Yesu ni Nikodɛmu ya baro
3
1 Ayiwa,
cɛ dɔ tɛɛ Fariziy rɔ,
min tɔgɔ tɛɛ ko Nikodɛmu;
Yaudiyay ya ɲɛnmɔgɔ dɔ le tɛɛ.
2 Lon dɔ su fɛ a nanni Yesu fɛ ka nan a fɔ a man ko:
«An Karanmɔgɔ,
an kɔni ye a lɔn faasi ko Ala le naan ile cera ka nan an karan;
sabu i ye kabako miny kɛra ni,
mɔgɔ si tɛ se ka o kɛ ni Ala tɛ ni a tigi ye.»
3 Yesu naan a jabira ko:
«Ciɛn rɔ,
ni bɛ a fɔ i ɲɛnnɛn ko ni mɔgɔ min man woro kokura kɛ o tigi tɛ se ka do Ala ya Mansaya rɔ fiyewu.»
4 Nikodɛmu ko:
«Ni mɔgɔ ka kɔrɔ ka ban,
a bɛ se ka woro cogo di bele?
Yala a bɛ se ka kɔsegi a bamuso kɔnɔn ka woro kokura kɛ tuguni wa?»
5 Yesu naan a jabira ko:
«Ciɛn rɔ,
ni bɛ a fɔ i ɲɛnnɛn ko ni mɔgɔ min man woro ji ni Nin Seninman baraka rɔ,
o tigi tɛ se ka do Ala ya Mansaya rɔ.
6 Sabu min woroni adamandeny baraka rɔ,
adamandenɲan cogo le kɛra o ra.
Ŋa ni min ka woro Nin Seninman baraka rɔ,
Nin Seninman cogo le o tigi ra.
7 Ayiwa ni baa a fɔ i ɲɛnnɛn minŋɛ ko ayi ka kan ka woro kokura kɛ,
o kanan i kɔnɔnrɔban.
8 I man a ye,
fɔɲɔn ye fiyɛra ka wa yɔrɔ min a di a ye,
i bɛ a manŋan miɛn,
ŋa i tɛ a bɔyɔrɔ lɔn,
i tɛ a wayɔrɔ lɔn fanan.
Mɔgɔ min woroni Nin Seninman baraka rɔ,
o tigi ta ye te le.»
9 Ayiwa Nikodɛmu ko Yesu man ko:
«O bɛ se ka kɛ cogo di sa?»
10 Yesu naan a jabira ko:
«Ile min ye Izirayɛli karanmɔgɔba ye,
ile man o lɔn wa?»
11 Yesu ko a man ko:
«Ni bɛ a fɔ i ɲɛnnɛn ciɛn rɔ,
ko an ye min lɔn,
an ye o le fɔra;
an naan min yera,
an bɛ kɛ o le seere ye fanan.
Ŋa alugu tɛ a fɛ ka sɔn annugu ya seereya man.»
12 Ko miny ye kɛra dunuɲan Kɔnɔn ya,
ni ni ka o fɔ alugu ɲɛnnɛn,
ni ayi man se ka la o ra,
ko miny ye kɛra sanŋolo rɔ,
ni ni ka o fɔ ayi ɲɛnnɛn ayi bɛnan la o ra cogo di?
13 Mɔgɔ si man yɛlɛn ka wa sanŋolo rɔ,
fo min jigini ka bɔ sanŋolo rɔ;
Mɔgɔ Denɲɛ,
ale le o ye.
14 «Ayiwa,
cela Musa naan shiɛn suranɛgɛlaman kɔrɔtara ɲan min man waa kɔnɔn,
jagboya le ko Mɔgɔ Denɲɛ fanan ye kɔrɔta o ɲan mana»
15 beisa ni mɔgɔ o mɔgɔ ka la a ra,
o tigi ye ɲɛnnɛnmanya banberi sɔrɔ.
16 Sabu Ala naan dunuɲanmɔgɔy kanunnan hali fo a Denɲɛ kelenpe,
a naan o dira ka a kɛ saraka ye,
beisa ni mɔgɔ o mɔgɔ ka la o ra,
o tigi kanan halaki,
ŋa o tigi ye ɲɛnnɛnmanya banberi sɔrɔ.
17 Ala Denɲɛ,
Ala man o ce dunuɲan Kɔnɔn ka nan kiti bien mɔgɔy ka,
ŋa a naan a cera le,
beisa dunuɲanmɔgɔy ye kisi a baraka rɔ.
18 «Ni mɔgɔ min ka la a ra,
Ala tɛnan kiti bien o tigi ka;
ŋa ni mɔgɔ min man la a ra,
kiti baa bien o tigi ka ka ban,
sabu Ala Denɲɛ kelenpe,
a man la o ra.
19 O kiti kun le ni:
Ala ya yeelen nanni dunuɲan Kɔnɔn,
ŋa dibi jiyani mɔgɔy ye ka timi yeelen ka,
bawu àyi kɛwaleny y'a jugu.
20 Sabu mɔgɔ o mɔgɔ ye kojugu kɛra,
o ye yeelen kɔninɲannan;
a tɛ sɔn ka bɔ kɛnɛn ka fanan,
sabu a ye sirannan ko mɔgɔy kanan nan bɔ a ya kɛwalenjuguy kara man.
21 Ŋa mɔgɔ min ye ciɛn ka,
o tigi ye a ya koy kɛra kɛnɛn ka,
beisa bɛɛ ye a ye ka a lɔn ko a ye tagamannan Ala ya sira le ka.»
Yesu ni Yahaya
22 O koy kɔ fɛ Yesu ni a ya karanmɔgɔdeny bɔni dugu kɔnɔn ka nan to Zude mara rɔ;
a toni ni àyi ye ka wagati daman kɛ,
ka to ka mɔgɔy batize.
23 Yahaya fanan tɛɛ mɔgɔy batizera Enɔn,
Salimu kɛrɛ fɛ;
sabu ji shiaman tɛɛ o yɔrɔ rɔ;
mɔgɔy tɛɛ nanra a fɛ ka nan i batize.
24 O ye a sɔrɔ Yahaya tun man bla kaso ra fɔnɔn.
25 Ayiwa sɔsɔyali dɔ nanni wirira Yahaya ya karanmɔgɔdeny ani Yaudiya dɔ cɛ seninɲanli ta ko rɔ.
26 Yahaya ya karanmɔgɔdeny wani a fɔra Yahaya ɲɛnnɛn ko:
«An Karanmɔgɔ,
i ni cɛ min tɛɛ ɲɔnŋɔn boro Zuridɛn ba kɔ fɛ,
i nɔn tɛɛ seereya kɛra min ya ko rɔ,
a flɛ,
a ye mɔgɔy batizera sisani;
mɔgɔ bɛɛ fanan ye ka wa ale le kɔ.»
27 Yahaya naan àyi jabira ko:
«Ni Ala man fen min di mɔgɔ man,
a tɛ se ka o sɔrɔ.»
28 Alugu yɛrɛ ye ni seere ye ko ni naan a fɔra ayi ɲɛnnɛn ko:
«Ala naan Masiya min layeri tara,
ni tɛ o ye.
Ala naan ni cera ka nan a ɲɛn le drɔn.»
29 Kɔnɲɔncɛ ta le kɔnɲɔnmuso ye.
Kɔnɲɔncɛ tericɛ kɔni lɔni a kɔrɔ;
ni a ka kɔnɲɔncɛ kumankan miɛn,
a bɛ sawa kosɔbɛ kɔnɲɔncɛ kumankan kɔsɔn.
Ni ta sawa ye o ɲɔnŋɔn le ye;
o sawa fanan baa dafa.
30 Ale ka kan ka boɲan,
ni ka kan ka dɔgɔya.
31 «Sabu min bɔnni sanŋolo rɔ,
o le ye bɛɛ kunnan;
ŋa min sɔrɔni dunuɲan Kɔnɔn ya,
o ye dunuɲan ta le ye,
a fanan bɛ kuman ka kaɲan ni dunuɲan ta cogo le ye.
Ŋa min bɔnni sanŋolo rɔ o ye bɛɛ kunnan.
32 A naan min yera ani a naan min miɛnnan,
a ye o le fɔra,
ŋa mɔgɔ si fanan tɛ sɔnnan a ya seereya man.
33 Ni mɔgɔ min ka sɔn a ya seereya man,
o tigi baa a yira ka a gbɛ ko Ala naan min fɔra,
ko o le ciɛn ye.
34 Ala naan min cera,
o le Ala ya Kuman fɔra mɔgɔy ɲɛnnɛn,
sabu Ala ye Nin Seninman dira a man hakɛya min nan,
dan tɛ o ra.
35 Fa ye a Denɲɛ kanunnan,
o le kɔsɔn a naan fen bɛɛ sebagaya dira a man.
36 Ni mɔgɔ min ka la Denɲɛ ra,
o tigi bɛnan ɲɛnnɛnmanya banberi sɔrɔ;
ŋa ni mɔgɔ min ka i ban Denɲɛ rɔ,
o tigi tɛnan o ɲɛnnɛnmanya sɔrɔ,
ŋa Ala ya dimi ye o tigi ka.»