YUANA
NAAN YESU YA KIBARO DUMAN MIN SƐBƐRA
Kuman kɛni yeelen ani ɲɛnnɛnmanya ye
1
1 Fɔlɔfɔlɔ ka a sɔrɔ fen si tun man dan fɔnɔn,
min ye welera ko Kuman,
o le tɛɛ ye.
O Kuman ni Ala tɛɛ ɲɔnŋɔn boro,
o Kuman ye Ala le ye.
2 Kabini fɔlɔfɔlɔ o Kuman ni Ala le ɲɔnŋɔn boro.
3 Ala naan fen bɛɛ dannan ale le baraka rɔ.
Fen o fen danni fanan,
o si man dan ale kɔ.
4 Ɲɛnnɛnmanya sɛbɛ tɛɛ sɔrɔra ale le rɔ.
O ɲɛnnɛnmanya le tɛɛ yeelen bɔra mɔgɔy ye.
5 O yeelen ye mɛnɛmɛnɛnnan dibi rɔ,
ŋa dibi man sɔn a man.
6 Wagati dɔ nanni sera,
Ala naan cɛ dɔ kɛra a ya celaden ye,
o cɛ tɔgɔ le tɛɛ ko Yahaya.
7 A nanni ka nan seereya le kɛ,
ka yeelen ko fɔ mɔgɔy ɲɛnnɛn,
beisa a ya kuman sababu ra bɛɛ ye la o yeelen ya ko ra.
8 Ale yɛrɛ tun tɛ yeelen ye,
ŋa a nankun le tɛɛ drɔn ka nan yeelen seereya kɛ mɔgɔy ye.
9 O kɛnɛnyeelen sɔbɛ le nanni dunuɲan kɔnɔn ka nan yeelen bɔ adamandeny bɛɛ ye.
10 Ŋa ciɛn rɔ Kuman tɛɛ dunuɲan Kɔnɔn kakɔrɔ,
sabu ale le baraka rɔ dunuɲan danni.
O bɛɛ ni a ta,
a nanni dunuɲan Kɔnɔn minŋɛ,
mɔgɔy man a lɔn.
11 A nanni a yɛrɛ ya mɔgɔy fɛ,
ŋa a ya mɔgɔy man sɔn a man.
12 Ŋa mɔgɔ miny sɔnni a man,
a naan se dira olugu man ka àyi kɛ Ala deny ye.
13 Olugu man o Aladenɲan sɔrɔ yomi adamanden ye worora ɲan min man,
adamanden sawo tɛ,
mɔgɔ si sawo tɛ,
ŋa Ala yɛrɛ sawo le.
Kuman kɛni adamanden ye
14 Ayiwa o Kuman kɛni adamanden ye.
A nanni i sigira an cɛ man.
Nɛnman ani ciɛn dafani tɛɛ a boro.
An fanan naan a nɔɔrɔya yera.
Fa Ala Denɲɛ kelenpe ya nɔɔrɔya le.
15 Ayiwa Yahaya naan ale ya ko seereya le ladira,
ka i pɛrɛn ka a fɔ mɔgɔy ɲɛnnɛn ko:
«Ni nɔn tɛɛ min ya ko fɔra ko a bɛnan nan ni kɔ fɛ,
ko ŋa a ni ɲɛn,
sabu sani ni ye woro,
ale tɛɛ ye kakɔrɔ,
ale le ni.»
16 Ayiwa,
a naan an bɛɛ wasara a ya nɛnman baraka rɔ,
ka nɛnman an ye lon bɛɛ.
17 Sabu seereya nanni cela Musa le sababu ra,
ŋa nɛnman ani ciɛn,
o nanni Yesu Kirisita le sababu ra.
18 Adamanden si ɲan man la Ala ka ka a ye;
Ala Denɲɛ,
min ye ni Fa Ala ye,
ale le naan Ala lɔnliya dira an man.
Yahaya ya wajibili
19 Ayiwa Yaudiya kuntigiy naan sarakalasebaga dɔy cera Yahaya man,
ani Alabatosoba bagaraden dɔy;
àyi bɔni Zeruzalɛmu ka wa Yahaya ɲininŋa ko:
«Ile ye jenitigi le ye?»
Yahaya naan seereya min dira o le ni.
20 Yahaya naan a fɔra ka a gbɛ àyi ɲɛnnɛn,
a man a dogo;
a ko:
«Masiya min layeri tani ni tɛ o ye.»
21 Àyi naan a ɲininŋara ko:
«O tuman ile ye jenitigi le ye?
Cela Iliyaa wa?»
A ko:
«Ni tɛ Iliya ye.»
Àyi ko tuguni ko:
«Cela min ko fɔni,
ile le wa?»
A ko:
«Ɔn-ɔn.»
22 Àyi ko:
«O tuman ile ye jenitigi le ye?
Dɔ fɔ an ɲɛnnɛn kɛ,
beisa an ye wa o fɔ an cebagay ɲɛnnɛn.
Ile ye i yɛrɛ jatera jenitigi le ye?»
23 Yahaya naan àyi jabira ni cela Ezayi ya kuman le ye.
A ko:
«Pɛrɛnkan min ye bɔra kon kɔnɔn ka a fɔ ko:
‹Ayi ye sira rɔbɛn Mantigi ye,›
Ni le o pɛrɛnkan yeb.»
24 Miny ceni tɛɛ Yahaya man,
olugu tɛɛ Farizi dɔy le ye.
25 Àyi naan a ɲininŋara tuguni ko:
«Ayiwa ni i tɛ Masiya ye,
ni i tɛ Iliya ye,
ni i fanan tɛ Cela ye,
o tuman mɛnɛn kɔsɔn ile ye mɔgɔy batizera?»
26 Yahaya ko:
«Ni kɔni ka ayi batize ni ji drɔn le ye;
ŋa mɔgɔ dɔ gbɛrɛ ye ayi cɛ man,
ayi man o tigi lɔn.
27 Ale bɛnan nan ni kɔ fɛ;
ni man kan ka hali a ya sanbarajuru foni.»
28 Ayiwa o koy bɛɛ kɛni Betani,
Zuridɛn ba kɔ man;
Yahaya tɛɛ mɔgɔy batizera o yɔrɔ le rɔ.
Ala ya Sagaden
29 Ayiwa o dugusɛgbɛ,
Yahaya naan Yesu nantɔ yera ale fɛ;
a ko mɔgɔy man ko:
«Ala ya Sagaden le ni,
min bɛnan dunuɲanmɔgɔy ya jurumun kaferi.
30 Ni nɔn tɛɛ ale le ya ko fɔra ayi ɲɛnnɛn ko mɔgɔ dɔ bɛnan nan ni kɔ fɛ,
ko ŋa a ye ni ɲɛn,
sabu sani ni ye woro,
ale tɛɛ ye kakɔrɔ;
ale le ni.
31 Ni yɛrɛ fanan tun man a lɔn fɔnɔn;
ŋa ni nanni mɔgɔy batizera ji rɔ,
beisa o ye kɛ sababu ye ka a to n'ye a yira Izirayɛlimɔgɔy ra.»
32 Ayiwa Yahaya naan seereya kɛra Yesu ya ko rɔ,
ko:
«Ni naan Nin Seninman jigitɔ yera ka bɔ sanŋolo rɔ yomi jɛnɛtuganni ka nan i sigi a ka.
33 Ni yɛrɛ tun man a lɔn.
Ŋa min naan ni cera ka nan mɔgɔy batize ji rɔ,
ale nɔn tɛɛ a fɔra ni man ko:
‹Ni i ka Nin Seninman jigitɔ ye ka nan i sigi mɔgɔ min ka,
o tigi le bɛnan mɔgɔy batize ni Nin Seninman ye.›
34 Ayiwa ni baa a ye te,
ni fanan baa seereya ladi ko ale le Ala Denɲɛ ye.»
Yesu ya karanmɔgɔden fɔlɔy
35 Ayiwa,
o dugusɛgbɛ,
Yahaya tɛɛ ni a ya karanmɔgɔden fla ye tuguni.
36 A naan Yesu timitɔ yera minŋɛ,
a naan a fɔra ko:
«Ala ya Sagaden le ni.»
37 Karanmɔgɔden fla naan o miɛnnan minŋɛ,
olugu naan i blara Yesu kɔ.
38 Yesu naan a ɲan murura ka àyi ye a yɛrɛ kɔ;
a ko àyi man ko:
«Ayi ye mɛnɛn le kɔ?»
Àyi ko Yesu man ko:
«Rabi,
i ya lu mini?»
Ni a ka fɔ ko Rabi,
o le kɔrɔ le ko Karanmɔgɔ.
39 Yesu ko àyi man ko:
«Ayi ye nan ka nan a flɛ.»
Àyi wani ni a ye ka wa a ya lu ye.
O kɛni wulada wagati le ra.
Àyi toni ni a ye o lon tere tɔ bɛɛ rɔ.
40 Karanmɔgɔden fla miny nɔn tɛɛ Yahaya Ya kuman miɛnnan ka i tugu Yesu kɔ,
olugu rɔ kelenŋ tɔgɔ tɛɛ ko Andere,
Simɔn Piyɛri badenɲɛ le tɛɛ.
41 Andere le kɔnŋɔnni ka wa a badenɲɛ Simɔn fɛ,
ka wa a fɔ a man ko:
«An baa Masiya ye.»
Masiya,
o kɔrɔ le ko Kirisita.
42 Andere wani ni Simɔn ye Yesu fɛ.
Yesu naan Simɔn flɛra,
ka a fɔ ko:
«Ile le Yuana denɲɛ Simɔn ye!
Ŋa i tɔgɔ bɛnan la ko Sefasi.»
Sefasi,
o kɔrɔ le ko Piyɛri,
farakuru.
Filipe ni Natanayɛli ya wele Yesu boro
43 O dugusɛgbɛ Yesu ko ko a bɛnan wa Galile;
a watɔ,
a naan Filipe yera.
A ko Filipe man ko:
«Tugu ni kɔ.»
44 Filipe tɛɛ bɔra Bɛtisayida;
o tɛɛ Andere ani Piyɛri fanan ya dugu le ye.
45 Filipe wani Natanayɛli yera minŋɛ,
a naan a fɔra a man ko:
«Cela Musa nɔn tɛɛ mɔgɔ min ya ko fɔra a ya seereya kitabuy Kɔnɔn,
ani cela tɔy fanan naan min ya ko fɔra,
an baa o ye:
Yesu min ye bɔra Nazarɛti,
ale le,
Yusufu denɲɛ».
46 Natanayɛli ko Filipe man ko:
«Yala fenɲunman bɛ se ka bɔ Nazarɛti wa?»
Filipe ko:
«Ayiwa,
i yɛrɛ ye nan a flɛ sa.»
47 Kabini Yesu naan Natanayɛli nantɔ yera,
a ko:
«Min ye Izirayɛliden yɛrɛworo le ye,
nanbara tɛ min jusu ra.»
48 Natanayɛli ko:
«Ile naan ni lɔnnan cogo di?»
Yesu ko:
«Ka i to torojun kɔrɔ,
sani Filipe ye wa i wele,
ni ɲan tɛɛ i ra ye.»
49 Natanayɛli ko:
«Rabi,
ile le Ala Denɲɛ ye,
ile le Izirayɛli mansacɛ ye.»
50 Yesu ko:
«Ni baa a fɔ i ɲɛnɛn minŋɛ ko ka i to torojun kɔrɔ,
ko ni ɲan tɛɛ i ra,
o drɔn le kɔsɔn i baa la ni ra kɛ.
I bɛnan ko dɔy ye min y'a bon ni min ye.»
51 Yesu ko tuguni ko:
«Ciɛn rɔ,
ni bɛ a fɔ ayi ɲɛnɛn ko lon dɔ ayi bɛnan sanŋolo dayɛlɛnni ye,
ka Ala ya mɛlɛkɛy yɛlɛntɔ ni àyi jigitɔ ye Mɔgɔ Denɲɛ kunnan.»