8
1 Yesu wani Oliviyejuny kuru ka.
Muso min minanni ɲanmɔgɔya rɔ
2 Ayiwa o lon dugusɛgbɛ sɔgɔmanda jonan fɛ,
Yesu segikɔni ka wa Alabatosoba lu kɔnɔn tuguni.
Jaman bɛɛ nanni i lajɛnnan a kɔrɔ;
a naan i sigira ye ka to ka àyi karan.
3 Ayiwa,
seereya karanmɔgɔy ani Fariziy nanni ni muso dɔ ye a fɛ,
ko o muso minanni ɲanmɔgɔya rɔ.
Àyi naan a minanra ka nan a la lɔ jaman cɛ man.
4 Àyi ko Yesu man ko:
«An Karanmɔgɔ,
an wani min muso minanra ka a to ɲanmɔgɔya ra ni cɛ dɔ ye.
5 Cela Musa naan o cefɔni dira an man seereya kɔnɔn ko an ka kan ka o muso ɲɔnŋɔn nan bon ni kabakuru ye ka a faga.
a Ayiwa ile ko di o rɔ?»
6 Àyi tɛɛ a fɛ ka a kɔrɔbɔ le,
beisa ka sababu dɔ sɔrɔ ka a jaraki.
Ŋa Yesu naan i birinan ka a kɛ ni sɛbɛli ye dugu man ni a borokunanden ye.
7 Ŋa àyi bɛ naan i mandugura a ra ni ɲininŋali ye minŋɛ,
a wirini ka i lɔ ka a fɔ àyi man ko:
«Ayi rɔ min ye jurumundan ye,
o tigi ye kɔnŋɔn ka a bon.»
8 A naan o fɔra minŋɛ,
a naan i birinan tuguni ka kɛ ni sɛbɛli ye dugu man.
9 O mɔgɔy naan o kuman miɛnnan minŋɛ,
[àyi yɛrɛ jusukun naan àyi sɔsɔra;]
àyi bɛɛ wani kelenŋ kelenŋ,
ka a daminan mɔgɔkɔrɔbay man ka wa bla denmisɛnniy ra.
Yesu kelenŋ toni ni muso ye,
muso lɔni toni a kɔrɔ.
10 Yesu naan a kun kɔrɔtara ka a fɔ muso man ko:
«Muso,
àyi ye mini le?
Mɔgɔ si man kiti bien i ka dɛ?»
11 Muso naan Yesu jabira ko:
«Mɔgɔ si!»
Yesu ko:
«Ayiwa ni fanan tɛnan kiti bien i ka;
wa,
i kanan jurumun kɛ bele.»]b
Dunuɲan kɛnɛnyeelen
12 O kɔ,
Yesu naan kuman tara tuguni ka a fɔ jaman man ko:
«Ni le dunuɲan yeelen ye.
Ni mɔgɔ min ka tugu ni kɔ,
o tigi tɛnan tagaman dibi rɔ,
ŋa o tigi bɛnan yeelen sɔrɔ,
min ye ɲɛnnɛnmanya ɲunman dira a man.»
13 Fariziy ko a man ko:
«Ni ile yɛrɛ le i yɛrɛ ya seereya ladira,
o tuman i ya seereya tɛ ciɛn ye.»
14 Yesu naan àyi jabira ko:
«Hali ni ni yɛrɛ ka kɛ n'ya seereya ladira,
ni ya seereya ye ciɛn le ye,
sabu ni ye n'bɔyɔrɔ lɔn,
ni ye n'wayɔrɔ fanan lɔn;
ŋa alugu man ni bɔyɔrɔ lɔn,
alugu man ni wayɔrɔ fanan lɔn.
15 Alugu kɔni ye kiti tɛgɛra ka kaɲan ni adamandeny ya jateminan le ye;
ŋa ni tɛ kiti tɛgɛra mɔgɔ si ka.
16 Hali ni ni ka kɛ kiti tɛgɛra,
ni ye n'ya kiti tɛgɛra ciɛn le ka,
sabu ni kelenŋ tɛ;
ni Fa min naan ni cera,
o ye ni ni ye.
17 Ayiwa,
a sɛbɛni ayi ya seereya kɔnɔn ko ni mɔgɔ fla ka kɛ ko min seere ye ko o ko le ciɛn yec
18 Ayiwa,
ni le n'yɛrɛ seere ye,
ni Fa min naan ni cera o fanan le ni seere ye.»
19 Àyi ko Yesu man ko:
«I fa mini le?»
Yesu naan àyi jabira ko:
«Alugu man ni yɛrɛ lɔn,
jango ni Fa;
ni alugu tun ka kɛ ni lɔn ciɛn rɔ,
ayi tun bɛnan ni Fa fanan lɔn.»
20 Yesu naan o kuman bɛɛ fɔra ka a sigini to karan nan Alabatosoba lu kɔnɔn sarakablaminany yɔrɔ rɔ.
Mɔgɔ si man se ka a minan,
sabu a ya wagati tun man se ba.
Yesu naan a wayɔrɔ fɔra Yaudiyay ɲɛnnɛn
21 Yesu naan a fɔra mɔgɔy ɲɛnnɛn tuguni ko:
«Ni bɛnan wa;
ni ni ka wa,
ayi bɛnan ni yɔrɔɲini,
ŋa ayi bɛnan sa ka ayi to ayi ya jurumun rɔ;
ni bɛnan wa yɔrɔ min nɔn,
ayi tɛ se ka wa o yɔrɔ rɔ.»
22 Yaudiya kuntigiy ko:
«O tuman a bɛnan a yɛrɛ faga le wa?
Sabu a ko,
ko:
‹Ni bɛnan wa yɔrɔ min nɔn ayi te se ka wa o yɔrɔ rɔ!› »
23 Yesu naan a fɔra ayi man ko:
«Alugu sɔrɔni dugukolo ka ya le,
ŋa ni bɔni sanŋolo rɔ;
dunuɲan min ta le alugu ye,
ŋa ni kɔni,
dunuɲan min ta tɛ ni ye!
24 O le kɔsɔn ni baa a fɔ alugu ɲɛnnɛn ko ayi bɛnan sa ka ayi to ayi ya jurumuny rɔ;
sabu ni ayi kɔni man la a ra ko ni ko ‹Ni ye min ye,
ni ye o le ye,›
o tuman ayi bɛnan sa ka ayi to ayi ya jurumuny rɔ.»
25 Àyi ko Yesu man ko:
«O tuman ile ye jenitigi le ye?»
Yesu ko:
«Kabini a daminan rɔ,
ni ye min ye,
ni baa o fɔ alugu ɲɛnnɛn.
26 Fen shiaman ye ni fɛ ka a fɔ alugu ya ko rɔ,
ani ka ayi jaraki;
ŋa min naan ni cera,
o ta le ciɛn ye;
ni naan min miɛnnan ale ra,
ni baa o le fɔ dunuɲanmɔgɔy ɲɛnnɛn fanan.»
27 Yaudiyay man a famu ko Yesu ye ka Fa ya ko le fɔ àyi ɲɛnnɛn.
28 O le kɔsɔn Yesu naan a fɔra àyi man ko:
«Tuman min ayi bɛnan Mɔgɔ Denɲɛ kɔrɔta san fɛ,
ayi bɛnan sɔrɔ ka a lɔn ko ni ko ‹Ni ye min ye,
ni ye o le ye›,
ko ni tɛ foyi kɛra n'yɛrɛ man,
ŋa Fa Ala naan ni karannan min nan,
ni ye o le fɔra.
29 Min naan ni cera,
ale ye ni ni ye.
A man ni to n'kelenŋ nan,
sabu min y'a di a ye,
ni ye o le kɛra tuman bɛɛ.»
30 Yesu naan o kuman fɔra minŋɛ,
mɔgɔ shiaman lani a ra.
Fen min ye mɔgɔ kanwrɔnɲannan
31 Ayiwa,
Yaudiya miny lani tɛɛ Yesu ra,
a naan a fɔra olugu ɲɛnnɛn ko:
«Ni alugu ka sɔn ka to ni ya kumany ka,
alugu bɛnan kɛ n'ya karanmɔgɔdeny ye ciɛn rɔ.
32 Ayi bɛnan ciɛn lɔn,
o ciɛn lɔnliya bɛnan ayi kɛ ayi kawrɔnɲan.»
33 Àyi ko Yesu man ko:
«Annugu ye Iburahima jurula le ye,
an man degi ka kɛ mɔgɔ si ya jɔn ye.
Mɛnɛn kɔsɔn ile ko,
ko an bɛnan kanwrɔnɲan?»
34 Yesu naan àyi jabira ko:
«Ciɛn rɔ ni bɛ a fɔ ayi ɲɛnnɛn ko mɔgɔ o mɔgɔ ye jurumun kɛra,
o tigi ye jurumun ya jɔn le ye.
35 Jɔn tɛ kɛra a matigicɛ ya so kɔnɔn wagati bɛɛ,
ŋa matigicɛ denɲɛ ye tora so kɔnɔn furututu.
36 Ala Denɲɛ,
ni o ka ayi kanwrɔnɲan,
o tuman ayi bɛnan kɛ ayi yɛrɛ ta ye yɛrɛ le.
37 N'ye a lɔn ko alugu ye Iburahima jurulay ye;
ŋa o bɛɛ ni a ta ayi ye ni fagacogo ɲininan,
sabu alugu tɛ ni ya kuman fɛ.
38 Ni kɔni,
ni naan min yera n'Fa fɛ,
ni bɛnan o le fɔ;
ayi fanan naan min sɔrɔra ayi fa fɛ,
ayi ye o le kɛra.»
39 Ayiwa àyi naan Yesu jabira ko:
«Annugu fa le Iburahima ye.»
Yesu ko àyi man ko:
«Ni alugu tun ka kɛ Iburahima deny ye,
ayi tun bɛnan Iburahima ya kɛwalen ɲɔnŋɔn le kɛ.
40 Ŋa sisani,
a flɛ,
ni naan ciɛn min sɔrɔra Ala fɛ ni baa o fɔ ayi ɲɛnnɛn,
o bɛɛ ni a ta ayi ye ni fagacogo ɲininan;
Iburahima man o ɲɔnŋɔn kɛ dɛ!
41 Ayi ye ayi fa ya kɛwaleny ɲɔnŋɔn le kɛra.»
Àyi ko Yesu man ko:
«Annugu man woro ɲanmɔgɔya rɔ ye dɛ!
Fa kelenpe le annugu boro,
o le Ala ye.»
42 Yesu ko àyi man ko:
«Ni Ala tun ka kɛ ayi Fa ye,
ayi tun bɛnan ni kanun,
sabu ni bɔni Ala le rɔ ka nan ya.
Ni man nan n'yɛrɛ man;
ale le naan ni cera.
43 Ni ye min fɔra mɛnɛn kɔsɔn ayi tɛ o famunan?
Ayi tɛ sɔnnan ka ni ya kumany lamiɛn le.
44 Ayi fa le Sitanan ye;
min fanan y'a di ayi fa Sitanan ye,
ayi ye a fɛ ka o le kɛ.
Ale le mɔgɔfagabaga ye kabini a koy daminan rɔ;
a man degi ka ciɛn fɔ ka ye,
sabu ciɛn den kelenpe tɛ a kɔnɔn.
Ni a y'a fɛ ka wuya fɔ tuman min nan,
a bɛ kuman ka kaɲan ni a yɛrɛ sɔn le ye;
sabu wuyafɔbaga le,
wuya facɛ yɛrɛ le.
45 Ŋa,
ni kɔni ni ye ciɛn le fɔra,
o le kɔsɔn ayi man la ni ra.
46 Alugu rɔ,
jenitigi le bɛ se ka a yira ko ni baa jurumun kɛ?
Ayiwa,
ni ni ye ciɛn le fɔra,
mɛnɛn kɔsɔn alugu man la ni ra?
47 Mɔgɔ min ye Ala ya mɔgɔ ye,
o tigi ye Ala ya Kumany lamiɛnnan.
Alugu tɛ a lamiɛnnan,
sabu ayi tɛ Ala ya mɔgɔy ye.»
Yesu ni Iburahima
48 Yaudiyay ko Yesu man ko:
«Jo ye an fɛ ka a fɔ ko i ye Samarika le ye,
ko jinan ye i rɔ fanan.»
49 Yesu naan àyi jabira ko:
«Jinan tɛ ni rɔ,
ŋa ni ye n'Fa le boɲannan;
alugu kɔni,
alugu ye ni dɔgɔyara le.
50 Ni tɛ boɲan ɲininan n'yɛrɛ ye,
ŋa kelenŋ ye,
ale le a ɲininan ni ye;
ale le bɛnan jo di ni man fanan.
51 Ciɛn rɔ ni bɛ a fɔ ayi ɲɛnnɛn ko ni mɔgɔ min ka ni ya kuman sira tagaman o tigi tɛnan sa fiyewu.»
52 Yaudiyay ko:
«Sisani kɔni an baa a lɔn yɛrɛ le ko jinan le ye ile rɔ.
Iburahima sani,
celay fanan sani;
ile ko,
ko ni mɔgɔ min ka ile ya kuman sira tagaman,
ko o tigi tɛnan sa fiyewu ka a ye.
53 O tuman ile y'a bo ni an bɛmɛncɛ Iburahima ye wa?
Ale sani,
celay fanan sani!
O tuman ile ye i yɛrɛ jatera mɔgɔ suguya jeni le ye?»
54 Yesu ko:
«Ni ni tun ka kɛ n'yɛrɛ boɲannan,
o boɲan tun tɛnan kɛ foyi ye.
Ni Fa le ni boɲannan,
alugu ko ale min man ko ayi ya Ala le.
55 Ayi man a lɔn,
ŋa ni ye a lɔn;
ni ni tun ko,
ko ni man a lɔn,
ni tɛɛ nan kɛ ayi ɲɔnŋɔn wuyafɔbaga si ye.
Ŋa ni ye a lɔn,
ni fanan ye a ya kuman sira tagamannan.
56 Ayi bɛmɛncɛ Iburahima naan i sawara ko a bɛnan ni nanlon ye.
A naan a yera minŋɛ,
a jusu jiyani kosɔbɛ.»
57 Yaudiyay ko a man ko:
«E!
Ile si man sanji bilooru sɔrɔ fɔnɔn,
ile ko,
ko i naan Iburahima yera?»
58 Yesu ko àyi man ko:
«Ciɛn rɔ ni bɛ a fɔ Ayi ɲɛnnɛn,
ko sani Iburahima ye woro,
‹ni ye min ye,
ni tɛɛ o ye ka ban!› »
59 O kuman kɔsɔn Yaudiyay naan kabakuruy tara ko àyi bɛnan Yesu bon,
ŋa a naan i dogora ka bɔ Alabatosoba kɔnɔn ka wa.