Yesu le ye sira ye
14
1 Ayiwa o kɔ,
Yesu ko a ya karanmɔgɔdeny man ko:
«Ayi hakiri kanan ɲanŋanmu;
ayi ye la Ala ra,
ayi ye la ni fanan ra.
2 Sigiyɔrɔ shiaman ye ni Fa boro,
ni o tun tɛ ciɛn ye,
ni tun tɛnan o fɔ ayi ɲɛnnɛn ko ni bɛnan wa yɔrɔ rɔbɛn ayi ye.
3 Ni ni ka wa yɔrɔ rɔbɛn ayi ye ka ban tuman min nan,
ni bɛnan kɔsegi ka nan ayi ta ka wa to n'kɔrɔ,
beisa n'ye yɔrɔ min nɔn,
ayi fanan ye kɛ ye.
4 Ni bɛnan wa yɔrɔ min nɔn,
ayi ye o sira lɔn.»
5 Toma ko Yesu man ko:
«Mantigi,
annugu man i wayɔrɔ lɔn,
an bɛnan a sira lɔn cogo di?»
6 Yesu ko Toma man ko:
«Ni le sira ye,
ani ciɛn,
ani ɲɛnnɛnmanya;
mɔgɔ si tɛ nan Fa Ala fɛ,
ni a man timi ni fɛ.
7 Ni ayi tun ka ni lɔn,
ayi tun bɛnan ni Fa fanan lɔn,
ŋa sisani ayi ye a lɔn,
ayi fanan baa a ye.»
8 Filipe ko Yesu man ko:
«Mantigi,
Fa Ala yira an nan;
o bɛnan annugu wasa.»
9 Yesu ko Filipe man ko:
«Ni ni alugu ye ɲɔnŋɔn boro kabini wagati jan,
ŋa hali bi ile man ni lɔn wa,
Filipe?
Ni mɔgɔ min ka ni ye,
o tigi baa Fa Ala le ye;
mɛnɛn kɔsɔn ile ye a fɔra tuguni ko:
‹Fa Ala yira an nan?›
10 O tuman ile man la a ra ko ni ye Fa Ala rɔ,
ko Fa Ala fanan ye ni rɔ?
N'ye kuman min fɔra ayi ɲɛnnɛn o man bɔ ni yɛrɛ rɔ;
Fa Ala min ye ni rɔ,
ale yɛrɛ ni ni le jɛnnan ka a ya bagara kɛ.
11 Ayi ye la ni ra:
ni ye Fa Ala rɔ,
Fa Ala fanan ye ni rɔ;
ni o man ayi wasa,
ni ye kɛwalen miny kɛra ayi ye la ni ra olugu kɔsɔn.
12 Ciɛn rɔ ni bɛɛ a fɔ ayi ɲɛnnɛn ko ni mɔgɔ min ka la ni ra,
ni ye bagara min kɛra,
o tigi bɛnan o ɲɔnŋɔn kɛ;
a yɛrɛ bɛnan bagara dɔy kɛ miny y'a bon ka timi ni tay ka,
sabu ni bɛnan wa Fa Ala fɛ.
13 Ni ayi ka fen o fen daari Ala fɛ ni tɔgɔ ra,
ni bɛnan o kɛ;
beisa Denɲɛ ye Fa Ala ya boɲan yira mɔgɔy ra.
14 Ni ayi ka fen o fen daari ni tɔgɔ ra,
ni bɛnan o kɛ.»
Nin Seninman layeri tani lananbagay ye Yesu boro
15 Ni ayi ka kɛ ni kanunnan,
ni baa ce miny fɔ ayi ɲɛnnɛn ayi bɛnan o kɛ.
16 Ni fanan bɛnan Fa Ala daari ko a ye jɛmɛnbaga gbɛrɛ di ayi man,
beisa o ye to ni ayi ye tuman bɛɛ.
17 Nin Seninman min ye ciɛn yirara,
o le.
Dunuɲan mɔgɔy tɛ se ka o sɔrɔ,
sabu ayi tɛ se ka a ye,
ayi tɛ se ka a lɔn fanan.
Ŋa alugu kɔni baa a lɔn,
sabu a ye ni alugu ye,
a bɛnan kɛ ayi jusukun nan fanan.
18 Ni tɛnan ayi to ayi kelenŋ nan yomi feretaniy;
ni bɛnan segikɔ ka nan ayi fɛ tuguni.
19 Sani dɔɔni cɛ dunuɲan mɔgɔy tɛnan ni ye,
ŋa alugu kɔni,
ayi bɛnan ni ye;
sabu ni bɛnan ɲɛnnɛnmanya tuguni,
o le kɔsɔn ayi fanan bɛnan ɲɛnnɛnmanya.
20 O lon le ra ayi bɛnan a famu ko ni ye ɲɛnnɛnmanyara n'Fa Ala le rɔ,
ko ayi bɛnan ɲɛnnɛnmanya ni rɔ,
ko ni fanan bɛnan ɲɛnnɛnmanya alugu rɔ.
21 «Mɔgɔ min ye ni ya kuman lamiɛnnan,
ka a sira tagaman,
o tigi le ni kanunnan.
Mɔgɔ min ye ni kanunnan,
ni Fa bɛnan o tigi kanun;
ni fanan bɛnan o tigi kanun ka n'yɛrɛ yira a ra.»
22 Ayiwa,
Zude,
min ni Zudasi Sikariyɔti tɛ kelenŋ ye,
ale ko:
«Mantigi,
mɛnɛn kɔsɔn i bɛnan i yɛrɛ yira annugu drɔn nan,
ŋa i tɛnan i yɛrɛ yira dunuɲanmɔgɔ tɔy ra?»
23 Yesu naan a jabira ko:
«Mɔgɔ min ye ni kanunnan,
o tigi bɛnan ni ya kumany sira tagaman,
ni Fa fanan bɛnan o tigi kanun;
ni ni n'Fa Ala bɛnan nan o tigi fɛ,
ka nan to ni o tigi ye.»
24 Mɔgɔ min tɛ ni kanunnan,
o tigi tɛ ni ya kumany sira tagamannan.
Ayi ye kuman min miɛnnan ni fɛ o man bɔ ni yɛrɛ rɔ;
a bɔni ni cebaga Fa Ala le rɔ.
25 Ni baa min koy fɔ ayi ɲɛnnɛn,
ka ni to ni ayi ye.
26 Ŋa Fa Ala bɛnan Jɛmɛnbaga min ce ayi man ni tɔgɔ ra,
min ye Nin Seninman ye,
ale le bɛnan ayi karan fen bɛɛ ra;
ni naan fen o fen fɔra ayi ɲɛnnɛn a bɛnan ayi hakiri lajigi o bɛɛ ra.
27 Ni bɛnan jususuman le to ayi boro,
ni bɛnan ɲan jususuman le di ayi man.
Ni tɛ a dira ayi man dunuɲan mɔgɔy ta dicogo ra.
Ayi hakiri kanan ɲanŋanmu,
ayi kanan siran.
28 «Ayi baa a miɛn ni ra ka ban ko ‹Ni bɛnan wa;
ŋa ni bɛnan kɔsegi ka nan ayi fɛ tuguni.›
Ni ayi tun ka kɛ ni kanunnan,
ayi tun bɛnan sawa ko ni ye ka wa Fa Ala fɛ;
sabu Fa Ala y'a bon ni ni ye.
29 Ayiwa,
sisani,
ni ye ka min koy fɔ ayi ɲɛnnɛn,
sani a kɛwagati ye se;
beisa ni a ka nan se,
ayi ye la n'ya kuman ra.»
30 Ni tɛnan kuman ni ayi ye bele ka miɛn,
sabu dunuɲan kuntigi bɛnan nan ni kaman;
ŋa se foyi si tɛ a boro ni ka.
31 Ni Fa Ala naan cefɔni min dira ni man,
ni bɛnan o le kɛ,
beisa dunuɲan mɔgɔy ye a lɔn ko ni ye Fa Ala kanunnan.
«Ayi ye wiri,
an n'ye wa ka bɔ ya.»