Karanmɔgɔdeny sen koni Yesu boro
13
1 Ayiwa,
a tɔ tun baa to tere kelenŋ Yaudiyay ya Jɔnɲanban ɲɛnɛngbɛ ye se,
Yesu tɛɛ a lɔn ko wagati baa se ale ye bɔ dunuɲan kɔnɔn ka wa Fa Ala fɛ.
Mɔgɔ miny lani tɛɛ a ra dunuɲan kɔnɔn ya,
a nɔn tɛɛ olugu kanunnan;
a naan àyi kanunnan fo ka wa se a dan nan.
2 Yesu ni a ya karanmɔgɔdeny tɛɛ wulala donnan;
o y'a sɔrɔ Sitanan nɔn tɛɛ Yesu janva miiriya dora Simɔn denɲɛ Zudasi Sikariyɔti jusukun nan ka ban.
3 Yesu tɛɛ a lɔn fanan ko Fa Ala naan sebagaya bɛɛ dora ale boro,
ko ale bɔni Ala rɔ,
ko a fanan bɛnan segikɔ ka wa Ala fɛ.
4 Ayiwa Yesu wirini dogoni kunnan,
ka a ya derekeba bɔ ka a bla,
ka fani dɔ ta ka a yɛrɛ cɛsiri ni o ye.
5 O kɔ a naan ji kɛra minan dɔ kɔnɔn ka kɛ ni a ya karanmɔgɔdeny seny ko ye;
fani min tɛɛ a cɛ man a naan ayi seny jɔsira ni o ye.
6 A nanni sera Simɔn Piyɛri man minŋɛ,
Piyɛri ko:
«Mantigi,
ile yɛrɛ le ni sen kora wa!»
7 Yesu ko a man ko:
«Ni ye min kɛra ta,
ile kɔni tɛ se ka o kɔrɔ lɔn sisani;
ŋa lon dɔ i bɛnan a kɔrɔ lɔn.»
8 Piyɛri ko:
«Ɔn-ɔn,
ni tɛ sɔn ile ye ni sen ko fiyewu.»
Yesu ko a man ko:
«Ni ni man i sen ko,
i tɛnan i ɲinyɔrɔ sɔrɔ ni fɛ dɛ!»
9 Simɔn Piyɛri ko:
«Ayiwa,
Mantigi,
ni o le,
i kanan dan ni sen koli drɔn man,
ŋa ni boroy,
ani ni kun fanan ko.»
10 Yesu ko a man ko:
«Ni mɔgɔ min feri yɔrɔ bɛɛ ka ko ka ban,
o tigi manko tɛ koli gbɛrɛ ra bele;
a kɔni ye se ka a seny ko,
ni o tɛ a seninɲanni le.
Ayi seninɲanni,
ŋa ayi bɛɛ tɛ dɛ!»
11 Karanmɔgɔden min tun bɛnan Yesu janva,
a tɛɛ o lɔn;
o le kɔsɔn a ko:
«Ayi bɛɛ man seninɲan.»
12 Yesu naan a ya karanmɔgɔdeny sen kora ka ban tuman min nan,
a naan a ya derekeba dora,
ka i sigi dogonikɛyɔrɔ rɔ tuguni.
A ko karanmɔgɔdeny man ko:
«Ni baa min kɛ ayi ra,
ayi ye o kɔrɔ lɔn wa?
13 Ayi ye ni welera ko:
‹An Karanmɔgɔ› walaman ko ‹Mantigi.›
O bɛnni le,
sabu ni ye o le ye.»
14 Ayiwa ni min ye ayi Mantigi ye ani ayi Karanmɔgɔ,
ni ni ka ayi sen ko,
o tuman ayi fanan ka kan ka ɲɔnŋɔn sen ko le.
15 Ni baa min kɛ ka a yira ayi ra le,
beisa ni baa a kɛ ayi ye ɲan min man,
ayi fanan ye a kɛ ɲɔnŋɔn ye te.
16 Ciɛn rɔ ni bɛ a fɔ ayi ɲɛnnɛn ko jɔn tɛ se ka boɲan ka timi a matigicɛ ka,
celaden fanan tɛ se ka boɲan ka timi a cebaga ka.
17 Sisani ayi baa o koy lɔn;
ni ayi ka sɔn ka a kɛ,
nɛnman bɛ ayi ye.
18 «Ni tɛ min fɔra ayi bɛɛ man dɛ!
Ni naan miny ɲananwolomannan,
ni ye olugu lɔn.
Ŋa celay naan min fɔra Kitabu Kɔnɔn,
o ka kan ka dafa le;
a sɛbɛni ko:
‹Min tɛɛ dogoni kɛra ni ni ye,
o naan a yɛrɛ kɛra ni jugu yea.›
19 Ni bɛ o fɔ alugu ɲɛnnɛn sisani sani a kɛwagati ye se,
beisa ni a ka se,
ayi ye la a ra ko ni ko ‹Ni ye min ye,
ni ye o le ye›.
20 Ciɛn rɔ ni bɛ a fɔ ayi ɲɛnnɛn,
ko ni mɔgɔ min ka sɔn ni ya celaden nɔn,
o tigi sɔnni ni yɛrɛ le rɔ;
ni mɔgɔ min fanan ka sɔn ni rɔ,
o tigi sɔnni ni cebaga le rɔ.»
Zudasi ya janva fɔni Yesu boro
21 Yesu naan o kuman fɔra minŋɛ,
a hakiri ɲanganmuni kosɔbɛ.
A naan a fɔra ayi man ka a gbɛlɛya ko:
«Ciɛn rɔ ni bɛ a fɔ ayi ɲɛnnɛn ko alugu rɔ kelenŋ bɛnan ni janva.»
22 A naan o fɔra minŋɛ,
karanmɔgɔdeny naan a kɛra ɲɔnŋɔn flɛflɛ ye;
àyi man a lɔn,
a kan tɛɛ min tigi man.
23 Yesu ya karanmɔgɔden dɔ tɛɛ ye,
ale ya ko tɛɛ a di Yesu ye kosɔbɛ;
ale le tɛɛ Yesu kɔrɔ.
24 Simɔn Piyɛri naan tɔgɔmansere dɔ kɛra ale man,
ko a ye Yesu ɲininŋa,
ko a kan jenitigi le man.
25 O karanmɔgɔden naan i mandugura Yesu ra,
ka a ɲininŋa ko:
«Mantigi,
i kan jenitigi le man?»
26 Yesu naan a jabira ko:
«Ni ni ka buru su ka a di mɔgɔ min man,
o tigi le.»
A naan buru tara ka a su ka a di Simɔn Sikariyɔti denɲɛ Zudasi man.
27 Kabini buru dini Zudasi man drɔn,
Sitanan doni a rɔ.
Yesu ko a man ko:
«I ye a fɛ ka min kɛ,
i teliya ye o kɛ sa.»
28 Ŋa miny tɛɛ dogonira ni Yesu ye,
olugu si man a lɔn fen min naan a tora a naan o kuman fɔra.
29 Yomi Zudasi le tɛɛ werimarabaga ye,
dɔy naan a miirira ko Yesu ko a man ko:
«An manko ye fen miny ra ka Jɔnɲanban ɲɛnɛngbɛ kɛ olugu san»,
walaman:
«Wa fanŋandany sɔn.»
30 O rɔ,
Zudasi naan buru minanra ka bɔ kɛnɛn man o yɔrɔni kelenŋ bɛɛ rɔ.
O ye a sɔrɔ su tun baa ko.
Yesu ya cefɔni kura
31 Ayiwa Zudasi Sikariyɔti bɔni kɔ,
Yesu ko a ya karanmɔgɔdeny man ko:
«Sisani kɔni boɲan baa la Mɔgɔ Denɲɛ ka,
ka boɲan la Ala fanan ka a le sababu ra.
32 [Ni boɲan lani Ala ka ale sababu ra,]
Ala yɛrɛ fanan bɛnan boɲan la ale ka;
a fanan tɛnan miɛn ka o boɲan la a ka.
33 Ni deny,
n'ye ni ayi ye wagati dɔɔni drɔn le.
Ayi bɛnan ni yɔrɔɲini,
ŋa ni baa min fɔ Yaudiya kuntigiy ɲɛnnɛn,
ni bɛnan o kelenŋ le fɔ alugu ɲɛnnɛn,
ko ni bɛnan wa yɔrɔ min nɔn,
alugu tɛ se ka wa o yɔrɔ rɔ.
34 Ni bɛnan ce kura fɔ ayi ɲɛnnɛn:
ayi ye ɲɔnŋɔn kanun;
ni naan alugu kanunnan ɲan min man,
alugu fanan ye ɲɔnŋɔn kanun te.
35 Ni kanun ka kɛ ayi ni ɲɔnŋɔn cɛ,
bɛɛ bɛnan a lɔn o le man ko ayi ye ni ya karanmɔgɔdeny le ye.»
Yesu ko ko Piyɛri bɛnan i ban ale rɔ
36 Simɔn Piyɛri naan Yesu ɲininŋara ko:
«Mantigi,
i bɛnan wa mini le?»
Yesu naan a jabira ko:
«Ni bɛnan wa yɔrɔ min nɔn,
ile tɛ se ka wa ni ni ye sisani o yɔrɔ rɔ;
ŋa lon dɔ i bɛnan wa ni nɔn fɛ.»
37 Piyɛri ko Yesu man ko:
«Mantigi,
mɛnɛn kɔsɔn ni tɛ se ka wa ni i ye sisani?
Ni bɛ sɔn ka n'yɛrɛ di hali ka sa ile kɔsɔn!»
38 Yesu ko a man ko:
«Ile bɛnan sa ni kɔsɔn wa!
Ciɛn rɔ,
ni bɛ a fɔ i ɲɛnnɛn ko sani dunun ye kisi,
ile bɛnan a fɔ mɔgɔy ɲɛnnɛn fo shiɛn saba ko i man ni lɔn.»