tin ka,
ɲanrɔsisi bɛ a sɔrɔ,
sabu denworo wagati tɔɔrɔya baa se a man.
Ŋa ni den ka woro ka ban,
a hakiri tɛ to a ya dimi rɔ bele sawa kɔsɔn,
sabu mɔgɔ dɔ baa nan dunuɲan Kɔnɔn.
22 Alugu kɔni,
ayi fanan ɲanrɔsisini le sisani;
ŋa ni bɛnan ayi ye bele,
ayi jusukun bɛnan sawa,
mɔgɔ si tɛnan se ka o sawa bɔsi ayi ra.
23 «Ni o lon ka se,
ayi tɛnan ni ɲininŋa foyi ra bele.
Ciɛn rɔ ni bɛ a fɔ ayi ɲɛnnɛn ko ni ayi ka ni Fa Ala daari fen o fen nan ni tɔgɔ ra,
a bɛnan o kɛ àyi ye.
24 Hali bi ayi man foyi daari Ala fɛ ni tɔgɔ ra fɔnɔn;
ayi ye a daari,
a bɛnan a di ayi man,
beisa ayi ya sawa ye dafa.»
Se baa sɔrɔ Yesu boro dunuɲan ka ka ban
25 Yesu ko:
«Ayiwa ni baa ayi karan min koy bɛɛ ra ni kumankɔrɔlamany ye.
Ŋa wagati dɔ bɛnan se,
ni tɛnan ayi karan ni kumankɔrɔlamany ye bele;
ni bɛnan kuman gbɛ ka a fɔ ayi ɲɛnnɛn ka Fa Ala ya koy yira ayi ra.
26 Ni o lon ka nan se,
ayi bɛnan Fa Ala daari ni ni tɔgɔ le ye;
ni tɛnan a fɔ bele ko ni bɛnan Fa Ala daari ayi ye.
27 Sabu Fa Ala yɛrɛ bɛnan ayi kanun,
sabu ayi ye ni kanunnan,
ani ayi lani a ra fanan ko ni bɔni ale le rɔ.
28 Ciɛn le,
ni bɔni Fa Ala le fɛ ka nan dunuɲan Kɔnɔn;
sisani ni bɛnan bɔ dunuɲan kɔnɔn ka segikɔ ka wa Fa Ala fɛ.»
29 Yesu ya karanmɔgɔdeny ko:
«Ɔnhɔn,
sisani kɔni,
i baa kuman gbɛ ka a fɔ an ɲɛnnɛn;
a man kɛ ni kumankɔrɔlaman ye bele.
30 Sisani kɔni an baa a lɔn ko i ye fen bɛɛ lɔn,
ko hali i ka kan ka ɲininŋa ko miny ra,
i ye o ɲininŋali bɛɛ lɔn ka ban,
sani i ye ɲininŋa.
O le kɔsɔn an lani a ra ko i bɔni Ala rɔ.»
31 Yesu naan àyi jabira ko:
«Ayi ko ko ayi lani ni ra sisani kɛ?
32 Ayiwa wagati dɔ bɛnan se,
a yɛrɛ baa se ka ban,
ayi bɛɛ bɛnan bori ka jɛnzɛn,
bɛɛ bɛnan wa a ta fan fɛ,
ka ni kelenŋ to.
Ŋa o bɛɛ ni a ta ni kelenŋ tɛnan to,
sabu Fa Ala ye ni ni ye.
33 Ni baa min koy fɔ ayi ɲɛnnɛn,
beisa ayi jusu sumanni ye to ni ya jɛnɲɔnŋɔnɲan rɔ.
Ayi bɛnan tɔɔrɔyakoy sɔrɔ dunuɲan kɔnɔn,
ŋa ayi ye ayi jija!
Ni baa se sɔrɔ dunuɲan ka.»