Snyurtar ber karwar
1 Timoteus, ka mswurat tomwatar ma rmpan kawar ma ralele Ratu ne ma ralang nir bosar, nema tomwatar kete rarikan Ratu ma rtayatak ninr anftutwar. 2a Farlan karwar raktem nir bosar ralele Yesus, ka kete rdaun feti raktem a ralele Yesus mpa to ralang nir bosar a ne. Nempa ka rtafal ma rlangun sir fengafele fali rkarya ber bosar ma ralele Yesus ma sir a nbal e rkamis desar nir bosar a ne.
Snyurtar ber tomwatar ma raftutu anftutw walyetar ma ber tomwatar ma ramkeus doit
6:2b-10
2b Timoteus, ka muftutu ma mswurat kabanir monuk ye ber tomwatar ma ralele Yesus.
3 Tomwatar ketnir raftutu anftutw walyetar ma to feleles nor kit ninr anftutwar. Sir to rlarat anftutw botunar nof Yesus ninr Ray Silai, ma to raftutu tomwatar ma rlarat Ratu Ni mpempeang. 4 Tomwatar ma farane rafdas sir safo to rafai sasaf. Ma rpeang lan ma rabangal na ngriar ma to ubnir. Iane nwayat ma rkafre dedesar, ma to rpeang ma tomwatar rlengan sir, ma nir andaun yatkar ber tomwatar mpa rsoi lamain tomwatar. 5 Tomwatar a ne rkafre dedesar fali nir andaun nfen ber kabain yatkar mpa to rafai feti mpe ma diat. Ma rdaun feti farlan rlarat Ratu e bise ma rabutin nir dotyar ma raoskai.
6 Botuan feti farlan tmorip tlarat Ratu ma trase feti safe ma namin kit a ne dengan e, keta tonri uban silai na ninr momorip. 7 Fali noak ma ramtoran babe kit a na saryamprene ye to ton sasaf, ma keta tmat e to ton sasaf a nbal. 8 Mpa farlan ninr tnyamar ma rabtyar, iane dengan lo. 9 Nempa merawe desar ber tomwatar ma rpeang ma raoskai ne, rfuf far sale dalam fali nir makeus nkete sir. Ma nir makeus ma to uban sasaf a ne nose ma keta rayatak. 10 Fali farlan tomwatar ramkeus doit keta rose kabain yatkar yadin. Ma ni botuan e tomwatar ketnir ratliur Yesus lo fali ramkeus doit mpa rose suse rbali sir.
Paulus ni snyurat terakhir ber Timoteus
11 Nempa Timoteus ko, Ratu Ni tomwate ber ko mpa ka mlwiak ko mof kabain yatkar monuk a ne. Ka mureke ma mumlonr na nim momorip, ka mlwarat Ratu Ni mpempeang, ka dedesar ma mulele Ratu, ma ka mkwamis tomwatar. Ma boloka mkwoman suse ka mubare motak, ma ka mwarkein a nbal ber tomwatar. 12 Ma ka mureke nbal ma mulele botuan Yesus nema mworip dedesar mor Ratu. Ka mose farane farlan tomwatar ma rlarat pertandingan ma rareke ma rmenang. Fali Ratu nfil ko lo ma mworip mor I noak ma myoding na tomwat ngayadin sonir lury feti ko mulele Yesus nin Ray Silai. 13 Timoteus, yak ktwak desar na Ratu ma Yesus ninr Ray Silai sonir lury ma ka mose kabar ye. Ratu ye ma nal momorip ber safe safe monuk, ma Yesus ninr Ray Silai ye ma nbaran ma nfalak safe ma botuan na Pontius Pilatus souny lury. 14 Ka mose mlwarat monuk faretar ye fengamone nema tomwatar to bise ma rfasale ko. Ma ka mose farane terik ma Yesus kit ninr Ray Silai nma nbali saryamprene. 15 Lan Ratu ma ntetak ni tewat ma Yesus nma. Mangkuase ye lan lese iane Ratu ma tomwatar rdangin I. Fali I ye Rai ber rayar monuk, ma Nrue ber nruar monuk. 16 Lan koko I ma nmorip dedesar fali mamate to bise ma nkuase I. Ma I namin ain ma idak resi, nwayat ma tomwatar to bise rlosir I. To tomwate fen lese ma nsalan I a fuky fali ni botuan e tomwatar to bise ma rsalan I. Ma ka weni tomwatar ralang I ma nfarete dedesar! Amen.
17 Timoteus, ka mswurat tomwatar ma raoskai na saryamprene ye, ma kete rafdas sir. Ma kete ralele nir kabain saryamprenar ma keta rlai ne. Nempa ka ralele Ratu ma dalam ngamone ma nal safe-safe monuk ber kit la tmorip tor senange. 18 Mfwalak ber sir ma ka dedesar ma rose kabain ngamonar. Ma ka dalmir ngamone ma ral safe-safe la rtulung tomwatar. 19 Farlan rose farane, iane farlan ma rabutin nir anoskai ngamonar na surga ma keta to nlai. Ma na ler famudi e keta ronri momorip ma Ratu nyoding a ne iane momorip dedesar.
20 Timoteus, Ratu nfil ko lo ma mufwibar ibar botuan na Yesus mpa ka mujake fengamone safe ma Ratu nal ber ko a ne. Ma ka mlwiak ko mof tomwatar ma rpeang lan ma rfalak kabanir ma to ubnir sasaf ma rbangal Ratu. Ma ka mlwiak ko a nbal mof tomwatar ma rabangal na nir andanwar a ne. Sir rfalak feti iane anftutw botunar safo tate. 21 Ma tomwatar ketnir ryoding nir andanwar a ne nwayat ma to ralele Yesus ninr Ray Silai lo.
Yak ktwak ma weni Yesus ninr Ray Silai nfatutu Ni dalam ngamone ber kmi monuk. Nater ye.
Salam nof yakw,
Paulus.