Tomwatar ma ralele Yesus rfen ber Ratu Smwangtany
2:1-13
1 Noak ma ler silai Pentakostaa e,
tomwatar monuk ma ralele Yesus rafburat sir a na ain lese.*
2 Metryat e,
rdengar mnaur uman esan nof langit a nma ma nafen das ma ramin a ne.
3 Ma rsalan au nfolur farlan keryar ma ntompur a na mpane sir.
Au farlan keryar ma rtompur a na mpane sir (2:3)
4 Mpe sir rfen ber Ratu Smwangtany,
ma ratanuk ror liliry walyetar farlan ma Ratu Smwangtany nal ber sir.
5 Noak a ne tomwat Yahudyar ma rlarat dedesar Ratu rof nusar monuk rma ma ramin Yerusalem.
6 Noak ma rdengar ese ne,
tomwatar yadin rti rkolu ain a ne.
Sir rmetkyau fali rdengar ma tomwatar ma ralele Yesus ne ratanuk e,
ral nir liliryar mpane.
7 Mpa rampriang desar ma rfalak,
“Sir ma ratanuk ye tomwat Galilear nre?
8 Safema sir bise ratanuk ror ninr liliryar mpane ye?
9 Kit ye tof nus Partia,
Media,
Elam,
Mesopotamia,
Yudea ma Kapadokia,
Pontus ma Asia.
10 Ma Frigia,
Pamfilia,
Mesir ma yampren Libia nlosir Kirene;
ketnir a nbal e,
tof Roma.
11 Ketnir e,
tomwat Yahudyar ma tomwatar rof nus walyetar ma rpafe agame Yahudi;
ketnir a nbal rma rof Kreta ma Arab.
Kit tdengar monuk ma ratanuk ror ninr liliryar mpane na kabain silayar ma Ratu nose ne!”
12 Sir monuk a ne rmetkyau ma to rafai feti rose safe mpa raenrat sir,
“Safema farye?”
13 Nempa ketnir e,
rkosy sir ma rfalak,
“Tuak silai mpa ranabuk lo!”
Petrus nafwibar Ibar Ngamone ber tomwat ngayadin
2:14-42
14 Mpene Petrus namdir nor mangsidkwar buti resin lese ne,
betno nafwayak ma nfalak,
“Hei,
tomwat Yahudyar a kmi ma tomwatar monuk ma mimin Yerusalem,
mdyengar fen ngamone safe ma kfwalak ye.
15 Sir ye to ranabuk far ma mfyalak a ne,
fali betno bobolisin jam sembilan ye,b
16 nempa safe ma kmi msyalan ye,
Ratu nafbotin ber nabi Yoel lo.
17 Ratu nfalak farye,
‘Keta ler famudi e,
ktwolar Smwangtangw ber tomwatar monuk,
nema angkimir merwanar ma batar bise rafbotin Ningw snyurat.
Ma ber tabweri batdare keta ratrufe kabanir.
Ma ber makene batmakene keta rmefi kabanir.*
18 Ma ber Ningw kawar bate ma merwane,
keta ktwolar Smwangtangw ber sir na lerar ne ma rafbotin snyurat nof Yakw.
19 Ma keta kose kabain mpasalnar na langit ma fanikar na saryamprene far dare ma au numur masu silai.
20 Ma keta to nait ler silai ma Ratu nfatutu Ni kuase fuky e,
lere makrokap ma bulan namemeye farlan dare.
21 Na lere tomwatar ma rtak tulung rof Mangnrur Silai keta nfair sir.’
22 Hei,
tomwat Israelar!
Mdyengar ma kfwalak:
Yesus nof Nasaret a ne ma Ratu nfil I ber a kmi.
Kmi mifai feti Ratu nal kuase ber I ma nose kabain mpasalnar ma fanikar na twalelenmir la nfatnyot feti I nma nof Ratu.
23 Ratu ntetak lo feti keta nal Yesus ber a kmi fali iane Ni rerengyar nof luryain,
ma nafai nbal feti keta minrenre I ber tomwatar ma to rlarat Ratu ma rsangwalu ma rfen I.*
24 Nempa Ratu nafmorip a nbali I ma nalin I nof ni suse na kubur dalam fali mamate to bise ma nkuase I.*
25 Luryain e,
Daud narengi lo feti keta Yesus nfalak,
‘Yakw kswalan Mangnrur Silai dedesar ma namin soungwlury,
ma to dalangw suse na safe safe fali I nor yakw.*
26 Iane nwayat ma dalangw nsenang resi ma dedesar ma kdwangin Ratu,
ma kulele feti keta kswanary yakw na kubur dalam kor maline.
27 Ma Ko to mwinrang ma tomwat malonri yakw kumin mangmwat anir.
Ma to mwinrang a nbal ma tenangw ye mpusuk fali yakw kwarya ber lan Ko.
28 Ko mfwatutu dalamtene ber yakw ma kulyole nema bise kmworip.
Ma keta kswenang resi fali Ko mor yakw.’
29 Soranyar mir kateman,
safe ma kfwalak na amninrar Daud ye mifai lo.
I nmat ma rafonak i ma ni kubur a ne lolone namin terik lere ye.
30 Nempa Daud ye,
nabyar sa i.
Ma nafai Ratu Ni yoyoding ber i feti keta nfil tomwatar sa nof ni dasdalam ma neluk rai ma nlikur i.*
31 I nafai nbal safe ma Ratu keta nose.
Mpa nafbotin ber tomwatar feti Ray Silai keta nmorip a nbali.
Daud nfalak feti:
‘Ratu keta to ninrang ma I namin mangmwat anir;
ma tenany to nlor.’
32 Kam mfalak botuan feti Yesus ye Ratu nafmorip a nbali I,
fali koko kam a msalan ngrie ne.
33 Ratu nfair I ma namtoran seriny fianc,
ma nal Ni Smwangtany ma nyoding a ne.
Mpe Yesus nal Ratu Smwangtany ber kam,
iane ma lere ye mdyengar ma msyalan.
34 Daud to nfangat far surga,
nempa nfalak feti,
‘Ratu nfalak ber ningw Mangnrur Silai lo,
35 mumtoran seringw fian ye,
titerik ma kose ma Nim muswar monuk rsatngur ber Ko.’*
36 Mpe tomwat Israelar monuk a kmi,
ka mifai botuan feti Yesus ma msyangwalu I a ne,
Ratu nfil I lo ma neluk Mangnrure ma Ray Silai.”
37 Rdengar Petrus ni tnyangkwar a ne e,
sir rase desar.
Ne renrat Petrus ma mangsiduk walyetar a ne,
“Wangur,
ka kam mose safe?”
38 Ne Petrus a nfalak,
“Mtyate mir salar,
ma ka radiris a kmi ma myeluk Yesus ninr Ray Silai Ni manglartar,
nema Ratu nlure mir salar.
Ma keta Ratu nal Smwangtany a nbal ber a kmi.
39 Fali Ratu nyoding lo feti keta I nal Smwangtany ber tomwatar monuk ma ntar sir a ne.
Sir a ne e,
kmi ma angkimir ma tomwatar ma ramin nus dodo.”
40 Mpe Petrus nal snyurtar yadin ber sir feti ka rtate nir salar nema Ratu kete nukun sir,
ma kete rlarat tomwat yatkar a na are ye.
41 Tomwatar yadin ralele safe ma Petrus a nfalak,
mpa radiris sir.
Na lere ne tomwatar rtafal ma yadin sir fafa ribun tel.
42 Sir dalmir kateman ma rdengar safe ma mangsidkwar a ne raftutu.
Ma dedesar ma rafburat sir ma rane tnyam faburat ma rsampayang.
Tomwatar ma ralele Yesus nir wewelmpampane
2:43-47
43 Tomwatar monuk rampriang ma ramtaut fali mangsidkwar a ne rose kabain mpasalnar ma fanikar yadin.
44 Tomwatar monuk ma ralele Yesus ne dedesar ma dalmir lese,
ma nir safe kabain monuk raktem a rakolu.*
45 Sir rfenri nir kabanir ma rasaman dotyar a ne ber tomwatar rlarat nir perluar mpane.
46 Lerar monuk e rafburat sir a na Ratu Ni Das Silai ni latyompur;
ma rane tnyam faburat rof dasar sa rti dasar sa ror dalmir kateman ma senange.
47 Ma dedesar ma rdangin Ratu,
ma tomwatar monuk rmpeang sir.
Ma lerar monuk e,
tomwatar ma ralele Yesus ne ntafal ma yadin sir,
fali Ratu nfair tomwatar nof nir salar ma nose ma sir ma ralele Yesus ne rtafal ma yadin sir.