Yesu sen munni Mariyamu boro ni turu kasaduman ye
12
1 Ayiwa,
tere wɔɔrɔ ka kɔnŋɔn Jɔnɲanban ɲɛnɛngbɛ ɲɛn;
Yesu wani Betani.
A nɔn tɛɛ Lazari min su lakununan,
o tɛɛ o dugu le kɔnɔn.
2 Àyi naan dogoni dɔ ladɛnɛnnan Yesu ye o yɔrɔ rɔ.
Mariti le tɛɛ o dogoniko ɲananbɔbaga ye;
Lazari fanan tɛɛ dogonira ni dogonikɛbaga tɔy ye.
3 Ka àyi to dogonira Mariyamu naan turu kasaduman yɛrɛworo sɔnŋɔn gbɛlɛn dɔ tara,
min tun bɛɛ litiri taranɲɛ bɔ,
ka o turu kɛ Yesu seny ka,
o kɔ a naan a seny jɔsira ni a yɛrɛ kunsigi ye.
O turu kasa naan bon yɔrɔ bɛɛ minanra.
4 Yesu ya karanmɔgɔden,
Zudasi Sikariyɔti,
min tɛɛ naan kɛ a janvabaga ye,
ale ko:
5 «Mɛnɛn kɔsɔn min turu kasaduman man fere werigbɛ kɛmɛn sabaa ka o weri di fanŋandany man?»
6 Zudasi tun man o fɔ fanŋandany hinɛn kɔsɔn,
ŋa a naan o fɔra le sabu son le tɛɛ;
ale le tɛɛ àyi ya werimarabaga ye,
ŋa ni weri min tun ka di a man,
a tɛɛ o tara.
7 Ŋa Yesu ko a man ko:
«Muso to ɲansuman rɔ;
a to a ye min kɛ ni ya sutarali kaman.
8 Sabu fanŋandany kɔni,
olugu ye ni ayi ye ya tuman bɛɛ,
ŋa ni tɛnan to ni ayi ye ya wagati bɛɛ dɛ!»
Janva min sirini Lazari kaman
9 Ayiwa Yaudiyay naan miɛnnan minŋɛ ko Yesu ye Betani,
àyi shiaman wani ye.
Àyi tun man wa Yesu yɛrɛ drɔn kɔsɔn,
ŋa a nɔn tɛɛ Lazari min su lakununan,
àyi wani tɛɛ ale fanan flɛyɔrɔ le rɔ.
10 Sarakalasebaga kuntigiy naan a latɛgɛra ko ni a ye te,
alugu bɛnan Lazari fanan faga;
11 sabu Lazari kɔsɔn Yaudiyay shiaman tɛɛ bɔra alugu kɔ ka la Yesu ra.
Yesu doni Zeruzalɛmu
12 Ayiwa o lon dugusɛgbɛ,
jaman shiaman min nanni tɛɛ Zeruzalɛmu Jɔnɲanban ɲɛnɛngbɛ ra,
olugu naan a miɛnnan ko Yesu ye ka nan Zeruzalɛmu.
13 Àyi naan tamaro yiriboroy tɛgɛtɛgɛra,
ka bɔ ka wa Yesu kunbɛn.
Àyi tɛɛ ka i pɛrɛn ko:
«Hozana!
Min ye ka nan Mantigi tɔgɔ ra,
duwau ye kɛ o ye!
Izirayɛli ya mansacɛ leb!»
14 Yesu nɔn tɛɛ sofeliden dɔ sɔrɔra;
a naan i sigira o ka,
yomi sɛbɛli naan a fɔra ɲan min man ko:
15 «Siyɔn dugumɔgɔy,
ayi kanan siran!
A flɛ,
ayi ya mansacɛ ye ka nan,
A sigini sofeliden dɔ kac.»
16 Karanmɔgɔdeny man o ko kɔrɔ famu o wagati ra;
ŋa Yesu nanni kununan minŋɛ ka bɔ saya rɔ ka do Ala ya nɔɔrɔya rɔ,
ayi hakiri sɔrɔni ka jigi o ra ko celay nɔn tɛɛ min sɛbɛra Yesu ya ko rɔ ko mɔgɔy nɔn tɛɛ o le kɛra a ye te.
17 Jaman min tɛɛ ni Yesu ye wagati min a nɔn tɛɛ Lazari welera ka bɔ kaburu kɔnɔn ka a lakunu saya rɔ,
olugu tɛɛ o koy seereya ladira.
18 O le kɔsɔn jaman nanni tɛɛ a kunbɛnnan,
sabu àyi nɔn tɛɛ a miɛnnan ko a naan o tɔgɔmansere kɛra.
19 Ayiwa,
Fariziy naan a kɛra a fɔ ye ɲɔnŋɔn ɲɛnnɛn ko:
«Ayi yɛrɛ ɲan ye a la kɛ,
ayi tɛ se ka foyi kɛ min cɛ ra;
mɔgɔ bɛɛ tuguni a kɔ.»
Gɛrɛki dɔy ye a fɛ ka kuman Yesu fɛ
20 Mɔgɔ miny nanni tɛɛ Zeruzalɛmu ɲɛnɛngbɛ rɔ ka nan Ala bato,
Gɛrɛki miny tɛɛ Yaudiyay ya dinan rɔ,
olugu dɔy tɛɛ o mɔgɔy cɛ man.
21 O Gɛrɛkiy naan i mandugura Filipe ra,
min bɔni Bɛtisayida,
Galile mara rɔ;
àyi naan a ɲininŋara ko:
«N'tericɛ,
annugu ye a fɛ ka Yesu ye ka kuman a fɛ.»
22 Filipe wani o fɔra Andere ɲɛnnɛn;
àyi mɔgɔ fla wani o fɔra Yesu ɲɛnnɛn.
23 Yesu naan àyi jabira ko:
«wagati baa se Mɔgɔ Denɲɛ ya boɲan bɛnan yira»
24 Yesu ko tuguni ko:
«Ciɛn rɔ ni bɛ a fɔ ayi ɲɛnnɛn ko ni sumankisɛ man do dugukolo rɔ ka sa,
a ye to a kelenŋ nan;
ŋa ni a ka sa,
a ye fɛrɛnnan ka den shiaman kɛ.
25 Ni mɔgɔ min ka a yɛrɛ nin kanun,
o tigi bɛnan bɔnɔn a rɔ;
ŋa ni mɔgɔ min ka a yɛrɛ nin kɔninɲan min dunuɲan kɔnɔn ya,
o tigi bɛnan a nin sɔrɔ,
ka ɲɛnnɛnmanya banberi sɔrɔ.
26 Ni mɔgɔ min y'a fɛ ka bagara kɛ ni ye,
o tigi ka kan ka tugu ni kɔ;
ni ye yɔrɔ min nɔn,
n'ya bagaraden fanan bɛnan kɛ o yɔrɔ le rɔ.
Ni mɔgɔ min ka bagara kɛ ni ye,
Fa Ala bɛnan o tigi boɲan.»
Yesu kumanni a ya saya ka
27 «Sisani kɔni,
ni hakiri ɲanŋanmuni le;
ni bɛnan mɛnɛn le fɔ sa?
Ko ni Fa Ala ye ni latanŋan min wagati tɔɔrɔya man wa?
Ni tɛ se ka o fɔ,
sabu ni nanni dunuɲan kɔnɔn min wagati tɔɔrɔya le kɔsɔn.
28 Ni Fa,
i tɔgɔ ye boɲan!»
Kumankan bɔni sanŋolo rɔ ko:
«Ni baa a boɲan ka ban,
ŋa ni bɛnan a boɲan kura ye bele.»
29 Jaman min tɛɛ o yɔrɔ rɔ,
olugu naan o miɛnnan minŋɛ,
dɔy ko:
«Sankulukan le.»
Dɔy ko:
«Mɛlɛkɛ dɔ le kumanni a fɛ.»
30 Ŋa Yesu ko àyi man ko:
«Min kumankan man bɔ ni kɔsɔn,
a bɔni alugu le kɔsɔn.
31 Dunuɲan kiti bɛnan tɛgɛ sisani le;
dunuɲan kuntigi bɛnan gbɛn ka bɔ ye sisani le.
32 Ni ni ka nan kɔrɔta ka bɔ dugukolo ka tuman min nan,
ni bɛnan mɔgɔ bɛɛ lanan n'fɛ.»
33 Yesu tɛɛ naan sa cogoya min nan,
a tɛɛ ka o le fɔ ka a yira mɔgɔy ra.
34 Jaman ko Yesu man ko:
«An naan a miɛnnan ko a sɛbɛni seereya kitabu kɔnɔn ko Masiya ɲɛnnɛnman bɛnan to wagati bɛɛ;
ŋa ile ko ko Mɔgɔ Denɲɛ ka kan ka kɔrɔta ka bɔ dugukolo ka?
O tuman jenitigi le Mɔgɔ Denɲɛ ye sa?»
35 Yesu naan àyi jabira ko:
«yeelen ye ayi cɛ man bele,
ŋa wagati dɔɔni le!
Yeelen ye ayi cɛ man wagati min,
ayi ye tagaman a rɔ o wagati ra,
beisa dibi kanan nan do ayi man ka bara ayi rɔ;
sabu mɔgɔ min ye tagamannan dibi rɔ o tigi tɛ a wayɔrɔ lɔn.
36 Yeelen ye ayi fɛ sisani le;
min ye o yeelen dira,
ayi ye la o ra,
beisa ayi ye kɛ o yeelen nɔn.»
Yesu naan o fɔra ka ban minŋɛ,
a bɔni àyi kɔrɔ ka wa yɔrɔ gbɛrɛ;
ka i dogo àyi man.
Yaudiyay ya lananberiya
37 Ayiwa,
Yesu ni a ya tɔgɔmansere shiaman bɛɛ Yaudiyay ɲan kɔrɔ,
àyi man la a ra.
38 O rɔ,
cela Ezayi nɔn tɛɛ kuman min fɔra o kɛni ciɛn ye ko:
«Mantigi,
jenitigi le sɔnni ka la an ya wajibili kumany ra?
Jenitigi le naan Mantigi ya sebagaya lɔnnand?»
39 Ayiwa àyi tun tɛ se ka la Yesu ra,
sabu cela Ezayi naan a fɔra fanan ko:
40 «Ala naan àyi ɲan fienyara,
Ka àyi jusukun fanan gbɛlɛya,
Beisa àyi ɲan kanan yeli kɛ,
Àyi jusukun kanan famuli kɛ,
Beisa àyi kanan nan ale fɛ,
beisa a le ye àyi kɛnɛnyae.»
41 Cela Ezayi naan o fɔra,
sabu a naan Yesu ya nɔɔrɔya le yera;
o le kɔsɔn a naan o fɔra a ya ko rɔ.
42 O bɛɛ ni a ta Yaudiya kuntigiy shiaman lani Yesu ra;
ŋa Fariziy ya ɲɛnsiranɲan kɔsɔn,
àyi man sɔn ka i gbɛ ka a fɔ kɛnɛn ka,
beisa àyi kanan nan àyi gbɛn ka àyi bɔ karanso ta jɛn rɔ.
43 Sabu mɔgɔy ya boɲan le tɛɛ a di àyi ye ka timi Ala ta ka.
Mɔgɔy ya kiti tɛgɛtɔ Yesu ya kuman le boro
44 Yesu kumanni ni fanŋan ye,
ka a fɔ ko:
«Ni mɔgɔ min ka la ni ra,
o tigi man la ni ra,
ŋa a lani ni cebaga Ala le ra.
45 Ni mɔgɔ min ka ni ye,
o tigi baa ni cebaga fanan ye.
46 Ni kɔni,
ni nanni dunuɲan Kɔnɔn yomi yeelen,
beisa ni mɔgɔ o mɔgɔ ka la ni ra,
o tigi kanan tagaman dibi rɔ bele.
47 Ni mɔgɔ min ka ni ya kuman lamiɛn,
ni a man a sira tagaman,
ni tɛnan kiti tɛgɛ o tigi ka;
sabu ni man nan ka nan kiti tɛgɛ dunuɲan mɔgɔy ka,
ni nanni ka nan àyi kisi le.
48 Ni mɔgɔ min ka i ban ni rɔ,
ni a man sɔn ka ni ya kuman lamiɛn,
o tigi baa kititɛgɛbaga sɔrɔ a yɛrɛ ra ka ban.
Ni naan kuman miny fɔra cɔ,
o kuman yɛrɛ le bɛnan kiti tɛgɛ o tigi ka dunuɲan labanlon nan!
49 Sabu ni man kuman n'yɛrɛ man;
ŋa Fa Ala min naan ni cera,
ale yɛrɛ le naan ni ya kuman fɔtay ani bɛ ya kumancogo yirara ni ra.
50 Ni fanan ye a lɔn ko ale ye min fɔra,
ko o le ɲɛnnɛnmanya banberi dira mɔgɔy man.
O le kɔsɔn Fa Ala naan a yirara ni ra ɲan min man,
ni ye a fɔra te le.»