Dogoni min dini jaman man Yesu boro
6
1 Ayiwa o koy kɔ,
Yesu wani Galile ba kɔ fɛ,
ba min ye welera fanan ko Tibɛriyadi ba.
2 Jaman ba tuguni tɛɛ a kɔ,
sabu a tɛɛ tɔgɔmansere miny kɛra ka bananbagatɔy lakɛnɛnya,
olugu tɛɛ o yera.
3 Yesu ni a ya karanmɔgɔdeny yɛlɛnni kongori dɔ ka ka i Sigi ye.
4 O ye a sɔrɔ Yaudiyay ya Jɔnɲanban ɲɛnɛngbɛ wagati tɛɛ ɲini ka se.
5 Yesu naan a ɲan kɔrɔtara ka a ye ko jaman ba dɔ ka nan ale nɔn fɛ.
A ko Filipe man ko:
«An ye se ka dogoni san yɔrɔ jeni,
beisa min mɔgɔy ye dogoni kɛ?»
6 Yesu tɛɛ ka o fɔ ka Filipe kɔrɔbɔ le;
ni o tɛ,
a tun bɛnan min kɛ a yɛrɛ tɛɛ o lɔn cɔ.
7 Filipe naan a jabira ko:
«Hali ni an ka weri deniyea kɛmɛn fla buru san ka a di min mɔgɔy man,
àyi bɛɛ tɛnan hali dɔɔni dɔɔni sɔrɔ a rɔ.»
8 Ayiwa,
Yesu ya karanmɔgɔden min ye Andere ye,
Simɔn Piyɛri badenɲɛ,
ale ko:
9 «Cɛdenni dɔ ye ya,
ɔriji burukun looru ani jɛgɛ fla ye o boro;
ŋa o bɛnan mɛnɛn ɲan min jaman ba man?»
10 Ayiwa Yesu ko karanmɔgɔdeny man ko:
«Ayi ye mɔgɔy lasigi dugu man.»
Binmisɛny tɛɛ a shia o yɔrɔ rɔ.
Mɔgɔy naan i sigira;
cɛy tun bɛ mɔgɔ waga looru bɔ.
11 Yesu naan o buruy tara ka barika la Ala ye,
ka a tarantaran mɔgɔy ra;
jɛgɛ fanan ta kɛni te.
Mɔgɔ bɛɛ naan dɔ sɔrɔra fo ka wasa.
12 Mɔgɔy naan dogoni kɛra ka fa tuman min,
Yesu ko karanmɔgɔdeny man ko:
«Ayi ye burukunŋuruny cɛ,
beisa dɔ kanan ciɛn.»
13 Àyi naan o ɔriji burukunŋuruny cɛra ka segi tan ni fla fa ni olugu ye;
mɔgɔy naan dogoni kɛra burukun looru rɔ ka min to o le kɛni o ye.
14 O mɔgɔy naan Yesu ya tɔgɔmansere yera minŋɛ,
àyi ko:
«Ciɛn rɔ,
cela min tun ka kan ka nan dunuɲan Kɔnɔn,
min yɛrɛ le.»
Yesu ya jikatagaman
15 Yesu nanni a lɔnnan minŋɛ ko àyi ye a fɛ ka ale minan fanŋan ra ka a kɛ àyi ya mansacɛ ye,
a bɔni àyi cɛ man ka segikɔ ka wa kongori dɔ ka a kelenŋ nan.
16 Wulada nanni sera minŋɛ,
karanmɔgɔdeny wani bada ra.
17 Àyi doni kurun dɔ kɔnɔn ko àyi ye ba tɛgɛra ka wa Kapɛrinaumu.
Su nanni kora ka a sɔrɔ Yesu tun man nan àyi fɛ fɔnɔn.
18 Fɔɲɔn ba dɔ wirini,
ka ji lamaga kosɔbɛ.
19 Àyi naan kile looru walaman wɔɔrɔ kɛra ji ka wagati min nan,
àyi naan Yesu tagamantɔ yera ji ka,
a ka i mantugu àyi ya kurun nan;
àyi siranni.
20 Yesu ko àyi man ko:
«Ni le,
ayi kanan siran!»
21 Àyi tɛɛ a fɛ ko a ye do kurun kɔnɔn alugu fɛ;
ŋa àyi tɛɛ ka wa yɔrɔ min nɔn,
o yɔrɔkelen bɛɛ rɔ kurun tuguni dugukolo ra àyi barani ka a ye ko àyi baa se àyi wa yɔrɔ rɔ.
Mɔgɔy naan Yesu yɔrɔɲininan
22 Dugu nanni gbɛra tuman min,
jaman min tɛɛ ba ɲan dɔ ka,
olugu naan a kɔrɔsira ka a ye ko kurun kelenŋ le tɛɛ ye,
ko Yesu tun man do o kurun kɔnɔn ni a ya karanmɔgɔdeny ye,
ŋa karanmɔgɔdeny drɔn le doni kurun kɔnɔn ka wa.
23 O ye a sɔrɔ kurun dɔy nanni tɛɛ ka bɔ Tibɛriyadi;
Mantigi Yesu nɔn tɛɛ barika lara Ala ye ka buru tarantaran jaman ra yɔrɔ min nɔn,
àyi lɔni tɛɛ o yɔrɔ le rɔ.
24 Ayiwa jaman nanni a yera ko Yesu tun tɛ ye,
ko a ya karanmɔgɔdeny fanan tun tɛ ye minŋɛ,
olugu yɛrɛ doni o kuruny kɔnɔn ka wa Kapɛrinaumu ka wa Yesu yɔrɔɲini.
Dogonifen min ɲɛnnɛnmanya dira
25 Àyi wani Yesu yera ba ɲan dɔ ka,
do a fɔ a man ko:
«An Karanmɔgɔ,
i seni ya wagati jeni?»
26 Yesu naan àyi jabira ko:
«Ciɛn rɔ ni bɛ a fɔ ayi ɲɛnnɛn ko ayi naan tɔgɔmansere miny yera ayi tɛ ni yɔrɔɲininan o kɔsɔn dɛ,
ŋa ayi naan dogoni min kɛra ka i fa,
ayi ye ni yɔrɔɲininan o le kɔsɔn.
27 Ayiwa,
dogonifen min ye sera ka ciɛn,
ayi kanan bagara kɛ o kɔsɔn;
dogonifen min tɛ ciɛnnan,
ani ni a ye ɲɛnnɛnmanya banberi dira fanan,
ayi ye bagara kɛ o kɔsɔn.
Mɔgɔ Denɲɛ le bɛnan o dogonifen di ayi man,
sabu Fa Ala naan a ya fanŋan tɔgɔmansere lara ale le ka.»
28 Àyi naan Yesu ɲininŋara ko:
«An ka kan ka mɛnɛn le kɛ ka Ala sawonan bagara kɛ?»
29 Yesu naan àyi jabira ko:
«Ala ye bagara min ɲininan ayi fɛ,
o le ye ko ale Ala naan mɔgɔ min cera,
ayi ye la o ra.»
30 Àyi ko Yesu man ko:
«Ayiwa,
ile bɛnan tɔgɔmansere jeni le kɛ ka a yira annugu ra,
beisa an ɲɛn la i ra?
I bɛnan mɛnɛn le kɛ?
31 An bɛmɛny naan dogonifen donnan wa kɔnɔn,
yomi a sɛbɛni kitabu kɔnɔn ɲan min man ko:
‹A naan dogonifen bɔra sanŋolo rɔ ka a di àyi man,
àyi naan a donnanb.› »
32 Yesu ko:
«Ciɛn rɔ,
ni bɛ a fɔ ayi ɲɛnnɛn ko cela Musa man dogonifen bɔ sanŋolo rɔ ka a di ayi man!
Ni Facɛ le dogonifen ɲɛnnɛnman dira ayi man ka bɔ sanŋolo rɔ.
33 Sabu min jigini ka bɔ sanŋolo rɔ,
ale le Ala ya buru ye,
min ye ɲɛnnɛnmanya dira dunuɲanmɔgɔy man.»
34 Àyi ko Yesu man ko:
«An Karanmɔgɔ,
kɛ o dogonifen dira annugu man wagati bɛɛ kɛ!»
35 Yesu ko àyi man ko:
«Dogonifen min ye ɲɛnnɛnmanya dira,
ni le o ye;
ni mɔgɔ min ka nan ni fɛ kɔnŋɔn tɛnan o tigi sɔrɔ bele fiyewu;
ni mɔgɔ min ka la ni ra,
minlɔgɔ tɛnan o tigi sɔrɔ bele fiyewu.
36 Ŋa ni baa a fɔ ayi ɲɛnnɛn ka ban,
ko:
Alugu baa ni ye,
ŋa alugu man la ni ra.
37 Ni ni Fa ka mɔgɔ o mɔgɔ di ni man,
olugu bɛɛ bɛnan nan ni fɛ;
ni mɔgɔ o mɔgɔ ka nan ni fɛ,
ni tɛnan o tigi gbɛn fiyewu.
38 Sabu ni man nan ka bɔ sanŋolo rɔ ka nan n'yɛrɛ sawo kɛ;
min naan ni cera,
ni nanni o sawo le kɛra.
39 Min naan ni cera,
o sawo flɛ ni:
ko Ale ka mɔgɔ o mɔgɔ di ni man ko olugu si kanan tunu;
ani ko dunuɲan labanlon nan fanan,
ni ye o tigi lakunu ka bɔ saya rɔ.
40 Sabu ni Fa sawo le ko ni mɔgɔ o mɔgɔ ka Denɲɛ ye ka la a ra,
o tigi ye ɲɛnnɛnmanya banberi sɔrɔ;
dunuɲan labanlon nan fanan,
ni bɛnan o tigi lakunu ka bɔ saya rɔ.»
41 Yesu ko minŋɛ ko buru min bɔni sanŋolo rɔ ko ale le o ye,
Yaudiyay naan a kɛra Yesu kɔrɔfɔ ye o le kɔsɔn.
42 Àyi ko:
«O tuman,
Yesu le tɛ nin wa,
Yusufu denɲɛ?
An ye a facɛ lɔn ka a bamuso lɔn kɛ.
Mɛnɛn kɔsɔn a ye ka a fɔ ko ale jigini ka bɔ sanŋolo rɔ?»
43 Yesu naan àyi jabira ko:
«Ayi kanan ngunungunu ayi yɛrɛ kɔrɔ ye.
44 Mɔgɔ si tɛ se ka nan ni fɛ,
ni ni Fa min naan ni cera,
ni ale man o tigi lanan ni fɛ;
ni o tigi ka nan ni fɛ,
dunuɲan labanlon nan,
ni bɛnan o tigi lakunu ka bɔ saya rɔ.
45 Ayiwa,
a sɛbɛni celay ya kitabuy kɔnɔn ko:
‹Ala yɛrɛ le bɛnan olugu bɛɛ karanc.›
Mɔgɔ o mɔgɔ ka Fa Ala ya Kuman lamiɛn ka sɔn a ya karan man,
o tigi bɛ nan ni fɛ.
46 Ŋa o tɛ a yirara ko mɔgɔ dɔ ɲan baa Fa Ala ye dɛ!
Mɔgɔ si man Ala ye,
fo min bɔni Fa Ala rɔ,
ale kelenŋ le baa Fa Ala ye.»
Yesu ferisogo ani a jeri le ɲɛnnɛnmanya dira
47 Ciɛn rɔ ni bɛ a fɔ ayi ɲɛnnɛn ko ni mɔgɔ min ka la ni ra,
o tigi bɛnan ɲɛnnɛnmanya banberi sɔrɔ.
48 Dogoni min ye ɲɛnnɛnmanya dira mɔgɔy man,
ni le o ye.
49 Dogonifen min ye bɔra sanŋolo rɔd ayi bɛmɛny naan o donnan wa kɔnɔn,
ŋa o bɛɛ ni a ta olugu sani.
50 Ŋa buru min jigini ka bɔ sanŋolo rɔ o le nin:
ni mɔgɔ min ka o don,
o tigi tɛnan sa.
51 Ni le dogonifen ɲɛnnɛnman ye,
min jigini ka bɔ sanŋolo rɔ.
Ni mɔgɔ min ka o don,
o tigi ɲɛnnɛnman bɛnan to wagati bɛɛ.
Ni bɛ dogonifen min di,
o le ni yɛrɛ ferisogo ye,
beisa dunuɲanmɔgɔy ye ɲɛnnɛnmanya.
52 Yesu naan o fɔra minŋɛ,
Yaudiyay naan a kɛra ɲɔnŋɔn sɔsɔ ye;
àyi ko:
«Min cɛ bɛ se ka a yɛrɛ ferisogo di an man cogo di le,
an ye a don?»
53 Yesu naan a fɔra àyi man ko:
«Ciɛn rɔ ni bɛ a fɔ ayi ɲɛnnɛn ko ni ayi man Mɔgɔ Denɲɛ ferisogo don ka a jeri min,
ayi tɛnan ɲɛnnɛnmanya ɲunman sɔrɔ.
54 Ŋa ni mɔgɔ min ka ni ferisogo don ka ni jeri min fanan,
o tigi bɛnan ɲɛnnɛnmanya banberi sɔrɔ;
dunuɲan labanlon nan,
ni bɛnan o tigi lakunu ka bɔ saya rɔ.
55 Sabu ni ferisogo ye dogonifen sɔbɛ le ye,
ni jeri fanan ye minlifen sɔbɛ le ye.
56 Ni mɔgɔ min ka ni ferisogo don,
ka ni jeri min,
o tigi bɛnan to ni ya jɛnɲɔnŋɔnya rɔ,
ni fanan bɛnan to jɛnɲɔnŋɔnya rɔ ni o tigi ye.
57 Fa Ala min ɲɛnnɛnman le,
min naan ni cera,
ni ye ɲɛnnɛnmanyara ale le sababu ra;
o ɲan man ni mɔgɔ min ka ni ferisogo don ka ni jeri min fanan,
o tigi bɛnan ɲɛnnɛnmanya ni sababu ra.
58 Buru min jigini ka bɔ sanŋolo rɔ,
o le nin;
a tɛ yomi ayi bɛmɛny naan min donnan ni àyi fagani.
Ni mɔgɔ min ka buru min don,
o tigi bɛnan ɲɛnnɛnmanya banberi sɔrɔ.»
59 Yesu naan min kumany le fɔra ka a to mɔgɔy karannan karanso kɔnɔn Kapɛrinaumu.
Yesu ya kuman ni ɲɛnnɛnmanya banberi
60 Ayiwa Yesu nanni o kuman fɔra te minŋɛ,
a ya karanmɔgɔdeny shiaman ko:
«Min kuman a gbɛlɛn dɛ!
Jeni se ka sɔn min man?»
61 Yesu naan a lɔnnan ko karanmɔgɔdeny ye o koy ngunungununan minŋɛ,
a ko àyi man ko:
«Min kuman diginni ayi ra wa?
62 O tuman,
ni ayi ka Mɔgɔ Denɲɛ yɛlɛntɔ ye ka wa a bɔyɔrɔ rɔ do?
63 Ala Nin le mɔgɔ ɲɛnnɛnmanyara;
ni o tɛ,
mɔgɔ yɛrɛ baraka tɛ se ka foyi kɛ;
ni baa kuman miny fɔ ayi ɲɛnnɛn,
o bɔni Ala Nin le rɔ,
o le ɲɛnnɛnmanya dira.
64 Ŋa dɔy ye ayi rɔ,
olugu man la o ra.»
Ayiwa,
kabini a daminan man,
miny tun man la Yesu ra,
a nɔn tɛɛ olugu lɔnnan,
ani min tɛɛ nan a janva.
65 Yesu naan a fɔra tuguni,
ko:
«O le kɔsɔn ni naan a fɔra ayi ɲɛnnɛn ko mɔgɔ si tɛ se ka nan ni man,
ni Fa Ala man o se di o tigi man.»
66 Ayiwa,
ka a ta o lon man,
a ya karanmɔgɔden shiaman bɔni a kɔ;
àyi man sɔn ka i tugu a kɔ bele.
67 Yesu ko a ya karanmɔgɔden tan ni fla man ko:
«Alugu fanan tɛ a fɛ ka taga wa?»
68 Simɔn Piyɛri naan a jabira ko:
«Mantigi,
annugu bɛnan wa jeni le fɛ?
Ɲɛnnɛnmanya banberi kuman ye sɔrɔra ile le fɛ.
69 Annugu lani i ra,
annugu fanan ye a lɔn ko ile le Ala Denɲɛ Seninman ye.»
70 Yesu naan a fɔra àyi man ko:
«Ni le man alugu mɔgɔ tan ni fla ɲananwoloman wa?
Ka a sɔrɔ kelenŋ ye ayi rɔ,
o ye sitananmɔgɔ le ye.»
71 Yesu kan tɛɛ Zudasi le man,
Simɔn Sikariyɔti denɲɛ;
ale le tɛɛ nan Yesu janva,
ka a sɔrɔ karanmɔgɔden tan ni fla dɔ rɔ kelenŋ le tɛɛ.