Fientɔcɛ dɔ lakɛnɛnyani Yesu boro
9
1 Yesu timitɔ,
a naan Fientɔcɛ dɔ yera;
o cɛ fientɔ le woroni.
2 Yesu ya karanmɔgɔdeny naan a ɲininŋara ko:
«An Karanmɔgɔ,
mɛnɛn le naan a tora min cɛ fienlaman woroni?
A yɛrɛ ya jurumun le wa,
walaman a worobagay ya jurumun le?»
3 Yesu naan àyi jabira ko:
«A yɛrɛ ya jurumun tɛ,
a worobagay fanan ya jurumun tɛ;
o kɛni le beisa Ala ya sebagaya ye yira ale sababu ra.
4 An ka kan ka ni cebaga ya bagara kɛ wagati min nan o ye a sɔrɔ tere yeelen ye ye;
ni o tɛ,
ni su ka nan ko mɔgɔ si tɛnan se ka bagara kɛ.
5 Ka ni to dunuɲan rɔ ya,
ni le dunuɲan yeelen ye.»
6 Yesu naan o fɔra minŋɛ,
a naan daji tura dugu man,
ka bɔgɔ fitini nɔnni ni a ye,
ka o mun fientɔ ɲandeny ra,
7 ka a fɔ a man ko:
«Wa i ɲan ko Silowe diŋɛn ji rɔ.»
Silowe kɔrɔ le ko «Celaden».
Cɛ wani a ɲan kora minŋɛ,
a segikɔtɔ,
a tɛɛ yeli kɛra.
8 Ayiwa,
a sigiɲɔnŋɔny ani miny tɛɛ tora ka a ye daarili ra,
olugu ko:
«Cɛ min le tun tɛ i sigira ya ka to ka mɔgɔy daari wa?»
9 Dɔy ko:
«Ale le kɛ.»
Dɔy ko:
«Ale tɛ,
a bɔnin a la le drɔn.»
A laban,
cɛ yɛrɛ ko:
«Ni yɛrɛ le.»
10 Àyi ko a man ko:
«I ɲan yɛlɛnni cogo di le?»
11 A naan àyi jabira ko:
«Cɛ min tɔgɔ ko Yesu,
ale le naan bɔgɔ kɛra ka a mun ni ɲan ra,
ko ni ye wa n'ɲan ko Silowe diŋɛn ji rɔ.
Ni wani n'ɲan kora minŋɛ,
ni ɲan yɛlɛnni.»
12 Àyi naan a ɲininŋara ko:
«O cɛ ye mini?»
A ko:
«Ni man a lɔn.»
Fientɔcɛkɔrɔ ɲininŋani fariziy boro
13 Ayiwa,
àyi naan o Fientɔcɛ ɲan yɛlɛnni minanra ka wa ni a ye Fariziy fɛ.
14 Ka a sɔrɔ Yesu nɔn tɛɛ bɔgɔ munnan cɛ ɲan ra ka a ɲan yɛlɛn lon min nan,
o lon le tɛɛ Yaudiyay ya Nunnɔnkirilon ye.
15 O le kɔsɔn Fariziy naan cɛ ɲininŋara tuguni ko a ɲan yɛlɛnni cogo di le.
A naan àyi jabira ko:
«A naan bɔgɔ munnan ni ɲandeny ra,
ni wani n'ɲan kora,
ni ɲan yɛlɛnni.»
16 A naan o fɔra minŋɛ,
Farizi dɔy ko:
«O cɛ man bɔ Ala rɔ,
sabu a tɛ Nunnɔnkirilon jatera.»
Ŋa dɔy ko:
«Jurumunkɛbaga bɛ se ka min kabakoy ɲɔnŋɔn kɛ wa?»
A kɛni te,
àyi gbaŋazan kan taranni.
17 Àyi naan Fientɔcɛ ɲan yɛlɛnni ɲininŋara tuguni ko:
«Cɛ min naan ile ɲan dayɛlɛnnan o,
ile yɛrɛ ye jeni le miirira o ya ko rɔ?»
A ko àyi man ko:
«Ala ya cela le.»
18 Ŋa Yaudiya kuntigiy tun man la a ra fiyewu ko o cɛ fientɔ le woroni,
ani ko a ɲan nanni dayɛlɛnnan.
O le kɔsɔn àyi naan a worobagay welera,
19 ka nan olugu ɲininŋa,
ko:
«Alugu denɲɛ le nin wa?
Alugu ye se ka a fɔ ciɛn rɔ ko a fientɔ le woroni wa?
A nanni kɛra cogo di sisani ko a ye yeli kɛra?»
20 Cɛ worobagay naan àyi jabira ko:
«An kɔni ye a lɔn ko an denɲɛ le,
ko a fientɔ le woroni fanan.
21 Ŋa fen min naan a tora a ye yeli kɛra sisani,
annugu man o lɔn;
mɔgɔ min fanan naan a ɲan yɛlɛnnan,
an man o tigi lɔn.
Ayi ye a yɛrɛ ɲininŋa;
denmisɛn tɛ bele a yɛrɛ bɛnan a ɲanfɔ ayi ɲɛnnɛn.»
22 Cɛ worobagay naan o fora Yaudiya kuntigiy ɲɛnsiranɲan le kɔsɔn,
sabu àyi tun baa bɛn a rɔ ko ni mɔgɔ o mɔgɔ ka i lɔ a ra ka a fɔ ko Yesu le Masiya ye,
ko àyi bɛnan o tigi gbɛn ka a bɔ karanso ya jɛn rɔ.
23 O ɲɛnsiranɲan le kɔsɔn àyi ko:
«Den tɛ,
ayi ye a yɛrɛ ɲininŋa.»
24 Ayiwa àyi naan fientɔkɔrɔ welera tuguni a shiɛn flanan ka nan a fɔ a ɲɛnnɛn ko:
«I Keni Ala ra ka boɲan di a man i ye ciɛn fɔ an ɲɛnnɛn.
Cɛ min naan i ɲan dayɛlɛnnan,
annugu kɔni ye a lɔn ko jurumunkɛbaga le.»
25 Cɛ naan àyi jabira ko:
«Ni jurumunkɛbaga le walaman ni jurumunkɛbaga tɛ,
ni man o lɔn;
ni ye fen kelenpe le lɔn:
Ni tɛɛ fientɔ le ye,
ŋa sisani ni ye yeli kɛra.»
26 Àyi ko a man ko:
«A naan mɛnɛn le kɛra i ra?
A naan i ɲan dayɛlɛnnan cogo di le?»
27 Cɛ naan àyi jabira ko:
«Ni baa a fɔ ayi ɲɛnnɛn ka ban,
ŋa ayi man sɔn ka ni lamiɛn;
mɛnɛn kɔsɔn ayi ye a fɛ ni ye a ɲanfɔ ayi ɲɛnnɛn bele?
Kɔni alugu fanan tɛ a fɛ ka kɛ a ya karanmɔgɔden dɔy ye dɛ?»
28 Àyi naan a jɛbɛra;
àyi ko:
«Ile le a ya karanmɔgɔden ye;
annugu ye cela Musa ya karanmɔgɔdeny le ye.
29 Annugu ye a lɔn ko Ala kumanni cela Musa fɛ,
ŋa an man min cɛ bɔyɔrɔ lɔn fiyewu.»
30 Cɛ ko:
«Min ye kabako le ye dɛ!
Ayi ko,
ko alugu man a bɔyɔrɔ lɔn,
ka a sɔrɔ a baa ni ɲan dayɛlɛn!
31 An ye a lɔn ko Ala tɛ jurumuntɔy lamiɛnnan;
ŋa mɔgɔ min ye a batora ka a sawo kɛ,
a ye o le lamiɛnnan.
32 Kabini dunuɲan danni,
an man degi ka a miɛn ko mɔgɔ min fientɔlaman woroni,
ko dɔ baa o ɲan dayɛlɛn.
33 Ni min cɛ tun man bɔ Ala rɔ,
a tun tɛnan se ka foyi kɛ.»
34 Fariziy ko cɛ man ko:
«Ile min kuturu woroni jurumun rɔ,
ile le annugu karannan sisani kɛ?»
Àyi naan a gbɛnnan ka bɔ karanso kɔnɔn.
Fientɔ bɛrɛbɛrɛy
35 Ayiwa Yesu nanni a miɛnnan ko àyi naan cɛ gbɛnnan;
a wani bɛnan ni a ye minŋɛ,
a ko a man ko:
«I lani Mɔgɔ Denɲɛ ra wa?»
36 Cɛ ko Yesu man ko:
«An Karanmɔgɔ,
jenitigi le?
A yira ni ra,
beisa n'ye la a ra.»
37 Yesu ko:
«I ɲan ye ale yɛrɛ le ra te,
a ye ka kuman i fɛ.»
38 Cɛ ko:
«Mantigi,
ni lani i ra.»
A naan a i manjigira Yesu kɔrɔ.
39 Yesu ko:
«Ni nanni dunuɲan kɔnɔn ka nan kiti tɛgɛ,
beisa miny tɛ yeli kɛra,
olugu ye yeli kɛ,
miny ye yeli kɛra,
olugu ɲan ye fienya.»
40 Farizi dɔy tɛɛ Yesu kɔrɔ,
olugu naan o kuman miɛnnan minŋɛ,
àyi ko Yesu man ko:
«O tuman annugu fanan ye fientɔ le wa?»
41 Yesu naan àyi jabira ko:
«Ni ayi tun ka kɛ fientɔ ye,
ayi tun tɛnan jurumun sɔrɔ;
ŋa ayi ko minŋɛ ko ayi ye yeli kɛra,
o le kɔsɔn ayi jarakini le tuman bɛɛ.»