Yesus neluk dalamtene ber kit ma takmat Ratu
14:1-14
1 Mpe Yesus nfalak ber Ni manglartar,
“Kete dalmir suse.
Ka milele Ratu ma milele Yakw nbal.
2 Na Amangw Ni das e anir yadin.
Ma farlan to botuan e to kfwalak farane ber a kmi.
Mpa Yakw kbwalun iano ma kususan anir ber a kmi.
3 Ma farlan Yakw ktwi iano ma kususan ain ber a kmi lo,
keta kbwali Yakw ma kor a kmi far iano.
Yakw kose farane nema Yakw kumin mpene ne,
kmi mimin iane nbal.
4 Ma kmi mifai dalamtene ma keta ktwi a ne lo.”
5 Ne Tomas nfalak ber Yesus,
“Maken,
kam to mafai feti mtwi mpe,
mpa kam mafai dalamtene farpe?”
6 Ne Yesus nfalak,
“Yakw ye kweluk dalamtene ber tomwatar ma rakmat Amangw Ratu.
Yakw kuftutu anftutw botunar na Ratu,
nema tomwatar ronri momorip dedesar.
Mpa tomwatar to bise ma rakmat Amangw farlan sir to ror Yakw.
7 Farlan kmi mifai Yakw e botuan feti mifai Amangw a nbal.
Ma lere ye kmi mifai I,
ma msyalan I lo.”
8 Ne Filipus nfalak ber Yesus,
“Maken,
mfwatutu Amoi ne ber kam.
Lan iane ma kam mtak mof Ko.”
9 Nempa Yesus nfalak,
“Filipus,
Yakw kor a kmi doan ye lo,
ma to mufai Yakw fuky e!
Ise ma nsalan Yakw iane feti I nsalan Amangw lo.
Ma safema mfwalak ma kfwatutu Amangw ber a kmi!
10 Ko to mulele feti Yakw dalangw lese kor Amangw ma Amangw dalamy lese nor Yakw nbal e?
Safe ma kfwalak ber a kmi ye to nof Ningw andaun motak.
Nempa Amangw ma dalamy lese nor Yakw ne,
I ma nose safe-safe monuk a ne.
11 Ka milele feti Yakw dalangw lese kor Amangw,
ma Amangw dalamy lese nor Yakw nbal.
Mpa farlan kmi to milele Yakw na safe ma kfwalak a ne,
ka milele Yakw na safe-safe ma kose ber a kmi a ne lo.
12 Mdyengar fen ngamone safe ma kfwalak ye.
Ni botuan e tomwate ma nalele Yakw,
keta nose kabain mpasalnar farlan ma kose ne.
Ma keta i bise ma nose kabain mpasalnar nlengan nof safe ma Yakw kose ne nbal.
Ma Yakw kose ma ktwi kukmat Amangw.
13 Ma safe-safe motak ma mtyak myor Yakw Ngarangw,
keta kal ber a kmi.
Yakw kose farane nema tomwatar rdangin Amangw na safe ma Yakw kose ne.
14 Ma kmi dalmir lese myor Yakw lo,
mpa safe-safe motak ma kmi mtyak myof Yakw ne,
keta kose ber a kmi.”
Yesus nyoding feti keta I nal Ratu Smwangtany la ntulung tomwatar ma ralele I
14:15-31
15 Yesus nfalak ber Ni manglartar,
“Farlan kmi mkyamis Yakw keta myose mlyarat Ningw faretar.”
16 Ma keta ktwak Amangw ma nal Smwangtany la nlikur Yakw ma ntulung a kmi.
Ma keta I nor a kmi titerik ma dedesar.
17 Smwangat ma keta ntulung a kmi a ne iane Ratu Smwangtany.
Ma I keta nfatutu kmi ma mkyaul myal kabain botunar na Ratu.
Ma tomwatar na saryamprene ye to rlangun I a na dalmir,
fali to rsalan I ma to rafai I.
Nempa kmi e mifai I fali I nmorip nor a kmi,
ma keta namin dalmir.
18 Keta to kswalan lonri ma koko kmi a myorip farlan tomwat watkar.
Nempa keta kbwali Yakw ma kukmat a kmi.
19 Ma to dodo a nbal e tomwatar na saryamprene ye to rkeban Yakw lo.
Nempa kmi e mkyeban Yakw,
fali Yakw kmworip a kbwali mpa keta kmi myorip a nbal.
20 Na lere ma kmworip a kbwali keta kmi mifai feti Yakw kmworip dalangw lese kor Amangw,
ma kmi dalmir lese myor Yakw,
ma Yakw nbal e dalangw lese kor a kmi.
21 Tomwate ma nlangun Ningw faretar ma nose nlarat,
i a ne nkamis Yakw.
Ma tomwate ma nkamis Yakw keta Amangw nkamis i a nbal.
Ma Yakw nbal e keta kwamis i,
ma keta kufbwotin Yakw ber i.
22 Na iane tomwat sa ngarany Yudas nempa to Yudas Iskariot i.
Noak ma ndengar ma Yesus nfalak farane i nenrat,
“Maken,
safema mufbotin Ko ber lan kam,
ma to mufbotin Ko ber tomwatar na saryamprene ye?”
23 Ne Yesus nfalak,
“Tomwate ma nkamis Yakw keta nose nlarat Ningw ngribatnir.
Ma Amangw keta nkamis i.
Ma keta madu Amangw ma makmat i ma mor i dedesar.
24 Nempa ise ma to nkamis Yakw keta to nose nlarat Ningw ngribatnir.
Ma ngribatnir ma kfwalak ber a kmi a ne to nof Yakw nempa nof Amangw ma nsiduk Yakw ne.
25 Noak ma lolone kor a kmi e kfwalak kabanir monuk ye ber a kmi lo.
26 Noak ma ktwi kukmat Amangw keta I nsiduk Ni Smwangtany ma nlikur Yakw la ntulung a kmi.
I ye ma keta naftutu safe-safe monuk,
ma nose ma minremi safe-safe monuk ma kfwalak ber a kmi a ne.
27 Yakw ktwi a ktwate kmi nempa Yakw ye ma kose ma myorip e mingamon motak.
Ma lan Yakw ye ma kose ma myorip e mingamon farane.
Iane to far ma tomwatar na saryamprene ye rose ber a kmi.
Mpa ka kete dalmir suse ma mimtaut na safe ma keta diat a kmi.
28 Yakw kfwalak ber a kmi lo feti,
keta ktwi a ktwate kmi nempa la kbwali Yakw ma kukmat a kmi.
Ma farlan botuan feti kmi mkyamis Yakw,
keta dalmir a rsenang ma ktwi kukmat Amangw.
Fali Amangw Ni kuase nlengan nof Yakw.
29 Lere ye Yakw kfwalak kabanir monuk a ne ber a kmi lo,
nema farlan kabanir monuk a ne rbotin na lere ma nma ne,
keta milele Yakw.
30 Keta to kutanuk dodo ber a kmi lo fali smwangat yatkar nir ulun ma nma ye lo.
Ma i ni kuase ma nfarete saryamprene ye,
nempa to ni kuase ma nfarete Yakw.
31 Fali kabanir monuk a ne ka rbotin nema tomwatar na saryamprene ye ka rafai feti Yakw kwamis Amangw,
ma Yakw dedesar ma kose klwarat monuk Ni faretar.
Mpa mya ma ti!”