Lazari ya saya
11
1 Ayiwa,
cɛ dɔ bananni tɛɛ,
a tɔgɔ le tɛɛ ko Lazari;
a tɛɛ Betani.
A badenmuso fla,
Mariti ni Mariyamu,
olugu fanan tɛɛ o dugu le kɔnɔn.
2 O Mariyamu tɔgɔ le nɔn tɛɛ turu kasaduman kɛra Mantigi sen ka ka a jɔsi ni a kunsigi ye;
ale badenɲɛ Lazari le tun man kɛnɛn.
3 O badenmuso fla naan mɔgɔ cera ka wa a fɔ Yesu ɲɛnnɛn ko:
«Mantigi,
i tericɛ man kɛnɛn dɛ!»
4 Yesu naan o kuman miɛnnan minŋɛ,
a ko:
«Min banan man dabɔ saya kaman;
a kɛni le ka Ala ya boɲan yira,
beisa a ye kɛ sababu ye ka boɲan la Ala Denɲɛ ka.»
5 Mariti ni a badenmuso ani Lazari bɛɛ ya ko tɛɛ a di Yesu ye kosɔbɛ.
6 Ŋa Yesu naan Lazari ya banan ko miɛnnan,
a tɛɛ yɔrɔ min nɔn,
a toni ye bele ka tere fla kɛ.
7 O kɔ,
a ko a ya karanmɔgɔdeny man ko:
«An ye segikɔ Zude mara rɔ.»
8 Karanmɔgɔdeny ko:
«An Karanmɔgɔ,
a man miɛn ba,
Yaudiya kuntigiy tɛɛ a fɛ ka i bon ni kabakuru ye ka i faga o yɔrɔ rɔ,
i ko bele ko an ye segikɔ ka wa ye!»
9 Yesu naan àyi jabira ko:
«Wagati tan ni fla le tɛ tere kɔnɔn wa?
Ayiwa,
ni mɔgɔ min ka tagaman tere fɛ,
o tigi sen talon man di,
sabu tere yeelen ye.
10 Ŋa mɔgɔ min ye tagamannan dibi rɔ o tigi sen le talonnan,
sabu yeelen tɛ ye.»
11 Yesu naan o fɔra minŋɛ,
a ko àyi man ko:
«An tericɛ Lazari ye sunɔgɔ rɔ,
ŋa ni bɛnan wa a lakunu.»
12 Karanmɔgɔdeny ko a man ko:
«An Karanmɔgɔ,
ni sunɔgɔ drɔn le a bɛnan kɛnɛnya.»
13 Yesu tɛɛ ka Lazari sako le fɔ àyi ɲɛnnɛn,
ŋa olugu tɛɛ a miirira ko sunɔgɔ gbaŋazan le.
14 O le rɔ Yesu sɔrɔni ka a fɔ àyi ɲɛnnɛn ka a gbɛ ko:
«Lazari baa sa.
15 Ŋa a man kɛ ni ɲan kɔrɔ minŋɛ,
o jiyani ni ye alugu kɔsɔn;
sabu min ko bɛnan kɛ sababu ye ka a to ayi ye la ni ra.
Ayi ye wiri,
an ye wa a fɛ ye.»
16 O tuman Toma,
min ye welera fanan ko Flani,
ale ko karanmɔgɔden tɔy man ko:
«An fanan ye wa,
ka wa sa ni a ye.»
Yesu le ɲɛnnɛnmanyara dira
17 Ayiwa Yesu seni Betani tuman min nan,
o ye a sɔrɔ Lazari su tun baa do kaburu rɔ kabini tere naani.
18 Betani ni Zeruzalɛmu cɛ tun man jan;
a tun tɛ timi kile saba ɲɔnŋɔn ka.
19 O le kɔsɔn Yaudiya shiaman nanni tɛɛ Mariti ni Mariyamu fɛ ka nan àyi fo ka àyi jusu la suman àyi badenɲɛ saya kɔsɔn.
20 Mariti nanni a miɛnnan ko Yesu ka nan minŋɛ,
a wirini ka wa a kunbɛn;
Mariyamu sigini toni bon kɔnɔn ye.
21 Mariti seni Yesu kɔrɔ minŋɛ,
a ko:
«Mantigi,
ni a tun ka kɛ ko ile le tɛɛ ya,
ni badenɲɛ tun tɛnan sa.
22 Ŋa ni ye a lɔn ko hali sisani,
ni i ka fen o fen daari Ala fɛ,
a bɛ se ka o kɛ i ye.»
23 Yesu ko a man ko:
«I badenɲɛ bɛnan kunu!»
24 Mariti naan a jabira ko:
«Ni ye a lɔn ko dunuɲan labanlon nan,
suy bɛnan kunu tuman min,
ni badenɲɛ fanan bɛnan kunu.»
25 Yesu ko a man ko:
«Ni le suy lakununan,
ni le ɲɛnnɛnmanya dira;
ni mɔgɔ o mɔgɔ ka la ni ra o tigi bɛnan ɲɛnnɛnmanya,
hali ni a ka sa.
26 Ni mɔgɔ o mɔgɔ ka ɲɛnnɛnmanya,
ka la ni ra,
o tigi tɛnan sa ka a ye fiyewu!
Ile lani o ra wa?»
27 Mariti ko:
«Ɔnhɔn,
Mantigi,
ni lani a ra faasi ko ile le Masiya ye,
Ala Denɲɛ,
min tun ka kan ka nan dunuɲan kɔnɔn.»
Yesu ya kisi Lazari kɔsɔn
28 Ayiwa Mariti naan o fɔra minŋɛ,
a kɔsegini lu kɔnɔn ka wa a dɔgɔmuso Mariyamu wele dogo rɔ,
ka a fɔ a ɲɛnnɛn ko:
«An Karanmɔgɔ baa nan,
a ko ko i ye wa ye.»
29 Mariyamu naan o miɛnnan minŋɛ,
a wirini jonan jonan ka wa Yesu nɔn fɛ.
30 O y'a sɔrɔ Yesu tun man do dugu kɔnɔn ba.
Mariti wani a sɔrɔra yɔrɔ min nɔn,
a tɛɛ o yɔrɔ kelenŋ le rɔ bele.
31 Yaudiya miny tɛɛ ni Mariyamu ye bon kɔnɔn,
ka to ka a jusu lasuman,
olugu naan a yera ko a wirini jonan jonan ka bɔ minŋɛ,
àyi bɛ naan i tugura a kɔ;
àyi tɛɛ a miirira ko a ye ka wa kaburulo le rɔ ka wa kisi.
32 Mariyamu wani sera Yesu kɔrɔ,
ka Yesu ye minŋɛ,
a bienni a sen kɔrɔ ka a fɔ a man ko:
«Mantigi,
ni a tun ka kɛ ko ile tɛɛ ya,
ni badenɲɛ tun tɛnan sa.»
33 Yesu naan Mariyamu yera kisira minŋɛ,
ani Yaudiya miny tɛɛ ni a ye ka olugu fanan kisi tɔ ye,
o naan a jusu tɔɔrɔra kosɔbɛ ka a hakiri ɲanŋanmu.
34 Yesu naan àyi ɲininŋara ko:
«Ayi naan a su dora mini?»
Àyi ko:
«Mantigi,
nan a yɔrɔ flɛ.»
35 Yesu kisini.
36 Yaudiyay ko:
«Ayi ye a flɛ!
Cɛ min ya ko tɛɛ a di a ye dɛ!»
37 Ŋa dɔy ko:
«Ale min naan Fientɔcɛ ɲan yɛlɛnnan,
a tun tɛ se ka a to Lazari kanan sa wa?»
Lazari su lakununi Yesu boro
38 Yesu jusukun tɔɔrɔniba wani sera kaburu man.
O kaburu tɛɛ kuruwo dɔ le ye,
ka kabakuru ba dɔ kɛ ka a datugun.
39 Yesu ko:
«Ayi ye kabakuru bɔ kaburu da ra.»
Banbagatɔ badenmuso min tɛɛ ye ko Mariti,
ale ko Yesu man ko:
«Mantigi,
i ye a sɔrɔ a kasa ka bɔ ka ban,
sabu a tere naani le bi ye kaburu kɔnɔn.»
40 Yesu ko Mariti man ko:
«Ni man a fɔ i ɲɛnnɛn ko ni i ka la ni ra ko i bɛnan Ala ya sebagaya ye wa?»
41 Àyi naan kabakuru bɔra kaburu da ra.
Yesu naan a ɲan kɔrɔtara san fɛ ka Ala daari ko:
«Ni Fa,
ni bɛ barika la i ye,
sabu i baa ni lamiɛn.
42 Ni ye a lɔn ko i ye ni lamiɛnnan wagati bɛɛ.
Ŋa mɔgɔ miny baa ni lamini,
n'ye ka o fɔ olugu le kɔsɔn,
beisa àyi ye a lɔn ko ile yɛrɛ le naan ni cera.»
43 Yesu naan o fɔra minŋɛ,
a kumanni ni fanŋan ye ko:
«Lazari,
bɔ kɛnɛn man ya.»
44 Su bɔni;
a seny ni a boroy minini tɛɛ ni fani ye,
a ɲan datugunni ni kasanŋe ye.
Yesu ko àyi man ko:
«Ayi ye faniy bɔ a ra ka a to a ye wa.»
Janva sirini Yesu kaman
45 Yaudiya miny nanni tɛɛ Mariyamu fɛ,
Yesu naan min kɛra olugu naan o yera minŋɛ,
àyi shiaman lani a ra.
46 Ŋa dɔy wani Fariziy fɛ ka wa Yesu ya koy lakeni olugu ɲɛnnɛn.
47 Sarakalasebaga kuntigiy ani fariziy naan kititɛgɛbagay ya jɛnkuru welera ka àyi lasigi;
àyi ko:
«An bɛnan mɛnɛn le kɛ?
Cɛ min ye tɔgɔmansere shiaman kɛra dɛ!
48 Ni an ka a to ta a yɛrɛ man,
a laban o laban mɔgɔ bɛɛ bɛnan la a ra.
Ŋa ni o ka kɛ,
Rɔmukay bɛnan nan ka nan an ya Alabatosoba ani an ya siya halaki!»
49 Kelenŋ tɛɛ àyi rɔ,
min tɔgɔ tɛɛ ko Kayife;
ale le tɛɛ sarakalasebagay kuntigiba ye o san nan.
Ale ko:
«Alugu kɔni,
ayi tɛ foyi lɔn.
50 Ayi man a lɔn ko a fisa ko mɔgɔ kelenŋ ye sa jamanan bɛɛ kɔsɔn,
beisa an ya siya bɛɛ kanan halaki wa?»
51 Ayiwa Kayife tun man o kuman fɔ a yɛrɛ man.
A kɛni tɛɛ sarakalasebaga kuntigiba ye o san nan minŋɛ,
o le kɔsɔn Ala naan o celayakuman dora a da,
ko Yesu le ka kan ka sa àyi ya siya nɔn rɔ.
52 Ŋa a tun tɛnan kɛ o siya daman kɔsɔn;
Ala ya mɔgɔ miny jɛnzɛnni dunuɲan fan bɛɛ rɔ,
a bɛnan sa ka olugu bɛɛ le lajɛn ka àyi kɛ kelenŋ ye.
53 Yaudiya kuntigiy naan a latɛgɛra o lon yɛrɛ ra ko Yesu ka kan ka faga.
54 O le kɔsɔn Yesu man sɔn ka kɛ yarayara ye Yaudiyay cɛ man kɛnɛn ka bele.
A bɔni o yɔrɔ rɔ ka wa waa mara rɔ,
dugu dɔ ra min ye welera ko Efirayimu.
Ale ni a ya karanmɔgɔdeny toni o yɔrɔ rɔ.
55 Ayiwa Yaudiyay ya Jɔnɲanban ɲɛnɛngbɛ tɛɛ ka surunɲan.
Mɔgɔ shiaman bɔni jamanan yɔrɔ gbɛrɛy rɔ,
ka nan Zeruzalɛmu ka kɔnŋɔn ɲɛnɛngbɛ ɲɛn,
ka nan àyi yɛrɛ seninɲan.
56 Mɔgɔy tɛɛ ka Yesu yɔrɔɲini.
Àyi naan a kɛra ɲɔnŋɔn ɲininŋa ye Alabatosoba lu kɔnɔn ko:
«A ye di?
O tuman a tɛnan nan ɲɛnɛngbɛ yɔrɔ rɔ wa?»
57 O ye a sɔrɔ sarakalasebaga kuntigiy ani Fariziy tun baa a fɔ mɔgɔy ɲɛnnɛn ka ban ko ni min o min ka Yesu yɔrɔ lɔn,
o tigi ye wa a fɔ alugu ɲɛnnɛn,
beisa àyi ye a minan.