Yesu le rɛzɛnjun ye
15
1 Yesu ko:
«Ni le rɛzɛnjun sɔbɛ ye,
ni Fa le ye a sɛnɛnbaga ye.
2 Yiriboro o yiriboro ye ni ra,
ni a tɛ dennan,
a bɛ o tɛgɛ ka a bɔ ye.
Ŋa yiriboro o yiriboro ye ni ra,
ni a ye dennan,
a bɛ o kɛrɛfɛboroy tɛgɛtɛgɛ ka a dakaɲan,
beisa a ye den shiaman kɛ ka timi fɔlɔ ta ka.
3 Ni baa karan min di ayi man,
o karan le kɔsɔn ayi baa seninɲan ka ban.»
4 Ayi ye to n'ya jɛnɲɔnŋɔnɲan rɔ,
ni fanan bɛnan to ayi ya jɛnɲɔnŋɔnɲan rɔ.
Yiriboro gbaŋazan tɛ se ka den a yɛrɛ man,
ni a nɔrɔni tɛ rɛzɛnjun nan;
ni ayi fanan man to n'ya jɛnɲɔnŋɔnɲan rɔ,
ayi tɛ se ka foyi kɛ Ala ye.
5 «Ni le rɛzɛnjun ye,
alugu le a boroy ye.
Ni mɔgɔ min ka to ɲan jɛnɲɔnŋɔnɲan rɔ,
ni ni fanan ka to o tigi ya jɛnɲɔnŋɔnɲan rɔ,
o tigi le bɛ den shiaman kɛ;
sabu ayi tɛ se ka foyi kɛ ni ni tɛ ni ayi ye.
6 Ni mɔgɔ min man to n'ya jɛnɲɔnŋɔnɲan rɔ,
o tigi bɛnan lafiri kɛnɛn man yomi yiriboro tɛgɛni;
a bɛ ja;
o kɔ,
àyi bɛ o yiriboroy cɛ ka àyi lafiri tasuman rɔ ka àyi jeni.
7 Ni ayi ka to ni y'a jɛnɲɔnŋɔnɲan rɔ,
ni ni y'a kumany ka to ayi kɔnɔn,
ayi ka kɛ fen o fen kɔ ayi ye o daari,
ayi bɛnan o sɔrɔ.
8 Ni ayi ka den shiaman kɛ,
ka a yira ko ayi ye ni ya karanmɔgɔdeny ye,
o le bɛnan ni Fa boɲan.
9 Fa Ala naan ni kanunnan cogo min nan,
ni baa alugu kanun o cogo le ra fanan;
ayi ye to ni ya kanunɲɔnŋɔnɲan rɔ.
10 Ni ayi ka ni ya cefɔniy kɛ,
ayi bɛnan to ni ya kanunɲɔnŋɔnɲan rɔ,
yomi ni naan n'Fa ya cefɔniy kɛra ɲan min man,
ka to a ya kanunɲɔnŋɔnɲan rɔ.»
Lananbagay ye Yesu teriy ye
11 «Ni baa min koy fɔ ayi ɲɛnnɛn le,
beisa sawa min ye ni ra,
o ye kɛ ayi ra,
ani ayi ya sawa ye dafa.»
12 Ni ya cefɔni flɛ nin:
Ayi ye ɲɔnŋɔn kanun yomi ni naan ayi kanunnan ɲan min man.
13 Ka i yɛrɛ di ka sa i teriy kɔsɔn,
kanunɲan si tɛ timi o ka.
14 Ni baa cefɔni min fɔra ayi ɲɛnnɛn,
ni ayi ka o kɛ,
o tuman ayi bɛnan kɛ ni teriy ye.
15 Ni tɛ ayi wele bele ko bagaradeny,
sabu bagaraden tɛ a mantigicɛ ya kokɛtay kara man;
ni baa ayi wele ko n'teriy,
sabu ni naan fen o fen sɔrɔra n'Fa fɛ ni baa alugu karan o bɛɛ ra.
16 Alugu man ni ɲannanwoloman;
ni le naan alugu ɲannanwolomannan,
ka ayi ce,
beisa ayi ye kɛ yomi yiri min ye dennan,
den min nanfa tɛ ban.
O ɲan man ni ayi ka ko o ko daari Fa Ala fɛ ni tɔgɔ ra,
a bɛ o di ayi man.
17 Ni ye min ɲininan ayi fɛ o le ko ayi ye ɲɔnŋɔn kanun.
Dunuɲan mɔgɔy bɛnan lananbagay kɔninɲan
18 Ni dunuɲan mɔgɔy ka ayi kɔninɲan,
ayi ka kan ka a lɔn ko àyi kɔnɲɔnni ka ni kɔninɲan alugu ɲɛn.
19 Ni ayi ni dunuɲan mɔgɔy tun ka kɛ kelenŋ ye,
àyi tun bɛnan ayi kanun,
sabu ayi ye àyi dɔ ye.
Ŋa ayi ni dunuɲan mɔgɔy tɛ kelenŋ ye minŋɛ,
ani ni baa ayi ɲananwoloman ka bɔ dunuɲan rɔ minŋɛ,
o le kɔsɔn àyi bɛnan ayi kɔninɲan.
20 «Ni baa kuman min fɔ ayi ɲɛnnɛn ayi ye ayi hakiri to o rɔ,
ko:
‹Jɔn tɛ boɲannan ka timi a mantigicɛ ka.›
Ni àyi ka ni tɔɔrɔ,
àyi bɛnan alugu fanan tɔɔrɔ;
ni àyi ka sɔn ni ya kuman man,
àyi bɛnan sɔn alugu fanan ya kuman man.»
21 Ŋa àyi bɛnan o koy bɛɛ kɛ ayi ra ni tɔgɔ le kɔsɔn,
sabu min naan ni cera,
àyi man o lɔn.
22 Ni a tun ka kɛ ko ni man nan,
ani ni ni tun man kuman àyi fɛ,
àyi tun tɛnan jaraki àyi ya jurumun ta ko rɔ bele;
ŋa sisani kɔni ni àyi ka jurumun kɛ,
àyi jarakiberi tɛ to.
23 Mɔgɔ min bɛnan ni kɔninɲan,
o tigi ye ni Fa fanan kɔninɲannan.
24 Mɔgɔ si man kɛwalen miny ɲɔnŋɔn si kɛ,
ni ni tun man o kɛ ayi ɲan kɔrɔ,
àyi tun tɛnan jaraki àyi ya jurumun kɔsɔn bele.
Ŋa sisani àyi baa ni ya kɛwaleny ye,
ŋa àyi ye ni ni n'Fa kɔninɲannan bele.
25 Ŋa o kɛni le beisa min sɛbɛni àyi ya seereya rɔ,
o ye kɛ ciɛn ye ko:
«Àyi naan ni kɔninɲannan gbaŋazana.»