Yuana 2

Kɔnɲɔnya min kɛni Kanan

1 Ayiwa tere fla timini kɔ, kɔnɲɔnya dɔ tɛɛ ka kɛ Kanan, Galile mara rɔ. Yesu bamuso tɛɛ ye. 2 Àyi nɔn tɛɛ Yesu ni a ya karanmɔgɔdeny fanan welera ka wa o kɔnɲɔnya rɔ.

3 Ayiwa ka àyi to ɲɛnɛngbɛra, duvɛn nanni dɛsɛra. Yesu bamuso naan a fɔra a ɲɛnnɛn ko: «Àyi ya duvɛn baa dɛsɛ.» 4 Yesu naan a fɔra a bamuso man ko: «Muso, mɛnɛn ye ile ni ni cɛ o koŋan rɔ? Ni ya wagati man se ba.»

5 Ayiwa, a bamuso naan a fɔra bagaradeny man ko: «Ni a ka fen o fen fɔ ayi ɲɛnnɛn, ayi ye o kɛ.»

6 O ye a sɔrɔ Yaudiyay ya kabakurudaga wɔɔrɔ tɛɛ ye. Yaudiyay tɛɛ àyi yɛrɛ seninɲanra ni o dagay ji le ye ka kaɲan ni àyi ya lada ye. Ji litiri biseɲi walaman kɛmɛn ni muŋan tɛɛ sera ka do o kabakurudagay bɛɛ kelenŋ kelenŋ kɔnɔn. 7 Ayiwa Yesu ko bagaradeny man ko: «Ayi ye min dagay bɛɛ lafa ni ji ye.» Bagaradeny naan olugu bɛɛ lafara fo ka se àyi kan kɔrɔ. 8 O kɔ, a ko bagaradeny man ko: «Ayi ye a bi sisani ka wa a di dogoniko ɲananbɔbaga man.» Àyi naan a bira ka wa a di.

9 Ayiwa, ji yɛlɛmanni ka kɛ duvɛn ye; dogoniko ɲananbɔbaga naan o nɛnnɛnra. Ale tun man o rɛzɛn ji bɔyɔrɔ lɔn, ŋa bagaradeny kɔni tɛɛ a bɔyɔrɔ lɔn. Dogoniko ɲananbɔbaga naan kɔnɲɔncɛ welera, 10 ka nan a fɔ a man ko: «Mɔgɔ bɛɛ ye duvɛn duman le dira mɔgɔy man fɔnɔn, ni àyi ka o mi shiaman tuman min nan, min man di kosɔbɛ, àyi do sɔrɔ ka o di àyi man. Ŋa ile do naan rɛzɛn ji duman le tora kɔ fɛ!»

11 Ayiwa o le kɛni Yesu ya tɔgɔmansere fɔlɔ ye. O kɛni Kanan, Galile mara rɔ. A naan a ya sebagaya yirara a ya karanmɔgɔdeny ra o ɲan le man; olugu lani a ra.

12 O kɔ, Yesu wani Kapɛrinaumu, ani a bamuso, ani a badenmany, ani a ya karanmɔgɔdeny. Àyi naan tere daman kɛra ye.

Ferekɛbagay gbɛnni Yesu boro ka bɔ Alabatosoba kɔnɔn

13 Ayiwa Yaudiyay ya Jɔnɲanban ɲɛnɛngbɛ tun baa surunɲan. Yesu wani Zeruzalɛmu. 14 Yesu naan mɔgɔ dɔy sɔrɔra Alabatosoba lu kɔnɔn, olugu tɛɛ ka misiy ani sagay ani jɛnɛtuganniy fere; werifelibagay fanan tɛɛ ye. 15 Yesu naan jurukisɛ dɔ kɛra bisan ye ka àyi bɛɛ gbɛn ka bɔ Alabatosoba lu kɔnɔn, ani àyi ya misiy ni àyi ya sagay bɛɛ. A naan werifelibagay ya weriy bɛɛ jɛnzɛnnan, ka àyi ya tabeliy ɲɔnniɲɔnni ka àyi la bienbien. 16 O kɔ, a naan a fɔra jɛnɛtuganni ferebagay man ko: «Ayi ye fen miny ta ka bɔ ya; ayi kanan ni Fa ya bon kɛ jagokɛyɔrɔ ye.» 17 Yesu naan o kɛra minŋɛ, a ya karanmɔgɔdeny hakiri jigini ko a sɛbɛni kitabu kɔnɔn ko:

«I ya so ta ko kereya hami ye ni jeninan n'jusukun nan yomi tasuman.»

18 Ayiwa Yaudiyay ya ɲɛnmɔgɔy naan Yesu ɲininŋara ko: «I bɛ se ka tɔgɔmansere jeni le kɛ ka a yira an nan ko jo ye i fɛ ka min koy kɛ?» 19 Yesu naan àyi jabira ko: «Ayi ye Alabatosoba min ci; ni bɛnan a lɔ kokura kɛ tere saba kɔnɔn.» 20 Yaudiyay ko: «Han! Àyi naan sanji binaanni ni wɔɔrɔ le kɛra min Alabatosoba lɔli ra, ile bɛnan o lɔ kokura kɛ tere saba kɔnɔn wa?»

21 Ŋa Yesu tɛɛ ka kuman Alabatosoba min ko rɔ, o tɛɛ a yɛrɛ ferisogo le ye. 22 Ayiwa Yesu nanni kununan minŋɛ ka bɔ saya rɔ, a ya karanmɔgɔdeny hakiri jigini a ra ko Yesu nɔn tɛɛ o fɔra. Àyi lani sɛbɛli ni a ya Kuman ra.

Yesu man la mɔgɔ dɔy ya lananya ra

23 Ayiwa ka Yesu to Zeruzalɛmu, Jɔnɲanban ɲɛnɛngbɛ ra, mɔgɔ shiaman lani a ra a ya tɔgɔmansere kɛniy kɔsɔn. 24 Ŋa Yesu tun man la àyi ra, sabu a tɛɛ àyi bɛɛ jusukun lɔn. 25 A manko tun tɛ a ra fanan ko mɔgɔ dɔ ye nan kɛ dɔ ya koɲany seere ye ale ɲɛnnɛn, sabu adamanden jusukun ye ɲan min man, a ye o lɔn.