Yesu badenmany man la Yesu ra
7
1 O kɔ,
Yesu tɛɛ yarayarala Galile mara yɔrɔy rɔ;
a man sɔn ka wa Zude mara rɔ,
sabu Yaudiya kuntigiy tɛɛ ka a yɔrɔɲini ko àyi bɛnan a faga.
2 Ayiwa,
Yaudiyay ya gbatakɔrɔsigi ɲɛnɛngbɛ wagati tun baa surunɲan.
3 Yesu badenmany naan a fɔra a man ko:
«I ka kan ka bɔ ya ka wa Zude mara rɔ,
beisa i ya karanmɔgɔdeny fanan ye i ya tɔgɔmanserey ye o yɔrɔ rɔ fanan.
4 Ni mɔgɔ min a fɛ ko a ye lɔn,
o tigi tɛ a ya koy kɛra dogo rɔ;
ni i ka kɛ min kabakoy ɲɔnŋɔn kɛra,
i ka kan ka i yɛrɛ yira dunuɲan ra le,
beisa bɛɛ ye i ye.»
5 Ayiwa Yesu badenmany tɛɛ o fɔra le,
sabu àyi fanan tun man la a ra.
6 Yesu naan a badenmany jabira ko:
«O kɛwagati man se ni boro fɔnɔn;
ŋa wagati bɛɛ kaɲi alugu kɔni man.
7 Dunuɲanmɔgɔy tɛ se ka alugu kɔninɲan;
àyi ye ni le kɔninɲannan,
sabu àyi ye kɛwalenjugu miny kɛra,
ni le o koy bɛɛ fɔra kɛnɛn ka.
8 Alugu kɔni ye wa ɲɛnɛngbɛ yɔrɔ rɔ faasi.
Ni tɛnan wa ye sisani fɔnɔn,
sabu wagati man se ni fɛ ba.»
9 Yesu naan o le fɔra a badenmany man,
do to Galile.
Yesu wani gbatakɔrɔsigi ɲɛnɛngbɛ rɔ
10 A badenmany wani kɔ ɲɛnɛngbɛ yɔrɔ rɔ,
Yesu yɛrɛ sɔrɔni ka wa.
Ŋa a man wa mɔgɔy ɲɛnnɛn,
a naan i dogora ka le wa.
11 O y'a sɔrɔ Yaudiya kuntigiy tɛɛ ka Yesu yɔrɔɲini ɲɛnɛngbɛ wagati ra;
àyi naan a kɛra ɲininŋali ye ko:
«A ye mini le dɛ?»
12 Jaman rɔ mɔgɔy tɛɛ ka ngunungunukan shiaman fɔ Yesu ya ko rɔ.
Dɔy ko:
«Mɔgɔ ɲunman le.»
Dɔy ko:
«Ciɛn tɛ,
a ye mɔgɔy lafirira le.»
13 Ŋa mɔgɔ si tun tɛ sɔnnan ka o kuman fɔ kɛnɛn ka,
sabu àyi tɛɛ ka siran Yaudiya kuntigiy ɲɛn.
Yaudiyay naan Yesu sɔsɔra
14 Ayiwa ɲɛnɛngbɛ wagati nanni sera a cɛmanyɔrɔ rɔ;
Yesu wani dora Alabatosoba lu kɔnɔn ka mɔgɔy karan.
15 A ya karan naan Yaudiyay kabakoyara;
àyi ko:
«Cɛ min naan min lɔnliya bɛɛ sɔrɔra mini le,
ka a sɔrɔ a man karan kɛ?»
16 Yesu naan àyi jabira,
ko:
«Ni ya karan man bɔ ni yɛrɛ rɔ,
ŋa a bɔni ni cebaga Ala le rɔ.
17 Ni mɔgɔ min y'a fɛ ka Ala sawo kɛ,
o tigi bɛnan a lɔn ni ni ya karan bɔni Ala le rɔ,
walaman ni a bɔni ni yɛrɛ le rɔ.
18 Mɔgɔ min ye kumannan ni a yɛrɛ ya sebagaya ye,
o tigi ye boɲan ɲininan a yɛrɛ le ye.
Ŋa ni mɔgɔ min ye a fɛ ko a cebaga ye boɲan,
o tigi ta le ciɛn ye,
nanbara si tɛ a ya koy rɔ.
19 Cela Musa le man seereya di àyi man wa?
Ŋa alugu si tɛ seereya sira tagamannan.
Mɛnɛn kɔsɔn àyi ye ni yɔrɔɲininan ka ni faga?»
20 Jaman rɔ dɔy ko Yesu man ko:
«Ile jinantɔ le ye.
Jenitigi le bɛnan i le yɔrɔɲini ka i faga?»
21 Yesu naan àyi jabira ko:
«Ni naan kabako kelenŋ min kɛra Nunnɔnkirilon nan,
o le naan àyi bɛɛ kabakoyara!
22 Àyi naan kɛnɛnsigili lɔnnan cela Musa le fɛ ka a sɔrɔ a man bɔ cela Musa rɔ,
a daminanni an bɛmɛny le man;
o le kɔsɔn hali Nunnɔnkirilon nan àyi bɛ sɔn ka cɛden kɛnɛnsigi.
23 Ni àyi bɛ sɔn ka cɛden kɛnɛnsigi Nunnɔnkirilon nan,
beisa ka cela Musa ya seereya sira tagaman o,
mɛnɛn kɔsɔn ni naan mɔgɔ kuturu lakɛnɛnyara Nunnɔnkirilon nan minŋɛ,
àyi dimini ni kɔrɔ o rɔ?
24 Àyi kanan ko ye àyi ɲan ra drɔn ka a kiti tɛgɛ;
àyi ye kiti tɛgɛ ni terenniya ye.»
Yala Yesu le Masiya ye wa?
25 Zeruzalɛmu dugumɔgɔ dɔy tɛɛ a fɔra ko:
«O tuman àyi ye cɛ min yɔrɔɲininan ka a faga,
ale le tɛ nin wa?
26 A flɛ,
a ye kumannan bɛɛ ɲan kɔrɔ kɛnɛn ka,
mɔgɔ si tɛ foyi fɔra a man.
Kɔni an ya kuntigiy man lɔ a ra ciɛn rɔ ko ale le ye Masiya ye dɛ?
27 Ka a sɔrɔ annugu ye cɛ min bɔyɔrɔ lɔn;
ŋa ni Masiya ka nan,
mɔgɔ si tɛnan a bɔyɔrɔ lɔn.»
28 Ayiwa ka Yesu to mɔgɔy karannan Alabatosoba kɔnɔn,
a kumanni ni fanŋan ye,
ka a fɔ ko:
«Àyi ko,
ko àyi ye ni lɔn,
ka ni bɔyɔrɔ fanan lɔn kɛ?
Ŋa ni man nan n'yɛrɛ man,
min naan ni cera,
ale le ciɛn tigi ye.
Ŋa àyi man a lɔn.
29 Ni kɔni ye a lɔn,
sabu ni bɔni ale le rɔ,
ale le fanan naan ni cera.»
30 Yesu naan o fɔra minŋɛ,
àyi tɛɛ a fɛ ka a minan,
ŋa mɔgɔ si man se ka a boro la a ka,
sabu a ya wagati tun man se fɔnɔn.
31 O bɛɛ ni a ta,
jaman rɔ mɔgɔ shiaman lani Yesu ra;
o mɔgɔy tɛɛ a fɔra ko:
«Hali ni Masiya ka nan,
a bɛnan tɔgɔmansere jeni le kɛ ka timi min cɛ ta ka?»
Yaudiya kuntigiy naan mɔgɔ dɔy cera ka wa Yesu minan
32 Fariziy toro doni jaman ngunungunu kan nɔn Yesu ya ko rɔ.
O rɔ,
sarakalasebaga kuntigiy ani Fariziy naan Alabatosoba kɔrɔsibaga dɔy cera ko àyi ye wa Yesu minan.
33 Yesu ko olugu man ko:
«Ni ye ni àyi ye ya bele ka wagati dɔɔni kɛ;
o kɔ,
ni bɛnan sɔrɔ ka wa n'cebaga fɛ.
34 Ŋa àyi bɛnan ni yɔrɔɲini ka dɛsɛ,
àyi tɛnan ni ye;
sabu ni bɛnan kɛ yɔrɔ min nɔn,
àyi tɛnan se ka wa ye.»
35 Yaudiya kuntigiy naan a fɔra ɲɔnŋɔn ɲɛnnɛn ko:
«O tuman cɛ min a fɛ ka wa yɔrɔ jeni le,
ni a ka fɔ ko an tɛnan ale ye?
Yaudiya miny jɛnzɛnni ka wa i Sigi Gɛrɛkiy fɛ,
kɔni a tɛ a fɛ ka wa olugu le fɛ ka wa àyi karan dɛ?
36 A naan kuman min fɔra o kɔrɔ ye di le,
ko:
‹Àyi bɛnan ni yɔrɔɲini,
ŋa àyi tɛnan ni ye?›
Ani ko:
‹Ni bɛnan kɛ yɔrɔ min nɔn,
àyi tɛnan se ka wa o yɔrɔ rɔ?› »
Nin Seninman layeri
37 Ayiwa ɲɛnɛngbɛ lon laban,
o le tɛɛ a lon ba yɛrɛ ye;
Yesu naan i lɔra jaman ɲan kɔrɔ ka kuman ni fanŋan ye,
ko:
«Ni minlɔgɔ ye mɔgɔ min nan,
o tigi ye nan ni fɛ ka nan i min.
38 Ni mɔgɔ min ka la ni ra,
ji min ye ɲɛnnɛnmanya dira,
o bɛnan woyo ka bɔ o tigi jusukun nan yomi baji,»
yomi a sɛbɛni Ala ya Kuman rɔ ɲan min man.
39 Nin Seninman min tun bɛnan di lananbagay man,
Yesu tɛɛ ka o ko le fɔ te.
O wagati ra Nin Seninman tun man di fɔnɔn,
sabu Yesu tun man kɔrɔta fɔnɔn ka wa do a ya nɔɔrɔya rɔ sanŋolo rɔ.
Mɔgɔy kan taranni Yesu kɔsɔn
40 Ayiwa jaman naan Yesu ya kuman miɛnnan minŋɛ,
àyi rɔ dɔy tɛɛ ka a fɔ ko:
«Sigiya si tɛ a rɔ,
cela min ko fɔni,
min cɛ yɛrɛ le!»
41 Dɔ gbɛrɛy tɛɛ a fɔra ko:
«Ala naan Masiya min layeri tara,
min le.»
Ŋa dɔy ko:
«Masiya bɛ se ka bɔ Galile mara rɔ cogo di?
42 Yala a man sɛbɛ Ala ya kitabu kɔnɔn ko Masiya bɛnan kɛ Dawuda jurula dɔ le ye wa,
ani ko a bɛnan bɔ Bɛtilɛhɛmu le,
min ye Dawuda worodugu ye wa?»
43 Yesu ya ko kɔsɔn jaman kan taranni.
44 Dɔy tɛɛ a fɛ ka Yesu minan,
ŋa mɔgɔ si man se ka a boro la a ka.
Yaudiya kuntigiy ya jusukungbɛlɛnya
45 Kɔrɔsibaga miny nanni tɛɛ Yesu minanyɔrɔ rɔ,
olugu segikɔni ka wa sarakalasebaga kuntigiy ani Fariziy fɛ;
àyi naan àyi ɲininŋara ko:
«Mɛnɛn kɔsɔn àyi man a minan ka nan ni a ye?»
46 Yesu minanbagay naan a jabira ko:
«An man mɔgɔ si lamiɛn ba min ye kumannan yomi min cɛ!»
47 Fariziy ko àyi man ko:
«O tuman a baa alugu fanan lafiri kɛ?
48 Alugu baa miɛn ko an ya kuntigiy jeni kelenŋ,
walaman Fariziy jeni kelenŋ le baa la a ra fɔnɔn?
49 Ŋa jaman min baa la a ra,
olugu si man cela Musa ya seereya lɔn;
olugu ye mɔgɔ danganiy le ye!»
50 Ayiwa,
Nikodɛmu min kɔnŋɔnni tɛɛ ka wa Yesu fɛ lon dɔ,
ale fanan tɛɛ o fariziy dɔ le ye;
ale ko àyi man ko:
51 «Yala ka kaɲan ni an ɲan seereya ye,
an ye se ka kiti tɛgɛ mɔgɔ dɔ ka ka a sɔrɔ an man a tigi lamiɛn fɔnɔn,
ka a lɔn a naan ko min kɛra wa?»
52 Àyi ko ale man ko:
«O tuman,
ile fanan bɔni Galile le wa?
I yɛrɛ ye wa Ala ya Kitabu flɛ ka ɲan,
i bɛnan a ye ko cela si man bɔ Galile fɔnɔn.»
53 O kɔ,
àyi bɛɛ kelenŋ kelenŋ wirini ka wa àyi a lu kɔnɔn.