Ratu nafbweberi ninr momorip
2:1-10
1 Wangur,
noak ma to milele Yesus ninr Ray Silai fuky e,
kmi farlan tomwatar ma rmat lo.
Kmi farlan tomwatar ma rmat fali kmi to mlyarat Ratu Ni faretar ma dedesar ma myose salar.
2 Noak a ne kmi myorip farlan tomwatar na saryamprene ma to ralele Yesus.
Kmi myorip farane fali mlyarat smwangat yatkar nir ulun ma nkuase smwangat yatkar na langit.
Smwangat yatkar nir ulun ye nbal ma nfarete tomwatar ma to rlarat Ratu.
3 Luryain e,
kit monuk ye tmorip tbalak sir ma to rlarat Ratu,
fali tose lan kabain yatkar,
tlarat ninr makeus ma ninr andaun yatkar.
Mpa ni botuan e,
ka Ratu nukun kit farlan ma nukun tomwat yatkar.
4 Nempa Ratu to nose farane fali Ni lolompang silai ma nkamis resi kit.
5 Mpa boloka kit farlan tomwatar ma rmat lo fali tose salar,
nempa Ratu nafmorip a nbali kit tor Yesus ninr Ray Silai,
iane feti nal momorip beberi ber kit.
Ma Ni dalamy ngamone ber kit mpa nalin kit nof ninr salar ma to nukun kit.
6 Ma dalminrar lese tor Yesus ninr Ray Silai lo,
mpa lere ye Ratu nafmorip a nbali kit,
ma taktem ninr Ray Silai tfarete na surga.
7 Ratu nose farane nema na are ma nma ye tomwatar monuk bise ma rsalan Ni dalamy ngamone ma nlie nlengan a ne.
Ma I nfatutu Ni dalamy ngamone ber kit fali dalminrar lese tor Yesus ninr Ray Silai lo.
8 Ratu nfair a kmi nof mir salar fali Ni dalamy ngamone,
ma fali milele Yesus ninr Ray Silai.
I nfair a kmi to nof safe ma kmi myose nempa koko I a nmpeang ma nfair a kmi.
9 Mpa ka kete tomwate fen lese ma nafdas i fali Ratu nfair tomwate to nof kabain ngamonar ma i nose.
10 Ratu ye ma nose kit,
ma nafbweberi nbali ninr momorip fali dalminrar lese tor Yesus ninr Ray Silai,
nema karya ngamonar ma Ratu nau ber kit nof luryain a ne kit tose dedesar na ninr momorip.
Dalminrar lese fali Yesus ninr Ray Silai nose ma tangamon a tbali
2:11-22
11 Wangur kmi ye ma to myof dasdalam Yahudi,
ka minremi mir momorip luryain a ne.
Noak a ne tomwat Yahudyar rfalak feti kmi ye ma to rsunat a kmi.
Ma rdaun feti lan sir ma rsunat sir.
Safo sunat ye ma tomwatar rose la rfaniak tenir.
12 Ma noak a ne to dalmir lese myor Yesus ninr Ray Silai fuky.
Kmi to myeluk Ratu Ni tomwatar fali Ratu to nfil a kmi farlan tomwat Yahudyar,
mpa rdaun feti tomwat mangum a kmi.
Ma to myonri safe ma luryain e,
Ratu nyoding ber Ni tomwatar.
Ma kmi to mifai Ratu mpa to bise ma milele feti keta nal kabain ngamonar ber a kmi na saryamprene ye.
13 Nempa lere ye kmi to myorip farane lo fali dalmir lese myor Yesus ninr Ray Silai.
Luryain e,
kmi dodo myof Ratu nempa lere ye mlyosir I fali Yesus ninr Ray Silai nmat lo ma darany a ntarbui na katutun sangwalu la ntebus kmi.
14-15 Luryain e,
Yahudyar nir yayatrwar ma faretar a ne rose ma takedan kit farlan tembok ma nakese kit.
Noak ma Yesus nanrenre I ma nmat na katutun sangwalu,
I nsose tembok a ne ma nose ma Yahudyar kam,
ma kmi ma to Yahudi kmi tangamon a tbali.
I nose farane nema teluk tomwat beberyar ma dalminrar lese tor I.
16 Yesus ninr Ray Silai nmat na katutun sangwalu nose ma nusar du ma rakedan sir a ne,
rfat ma lese ma rangamon a rbali ror Ratu.
17 Yesus ninr Ray Silai nma ma nafwibar Ibar Ngamone nema tangamon a tbali tor Ratu.
Ma I nafwibar ibar a ne ber kmi ma to Yahudi kmi ma dodo myof Ratu,
ma ber Yahudyar kam ma mlosir Ratu nbal.
18 Ma fali kit monuk dalminrar lese tor Yesus ninr Ray Silai lo,
mpa bise ma takmat Amninrar Ratu fali Ratu Smwangtany ntulung kit.
19 Iane nwayat ma kmi ma to Yahudi kmi a ne to myeluk tomwat mangum lo,
fali lere ye myeluk Ratu Ni tomwatar ma miktem Ratu dasdalam lese.
20 Wangur,
farlan tomwatar rafdiri das,
luryain e,
sir ral baty fakoran la rose fanderen nema das a ne namkoran.
Kit ma talele Yesus ye farlan das ma Ratu nafdiri.
Ratu Ni mangsidkwar ma nabyar e,
reluk fanderen,
ma Yesus ninr Ray Silai ye neluk baty fakoran.
21 Ma kmi monuk ma dalmir lese myor Yesus ninr Ray Silai ne farlan dasbanir ma tomwatar rasusan ma nangafel na baty fakoran das.
Keta das a ne silai ma namkoran ma neluk ain lelerap ber Ratu.
22 Ma keta I nose nbal ma miktem tomwat walyetar ma ralele Yesus ne myeluk Ratu Ni Das Silai,
fali dalmir lese myor Yesus ninr Ray Silai.
Das a ne ma keta Ratu Smwangtany namin a ne.