Yesus nbur Ni manglartar emnir
13:1-20
1 Noak a ne tomwat Yahudyar nir ler silai Paskaha sesedin lo.
Ma Yesus nafai feti ni tewat lo ma nti a ntate saryamprene ye ma nti nakmat a nbali Amany.
I dedesar ma nkamis Ni tomwatar ma ralele I a na saryamprene.
Ma keta nfatutu Ni ankamis ber sir terik ma nmat.
2 Ni nronram e Yesus nor Ni manglartar rtame.
Ma smwangat yatkar nir ulun nau andaun yatak na Yudas dalamy lo nwayat ma keta nfenri Yesus.
Yudas ye Simon Iskariot anaky.
3 Yesus nafai lo feti Amany nal kuase monuk ber I lo.
Ma I nafai nbal feti Ratu nsiduk I ma nma saryamprene ye,
ma keta nti nakmat a nbali Ratu.
4 Mpe noak ma lolone rtame e Yesus namdir ma nalin kalin Ni rabit melawas.
Betno nal maloli la nkete fetwalan.
5 Ne nbui weye na loyang,
betno nbur Ni manglartar emnir.
Ne nal maloli ma nkete na fetwalan a ne ma nei emnir.
6 Lama nait Simon Petrus e Petrus nfalak ber I,
“Maken,
safe desar ma mbwur emngur ye?”
7 Yesus nfalak ber i,
“Lere ye ko to mkwaul mwal safe ma yakw kose ye nempa keta famudi betno mkwaul mwal a ne.”
8 Ne Petrus nfalak ber I,
“Kete,
kete mbur emngur desar!”
Ne Yesus nfalak,
“Farlan to kbwur emar e iane feti to dalam lese mor Yakw.”
9 Ne Petrus nfalak ber I,
“Maken,
farlan farane e kete mbwur lan emngur,
nempa mbwur limngur ma ulungw a nbal.”
10 Nempa Yesus a nfalak ber i,
“Tomwate ma nadiris monuk,
iane feti tenany nanglerap lo,
mpa nbur lan emnir.
Botuan feti kmi monuk a nbal e minglerap lo nempa to monuk-monuk a kmi a fuky.”
11 Yesus nfalak farane fali nafai feti ise ma keta nfenri I.
Iane nwayat ma nfalak,
“To monuk-monuk nof sir a ne ma ranglerap.”
12 Lama nbur monuk Ni manglartar emnir e nfonak Ni rabit melawas ma nbali i ma namtoran.
Ne nfalak ber sir,
“Kmi mkyaul myal safe ma betno kose ye e?
13 Kmi biase ma mtyar Yakw feti Tuangguru nre Mangnrur Silai.
Safe ma mfyalak a ne iane diat,
fali botuan feti Yakw ye mir tuangguru ma mir Mangnrur Silai nbal.
14 Mpa farlan Yakw ye ma kweluk mir Tuangguru ma Mangnrur Silai ma kbwur emir,
kmi a nbal e ka mbyur mpane emir.
15 Yakw kose farane la kfwatutu ber a kmi,
mpa ka myose mlyarat a nbal safe ma Yakw kose ber a kmi a ne.
16 Mdyengar fen ngamone safe ma kfwalak ye.
Ni botuan e mangkaryae to ubany nlengan nof ni bos.
Iane feleles farlan tomwate ma rsiduk i a nbal,
i to ubany nlengan nof tomwate ma nsiduk i a ne.
17 Kmi mifai safe-safe monuk ma kfwalak ye.
Mpa ngamone ber tomwatar ma rose rlarat safe ma kfwalak ye.
18 Safe ma kfwalak ye to ber kmi monuk.
Yakw kufai tomwatar monuk ma kfwil sir a ne dalmir.
Nempa Yakw kfwil tomwate ne nbal nema Ratu nafdiat safe ma rarengi na Kitap Lelerap dalam feti:
‘Tomwate ma namtoran ma ntame nor Yakw,
keta nbangal Yakw.’*
19 Yakw kfwalak ber a kmi na ngrie ma keta nbotin,
nema farlan ngrie ne nbotin e kmi milele feti Yakw ye ma Ratu nsiduk I a ne.
20 Mdyengar fen ngamone safe ma kfwalak ye.
Ni botuan e ise ma nlangun tomwate ma kswiduk i,
iane i nlangun Yakw.
Ma ise ma nlangun Yakw,
iane nlangun I ma nsiduk Yakw.”
Yesus nafbotin na tomwate ma keta nfenri I
13:21-30
21 Lama Yesus nfalak farane,
dalamy suse desar.
Ne I nfalak,
“Mdyengar safe ma kfwalak ye.
Ni botuan e tomwatar sa nof a kmi ye keta nfenri Yakw ber tomwatar ma rbangal Yakw.”
22 Mpe Ni manglartar a ne rafone sir ma rampriang.
Fali to rafai feti I nfalak ise.
23 Nof Yesus Ni manglartar monuk a ne,
tomwat sa ma I nkamis resi i.b
Tomwate ne namtoran Yesus seriny fian.
24 Mpene Simon Petrus nampuat limany ber tomwate ma Yesus nkamis resi i a ne,
ma nfalak,
“Mwenrat Yesus feti I nfalak ise.”
25 Mpe tomwate ne ntafal ma nlosir Yesus ma nasarmpumpu ber I ma nfalak,
“Maken,
ali tomwate ne ise?”
26 Ne I nfalak,
“Yakw keta kswob roti ye na mangkok.
Ma tomwate ma kal roti ne ber i e i a ne lo.”
Lama nfalak monuk farane,
I nal roti ma nsob a na mangkok betno nal ber Yudas,
Simon Iskariot anaky a ne.
27 Lama Yudas nal roti ne,
smwangat yatak nir ulun nsung i.
Ne Yesus nfalak,
“Safe ma keta mose ne,
mose desar lo.”
28 Nempa sir monuk ma rtame ror I a ne to fen lese ma nkaul nal feti safema Yesus nfalak ber Yudas farane.
29 Tomwatar ketnir nof sir a ne rafliak feti Yesus nluan Yudas ma nselir kabanir ma rperlu a na ler silai ne,c
nre ntak i ma nsaman dotyar ber tomwatar ma rawatan.
Sir rdaun farane fali Yudas ye ma neluk nir mangomat doit.
30 Lama Yudas nal roti ne,
i nti burit desar.
Noak a ne nronram lo.
Yesus nal Ni faret beberi ber Ni manglartar
13:31-35
31 Noak ma Yudas nti burit e Yesus nfalak,
“Lere ye ni tewat lo ma tomwatar rdangin Yakw,
Tomwate Anaky.
Ma safe ma keta yakw kose ne nose ma tomwatar rdangin Ratu nbal.
32 Yakw kose farane nwayat ma tomwatar rdangin Ratu,
mpa keta Ratu nose nbal ma tomwatar rdangin Yakw Tomwate Anaky.
Ma keta I nose desar ngriar a ne.”
33 Yesus nfalak a nbal,
“Angkur ma kwamis a kmi,
keta Yakw kor a kmi e to dodo.
Ma keta minriak Yakw,
nempa to bise ma mtyi ain ma keta ktwi a ne.
Iane farlan ma kfwalak ber mangfaret Yahudyar a ne lo,
ma lere ye kfwalak ber a kmi a nbal.
34 Ma ye faret beberi ma kal ber a kmi:
ka sa nkamis sa!
Farlan Yakw kwamis a kmi,
mpa kmi a nbal e ka mikamis a kmi.
35 Farlan mikamis a kmi,
keta tomwatar monuk rafai feti Ningw manglartar ber a kmi.”
Yesus nafbotin feti Simon Petrus namsoal I
13:36-38
36 Mpe Simon Petrus nenrat Yesus,
“Maken,
ali Ko mose ma mtwi mpe?”
Ne Yesus nfalak,
“Yakw kose ma ktwi ain ma ko to bise ma mtwi a ne.
Nempa famudi e keta mlwarat ma mtwi ain a ne nbal.”
37 Ne Simon Petrus nfalak,
“Maken,
safema lere ye to bise ma klwarat Ko?
Safo kmpweang ma kmwat ber Ko.”
38 Ne Yesus nfalak,
“Simon Petrus,
botuan feti ko mpweang ma mwat ber Yakw e?
Mdwengar fen ngamone safe ma kfwalak ye.
Ni botuan e keta sife to nkikyeu fuky e ko mumsoal yakw lain tel e lo.”