Sagagbɛnbaga ni sagay ya kumankɔrɔlaman
10
1 Yesu ko:
«Ciɛn rɔ ni bɛɛ a fɔ ayi ɲɛnnɛn ko mɔgɔ min tɛ i sɔnnan ka don sagabon donda fɛ,
fo a ye i yɛlɛnnan fan gbɛrɛ fɛ ka do,
o tigi ye son le ye,
bienŋalikɛbaga le we.
2 Ŋa min ye dora donda fɛ,
o le sagagbɛnbaga yɛrɛ ye.
3 Sagabon kɔrɔsibaga bɛ da yɛlɛn a ye.
Sagay bɛ a kan miɛn;
a bɛ a ya sagay wele kelenŋ kelenŋ àyi tɔgɔ ra ka bɔ ni àyi ye kɛnɛn man.
4 Ni a ka bɔ ni a ya sagay ye kɛnɛn man,
a bɛ bla àyi ɲɛn.
Sagay fanan bɛ tugu a kɔ,
sabu àyi ye a kan lɔn.
5 Ŋa sagay tɛ i tugura mɔgɔ gbɛrɛ kɔ;
àyi bɛ bori o tigi ɲɛn,
sabu àyi tɛ mɔgɔ gbɛrɛ kan lɔn.»
6 Yesu naan o kumankɔrɔlaman fɔra o mɔgɔy ɲɛnnɛn,
ŋa àyi man a famu.
Sagagbɛnbaga ɲunman
7 Yesu naan a fɔra àyi man tuguni ko:
«Ciɛn rɔ ni bɛ a fɔ ayi ɲɛnnɛn ko ni le sagabon donda ye.»
8 Miny bɛɛ nanni ni ɲɛn,
olugu bɛɛ ye son le ye ani bienŋalikɛla;
ŋa sagay man àyi kan lamiɛn.
9 Ni le donda ye;
ni mɔgɔ min ka timi ni fɛ ka do,
o tigi bɛ kisi.
O tigi bɛnan to ka do ka bɔ ɲansuman rɔ,
ka dogonikɛyɔrɔ sɔrɔ.
10 Son tɛ nanra foyi kaman ni soɲanli tɛ,
ani fagali,
ani ciɛnli.
Ŋa ni kɔni nanni le,
beisa mɔgɔy ye ɲɛnnɛnmanya sɔbɛ sɔrɔ fɔ ka wasa.
11 «Ni le sagagbɛnbaga ɲunman ye;
sagagbɛnbaga ɲunman le ye a nin dira ka sa a ya sagay kɔsɔn.»
12 Ŋa bagaraden min ye sagay kɔrɔsira sara la,
ale tɛ sagagbɛnbaga ye,
sagay fanan tɛ a ta ye;
o le kɔsɔn ni a ka wara nantɔ ye a bɛ bori ka sagay to ye.
Wara bɛnan saga dɔy minan,
a tɔy bɛ jɛnzɛn.
13 Bagaraden bɛ bori,
sabu ale ye weriɲinibaga le ye;
sagay hami tɛ a ra.
14 Ni kɔni,
ni ye sagagbɛnbaga ɲunman le ye;
ni ye n'ya sagay lɔn;
ni ya sagay fanan ye ni lɔn,
15 yomi Fa Ala ye ni lɔn ɲan min man,
ani n'ye Fa Ala lɔn ɲan min man.
Ni bɛ n'yɛrɛ nin di ka sa n'ya sagay kɔsɔn.
16 Saga gbɛrɛy ye ni boro tuguni,
olugu tɛ min sagabon kɔnɔn;
jagboya le ni ye wa olugu fanan gbɛngbɛn ka nan;
àyi bɛnan ni kan miɛn,
àyi bɛnan kɛ sagakuru kelenŋ ye,
ka sagagbɛnbaga kelenŋ kɛ àyi kunnan.
17 «Ni ya ko y'a di Fa ye,
sabu ni bɛ n'nin di ka sa,
beisa n'ye a sɔrɔ tuguni.
18 Mɔgɔ si tɛ se ka ni nin bɔ jagboya ra;
ni yɛrɛ le bɛ a di.
Se ye ni ye ka a di,
se ye ni ye fanan ka a minan tuguni;
ni Fa Ala naan o le fɔra ni ɲɛnnɛn.»
19 Yesu ya kuman kɔsɔn Yaudiyay kan taranni tuguni.
20 Àyi shiaman ko:
«Jinan le cɛ min nɔn,
fatɔ le;
mɛnɛn kɔsɔn alugu ye a lamiɛnnan?»
21 Ŋa dɔy ko:
«Min tɛ jinantɔ kan ye dɛ!
Jinantɔ ye se ka fientɔy ɲan yɛlɛn cogo di?»
Yaudiyay naan i bannan Yesu rɔ
22 Ayiwa Yaudiyay ya Alabatosoba ɲɛnɛngbɛ min ye kɛra Zeruzalɛmu san o san,
o nanni sera;
o ye bɛnan nɛnɛnba wagati le man.
23 Yesu tɛɛ yarayara ra Alabatosoba lu kɔnɔn,
masa Sulemani ya gbata kɔrɔ.
24 Yaudiyay nanni i lɔra ka a lamini;
àyi naan a ɲininŋara ko:
«Wagati jeni le i bɛnan sigiya bɔ an jusu ra sa?
Ni ile le Masiya ye,
a fɔ ka a gbɛ an ɲɛnnɛn.»
25 Yesu naan àyi jabira ko:
«Ni baa a fɔ ayi ɲɛnnɛn ka ban,
ŋa ayi man la a ra.
N'ye kɛwalen miny kɛra n'Fa Ala tɔgɔ ra,
o kɛwaleny le ye a yirara ko ni ye min fɔra ayi ɲɛnnɛn ko ye o ciɛn le ye.
26 Ŋa alugu tɛ lara ni ra,
sabu alugu tɛ ni ya saga dɔy ye.
27 Ni ya sagay ye ni kan miɛnnan;
ni ye olugu lɔn,
àyi ye i tugura ni kɔ fanan.
28 Ni le ɲɛnnɛnmanya banberi dira àyi man.
Àyi tɛnan halaki fiyewu,
mɔgɔ si tɛnan àyi bɔsi ka àyi bɔ ni boro fanan.
29 Ni Fa naan min dira ni man o y'a bo ni a bɛɛ ye;
mɔgɔ si fanan tɛ se ka o bɔsi ka bɔ ni Fa boro.
30 Ni ni n'Fa ye kelenŋ le ye.»
31 Yaudiyay naan kabakuruy tara tunguni ka a bon.
32 Yesu ko àyi man o rɔ ko:
«Ni naan kɛwalenɲuman shiaman miny sɔrɔra Fa fɛ,
ni naan o kɛra alugu ɲan kɔrɔ.
O kɛwaleny jeni kelenŋ le kɔsɔn ayi ye a fɛ ka ni bon ni kabakuru ye?»
33 Yaudiyay ko Yesu man ko:
«An tɛ a fɛ ka i bon i ya kɛwalenɲumany kɔsɔn;
i naan Ala tɔgɔciɛnkuman min fɔra,
o le kɔsɔn an ɲɛn a fɛ ka i bon;
ile mɔgɔ gbaŋazan,
ile le i yɛrɛ kɛra Ala ye.»
34 Yesu ko àyi man ko:
«A man sɛbɛ alugu ya seereya yɔrɔ dɔ rɔ ko Ala naan a fɔra ko ayi ye alay le yea wa?
35 K'a sɔrɔ annugu ye a lɔn ko min sɛbɛni Ala ya Kitabu kɔnɔn,
ayi tɛ se ka o yɛlɛman.
Ayiwa,
Ala naan a ya kuman lasera miny man,
ni a ye àyi welera ko alay,
36 o tuman,
Fa naan min ɲananwolomannan ka a ce dunuɲan kɔnɔn,
ni o ko,
ko ale le Ala Denɲɛ ye,
mɛnɛn kɔsɔn alugu ko,
ko o ye Ala tɔgɔ ciɛnnan?
37 Ni a ka kɛ ko ni tun tɛ n'Fa ya kɛwaleny kɛra,
o tuman ayi kanan la ni ra.
38 Ŋa ni ni ye o kɛwaleny le kɛra,
hali ni ayi man la ni ra,
ayi ye la a ra ko o kɛwaleny bɔni Ala le rɔ,
beisa ayi ye a lɔn ka a gbɛ ko ni ni n'Fa Ala ye kelenŋ le ye.»
39 O kuman kɔsɔn mɔgɔy wirini tunguni ko àyi bɛnan Yesu minan,
ŋa a naan i bɔsira àyi boro ka wa.
40 Yesu wani Zuridɛn ba kɔ fɛ tunguni,
Yahaya tɛɛ mɔgɔy batizera yɔrɔ min nɔn fɔlɔfɔlɔ;
Yesu toni o yɔrɔ rɔ.
41 Mɔgɔ shiaman wani a nɔn fɛ o yɔrɔ rɔ.
O mɔgɔy tɛɛ a fɔra ko:
«Yahaya man tɔgɔmansere si kɛ,
ŋa a naan fen o fen fɔra min cɛ ya ko rɔ,
o le kɛni ciɛn ye.»
42 Mɔgɔ shiaman lani Yesu ra o yɔrɔ rɔ fanan.