Samarikamuso ya ko
4
1 Ayiwa Fariziy nɔn tɛɛ a miɛnnan ko Yesu ye karanmɔgɔden shiaman sɔrɔra ka àyi batize ka timi Yahaya ka;
Yesu bɔnni o ko kara man.
2 Ka a sɔrɔ Yesu yɛrɛ tun tɛ mɔgɔy batizera,
a ya karanmɔgɔdeny le tɛɛ mɔgɔy batizera.
3 O le kɔsɔn,
Yesu bɔnni Zude mara rɔ ka kɔsegi Galile mara rɔ.
4 Ŋa jagboya le ko a tɛɛ timi Samari mara rɔ.
5 Ayiwa,
a wani sera Samari dugu dɔ ra,
o tɔgɔ le ko Sikari;
Yakuba nɔn tɛɛ foro min dira a denɲɛ Yusufu man fɔlɔfɔlɔ,
Sikari ye o foro le kɛrɛ fɛa.
6 Yakuba ya kɔrɔn tɛɛ o yɔrɔ le rɔ.
Ayiwa Yesu sɛgɛni tagaman rɔ minŋɛ,
a nanni i sigira kɔrɔnda ra.
O tuman ra tere tun baa se kunɲɛ man.
7 Ayiwa Samarikamuso dɔ nanni jibiyɔrɔ rɔ.
Yesu ko o man ko:
«I Saberi ji dɔ di ni man,
n'ye min.»
8 O ye a sɔrɔ a ya karanmɔgɔdeny wani tɛɛ dugu kɔnɔn ka wa dogoni san.
9 Samarikamuso ko Yesu man ko:
«E!
Ile min ye Yaudiya ye,
mɛnɛn kɔsɔn ile bɛ sɔn ka ni daari ji minta ra,
ka a sɔrɔ ni ye Samarika le ye?»
Muso naan o fɔra,
sabu Yaudiyay tɛ sɔnnan ka jɛn ni Samarikay ye foyi kɔsɔn.
10 Yesu naan a jabira ko:
«Ala ye fen min dira gbaŋazan,
ni i tun ka kɛ o lɔn,
ani mɔgɔ min ko i man ko:
‹Ji di n'man,
n'ye n'min›,
ni i tun ka kɛ o tigi lɔn,
ile yɛrɛ le tun bɛnan ale daari ji ra,
a tɛɛ nan ji ɲɛnnɛnman di i man.»
11 Muso ko Yesu man ko:
«An Karanmɔgɔ,
jurufiyɛ tɛ ile boro,
kɔrɔn fanan a dun,
ile bɛnan o ji sɔrɔ yɔrɔ jeni sa,
ka o di ni man?
12 An bɛmɛncɛ Yakuba le naan min kɔrɔn dira annugu man;
ale yɛrɛ naan min ji minnan,
ani a deny ni a ya biŋany.
O tuman ile ya bo ni an bɛmɛncɛ Yakuba ye wa?»
13 Yesu naan muso jabira,
ko:
«Ni mɔgɔ o mɔgɔ ka min ji min,
jiminlɔgɔ bɛnan o tigi minan tuguni.
14 Ŋa ni bɛ ji min di,
ni mɔgɔ o mɔgɔ ka o ji min,
jiminlɔgɔ tɛnan o tigi sɔrɔ bele,
sabu ni bɛ ji min di,
o bɛnan kɛ bununji ye o tigi kɔnɔn ka woyo fo ka ɲɛnnɛnmanya banberi di o tigi man.»
15 Muso ko a man ko:
«An Karanmɔgɔ,
o ji di ni man kɛ,
beisa jiminlɔgɔ kanan ni sɔrɔ bele,
ani ni kanan nan ji bi ya bele.»
16 Ayiwa Yesu ko a man ko:
«Wa i cɛ wele ka nan ya.»
17 Muso ko:
«Cɛ tɛ ni boro!»
Yesu ko a man ko:
«Jo ye i fɛ ka a fɔ ko cɛ tɛ i boro.
18 Sabu i naan i sigira cɛ looru le kun;
i ye min kun sisani,
o fanan tɛ i cɛ ye.
I baa min fɔ o le ciɛn ye.»
19 Muso ko a man ko:
«An Karanmɔgɔ,
ni baa a ye ɲan min man,
ile ye Ala ya cela le ye!
20 O rɔ,
ni bɛnan i ɲininŋa:
Mɛnɛn kɔsɔn annugu Samarikay,
annugu bɛmɛny naan Ala batora min kuru le ka ya,
ka a sɔrɔ alugu Yaudiyay,
alugu ye a fɔra ko Ala ka kan ka bato yɔrɔ min nɔn ko o le Zeruzalɛmu ye?»
21 Yesu naan a jabira,
ko:
«Muso,
la ni ra;
wagati dɔ bɛnan se,
ayi tɛnan Fa Ala bato min kuru ka bele,
walaman Zeruzalɛmu.
22 Ayiwa,
alugu Samarikay ayi ye min batora,
ayi tɛ o lɔn;
ŋa annugu Yaudiyay,
annugu ye min batora,
annugu ye o lɔn,
sabu kisili bɔni Yaudiyay le rɔ.
23 Ŋa wagati bɛnan se,
a baa se yɛrɛ ka ban;
Alabatobaga sɔbɛy bɛnan Fa Ala bato nin ani ciɛn le ra;
sabu Fa Ala ye o batobagay ɲɔnŋɔn le ɲininan.
24 Ala ye Nin le ye,
o le kɔsɔn miny bɛɛ bɛnan a bato,
olugu ka kan ka a bato ni nin ani ciɛn le ye.»
25 Muso ko Yesu man ko:
«Ni ye a lɔn ko Masiya bɛnan nan,
min ye welera ko Kirisitab;
ni a ka nan,
a bɛnan fen bɛɛ ɲanfɔ an ɲɛnnɛn.»
26 Yesu ko muso man ko:
«Ni min ye kumannan i fɛ,
ni yɛrɛ le.»
27 Ayiwa,
karanmɔgɔdeny kɔsegini ka nan;
àyi naan a yera ko Yesu ye kumannan ni muso ye minŋɛ,
o naan àyi kɔnɔnrɔbannan.
Ŋa àyi si man sɔn ka a ɲininŋa ko a tɛɛ mɛnɛn le ɲininŋara muso fɛ,
walaman ko mɛnɛn kɔsɔn a kumanni ni muso ye.
28 Muso naan a ya jidaga tora kɔrɔnda ra,
ka wa dugu kɔnɔn,
ka wa a fɔ mɔgɔy ɲɛnnɛn ko:
29 «Ayi ye nan cɛ dɔ flɛ.
Ni baa ko o ko kɛ ka timi,
a baa o bɛɛ fɔ ni ɲɛnnɛn;
Masiya min ko fɔni,
kɔni ale tɛ dɛ?»
30 Mɔgɔy bɔni dugu kɔnɔn ka nan Yesu fɛ.
31 Ayiwa o ye a sɔrɔ karanmɔgɔdeny tɛɛ ka Yesu daari ko:
«An Karanmɔgɔ,
dogoni kɛ sa!»
32 Yesu naan àyi jabira ko:
«Dogonifen dɔ ye ni boro ka a don,
alugu tɛ dogonifen min lɔn.»
33 Karanmɔgɔdeny naan kɛra ɲɔnŋɔn ɲininŋa ye,
ko:
«O tuman dɔ le nanni dogoni dira a man ya wa?»
34 Yesu naan a fɔra àyi man ko:
«Ka ni cebaga sawo kɛ,
ani ka a ya bagara kɛ ka a dafa,
o le ni ya dogoni ye.
35 Ayi degini tɛɛ ka fɔ ko karo naani le lanlikɛwagati ani sumantɛgɛwagati cɛ wa?
Ayiwa,
ni bɛ a fɔ ayi ɲɛnnɛn ko ayi ye ayi ɲan kɔrɔta ka foroy flɛ;
suman baa kɔgɔ,
a tɛgɛwagati baa se ka ban.
36 Min ye suman tɛgɛra,
o tigi bɛ a sara sɔrɔ ka ban;
a bɛ sumankisɛ lajɛn ka a bla ɲɛnnɛnmanya banberi ɲɛn.
O ɲan le man lanlikɛbaga ni sumantɛgɛbaga bɛɛ ye i ɲagarira ɲɔnŋɔn boro.
37 Sabu zana min ko,
ko ‹dɔ bɛ lanli kɛ,
dɔ gbɛrɛ bɛ suman tɛgɛ,›
o zana ye ciɛn le ye.
38 Ayiwa,
alugu man bagara kɛ foro min nɔn,
ni baa alugu ce ka wa o suman tɛgɛ;
mɔgɔ gbɛrɛy naan bagara min kɛra,
alugu baa tɔnɔn sɔrɔ olugu ya bagara nɔn le rɔ.»
39 Ayiwa,
o muso ya kuman kɔsɔn,
Samarika shiaman lani Yesu ra o dugu ra,
sabu muso naan a fɔra àyi ɲɛnnɛn ko:
«Ni baa ko o ko kɛ ka timi,
a baa o bɛɛ fɔ ni ɲɛnnɛn».
40 O le kɔsɔn Samarikay nanni Yesu fɛ minŋɛ,
àyi naan a daarira ko a ye to alugu fɛ;
Yesu naan tere fla kɛra ni àyi ye.
41 Mɔgɔ shiaman gbɛrɛ lani a ra a yɛrɛ ya kuman kɔsɔn.
42 O mɔgɔy ko muso man ko:
«Annugu man la a ra ile ya kuman kɔsɔn dɛ,
ŋa an yɛrɛ naan a lamiɛnnan,
an baa a lɔn ciɛn rɔ ko ale le dunuɲan Kisibaga ye.»
Kuntigi dɔ denɲɛ ya lakɛnɛnyali
43 O tere fla timini kɔ Yesu ni a ya karanmɔgɔdeny bɔni ka wa Galile.
44 Ka a sɔrɔ Yesu yɛrɛ nɔn tɛɛ a fɔra ko:
«Cela si tɛ boɲannan a yɛrɛ ya jamanan rɔ.»
45 Ayiwa,
àyi seni Galile minŋɛ,
Galilekay naan a kunbɛnnan ni sawa ye,
sabu Yesu nɔn tɛɛ ko miny bɛɛ kɛra Zeruzalɛmu Jɔnɲanban ɲɛnɛngbɛ rɔ,
Galilekay nɔn tɛɛ o yera,
bawu olugu yɛrɛ wani tɛɛ ɲɛnɛngbɛ yɔrɔ rɔ.
46 Ayiwa Yesu segikɔni ka wa Ka nan tuguni,
Galile mara rɔ,
a nɔn tɛɛ ji yɛlɛmannan ka kɛ duvɛn ye yɔrɔ min nɔn.
O ye a sɔrɔ jamanan ɲɛnmɔgɔ dɔ tɛɛ Kapɛrinaumu,
o den tun man kɛnɛn.
47 O cɛ naan a miɛnnan minŋɛ ko Yesu bɔni Zude ka nan Galile mara rɔ,
a wani Yesu kɔ ka wa a daari ko a ye nan Kapɛrinaumu ko ale denɲɛ bɛ ɲini ka sa,
ko a ye nan a lakɛnɛnya.
48 Yesu naan a fɔra ko:
«Ni ayi man tɔgɔmanserey ani kabakoy ye ayi ɲan ra,
ayi tɛ lara ni ra fiyewu!»
49 O kuntigi ko Yesu man ko:
«An Karanmɔgɔ,
i Saberi ka nan joonan,
beisa ni denɲɛ kanan sa.»
50 Yesu ko a man ko:
«I kɔsegi ka wa,
i denɲɛ ɲɛnnɛnman ye.»
O cɛ lani Yesu ya kuman ra;
a wani.
51 Ka a watɔ to,
a ya bagaradeny naan a kunbɛnnan sira ra ka a fɔ a ɲɛnnɛn ko:
«I denɲɛ ɲɛnnɛnman ye.»
52 A naan a ya bagaradeny ɲininŋara ko:
«A fisayani wagati jeni le ra?»
Àyi naan a jabira ko:
«A ya ferigban banni kunu le,
wagati min nan tere tɛɛ kunɲɛ man.»