Tomwatar ma ralele Yesus nir wewelmpampane
1 Titus, ka mfwalak ber soranyar na iane nema ranremi ma ka rose rlarat safe ma mangfaretar ma mangonbain silayar rfarete. Ma ka rpeang ma rtulung sir na nir karya ngamonar monuk. 2 Ma mfwalak ber sir a nbal ma kete rarikan tomwatar nre rkafre, nempa ka rmarkein ma ralang tomwatar monuk. 3 Fali luryain e kit tmorip a nbal na makrokap dalam ma to talele Ratu. Ma tose tlarat lan ninr mpempeang ma ninr makeus. Tpeang lan ma tose kabain yatkar, ma to tpeang ma tomwatar rlengan kit, ma tmorip e takedan kit. 4 Nempa Ratu ma nfair kit a ne nfatutu Ni dalam ngamone ma Ni ankamis ber kit. 5 I nfair kit e to nsalan nof ninr adat ngamonar nempa lan Ni ankamis motak ber kit. I nal Ni Smwangtany la nfair kit tof ninr salar. Ma Ni Smwangtany a ne ma naflerap dalminrar ma nafbeberi ninr momorip nema tmorip a na momorip beberi. 6 Yesus nin Ray Silai ne nmat lo ma nfair kit nof ninr salar nema Ratu nal Ni Smwangtany ber kit ma kit bise ma tkaryae Ni karyayar tor Ni kuase. 7 I nose farane la nfatutu Ni dalam ngamone ma bise ma tangamon a tbali tor I. Nema kit bise ma talele feti keta tmorip dedesar far ma Ratu nyoding ber kit a ne. 8 Safe ma kfwalak a ne botuan. Yak ktwak desar ma ka muftutu kabanir monuk ye, nema tomwatar ma ralele Ratu ne rtafal ma rose kabain ngamonar fenbotuan. Snyurtar ma kfwalak ye rangafel ma uban ber tomwatar monuk.
9 Titus, ka mlwiak ko mof ngriar ma to ubnir sasaf. Ka mlwiak ko a nbal mof tomwatar ma rpeang lan ma rasaur na empnir nusnir nir dasdalmir. Ma ka mlwiak ko a nbal mof tomwatar ma rabangal a na tetetkar ma luryain e Ratu nal ber Musa fali kabanir monuk a ne to ubnir sasaf. 10 Farlan tomwatar sa nose ma tomwatar ma ralele Yesus rakes rasam sir, ka mswurat i. Ma farlan to ndengar e mswurat i a nbal. Nempa farlan to ndengar a nbal e ka mwalin i mof tomwatar ma ralele Yesus. 11 Ko mufai feti tomwate ma farane natliur Ratu Ni anftutw botunar lo. Ma boloka nafai feti safe ma nose ne sale nempa dedesar ma nose.
Salam penutup
12 Titus, keta kswiduk Artemas nre Tikhikus ber ko. Farlan nof radu ye sa nait ko e ka musnyalik ma mwa mukmat yakw na kote Nikopolis fali kpweang ma kumin iano noak ma nuse to mengarat a fuky. 13 Ka mtwulung Apolos ma Zenas mangafai hukum ne fengamone. Nema noak ma raflolwain rof iano safe safe ma rperlu a na nir mpampane ne dengan ber sir. 14 Ka muftutu nbal tomwatar ma ralele Yesus na yampren Kreta ma dedesar ma rose kabain ngamonar, nema bise ma rtulung tomwatar na nir perluar lerar. Farlan rose farane keta nir momorip a ne ubany ber sir.
15 Titus, wangur ma ror yakw na ye rkirim salam ber ko. Ma mfwalak ber ninr soranyar monuk ma ralele Yesus na iane feti kam mkirim salam ber sir a nbal. Ma weni Yesus ninr Mangnrure nfatutu Ni dalam ngamone ber kmi monuk. Nater ye.
Salam nof yakw,
Paulus.