Muruku dɔ ya kɛnɛnyali Bɛtisayida
5
1 Ayiwa o koy kɔ fɛ,
ɲɛnɛngbɛ ba dɔ tɛɛ Yaudiyay fɛ Zeruzalɛmu;
Yesu wani o ɲɛnɛngbɛ yɔrɔ rɔ.
2 Zeruzalɛmu dugu donda min ye welera ko Sagay ya donda,
diŋɛn jiman dɔ le tɛɛ o donda kɛrɛ fɛ,
min ye welera heburukan nɔn ko Bɛtisayida;
gbata looru lɔni tɛɛ o diŋɛn kɛrɛ fɛ.
3 Ayiwa,
bananbagatɔ shiaman lalani tɛɛ o gbatay kɔrɔ:
Fientɔy,
ani nanbaray,
ani murukuy.
[Àyi tɛɛ ji lamaga wagati le kɔnɔnnan.
4 Sabu Ala ya mɛlɛkɛ dɔ le tɛɛ tora ka jigi ji rɔ wagati dɔy ra ka a lamaga.
Ji lamagani kɔ,
ni bananbagatɔ min tun ka kɔnŋɔn ka jigi ji rɔ,
o tigi tɛɛ kɛnɛnyara,
hali ni a ya banan tun ka kɛ banan suguya min o min ye.]
5 Ayiwa,
cɛ dɔ le tɛɛ o yɔrɔ rɔ,
ale tun baa san bisaba ni seeɲi le kɛ banan rɔ.
6 Yesu naan o cɛ lani yera minŋɛ,
a naan a lɔnnan ko a baa miɛn banan rɔ;
a naan a ɲininŋara ko:
«Yala i ye a fɛ ka kɛnɛnya wa?»
7 A naan Yesu jabira ko:
«An Karanmɔgɔ,
ni ji ka lamaga,
mɔgɔ tɛ ni boro ka ni ta ka ni lajigi o diŋɛn jiman rɔ;
ni ni fanan ko ko ni bɛnan wiri n'yɛrɛ man,
sani n'ye se ye,
dɔ bɛ kɔnŋɔn ka jigi ni ɲɛn.»
8 Yesu ko a man ko:
«I wiri ka i ya lafen ta ka tagaman.»
9 Ayiwa o yɔrɔni kelenŋ bɛɛ a kɛnɛnyani;
a wirini ka a ya lafen ta ka kɛ tagaman ye.
O kɛni tɛɛ Yaudiyay ya Nunnɔnkirilon le man.
10 O rɔ,
Yaudiyay naan a fɔra o cɛ kɛnɛnyani man ko:
«Bi ye Nunnɔnkirilon le ye!
Ka kaɲan ni seereya ye,
a man daga ko i ye i ya lafen ta ka tagaman bi.»
11 O cɛ ko Yaudiyay man ko:
«Min naan ni lakɛnɛnyara ale le ko ni man ko:
‹I ya lafen ta ka tagaman!› »
12 Àyi naan a ɲininŋara ko:
«Jenitigi le naan a fɔra i man ko i ye i ya lafen ta ka tagaman?»
13 Ŋa mɔgɔ kelenŋ min nɔn tɛɛ cɛ lakɛnɛnyara,
a tun man o tigi lɔn bele;
sabu jaman tɛɛ a shia,
Yesu fanan tun baa tunu jaman rɔ.
14 Kɔ fɛ,
Yesu nanni bɛnan ni o cɛ ye Alabatosoba lu kɔnɔn;
Yesu ko a man ko:
«A flɛ,
sisani i baa kɛnɛnya;
i kanan jurumun kɛ bele,
beisa kojugu gbɛrɛ kanan i sɔrɔ min y'a jugu ni min ye.»
15 O cɛ wani a fɔra Yaudiyay kuntigi ɲɛnnɛn ko Yesu le naan ale lakɛnɛnyara.
16 Yaudiyay kuntigiy wirini o le rɔ ka kɛ Yesu kɔninɲanli ye ko mɛnɛn kɔsɔn a naan cɛ lakɛnɛnyara Nunnɔnkirilon man.
17 Yesu naan àyi jabira,
ko:
«Ni Facɛ ye bagara ra wagati bɛɛ,
o le kɔsɔn ni fanan ka kan ka bagara kɛ.»
18 Yesu naan o kuman fɔra minŋɛ,
dɔ faranni Yaudiya kuntigiy ya dimi ka,
fo àyi naan a kɛra Yesu fagacogo ɲini ye;
àyi ko ko a man Nunnɔnkirilon jate minŋɛ,
ko o drɔn tɛ,
ŋa ko a ko ko Ala le a Fa ye,
ka a yɛrɛ kaɲan ni Ala ye.
Yesu ya fanŋan sɔrɔ yɔrɔ
19 Yesu ko o mɔgɔy man tuguni ko:
«Ciɛn rɔ,
ni bɛɛ a fɔ ayi ɲɛnnɛn ko Denɲɛ tɛ se ka foyi si kɛ a yɛrɛ man,
ni a man a Fa ye min kɛra.
Fa ye min kɛra,
Denɲɛ fanan ye o ɲɔnŋɔn le kɛra;
20 sabu Fa ye Denɲɛ kanunnan,
o le kɔsɔn a ye ko o ko kɛra,
a ye o bɛɛ yirara a ra.
A yɛrɛ bɛnan fen shiaman yira a ra tuguni min y'a bon ka timi min ka,
beisa ayi ye kabakoya.
21 Sabu Fa ye suy lakununan ka ɲɛnnɛnmanya di olugu man kura ye ɲan min man,
o ɲan kelenŋ le man ni Denɲɛ ye a fɛ ka ɲɛnnɛnmanya di miny man,
a bɛ a di olugu man.
22 Fa tɛ kiti tɛgɛra mɔgɔ si ka fanan,
ŋa a naan kitiko bɛɛ tora Denɲɛ le boro,
23 beisa bɛɛ ye Denɲɛ boɲan yomi àyi ye a Fa boɲannan ɲan min man.
Ni mɔgɔ min man sɔn ka Denɲɛ boɲan,
Fa min naan a cera,
o tigi tɛ o le boɲannan.»
24 Yesu ko àyi man ko:
«Ciɛn rɔ ni bɛ a fɔ ayi ɲɛnnɛn ko mɔgɔ min ka ni ya kuman lamiɛn ka la ni cebaga ra fanan,
o tigi baa ɲɛnnɛnmanya banberi sɔrɔ;
kiti tɛnan tɛgɛ o ka bele,
sabu a baa bɔ saya rɔ ka do ɲɛnnɛnmanya rɔ.
25 Ciɛn rɔ ni bɛ a fɔ ayi ɲɛnnɛn ko wagati dɔ bɛnan se,
o ye sisani le ye;
Ala Denɲɛ,
suy bɛnan o kumankan miɛn;
ni miny ka a kumankan lamiɛn,
olugu bɛnan ɲɛnnɛnmanya.
26 Sabu se ye Fa Ala ye ka ɲɛnnɛnmanya di mɔgɔy man ɲan min man,
a naan se dira Denɲɛ man ka ɲɛnnɛnmanya di mɔgɔy man o ɲan le man.
27 A naan fanŋan dira Denɲɛ man ka kiti tɛgɛ,
sabu ale le Mɔgɔ Denɲɛ ye.
28 Ayi kanan kabakoya o ra,
sabu wagati dɔ bɛnan se,
su miny bɛɛ ye kaburuy kɔnɔn,
olugu bɛɛ bɛnan a kan miɛn.
29 Miny naan koɲunman kɛra,
olugu bɛnan kunu ka wa to ɲɛnnɛnmanya rɔ;
ŋa miny naan kojugu kɛra,
olugu bɛnan kunu ka kiti bien ayi ka.»
Yesu ya kuman
30 Yesu ko:
«Ni tɛ se ka foyi kɛ n'yɛrɛ man.
Ala naan min fɔra ni ɲɛnnɛn,
n'ye kiti tɛgɛra ka kaɲan ni o le ye.
N'ya kiti terenni le,
sabu ni tɛ a kɛra ka kaɲan ni n'yɛrɛ sawo ye;
min naan ni cera,
n'ye a kɛra ka kaɲan ni o sawo le ye.»
31 Ni ni yɛrɛ le tun ka kɛ n'yɛrɛ seere ye,
ni ya kuman tun tɛ se ka kɛ ciɛn ye;
32 ŋa mɔgɔ gbɛrɛ le ni seere ye;
ni ye a lɔn fanan ko a ye min fɔra ni ya ko rɔ,
ko o ye ciɛn le ye.
33 Ayi naan mɔgɔ dɔy cera Yahaya Batizelikɛbaga man.
A naan min fɔra ayi ɲɛnnɛn ni ya ko rɔ,
o ye ciɛn le ye.
34 Ni tɛ o fɔra,
sabu ni manko ye adamandeny ya seereya ra dɛ!
Ni manko tɛ o ra.
Ŋa ni ye o fɔra le,
beisa ayi ye kisi.
35 Yahaya kɛni tɛɛ yomi laman min yeelen ye bɔra ayi cɛ man;
ayi kɔni sɔnni ka ɲagari a yeelen nan wagati dɔɔni.
36 Ŋa ni kɔni,
fen gbɛrɛ ye ni seere ye min a bon ni Yahaya ya seereya ye;
sabu Fa Ala naan bagara miny dira ni man,
ni ye o bagara miny kɛra,
o kɛwaleny le ye ni seere ye.
O le ye a yirara ko Fa Ala naan ni cera.
37 Fa Ala min naan ni cera,
ale yɛrɛ le seereya kɛra ni ya ko rɔ.
Ŋa ayi man sɔn ka a kan lamiɛn,
ayi ɲan fanan man la a ka ka ye.
38 A ya kuman tɛ tora ayi kɔnɔn,
sabu a naan mɔgɔ min cera ayi man la o ra.
39 Ayi ye ayi timinanjiyara Sɛbɛliy karan man kosɔbɛ,
sabu ayi ye ayi miirira ko ayi bɛnan ɲɛnnɛnmanya banberi sɔrɔ o le rɔ,
ka a sɔrɔ o Sɛbɛli keleny le ni seere ye.
40 O bɛɛ ni a ta,
ayi tɛ a fɛ ka nan ni man beisa ayi ye ɲɛnnɛnmanya sɔrɔ.
41 «Ni tɛ adamandeny ya boɲan kɔ;
sabu ayi ye mɔgɔ suguya miny ye,
ni ye o lɔn.
42 N'ye a lɔn fanan ko Ala ya kanunɲan tɛ ayi jusukun nan.
43 Ni nanni n'Fa tɔgɔ le ra,
ŋa ayi man sɔn ni ta man,
ka a sɔrɔ ni mɔgɔ gbɛrɛ le tun ka nan a yɛrɛ tɔgɔ ra,
ayi tɛɛ naan sɔn o tigi man.
44 Ayi ye se ka la ni ra cogo di,
alugu miny ye ayi ya boɲan ɲininan ayi mɔgɔɲɔnŋɔny fɛ,
ŋa boɲan min ye sɔrɔra Ala kelenpe fɛ ayi tɛ o ɲininan?
45 Ayi kanan a miiri ko ni bɛnan ayi jaraki n'Fa ɲankɔrɔ dɛ!
Ayi jigi lani cela Musa min ka dɛ,
ole bɛnan kɛ ayi jarakibaga ye.
46 Ni ayi tun ka la cela Musa ra,
ayi tun bɛnan la ni ra fanan,
sabu cela Musa naan ni ya ko le sɛbɛra a ya kitabuy Kɔnɔn.
47 Ŋa cela Musa naan min sɛbɛra ni ayi man la o ra,
ayi bɛnan la ni ra kumany ra cogo di?»