Yuana i

YUANA

NAAN YESU YA KIBARO DUMAN MIN SƐBƐRA

Kitabu famucogo

Yuana le kɛni min kitabu sɛbɛbaga ye. Yomi ale yɛrɛ tɛɛ ni Yesu ye, a naan fen o fen sɛbɛra, a yɛrɛ ɲan naan o bɛɛ yera.

Kitabu daminan kumany ye Yesu ya Alaya le yirara. Yesu le welera ko Kuman, min tɛɛ ni Ala ye, min tɛɛ Ala ye, ani min kɛni adamanden ye ka nan i sigi an cɛ man (1.14). Yuana ko ko min kitabu sɛbɛkun le beisa an n'ye a lɔn ka la a ra ko Yesu le Kisibaga ye, Ala Denɲɛ, ani beisa o lananya kɔsɔn an n'ye ɲɛnnɛnmanya ɲunman sɔrɔ a tɔgɔ baraka rɔ (20.31).

Yesu naan bagara min kɛra ka a to Galile mara rɔ, Yuana ya kitabu le o lakeninan an ɲɛnnɛn. A ye Yesu ya tɔgɔmanserey lakeninan ka àyi gbungbun ɲɔnŋɔn nan, ani a ya wajibiliy.

Matiyu naan a yirara ko Yesu le Kisibaga ye, Marika naan a yirara ko Yesu le Ala ya bagaraden ye, Luka naan a yirara ko Yesu kɛni Adamanden ye; ŋa Yuana ya kitabu ye a yirara an nan ko Den min bɔni Ala rɔ, ko Yesu le o ye.

Kitabu sɛbɛbaga ye kuman shiaman kɛra ka Yesu suguya yira: A ko ko Yesu le kɛnɛnyeelen ye dunuɲan mɔgɔy man, ani dogonifen min ye ɲɛnnɛnmanya dira, ani ji min ye ɲɛnnɛnmanya dira; Yesu le sagay ya donda ye, ani sagagbɛnbaga ɲunman, ani rɛzɛnjun, ani ciɛn, ani min ye suy lakununan ka ɲɛnnɛnmanya di mɔgɔy man. Kitabu haya belebele kɛni saba ani tan ni wɔɔrɔ (3.16) le ye, min ye Ala ya kanunɲan ani a ya kisili yirara an nan. «Sabu Ala naan dunuɲanmɔgɔy kanunnan hali fo a naan a Denɲɛ kelenpe dira ka a kɛ saraka ye, beisa ni mɔgɔ o mɔgɔ ka la o Den nan, o tigi kanan wa halaki lahara, ŋa o tigi ye ɲɛnnɛnmanya banberi sɔrɔ.»

Kitabu kɔnɔnrɔkoy

Kitabu daminan kumany (1.1-18)

Yahaya Batizelikɛbaga ya karanmɔgɔden fɔlɔy (1.19-51)

Yesu naan a ya bagara daminanra kɛnɛn ka mɔgɔy ɲan kɔrɔ (2-12)

Yesu naan a wako fɔra sanŋolo rɔ (13-17)

Yesu ya tɔɔrɔya ni a ya saya (18-19)

Yesu kununi ka a yɛrɛ yira karanmɔgɔdeny ra (20-21)