Paulus nsurat Timotius ma nkarya fen ngamone ber Ratu
4:1-8
1 Timotius!
Kit tafai feti Yesus ninr Ray Silai keta nma nbali saryamprene ma nfil a nkese sir ma rlangun I nof sir ma to rlangun I.
Ma keta nbali I a nma ma neluk Rai ma nfarete tomwatar monuk na saryamprene.
Ratu ma Yesus ninr Ray Silai rafai safe ma kit tose ne mpa ktwak desar kof ko:
2 Ka dedesar ma mufwibar Ibar Ngamone ber tomwatar,
boloka rlangun nre to rlangun.
Farlan tomwatar rose salar ka mfwalak nir salar a ne,
ma ka mswabar dedesar ma mswurat sir ma muftutu sir.
3 Fali keta ni tewat e,
tomwatar to rmpeang ma rlangun Ratu Ni anftutw botunar lo.
Ma keta ranriak tuanggurwar ma raftutu sir ror kabanir la rafsenange dalmir nema sir rose rlarat nir mpempeang motak.
4 Keta repat tlingnir rof anftutw botunar ma rmpeang lan ma rdengar ansaur lepuskwar.
5 Nempa ka mfwenai dedesar ma mujake ko na safe-safe motak.
Ma farlan mkwoman suse e,
mubare motak,
lan feti dedesar ma mufwibar Ibar Ngamone,
ma mkwaryae monuk karyayar ma Ratu nal ber ko a ne fen ngamone.
6 Yakw kfwalak farye ber ko fali ningw karyayar ber Ratu ketla omp,
ma to dodo a nbal e,
kmwat lo.
Mpa farlan kmwat e,
iane neluk snyompe ber Ratu.
7 Yakw kwarya ma kmwat a klwai desar ber Ratu ma ksworu kabanir monuk ma Ratu nal ber yakw ne.
Ma dedesar ma kulele Yesus ninr Ray Silai Ni anftutw botunar a ne.
8 Ma lere ye,
I nau sewe ber yakw lo fali na ningw momorip e,
kose klwarat Ratu Ni mpempeang.
Ma keta Yesus nal sewe ne ber yakw noak ma nma nbali saryamprene ma ntetak tomwatar nir ngriar nor malonri.
Ma keta to lan yakw ma konri sewe ne nempa tomwatar monuk ma dedesar ma rnengar Ni mamae.
Paulus ntak Timotius ma nma ma nakmat i
4:9-18
9 Timotius ka musnyalik ma mwa ma mukmat yakw.
10 Fali Demas nti a ntate yakw lo.
I ndaun lan kabain saryamprenar ma nti Tesalonika.
Kreskes nti Galatia lo,
ma Titus nti Dalmatia.*
11 Lan Lukas ma nor yakw.
Ka mtwi e,
mal Markus ma midu a mya,
fali i ntulung desar yakw na Ratu Ni karyayar ma kwaryae ye.*
12 Yakw klwuan Tikhikus ma nti kote Efesus lo.*
13 Ma farlan mwa e,
mtwi Karpus ni das na kote Troas a ne ma mwal ningw rabit melawas.
Ma ka monr a mbwal ningw bukwar ma nlengan e,
bukwar ma rose rof mpimpi kultir a ne.*
14 Ma Aleksander mangkarya tembaga ne nose kabain yatkar yadin ber yakw lo mpa keta Ratu nbalas i nlarat safe ma nose ne.*
15 Ka mujake ko fen ngamone mof i,
fali i nbangal desar safe ma taftutu.
16 Noak ma betno rsidang yakw luryain e,
tomwatar monuk rti a rtate yakw ma to fen lese ma nafdiat yakw.
Nempa ktwak ma weni Ratu nkes kalin nir salar.
17 Boloka farane Yesus ninr Mangnrure najake yakw ma nafkoran yakw mpa boangw kal ma kufwibar monuk Ratu Ni ngribatnir nema tomwatar ma to Yahudi sir a ne rdengar a nbal.
Ma nalin yakw nbal nof tomwatar ma rose ma rfen yakw.
18 Ma kufai feti ninr Mangnrure keta nalin yakw nof tomwatar ma rmpeang ma rose yatak yakw,
ma keta nor yakw far ain ma Ratu namin.
Ka weni tomwatar rdangin ma ralang I dedesar!
Amen.
Salam
4:19-22
19 Timotius,
mfwalak ningw salam ber Priskila,
Akwila ma ber Onesiforus ni dasdalam.*
20 Erastus e,
namin kote Korintus,
ma Trofimus e,
knwau i a na kote Miletus fali nafanas.*
21 Ma ka mureke ma mwa noak ma nuse to mengarat a fuky.
Salam ber ko nof Ebulus,
Pudes,
Linus,
Klaudia,
ma soranyar monuk.
22 Ka weni Yesus ninr Mangnrure nor ko ma nfatutu Ni dalamy ngamone ber kmi monuk.
Nater lan ye.
Salam nof yakw,
Paulus.