Petrus nafngamone mangamlukut
3:1-10
1 Na ler sa e,
Petrus ma Yohanes rti Ratu Ni Das Silai.
Sir rti e,
ketla nait ma tomwat Yahudyar a rsampayang na jam tiga ler dae.
2 Na Ratu Ni Das Silai ni latyompur ni finru matan,
rnau merwan mangamlukut.
Finru matan a ne rtar feti Finru Matan Ngafele.
Tomwate ne namlukut nof ni talengankire.
Lerar monuk e,
ror i ma rnau i a nane nema ka ntak dotyar nof tomwatar ma rti Ratu Ni Das Silai.
3 Noak ma nsalan Petrus radu Yohanes rti Ratu Ni Das Silai ni latyompur e,
i ntak doit nof sir.
4 Ne rfon i,
ma Petrus a nfalak,
“Mswalan kam.”
5 Ne nfon sir,
ma nalele feti keta ral kabanir sa ber i.
6 Nempa Petrus a nfalak,
“To ningw doit.
Nempa safe ma namin yakw la kal ber ko.
Kor Yesus ninr Ray Silai tomwat Nasaret a ne Ni kuase,
kfwalak,
mumdir ma mpwan lo!”
7 Ne Petrus nomat limany fian ma ntulung ma namdir.
Ntabw nof a ne emnir rmakoran desar.
8 Ne metryat e namdir ma naputuk,
ma mpane mponi i.
Mpene nmpan a nlarat sir far Ratu Ni Das Silai ni latyompur ma naputuk mpane ma ndangin Ratu.
9 Tomwatar monuk rsalan ma i nmpan ma ndangin Ratu,
10 mpe rafai ral desar feti tomwate ye ma biase namtoran a na Ratu Ni Das Silai Ni Finru Matan Ngafele ma natak.
Mpa rampriang desar ma rsalan safe diat tomwate ne.
Petrus nafwibar Ratu Ni ngribatnir na Ratu Ni Das Silai
3:11-26
11 Ne tomwate ne nomat Petrus ma Yohanes ma nlarat dedesar sir.
Mpa tomwatar monuk ma rampriang a ne rti rkolu sir na siflyoi ma rtar feti Siflyoi Salomo.
12 Petrus nfon tomwatar a ne,
ma nfalak,
“Hei tomwat Israelar,
safe ma mimpriang ngrie ye ma mfyon dedesar kam farane?
Mifliak feti tomwate ye nmpan fali mamy kuase e,
nre dedesar ma mlarat Ratu e?
13 Mdyengar fen ngamone,
Ratu ye ma empninrar nusninrar Abraham,
Ishak ma Yakub rsatngur ber I.
I ye ma nafdas Ni mangkaryae,
Yesus.
Yesus ye ma minrenre I ber mangfaretar ma Pilatus.
Pilatus ntetak ma ntate I nempa miliu I.*
14 Yesus ye tomwat ngamone ma namlonry nempa kmi mimsoal I.
Ma mryibut ma ntate mangafene ber a kmi.*
15 Ne kmi mfyen I safo nal momorip dedesar.
Nempa Ratu nafmorip a nbali I nof mangmwatar;
kam mfalak farye fali kam ye ma koko kam a msalan ngrie ne.
16 Kmi mifai monuk tomwate ye ma koko kmi msyalan safe diat i.
Fali nalele Yesus mpa namkoran.
Ma Yesus Ni kuase ma nafngamone i.
17 Soranyar mir kateman!
Yakw kufai feti kmi a ma mir mangfaretar myose farane,
fali to mifai safe ma myose ne.
18 Iane Ratu nafdiat safe ma nafbotin ber nabi luryanir feti,
Ray Silai ma nsiduk I ye ka nkoman suse.
19 Mpa mfyenai ma mtyate mir salar,
nema Ratu nlure mir salar.
20 Nema ni tewat e,
Ratu nose ma msyenang ma nsiduk Yesus ber a kmi fali nfil I ma neluk Ray Silai ber a kmi.
21 Ray Silai ne ka namin surga terik ma Ratu nafbweberi saryamprene,
farlan ma nfalak ber Ni nabi lelerpar na arar luryain a ne.
22 Musa nfalak lo:
Mir Ratu ma neluk mir Mangnrure ma msyatngur ber I a ne keta nfil nabyar sa nof mir nuse farlan yakw.
Mpa ka mlyarat safe-safe monuk ma I nfalak a ne.*
23 Ise ma to ndengar safe ma nabi ne nfalak,
keta nmat ma to neluk Ratu Ni tomwatar.*
24 Nabi luryanir ma rafbotin Ratu Ni ngribatnir,
ntabw nof nabi Samuel terik nabi famudyar,
sir rafbotin kabanir monuk lo ma keta rbotin na are ye.
25 Safe ma Ratu nyoding ber nabyar,
kmi myonri lo.
Ratu nfalak ber nusmir Abraham feti:
Nof nim dasdalam keta kbwerkat nusar monuk na saryamprene.*
26 Iane nwayat ma Ratu nfil Ni mangkaryae,
betno nsiduk I ma nbalun ma nakmat a kmi nema nberkat a kmi.
Berkat ne nose ma mtyate mir adat yatkar.”